1 Chronicles 29

Ghɨ fu ɨfwo ta ka ghɨ baʼlɨ ndô Fɨyini ateyn

¹Fòyn Devìt nɨn be meyn sɨ̂ ghelɨ nô ghɨ̀jɨ̀m na, “Wâyn wom Solomùn, ɨ wul vzɨ̀ a Bôbo Fɨyini choʼ na wù li alêʼ àkema sɨ a fòyn, nɨn bu ghɨ kɨi wayndà, kya wi iwo ili kûm àbâʼlɨ̀. Ifêl ateyn i nɨn boynɨ̂ wì bòm ta ghɨ n-bâʼlɨ̀ wì ndo nâ yèyn a ntoʼ afêyn sɨ̂ wùl, mɨtì bâʼlɨ̀ sɨ̂Bôbo Fɨyini. ²Ma fu meyn ɨ̀fwo vzɨ̀ a mɨ n-kelɨ nô ɨ̀jɨ̀m na ghɨ baʼlɨ ndô Fɨyini ateyn, ma àti aso ɨkwo abaŋnɨ-a nɨ̀ a fɨfâ, nɨ̀ ìdyani nɨ̀ àkasa nɨ̀ ɨ̀nkàʼ nɨ̀ ngòʼsɨ onìksɨ̀ nɨ̀ ɨsɨ mabɨ̀lsɨ̀ nɨ ɨsɨ njeyntɨnɨsɨ sɨlisɨ nɨ̀ mɨ̀nchyaʼ ɨnseytɨnɨ̂ baʼsɨ̂ nô mɨ nɨ̀ ìnki i ngòʼsɨ̀ ijuŋì ìkà. Ma fu meyn ɨ̀fwo nâ wèyn nô sɨ idvɨ̀ na ghɨ ni ifêl ateyn. ³Bo'm i'kôŋ zɨ̀ a mɨ n-kelɨ sɨ̂ ndo nâ yèyn, mɨ n-fu kfeynsɨ̂ àso ɨkwo a baŋnɨ-a nɨ afɨfâ a ighaʼ afî mɨ n-kelɨ. ⁴Antêynɨ̀ ɨ̀fwo abàʼlɨ̀ nô ɨ̀jɨ̀m, ma fu meyn bòsɨ̀ aso ɨkwo abaŋnɨ-a kì a kɨ fvɨ̀ a Ofì, nkam sɨ̀tal nɨ̀ bòsɨ̀ aso ɨkwo a fɨfâ ajuŋà nkamsɨ nsòmbo na ghɨ tsɨn ɨwuyn ndo nɨ̀ ànkeyna, ⁵ɨ̀ nì ìfêl zɨ̀ a ghɨ n-kelɨ sɨ nì nɨ̀ ɨ̀fwo ateyn ateyn, ɨ̀ fì nì nô mɨ ifêl ìkà zɨ̂ a ghelɨ ghɨfelɨnɨ nɨn kelɨ sɨ nì. A n-kôŋ ndà sɨ fu ɨfwo na ghɨ ni ifêl i Bôbo Fɨyini ateyn a?” ⁶Wu n-taŋi tî, ɨtu asas a ndo nɨ̀ ɨ̀tu ɨ sugèyʼsɨ̀ vzɨ̀ a ghɨ n-choʼtɨ a asas a ndo nɨ ɨvzɨ̂ a wu n-tisɨ inôyn i sugèyʼsɨ̀ nkam nɨ ɨvzɨ̂ a wu n-tisɨ inôyn i sugèyʼsɨ̀ ighɨ baʼsɨ̂ nɨ̀ ghelɨ ghì a ghɨ n-tôʼnɨ̀ nɨ̀ ɨ̀fwo fòyn ɨ choʼnɨ sɨ fu ɨfwo sɨ̂ Fɨyini fɨ. ⁷Àŋena nɨn fu meyn bòsɨ̀ aso ɨkwo abaŋna nkam sɨ̀ tâyn nɨ̀ bòsɨ aso ɨkwo a fɨfâ nkamsɨ ìvɨm nɨ̀ bòsɨ idyàyn nkamsɨ njvàsɨ̀ nfama nɨ̀ bòsɨ akas nka, ɨvɨ, na ghɨ baʼlɨ ndô Fɨyini ateyn. ⁸Ghelɨ ghìa ghɨ nà n-kelɨ ngòʼsɨ njeyntɨnɨsɨ ɨ fu lèm a ndo afî a ghɨ n-lêm ɨfwo ɨ ndô Fɨyini ateyn, a kinî Jèhiyèl ɨ wulɨ̀ ndo nɨ̀ Geshòn ɨfwo ateyn. ⁹Ghelɨ nà n-saŋlɨ-à bòm ìwo zɨ̀ a ghelɨ ghì a ghɨ n-tisɨ àŋena nì bòm ta àŋena nɨn læ fu ɨfwo sɨ̂ Bôbo Fɨyini nɨ̀ mɨ̀tem mɨ̀ àŋena ɨ̀njɨ̀m, nô fòyn Devìt ɨ nà saŋlɨ̂ nô sɨ a ŋaŋ.

