1 Samuel 31

Sôl ŋêyn woyn ŋweyn ɨ kfɨtɨ

¹À nà n-ghɨ ta Devìt nɨ̀n nu ghelɨ Amalèk, ghelɨ Fìlisìyà ɨ nû ghelɨ Isìlæ̀. Ghelɨ Fìlisìya ɨ zuetɨ ghelɨ Isìlæ̀ a kfɨyn Gilbùwà nô sɨ idvɨ̀ ghɨli leʼnɨ. ²Ghelɨ Fìlisìyà ɨ nyɨŋ ibàm nɨ̀ Sôl ŋêyn woyn ŋweyn nô sɨ adyaʼ ɨ zue Jònatàn nɨ̀ Abinadàb nɨ̀ Malki Shùwà ɨ woyn ŋweyn. ³Àŋena nɨ̀n læ meyn nù Sôl nô nɨ̀ àdyaʼa ɨ tɨm lemsɨ ŋweyn nô sɨ a ŋaŋ nɨ̀ fɨ̀nchyafɨ.

⁴Sôl ɨ bè sɨ̂ wùl vzɨ̀ a wu nà n-beʼì ɨfwo iwòŋ nɨ̀ ŋweyn na, “Choʼ fɨ̀nyuè fyafɨ ɨ zue mesi ndù nɨ̀ mà a bu tì a ghelɨ Fìlisìyà ghèyn a ghɨ n-kya wi Fɨyinì tèyn gvi wùmsɨ zuè ma na dyal a.”

Mɨtì iwo ateyn i ɨ bem ghaʼ wul àteyn wu leʼ na yì kàʼ yi bû mòm ìnkì iwo tì. Sôl ɨ choʼ Fɨ̀nyuè fɨ ŋweyn ɨ zue ngêŋ ŋweyn. ⁵Wùl nâ vzɨ̀ a wu nà n-beʼi ɨfwo iwòŋ nɨ̀ Sôl ɨ yeyn na Sôl kfɨ meyn ɨ choʼ fɨ̀nyuefɨ ŋweyn ɨ boŋ chuʼ ngêŋ ŋweyn ateyn ɨ kfɨ. ⁶À ti ta Sôl ŋêyn woyn ŋweyn ghɨ̀ tal nɨ̀ wùl vzɨ̀ a wu nà n-beʼi ɨfwo iwòŋ nɨ̀ ŋweyn, baʼsɨ̂ nɨ̀ ghelɨ iwòŋ nɨ̀ ŋweyn nô ghɨ̀ jɨ̀m nɨn chɨ̀yntɨ kfɨtɨ kɨ achi àmòʼ.

⁷Ghelɨ Isìlæ̀ ghî a ghɨ nà n-chi a ibal i Jeslèl nɨ ɨghî a ghɨ nà n-chi injɨyn i Jodàn ɨ yeyn na ghelɨ iwòŋ nɨ̀ àŋena leʼnɨ meyn, Sôl ŋêyn woyn ŋweyn kfɨtɨ, àŋena leʼnɨ ɨ fvɨ̀ sɨ a àŋena ntèʼsɨ ghelɨ Fìlisìyà ɨ gvi zɨ ɨ nà chî ateyn. ⁸Ɨtuʼ layn ghelɨ Fìlisìyà ɨ kasi ndù sɨ kumtɨ ɨfwo ghelɨ Isìlæ̀ ghì a àŋena tî zuètɨ, ɨ kæ sɨ yeyn Sôl a kfɨ̂yn Gilbùwà ŋêyn woyn ŋweyn ghɨ̀tal ma àŋena kfɨtɨ meyn. ⁹Àŋena teyn atu a Sôl ɨ choʼtɨ ɨ̀fwo iwòŋ nɨ̀ ŋweyn sɨ a ŋweyn ɨwùyn ɨ tum ghelɨ na ghɨ jel fèʼtɨ̀ ìwo ateyn kɨ ilaʼ i Fìlisìyà ì jɨ̀m ɨ̀ fì fèʼtɨ̀ a ndosɨ ɨ̀nfèʼsɨ̀ mɨyini nɨ̀ àŋena. ¹⁰Àŋena nɨn læ meyn lì ɨ̀fwo iwoŋ nɨ̀ ŋweyn ɨ lèm a ndô fɨyini fɨ Ashtolèt ɨ ghaŋsɨ igvɨyn i ŋweyn ɨwuyn mbàyn Bet Shàn.

¹¹A nà sɨ ghɨ ta ghelɨ Jabèsh abàs a Gilèd yvɨ iwo zɨ̀ a ghelɨ Fìlisìyà mòm sɨ̂ Sôl, ¹²ghelɨ ghɨ nunɨ nɨ̀ àŋena nô ghɨ̀ jɨ̀m ɨ lù ɨ chi jelɨ̀ kɨ têyn ɨ ndù a Bet Shàn. Àŋena nɨn ndù tî ɨ suʼsɨ ìgvɨyn i Sôl ŋêyn woyn ŋweyn sɨ ɨwuyn mbàyn nâ ghè ɨ ndu nyòʼ a Jabèsh. ¹³Àŋena nɨn nyòʼ tî ɨ lì ɨ̀vɨf ɨ gvìmì isas i fɨ̂kàʼ fɨ tamalìs a ntèʼ Jabèsh ɨ bam ɨchfɨ sɨ a mɨchi nsòmbo, dzɨ̂ ìkfɨ i Sôl.