1 Samuel 1

Ghɨ bzɨ Samwèl

¹Wùl ɨ̀ lvì nɨn læ meyn nà ghɨ izɨyn i ŋweyni ghɨ Elkanà. Wu nà n-chî a ntèʼ Lamà ilaʼ ili atu kfɨ̀yn ghɨ toŋtɨ̂ na Efɨ̀lèm. Wu nà n-ghɨ wâyn Jèlohàm, Jèlohàm ɨ ghɨ wâyn Elihù, Elihù ɨ ghɨ wâyn Tohù, Tohù ɨ ghɨ wâyn Zuf ilaʼ nâ ghè. ²Elkanà nà n-kelɨ ghɨ̀ki ghɨ̀bò, a ghɨ Hàna ŋêyn Bèninà. Bèninà nà n-kelɨ woyn mɨtì Hàna kelɨ wi.

³A nà n-ghɨ mɨ a bêŋ ì kà Elkanà ɨ koʼ a Shilò sɨ koʼsɨ Bôbo Fɨyini sɨ fì sɨ fu ifu sɨ̂ ŋweyn. A nà n-ghɨ ɨtuʼ nâ ghè, ngàŋsɨ ndô Fɨyini sɨ ghɨ woyn Eli, ghɨ toŋtɨ̂ àŋena na Ofɨ̀nì ŋêyn Fineghàs. ⁴Elkanà nà n-fu ìfu sɨ̂ Bôbo nô mɨ ɨlvɨ gha, wu fu ɨlwêʼ ɨ nyâm ɨlvi sɨ̂ wî ŋweyn Bèninà ŋêyn woyn ŋweyn woyn ghɨ lûmnɨ̀ nɨ ghɨki nô ghɨ̀ jɨ̀m. ⁵Wu nà n-kôŋ wî ŋweyn Hàna nô a jûŋ nô mɨ ta Bôbo nà n-ghɨ bula wù fu woyn sɨ̂ ŋweyn ɨ̀ nì wu fu kɨ nô àlêʼ a nyam a ghaʼnɨ-a sɨ̂ ŋweyn. ⁶Fɨfɨ̀ ŋweyn Bèninà nà n-faŋ wi tɨ̀ nà luʼsɨ Hàna, nî na ɨtoŋ ŋweyn na yafa ta Bôbo nà n-ghɨ bula wù fu wayn sɨ̂ ŋweyn tì. ⁷Wu nà n-nî kɨ tèyn bèŋ sɨ̀ jɨ̀m ɨlvɨ ta àŋena kòʼ a Shilò, a ndo nɨ̀ Bôbo. Wu nà n-lûʼsɨ̀ ŋweyn nô mɨ ɨlvɨ gha, Hàna dzɨ̀ tèyn ɨ leʼ iyɨ. ⁸Wù se sɨ leʼ tî lûm ŋweyn Elkanà ɨ nà bɨf sɨ̂ ŋweyn nâ, “Wà n-dzɨ̂ ghà? Bòm ghà ta wà n-bɨ̂ kayn mbzɨ tèyn a? A mà ti n-chwô wì woyn ìvɨm sɨ̂ và a?”

⁹A læ nà ghɨ achi a li-a a ndô Fɨyini a Shilò, àŋena yɨ mèsì ɨ fi nyvɨ. Hàna làlì ɨ timi iyvɨ sɨ jèm. À nà n-ghɨ tì Eli ɨ ngàŋ ndô Fɨyini duʼ kɨ achɨ afî a wù nà n-lum duʼ ateyn ɨchfɨ ndô Fɨyini. ¹⁰Hàna nà sɨ jêm sɨ̂ Bôbo, fêʼtɨ̀ ngeʼsɨ ŋweyn fî dzɨ̂ nô nɨ̀ àkfɨynà. ¹¹Wu jèm tèyn ɨ kæ chfɨnɨ sɨ̂ Bôbo, ɨ bò ɨ̀dwaʼ ɨ̀ jɨ̀m na, “Bôbo, bò ɨdwaʼ ɨ̀ jɨ̀m, wà kæ sɨ ki kɨ nô ngêʼ semsɨ ɨ̀ kòynsɨ ìsuyn sɨ̂ mà ɨ̀ fù wayn ɨ lûmnɨ̀ sɨ̂ mà, a mà kasî fù wayn àteyn sɨ̂ và a Bôbo sɨ a wul ìfèl nɨ̀ và kɨ̀ sɨ a mɨlvɨ ɨ̀n jɨ̀m, a ghɨ læ faŋ tɨ̀ kom atu a ŋweyn.”

¹²Hàna nà n-jêm tì Eli nyaʼtɨ̂ ki kɨ ɨ̀chfɨ ɨ ŋweyn. ¹³À nà n-ghɨ tì Hàna jêm kɨ àtsɨ̀-atsɨ, a nûlɨ̀ kɨ gvɨsɨ ɨchfɨ̀ nɨ̀ ŋweyn. Eli yeyn tî ɨ nà sɨ kfâʼ na à kù mɨlûʼ ku Hàna, ¹⁴ɨ kæ bɨf sɨ̂ ŋweyn na, “Mɨ̀lùʼ ti n-bɨ̂ fu ti ngeʼ sɨ̂ và tèyn a? Visi mɨlûʼ myâ mèyn!”