Devìt ɨ jèm asɨ nɨ̀ ghelɨ nô ghɨ̀jɨ̀m

¹⁰Devìt nɨn koʼsɨ meyn Bôbo Fɨyini asɨ nɨ̀ ghelɨ nô ghɨ̀jɨ̀m ɨ bè na, “Ô Bôbo Fɨyini, fɨ bò wes Isìlæ̀, ghɨ na koʼsɨ̂ và kɨ̀ sɨ a mɨlvɨ ɨ̀njɨ̀m. ¹¹Wà n-kelɨ àdyaʼ, ngaŋtɨ-à, fî ŋwaʼà. À n-kelɨ và ɨfwo ɨ̀jɨ̀m iyvɨ nɨ̀ nse. Wà n-saʼ ghelɨ ghɨ̀jɨ̀m, ngaŋtɨ̂ chwô nô mɨ ndà. ¹²À n-fu và ighaʼ ìjɨ̀m nɨ̀ ɨ̀kfɨm ɨ̀jɨ̀m sɨ̂ ghelɨ bòm ta wà n-kelɨ àdyaʼ nô mɨ atu nɨ̀ ghà, ma wà kàʼ a wà fu adyaʼ nô mɨ sɨ̂ ndà, nì a wù na saŋli-à. ¹³Ghès nɨn fu àyòŋnɨ̀ sɨ̂ và a Fɨyini fɨ , koʼsɨ̂ ìzɨyn ìzyæ zɨ̀-ì a yi n-ŋwâʼ. ¹⁴Mɨtì a Bôbo, mà nɨ̀ ghelɨ̀ ghem ti ghɨ nô ghɨ̀ ndà sɨ fu ɨfwo sɨ̂ và nô sɨ idvɨ̀ tèyn a? Nô ɨ̀fwo ɨ̀jɨ̀m ta ghès nɨn kelɨ, à fu vâ, ghèsɨ kàsi fu kɨ ɨfwo vzɨ̀ sɨ̂ và a wà fù sɨ̂ ghès. ¹⁵Ghès nɨn ghɨ ghelɨ ɨtum, chwô dzɨ kɨ̀ ta ghɨ̀bo ghesɨ nà n-ghɨ nô ghɨ̀jɨm. Mɨ̀chi mês a nse afêyn ɨ ghɨ tèyn ta alɨŋsɨ, ghɨ sɨ mùtɨ kɨ têyn sɨ sami. ¹⁶Bôbo Fɨyini feyfɨ, à fu vâ ɨfwo wèyn a ghèsɨ̀ fu sɨ̂ a idvɨ̀ tèyn nô ɨ̀jɨ̀m na ghɨ baʼlɨ ndo ɨ̀zyâ nɨ̀ ɨ̀ŋweyn, a kelɨ và ɨfwo ateyn nô ɨ̀jɨ̀m. ¹⁷Mɨ n-kya a Fɨyini femfɨ na wà n-môm nô mɨ àtem a nda, saŋlɨ̂ àtem kì a kɨ n-ti àtì-ati. Mà fu ɨfwo wèyn nô ɨ̀jɨ̀m tèyn sɨ̂ và nɨ̀ ìkoŋì nɨ̀ ìkfâʼtɨ̀ ijuŋì. Mɨ n-saŋlɨ-à bòm ta ma yeyn meyn ìkôŋ zɨ̀ a ghelɨ̀ ghya ghì a ghɨ fu meyn ɨ̀fwo sɨ̂ và, nɨn kelɨ. ¹⁸Bôbo Fɨyini fɨ ghɨbo ghesɨ Abɨ̀làhâm nɨ̀ Yisàk nɨ̀ Isìlæ̀ nɨ̀ ikfâʼtɨ̀ nâ yèynì faŋ kɨ̀ sɨ amoʼ a mɨtem nɨ̀ ghelɨ̀ ghya, ɨ̀ nì àŋena na gvɨmlɨ̂ và a àŋena mɨtèm. ¹⁹Ni wayn wom Solomùn na lêm tɨ̀saʼ tyatɨ nɨ̀ àtem a ŋweyn a kɨ àjɨ̀m, ɨ fi nì wù momsɨ nô mɨ a dzɨ ìkà sɨ baʼlɨ ndô zyâ zɨ̀ a mà fu meyn ɨ̀fwo na ghɨ baʼlɨ ateyn. ²⁰Devìt jèm tì li bè nô sɨ ghelɨ ghɨ̀jɨ̀m na, “Yì koʼsɨ Bôbo Fɨyini fifɨ,,” Àŋena ghɨ̀jɨ̀m ɨ koʼsɨ Fɨyini fɨ ghɨbo àŋena. Àŋena nɨn nyɨŋi meyn àkfɨ̀-akfɨ, ɨ gvɨmlɨ Bôbo Fɨyini nɨ̀ Fòyn Devìt.

