1 Samuel 22

Sôl ɨ zuetɨ nfèʼtɨ̀ sɨ a Nôb

¹Devìt nɨ̀n fi meyn lù sɨ a ntèʼ Gât ɨ leʼ ndu lèytɨ̀ ifò ili a ngùŋ ntèʼ Adulàm. Woyn nà ŋweyn nɨ̀ ìsas i ndo nɨ̀ bò ŋweyn nô ì jɨ̀m ɨ yvɨ alêʼ kì a wù lèytɨ̀ ateyn, ɨ lu ndù sɨ yeyn ŋweyn. ²Ghelɨ ghɨli nɨn læ meyn boŋ ndu kɨmɨ sɨ yeyn ŋweyn chem ndû ighɨ ì kæ̀. À nà n-ghɨ ghelɨ ghɨ saʼ yeʼtɨ̂ àŋena, ghɨli ghɨ ateyn kelɨ ìkwo sɨ làʼ, ghɨli gvî kɨ nô bòm ta àŋena nà n-saŋlɨ wi. Ghɨ gvi kɨ tî Devìt ɨ nà sɨ ghɨ àtu sɨ̂ àŋena.

³Devìt ɨ fi lù sɨ afu ɨ ndù a ntèʼ Misbà ilaʼ i Mowàb ɨ bè sɨ̂ fòyn na, “Mɨ n-chwotɨ̂ na wà visi bò wom nɨ̀ nà wom gvi nà chî afêyn zɨ̂ àŋena sɨ chem ta ka mà keli iwo zɨ̀ a Fɨyini fɨ nɨn kɨŋ sɨ ni sɨ̂ mà.” ⁴Fòyn Mowàb ɨ bɨmi, Devìt ɨ visi àŋena sɨ̂ ŋweyn. Àŋena faŋ kɨ afu nô ta ka Devìt læ̂ kàsi fvɨ̀ sɨ alèʼ ghè a wù nà n-lêytɨ̀ ateyn. ⁵A nà ghɨ achi a li-a, Gâd ɨ Nfèʼtɨ̀ ìghaʼnɨ ɨ ndu bè sɨ̂ Devìt na, “Yi n-jofɨ̀ wì na wà na fî chî alèʼ ghàyn. Kwo lu ndu ilaʼi Judà.” Devìt ɨ kæ lù sɨ ndù sɨ nà chi akù a li-a a ngùŋ ntèʼ Helèt. ⁶A læ nà ghɨ achi a li-a Sôl ɨ yvɨ na ghɨ yeyn meyn àlêʼ kì a Devìt nɨ̀n lêytɨ̀ ateyn ŋêyn ghelɨ ŋweyn. Ghɨ n-læ fèʼtɨ iwo ateyn sɨ̂ ŋweyn wu duʼ isas i fɨ̂kàʼ fɨ tamalìs atu kfɨ̀yn a Gibìyà nɨ̀ ìwoŋi sɨ awu, ma ghelɨ ŋweyn timi meyn jɨ̀ŋ kàli ŋweyn. ⁷Sôl ɨ bè sɨ̂ àŋena na, “Ghelɨ isas i ndo nɨ̀ Benjamìn, yì yvɨ̀tɨ a woyn nà ghem. A ti bè na wâyn Jesì wèyn kàʼ a wù fu gveynsɨ sɨ̂ zɨ̀ ta mà sɨ ghɨ ma ma fu meyn a? A wù ti kàʼ a wù fu mɨchɨ ɨ̀ngàŋtɨnɨ̂ na yì na tisɨ̂ ghelɨ iwòŋ a? ⁸A ti iwo zì a yì kulɨ mɨ̀nàŋ sɨ suʼsɨ ma sɨ a yi a fòyn. Wayn wom tî yɨ̀ mɨkâyn ŋêyn Devìt nô wùl sɨ̂ zɨ̀ faŋ tɨ̀ fèʼtɨ sɨ̂ mà. Wùl sɨ̂ zɨ̀ ɨ kelɨ wi ɨlvɨ kûm mà. Nô wùl bû tìmi fèʼtɨ̀ sɨ̂ mà na Devìt nɨ̀n baʼtɨ̂ sɨ zue ma. Wâyn wom Jònatàn nɨ̀n tôʼ ìwo nâ yèynì mɨtì wùl sɨ̂ zɨ̀ ɨ fêʼtɨ̀ wì sɨ̂ ma.” ⁹Wu nà n-taŋî tì Duwèk ɨ wul ɨ̀ Edòm ɨ ti ŋêyn nchì sɨ Sôlsɨ̀ wu bè na, “Ma ti meyn yèyn wâyn Jesì nâ vzɨ̀ ta wù gvì sɨ yeyn Ahimelèk ɨ wâyn Ahitùb a ntèʼ Nôb. ¹⁰Wâyn Jesì nâ vzɨ̀ tî gvì tì Ahimelèk bɨf iwo zɨ-ì sɨ̂ Bôbo a wù n-kɨŋ na wù ni, ɨ̀ fu ɨfwo ɨ yɨnɨ ɨ fi fu kɨ̀mɨ fɨ̀nyuè fɨ Gòliyàt ɨ wul ɨ̀ Fìlisìyà vzɨ̀ sɨ̂ ŋweyn.”

¹¹A nà sɨ ghɨ ta Sôl yvɨ iwo ateyn, wu tum jàŋ Ahimelèk ɨ wâyn Ahitùb ŋêyn ghelɨ isas i ndo nɨ̀ bò ŋweyn ghì a ghɨ nà n-ghɨ ngàŋsɨ ndô Fɨyini a Nôb nô ghɨ̀ jɨ̀m, àŋena gvì a ŋweyn asɨ. ¹²Sôl ɨ kæ bè sɨ̂ Ahimelèk na, “Yvɨtɨ a wâyn Ahitùb.” Ahimelèk ɨ beynsɨ̀ na, “Mɨ yvɨtɨ̂ a mbæ̀.”

