1 Chronicles 23
Awo kì a woyn Levì nɨn læ nà kelɨ sɨ nà ni-à
1A n-læ nà ghɨ ta Devìt lèma ɨ̀ dvɨ̀yn, wu lèm wâyn ŋweyn Solomùyn sɨ a fòyn a Isìlæ̀. 2Wu n-læ meyn yvɨ̀ŋtɨ kɨmɨ chyeʼsɨ Isìlæ̀ bàʼsɨ̂ nɨ̀ ngàŋsɨ ndô Fɨyini, nɨ̀ woyn Levì nô sɨ̀jɨ̀m; 3ɨ bè na ghɨ taŋ woyn Levì ghî a ghɨ nà ghɨ ma ghɨ lema meyn chem bèŋ mɨ̀vɨm ɨ̀ntal sɨ koʼ sɨ ndù asɨ, ghɨ taŋ àŋena nà chɨ̂yntɨ̀ ghɨ nkam mɨ̀vɨm ɨ̀ntal, njvàsɨ̀ nfama. 4Devìt ɨ bè na, “Antêynɨ̀ nɨ̀ àŋena têyn, ghelɨ nkam mɨ̀vɨm mbò, njvàsɨ̀ bò na tisɨ̂ ìfêl i abàʼlɨ̀ a ndô Fɨyini, ghelɨ nkamsɨ ntufa tisɨ̂ ghelɨ fî saʼ saʼsɨ. 5Ghelɨ nkam sɨ̀ kæ̀ ɨ ti achfɨ̀ a mbàynsɨ̀ sɨ a nchìsɨ̀, ghelɨ ghɨli nkam sɨ̀ kæ̀ ɨ buʼ ɨ̀fwo, koʼsɨ̂ Fɨyini nɨ̀ ɨfwo vzɨ̀ a mɨ n-læ fu tî 6Devìt nɨn læ gwòtɨ woyn Levì inôyn ìtal, kɨ̀ ighel ta asas a ndo nɨ̀ àŋena nɨn læ nà ghɨ. Woyn ateyn nɨn læ nà ghɨ Geshòn nɨ̀ Kohàt ŋêyn Melalì. 7Woyn Geshòn nɨn læ nà ghɨ Ladàn ŋêyn Shimèy, 8woyn Labàn ɨ ghɨ ghɨ̀tal; ɨ wu àsɨ ɨ ghɨ Jehiyèl, ghɨli ghɨ Zetàm ŋêyn Jowèl. 9Woyn Shimeyìl nɨn læ nà ghɨ kɨmɨ ghɨ̀tal; ɨ Shelomòt nɨ̀ Haziyèl nɨ̀ Halàn. Àŋena nà n-ghɨ sɨ a ghelɨ ghɨtisɨnɨ a ndo nɨ̀ Ladàn. 10Woyn Shimeyì nɨn læ nà ghɨ Jahàt nɨ̀ Zizà nɨ̀ Jeyùsh nɨ̀ Beliyà. Àŋena nà n-chɨyntɨ̀ ghɨ ghɨ̀kæ̀. 11Jahàt nɨn læ nà ghɨ wayn ɨwû àsɨ, Zizà ɨ ghɨ ànkùmtɨ̀, Jewùsh ɨ ghɨ ŋêyn Belayà nà n-kelɨ kɨ woyn sɨ ilæ, ghɨ chɨ̂yntɨ̀ taŋ àŋena kɨ sɨ a isas i ndo ìmòʼ, ɨ lèm na àŋena na fèlɨ̀ kɨ ɨwo ìmòʼ. 12Kohàt nɨn læ nà chɨ̂yntɨ̀ kelɨ woyn ghɨ̀kæ̀, a ghɨ Amlàm nɨ̀ Izà nɨ̀ Heblòn nɨ̀ Uziyèl. 