Ghɨ yisi Solomùn sɨ a Fòyn

²¹A nà n-ghɨ a ànkùmtɨ̀ achi, àŋena sɨ nyamsɨ ɨ fu sɨ a ifu inyoʼnɨ-i sɨ̂ Bôbo Fɨyini, a ghɨ nyamsɨ mbòloʼ sɨ lûmnɨ̀sɨ̀ nkam, nɨ̀ ɨ̀ywaʼ nkam nɨ̀ njɨ̀sɨ̀ kɨ̀mɨ nkam nɨ̀ mɨ̀lùʼ, baʼsɨ̂ nɨ̀ tɨ̀fu tɨ litɨ nô sɨ̀ idvɨ̀ sɨ alèʼ nɨ̀ ghelɨ Isìlæ̀ nô ghɨ̀jɨ̀m. ²²Àŋena nɨ̀n yɨ meyn ɨ fi nyvɨ nɨ̀ ìsaŋlɨ ighàʼnɨ-i asɨ nɨ̀ Fɨyini fɨ̀ achi nâ ghè. Àŋena nɨn yɨ tî a yeyn keli Solomùn ɨ wâyn Devìt sɨ a fòyn, sɨ̂ ankùmtɨ̀ a ɨlvɨ. Ghɨ n-fi meyn yisi ŋweyn sɨ a fòyn asɨ nɨ̀ Fɨyini fɨ, ɨ yisi Zadòk sɨ a ngàŋ ndô Fɨyini. ²³Solomùn ɨ dùʼì achɨ a tɨ̂fòyn afî a Bôbo Fɨyini nɨn læ fu sɨ̂ bò ŋweyn ɨ lì àlêʼ a bò ŋweyn, ɨ lì àlêʼ a bò ŋweyn. Wu n-saʼ meyn ajûŋ ghelɨ,Isìlæ̀ nô ghɨ̀jɨm ɨ nà ngvɨmlɨ̂ ŋweyn. ²⁴Ɨtu ɨ sugèyʼsɨ̀ nô ɨ̀jɨ̀m nɨ̀ ghelɨ ighòŋ, baʼsɨ̂ nô nɨ̀ woyn fòyn Devìt ɨ chfɨ̀nɨ̀ sɨ nà gvɨmlɨ fòyn Solomùn. ²⁵Bôbo Fɨyini ɨ ni nô ghelɨ Isìlæ̀ ghɨ̀jɨ̀m ɨ nà fâyn Solomùn ɨ fi fu ɨkfɨm sɨ̂ ŋweyn bula tɨfôyn titɨ̀ a tɨ n-læ saʼ aŋweyn asɨ tìmi kèli. ^26-27Devìt, wâyn Jesì nɨn sàg meyn Isìlæ̀ sɨ a bèŋ mɨ̀vɨm ɨ̀nkæ̀. Wu n-saʼ sɨ a bèŋsɨ̀ nsòmbo a Heblòn ɨ saʼ sɨ a bèŋsɨ̀ mɨ̀vɨm ɨ̀ntal njvàsɨ̀ tal a Jèlusalèm. ²⁸Wu n-læ kfɨ kɨ nô tèyn ma wù lema meyn ɨ̀ dvɨ̀yn, kelɨ ìghaʼ, ghɨ gvɨmlɨ̂ ŋweyn, ma wù chi meyn sɨ ɨlvɨ ɨdyâ, Solomùn ɨ wâyn ŋweyn, ɨ yɨ achi aŋweyn. ²⁹Awo kì a kɨ n-gàyn a ɨtuʼ ta Devìt nà n-saʼ a nzɨ̀tɨ sɨ chem a ngòʼsɨ, nà n-ghɨ ma nfèʼtɨ̀ sɨ Fɨyini sɨ nyaʼ meyn lèm a ŋwàʼlɨ̀ sɨ̀ nɨ̀ àŋena, ma àti Samwèl nɨ̀ Natàn nɨ̀ Gâd. ³⁰Ŋwàʼlɨ̀ nâ sèynsɨ nà n-dyêyn dzɨ zɨ̀ a wù n-læ saʼ ateyn nɨ̀ àdyaʼ kì a wu nà n-kelɨ nɨ̀ àwo kì a kɨ n-gàyn sɨ̂ ŋweyn ŋêyn ghelɨ Isìlæ̀, baʼsɨ̂ nɨ̀ tɨ̀laʼ tɨ litɨ.