¹³Sôl ɨ bɨf sɨ̂ ŋweyn nâ, “Bòm ghà ta zɨ̂ wâyn Jesì wèyn nɨ̀n choʼ avɨ à kema a? Zɨ̂ ŋweyn yɨnɨ meyn wà fu àbayn nɨ̀ fɨ̀nyuèfɨ sɨ̂ ŋweyn. Wà fi meyn bɨf iwo zɨ̀ sɨ̂ Fɨyini fɨ̀ a ka wù ni. Awo nâ kèynà a wà nì têyn, gamtɨ meyn sɨ nì na wù keʼ ma. À n-ghɨ lvɨ̂yn wu ki kɨ fɨ̀bûʼnɨ̀ tèyn sɨ zue ma.”

¹⁴Àhimelèk ɨ bèynsɨ̀ ɨ bè sɨ̂ fòyn na, “Devìt nɨ̀n ghɨ wul ɨ̀ fèlɨnɨ nɨ̀ và vzɨ̀ a wù n-yvɨnɨ vâ chwô nô mɨ ndà. Ba wù n-ghɨ lûm wayn vâ, ghɨ kɨmɨ àtu a ghelɨ ghì a ghɨ n-chî vâ? Ba nô ghelɨ ghɨ̀ jɨ̀m a wa isas i ndo nɨn ngvɨmlɨ̂ ŋweyn nô sɨ a jûŋ? ¹⁵À bu tî nà ghɨ àchi a kɨ asɨ-a ta mà bɨ̀f iwo kûm ŋweyn sɨ̂ Fɨyini fɨ. Mɨ n-chwotɨ̂ và a mbæ̀ na ka wà na kfàʼ na ghesɨ̀ ghelɨ isas i ndo nɨ̀ bò wom nɨn kya ìwo kûm ìwo nâ yèynì a wà n-bê.”

¹⁶Mɨtì foyn be kɨ sɨ̂ Ahimelèk na, “Mɨ n-bê sɨ̂ và samoʼ na zɨ̂ ghelɨ isas i ndo nɨ̀ bò vâ nô ghɨ̀ jɨ̀m nɨ̀n kfɨtɨ à.” ¹⁷Wu taŋi tì ɨ bè sɨ̂ nchì sìsɨ̀ a sɨ nà n-ti a ŋweyn a ngùŋ na, “Yì zuetɨ ngàŋsɨ Bôbo Fɨyini sèynsɨ̀ nô sɨ̀ jɨ̀m bòm ta àŋena nɨn boŋ tòʼ Devìt. Àŋena ti meyn nà kya na wù n-leʼ leʼ ɨ̀ faŋ tɨ̀ fèʼtɨ sɨ̂ mà.” Mɨtì nchì sɨ ateyn sɨ nà kôŋ wì sɨ zuetɨ ngàŋsɨ Bôbo Fɨyini.

¹⁸Wu n-tàŋi tî ɨ bè sɨ̂ Duwèk na, “Zuetɨ ngàŋsɨ ndô Fɨyini nâ sèynsɨ̀.” Nô mɨ ɨlvɨ gha Duwèk ɨ beynlɨ̀ ɨ zuetɨ nô sɨ̀ jɨ̀m. Wù n-tsɨyntɨ zuetɨ àŋena ta ghɨ n-màʼ ndzɨsɨ ngàŋ sɨ ndô Fɨyini mɨ̀vɨm nfama njvàsɨ̀ tâyn achi nâ ghè. ¹⁹Wù n-zuetɨ meyn kɨmɨ ghelɨ ntèʼ Nôb ghì a ngàŋsɨ ndô Fɨyini sɨ nà n-chi afu nɨ̀ fɨ̀nyuèfɨ. Wù n-fi meyn zuetɨ kɨmɨ ghɨ̀lûmnɨ̀ nɨ̀ ghɨ̀ki a ntèʼ afu nɨ̀ woynda baʼsɨ̂ nɨ̀ nyamsɨ mbòloʼsɨ nɨ̀ njàkâsɨ̀ nɨ̀ njɨ̀sɨ aŋenasɨ.

²⁰Wu n-zuètɨ mɨtì wâyn ɨ lûmnɨ̀ ɨ̀lvì ɨ leʼ ndu yeyn Devìt izɨyn i ŋweyni ghɨ Abiyatà ɨ wâyn Ahimelèk. Ahimelèk nà n-ghɨ wâyn Ahitùb. ²¹Wu ndù tì ɨ fèʼtɨ̀ sɨ̂ Devìt na Sôl zuetɨ meyn ngàŋsɨ Bôbo Fɨyini. ²²Devìt ɨ bè sɨ̂ ŋweyn na, “À tî nà ghɨ achi ghè a mà yeyn Duwèk ɨ wul ɨ̀ Edòm vzɨ̀ afu ɨ keli kɨ keli na wu n-fèʼtɨ̀ sɨ̂ Sôl na yi yeyn meyn mà ghesɨ̀ bò vâ. Yi ti n-dyêyn na ghɨ zue bò vâ nɨ̀ ìsas i ndo nɨ̀ ŋweyni bòm mà. ²³Dùʼi kɨ afêyn ghesɨ̀và. Ka wa n-fì fàyn. Sôl nɨ̀n kɨŋ sɨ zuetɨ ghesɨ̀và kɨ ghɨ̀ jɨ̀m. Iwo i nɨn gàyn wì sɨ̂ và ma ghɨ.”