13Woyn Amlàm nà n-ghɨ Alòyn ŋêyn Mosìs. Ghɨ n-lem meyn Alòyn nɨ̀ ìlayni ŋèyn woyn nà ŋweyn na àŋena na tòʼnɨ̀ nɨ̀ nɨ̀ ɨ̀fwo vzɨ̀ a ghɨ nà n-koʼsɨ Bôbo Fɨyini nɨ̀ ɨ̀ŋweyn kɨ̀ samoʼ, na àŋena na nyòʼ ìleŋ sɨ̂ Bôbo Fɨyini, felɨ̀ sɨ̂ ŋweyn fî boysɨ̂ ghelɨ sɨ a ŋweyn izɨyn kɨ̀ samoʼ. 14Ghɨ n-læ meyn taŋ woy Mosìs vzɨ̀ a wu nà n-ghɨ nfèʼtɨ̀ Bôbo sɨ̂ ghelɨ ndo nɨ̀ Levì. 15Woyn Mosìs nɨn n-læ nà ghɨ Geshòm ŋêyn Èlizà. 16Shebayèl nà n-ghɨ àtu isas i ndo nɨ̀ Geshòm. 17Èlizà nà n-kelɨ wayn ɨ̀mòʼ wu ghɨ àtu isas i ndo nɨ̀ ŋweyn. Wayn àteyn nà n-ghɨ Lèhabiyà, kelɨ woyn nô sɨ idvɨ̀. 18Shelomìt nà n-ghɨ wâyn Izà, ghɨ àtu isas i ndo nâ kì antêynɨ̀ nɨ̀ woyn nà ŋweyn. 19Heblòn nà n-kelɨ woyn ghɨ̀kæ̀, ɨwu àsɨ ghɨ Jeliyà. Àmaliyà ɨ ghɨ ànkùmtɨ̀, ghɨli ghɨ Jàhaziyèl ŋêyn Jèkamìm. 20Uziyèl nà n-kelɨ wowyn ghɨ̀bò, ɨwu àsɨ ɨ ghɨ Mikà, àngòʼsɨ̀ a ghɨ Ishìyà. 21Woyn Mèlalì nà n-ghɨ Malì ŋêyn Mushi, woyn Malì ɨ ghɨ Èlizà ŋêyn Kîsh. 22Èlizà nn læ kfɨ, kelɨ kɨ woyn ghɨkì bula wù bzɨ̀ wayn ɨlûmnɨ̀. Woyn ghɨkì ateyn ɨ mala woyn ghɨbo àŋena, ma àti woyn Kîsh. 23Mushì nɨn læ nà chɨ̂yntɨ̀ kelɨ woyn ghɨ̀tal, a ghɨ Mali' nɨ̀ Edà nɨ̀ Jelimòt. 24Ghelɨ nâ gheyn nà n-ghɨ ghelɨ ndo nɨ̀ Levì, ma nô mɨ ndà fvɨ̀ kɨ̀ a ɨtweŋ ndo nɨ̀ ŋweyn, nɨ̀ ìsas i ndo nɨ̀ woyn ŋweyn. Nômɨ ndà a àŋena atêynɨ̀ nà n-ghɨ ma wù nyaʼ meyn ìzɨyn a àŋena isas i ndo, ghɨ taŋ ŋweyn, fî ghɨ àtu isas i ndo. Nômɨ wulɨ̀ ndo nɨ̀ Levì ɨkfà ta wù lèma chem bèŋ mɨ̀vɨm ɨmbò, sɨ koʼ asɨ nà n-fêl a ndo Fɨyini. 25Devìt nà n-ghɨ ma wù be meyn na, “Bôbo Fɨyini, ɨ Fɨyini fɨ Isìlæ fu meyn mbôynɨ̀ sɨ̂ ghelɨ ŋweyn ɨ̀ gvì sɨ nà chî a àŋena antêynɨ̀ a Jèlusalèm kɨ̀ samoʼ. 