1 Samuel 29

Ŋwàʼlɨ̀ 1 Samwèl

Ghelɨ Fìlisìyà ɨ mo Devìt

¹A nà ghɨ achi a li-a, ghelɨ Fìlisìyà ɨ yvɨ̀ŋtɨ̀ ghelɨ iwòŋ nɨ̀ àŋena a Afèk. Ghelɨ iwoŋ nɨ̀ Isìlæ̀ ɨ yvɨ̀ŋtɨ̀ a mbæ̀ ìsɨ ilɨmàlɨmà a Jeslèl. ²Tɨfôyn tɨ Fìlisìyà tɨ lù nà jelɨ̀ ndu-à nɨ̀ ìnôyn i ghelɨ iwòŋ nɨ̀ àŋena. Inôyn ili nà n-ghɨ ghelɨ ɨvɨ, ili ghɨ nkamsɨ. Devìt ŋêyn ghelɨ ŋweyn ɨ jelɨ̀ ndû ibam ŋêyn fòyn Akìsh. ³Ghɨ̀bo ndo ìwoŋ nɨ̀ ghelɨ Fìlisìyà ɨ bɨf nâ, “Ghelɨ Hibɨ̀lù ghèyn nɨn ndû wo a ghesɨ̀nà ibàm a?” Akìsh ɨ bèynsɨ̀ ɨ bè na, “Ba à n-ghɨ Devìt ti ta wu nà n-ghɨ bò ndo ìwoŋ nɨ̀ fòyn Sôl a Isìlæ̀. Ghesɨ̀ ŋweyn sɨ ghɨ ma ghɨ chi meyn chwò bèŋ. Sɨ achi ta wù lèʼ Sôl sɨ koʼ sɨ chem layn ma bû yèyn njas sɨ̂ ŋweyn.”

⁴Ghɨ̀bo ndo ìwoŋ nɨ̀ Fìlisiyà ɨ nà nyôʼsɨ̀ ɨ̀toŋ sɨ̂ Akìsh ɨ bè na, “Sàŋa wù kasî ndù alèʼ ghè a wà tî fù sɨ̂ ŋweyn. Wù kàʼ wu bû sèʼ ghesɨ̀nà nɨ̀ àŋena bu tì a ghɨ ndu se sɨ nù a wù kasi kèʼ ghesɨ̀nà. Wà n-kfâʼ na wù kàʼ a wù ni gha ta ka Sôl na fì saŋlɨ̂ sɨ̂ ŋweyn a bu kɨ na wù zuetɨ ghelɨ Fìlisìya?” ⁵Ba ɨwêyn nɨn ghɨ Devìt vzɨ̀ a ghɨ n-læ nà yem njàŋsɨ̀ kûm ŋweyn cheŋà bê na,

“Sôl zuètɨ mbàynɨ̀sɨ nkam mɨtì Devìt zuetɨ nkamsɨ ìvɨ̀m?”

⁶Akìsh ɨ kæ jàŋtɨ Devìt sɨ be sɨ̂ ŋweyn na, “Mɨ n-bê sɨ vâ sɨ izɨyn nɨ̀ Bôbo na, wà n-ghɨ kɨ nô wul àtì-ati ma kôŋ na ghesɨ̀và tɨm iwoŋ yèynì amoʼ. Kɨ̀ sɨ zɨtɨ sɨ achi ta wà gvì, ma bû tìmi yeyn iwo i sœni sɨ̂ và mɨtì tɨfôyn tɨ Fìlisìyà tɨ kôŋ wì na wà na ghɨ zɨ̂ àŋena. ⁷Kasi wa kfâ kɨ nɨ̀ mbôynɨ̀. Ka wa n-nì ìwo ta ka tɨfôyn nâ tèyntɨ̀ na nyôʼsɨ̀ ɨ̀toŋ sɨ̂ và.”

⁸Devìt ɨ bèynsɨ̀ ɨ bɨf na, “Mà bèbsɨ ghà? Sɨ achi ta mà zɨ̀tɨ̀ sɨ chi ghesɨ̀và ma timi meyn nì jas iwo sɨ̂ và sɨ chem lvɨ̂yn à? Bòm ghà ta ghɨ n-leʼ na ka mà seʼ nù mbàynɨ̀sɨ fòyn ɨ bò ìfèl nɨ̀ mà a?”

⁹Akìsh ɨ bèynsɨ̀ ɨ bè na, “Mɨ n-kya na wà n-ghɨ sɨ̂ mà kɨ̀ têyn ta nchì Fɨyini kelɨ wi njas mɨtì ma ghɨ̀bo ndo ìwoŋ nɨ̀ Fìlisìyà kayn meyn na wa n-seʼ wi ghesɨ̀nà amoʼ. ¹⁰Yi ti ndêyn na zɨ̂ ghelɨ̀ ghya nɨn bɨsɨ nyàŋsɨ̀ làlì-à ɨ̀ lù nà kfâ jæ ta ka abe-a lani.”

¹¹Ɨtuʼ nà layn gvî kɨ tèyn Devìt ŋêyn ghelɨ ŋweyn ɨ làlì ɨ lù ɨ nà kasi kfa ilaʼ i Fìlisìyà, ghelɨ Fìlisìyà ɨ lu ndù a ntèʼ Jeslèl.