¹⁵Hàna bèynsɨ̀ ɨ bè sɨ̂ Eli na, “Yi n-ghɨ wi tî a bòbè, mà lum nyɨ wi mɨlûʼ ɨn to. Mɨ n-ghɨ wul ɨ̀ wi, kelɨ ngeʼsɨ sɨ dvɨ̂ kɨ tèyn. Mɨ n-fêʼtɨ̀ kɨ ngêʼ semsɨ sɨ̂ Fɨyini fɨ, ɨ bò ɨ̀dwaʼ ɨ̀ jɨ̀m. ¹⁶Ka wa n-lì wul ɨ̀ fèlɨnɨ nɨ̀ và sɨ a wùl ɨ wi àyùŋayuŋ. Mɨ n-jêm tèyn, fêʼtɨ̀ kɨ ngeʼ semsɨ sɨ̂ Fɨyini fɨ̀.” ¹⁷Eli bè sɨ̂ ŋweyn na, “Kfa nɨ̀ mbôynɨ̀. Fɨyini fɨ ghelɨ Isìlæ̀ fɨ̀ nɨn fu nô mɨ ghà vzɨ̂ a wà n-bɨf sɨ̂ nfeynfɨ.”

¹⁸Hàna bèynsɨ̀ ɨ bè sɨ̂ ŋweyn na, “Bô, wa duʼa kfâʼtɨ̀ wul ìfèl nɨ̀ và.” Ta wù tàŋi tî mɨ ɨlvɨ gha ɨ lu kfa ndù ɨ yɨ, ɨ nà bu fì koynsɨ̂ kêʼ wì keʼ.

¹⁹Elkanà nɨ̀ isas i ndo nɨ̀ ŋweyni nɨ̀n bɨs meyn làlì ɨ koʼsɨ Fɨyini ɨ kasi kfa sɨ a àŋena abe a Lamà. Ta wù kfa tî ɨ ndu chi nɨ̀ wî ŋweyn Hàna, Bôbo bèynsɨ̀ ìjêm i Hàna. ²⁰Bèŋ ɨ se sɨ chwò, wu timi ɨlvâ ɨ læ bzɨ wayn ɨ̀ lûmnɨ̀ ɨ chfɨ̀ ìzɨyn i ŋweyn na Samwèl bê na, a n-ghɨ ta yi n-læ loyn ŋweyn sɨ̂ Bôbo.

²¹Ɨlvɨ læ kfeyn, Elkanà ɨ lì ghelɨ abe nɨ̀ ŋweyn ŋêyn àŋena koʼ a Shilò sɨ fu ifu i Fɨyini sɨ fì sɨ luynsɨ ichfɨ̂nɨ̀ i ŋweyn sɨ̂ Bôbo. ²²Àŋena nɨn læ se sɨ koʼ tî Hàna faŋtɨ̀ koʼ ɨ bè sɨ̂ lûm ŋweyn na, “Mà læ̀ teyn wayn sɨ igheyn mɨ ɨtuʼ gha ɨ̀ koʼ nɨ̀ ŋweyn a ndô Fɨyini ta ka wù faŋ kɨ̀ afu sɨ a wul ìfèl nɨ̀ Bôbo Fɨyini.”

²³Elkanà ɨ bèynsɨ̀ ɨ bè sɨ̂ ŋweyn na, “Ni kɨ iwo zɨ̀-ì a yi n-kfeynɨ sɨ̂ và. Bôbo nɨn ni-à a wà luynsɨ ichfɨ̂nɨ̀ ì zæ sɨ̂ ŋweyn.” Hàna kæ faŋ ɨ nà nyoŋsɨ̂ koʼ nɨ̀ wàyn ɨ læ teyn sɨ igheyn.

²⁴Wu n-læ teyn wayn sɨ igheyn tì, ŋêyn lûm ŋweyn Elkanà ɨ lì wayn nɨ̀ nyàm bèŋsɨ̀ tal nɨ̀ ìfûʼi ɨnkfɨ̀ŋì nɨ̀ nsàl mɨ̀lùʼ ɨ koʼ a ndô Fɨyini a Shilò nô mɨ ta wayn nà n-bu læ. ²⁵Àŋena nɨ̂n kòʼ tî ɨ sɨ nyam àteyn ɨ li ndù nɨ̀ wàyn sɨ̂ Eli ɨ ngàŋ ndô Fɨyini. ²⁶Hàna ɨ kæ bè sɨ̂ Eli na, “Mɨ n-kfâʼ a Bòbè na wà bu kya mà. Mɨ n-ghɨ wul ɨ wi vzɨ̀ a wu n-læ timi a wa asɨ afêyn ɨ nà jêm sɨ̂ Bôbo tî. ²⁷Mɨ nà n-jêm tì loyn wayn, Bôbo tî kòynsɨ ìsuyn sɨ̂ mà ɨ̀ bèynsɨ̀ ìjêm ì yemi ɨ̀ fu wayn wèyn sɨ̂ mà. ²⁸À na sɨ ghɨ lvɨ̂yn ma kasî fu wayn àteyn sɨ̂ Bôbo Fɨyini na wu na ghɨ wul ìfèl nɨ̀ ŋweyn kɨ̀ samoʼ.” Àŋena koʼsɨ Fɨyini afu.