26Ghelɨ ndo nɨ̀ Levì nɨn keli wi sɨ nà fî beʼì jelɨ̀ nɨ̀ fɨ̀ndo fɨ Fɨyini fɨ̀ baʼsɨ̂ nɨ̀ ɨ̀fwo vzɨ̀ a ghɨ n-felɨ̀ nɨ̀ ɨ̀ŋweyn ateyn.” 27Ghɨ nà n-lî ghelɨ ndo nɨ̀ Levì nô ghɨ̀jɨ̀m afyàʼ a ndô Fɨyini ɨlvɨ ta àŋena chem bèŋ mɨvɨm ɨ̀mbò sɨ koʼ sɨ ndù asɨ, kɨ̀ ighel ta Devìt nɨn læ bè a itaŋi igoʼsɨni nɨ̀ ŋweyn. 28Ghelɨ ndo nɨ̀ Levì nâ ghèyn nɨn læ nà kelɨ sɨ nà gamtɨ woyn Alòyn, ma àti ngàŋsɨ ndô Fɨyini sisɨ̀ a sɨ nà n-felɨ̀ a ndô Fɨyini toʼnɨ̀ nɨ̀ àbe a ndô Fɨyini à, nɨ̀ lûm sisɨ̀ a sɨ n-ghɨ a ndô Fɨyini fî lêm ɨ̀fwo vzɨ̀ nɨ̀ ìlayni, a ghɨ n-kosɨ Fɨyini nɨ̀ ɨ̀ŋweyn, baʼsɨ̂ kɨmɨ nɨ̀ àwo ali-a. 29Àŋena nà n-kelɨ kɨmɨ sɨ nà faytɨ abaŋ kì a ghɨ n-lem abayn asɨ nɨ Fɨyini fɨ ateyn nɨ̀ ɨ̀kfaŋ vzɨ̀ a ghɨ n-sesɨ fu ifu-i ɨfwo ɨyɨnɨ, ghɨ fu baʼsɨ ateyn, nɨ̀ àbaynkì a ghɨ n-lam tɨghef tɨ ateyn tɨ ɨ lælɨ̂ kɨ tèyn bula fɨ̀shìk, faytɨ ɨ̀fwo nyôʼ àbayn a nyoʼna ateyn fî fêʼ ɨ̀kwo taŋtɨ̂ lemà. 30Àŋena nà kelɨ sɨ nà ndû asɨ nɨ̀ Bôbo Fɨyini nɨ̀ bɨsì-bɨsì, ndû aleŋ ɨlvɨ ikfa, fu àyòŋnɨ̀ sɨ̂ ŋweyn fî kòʼsɨ̂ ŋweyn, 31nîkɨmɨ tì nô mɨlvɨ ɨgha ta ghɨ nà n-fu tɨfu tɨnoʼnɨ tɨ sɨ̂ Fɨyini fɨ a mɨchi mɨ̀ ɨ̀tuʼ ilaʼ nɨ̀ mɨ̀chi mɨ̀ àyɨ mzì a ghɨ nà n-yɨ, nômɨ ɨchfɨ njoŋ ìkà, baʼsɨ̂ nɨ̀ mɨchi mɨ̀ àyɨ ɨnlì mzɨ̂ a ghɨ nà n-ghɨ ma ghɨ lem meyn. Àŋena nà n-kelɨ sɨ nà lum fêlɨ̀ kɨ felɨ sɨ̂ Bôbo Fɨyini akòyn ajuŋà, a dzɨ ghè a ghɨ lèm na ghɨ na fèl ateyn. 32A dzɨ nâ ghàyn, ghelɨ ndo nɨ Levì ɨ ni ìfêl i àŋena a fɨndo nɨ̀ Fɨyini fɨ ɨ nì a ndô Fɨyini ɨ fi gàmtɨ̀ woyn nà àŋena, ma àti ghelɨ ndo nɨ̀ Alòyn nɨ̀ ìfêl zɨ̀ a àŋena nɨn nî a ndo nɨ̀ Bôbo Fɨyini.