2 Chronicles 11

Shèmayà ɨ Làʼì ntûm Fɨyini

¹À nà n-ghɨ ta Lèhobòwàm kàsi ndù a Jèlusalèm, wu yvɨ̀ŋtɨ̀ sugèyʼsɨ Judà nɨ̀ ɨ sɨ benjamìnsɨ̀, nkam ɨvɨ nɨ̀ sugèyʼsɨ̀ mɨ̀vɨm nfama a ghɨ sugèyʼsɨ tosɨ. Lèhobòwàm nà n-kɨŋ na ghɨ gamtɨ ŋweyn tɨm yɨ Isìlæ̀ wù kasi nà saʼa.

²Mɨtì Bôbo Fɨyini ɨ taŋi sɨ̂ Shèmayà ɨ nfèʼtɨ̀ ìghaʼnɨ̀ ɨ bè na, ³“Bè sɨ̂ Lèhobòwàm ɨ wâyn Sòlomòn ɨ fòyn Judà ŋêyn ghelɨ Isìlæ̀ ghì a ghɨ n-chi a Judà nɨ̀ Benjamìn nô ghɨ̀ jɨ̀m na, ⁴‘Bôbo Fɨyini bè na ka yi nù woynà ghi. Yì kasi nô ghɨ̀ jɨ̀m nà kfâ bòm ta à nì mà na yì na ghɨ tèyn.’” Àŋena ɨ yvɨnɨ Bôbo Fɨyini ɨ faŋ tɨ̀ fì tɨ̀ nu Jèlobòwàm ɨ kasi kfa.

Lehobòwàm ɨ tɨm mbàyn ɨ jɨŋ kali Judà

⁵Lèhobòwàm nɨn læ meyn faŋ a Jèlusalèm ɨ bàʼlɨ̀ ntèʼsɨ ta ka ghelɨ na chî ateyn nɨ̀ mbôynɨ̀. ⁶Wù n-baʼlɨ meyn ntèʼ Betɨ̀làhêm nɨ̀ ntèʼ Etàm kɨ̀mɨ nɨ̀ ntèʼ Tekowà, ⁷ɨ ɨ fi bàʼlɨ̀ ntèʼ Bet Zû nɨ̀ ntèʼ Sakò kɨ̀mɨ nɨ̀ ntèʼ Adulàm, ⁸nɨ̀ ntèʼ Gât nɨ̀ ntèʼ Maleshà kɨ̀mɨ nɨ̀ ntèʼ Zîf, ⁹nɨ̀ ntèʼ Adolèm nɨ̀ ntèʼ Lakìsh kɨ̀mɨ nɨ̀ ntèʼ Azekà, ¹⁰ɨ bàʼlɨ kɨmɨ ntèʼ Zolà nɨ̀ ntèʼ Ayjalòn baʼsɨ̂ nɨ̀ ntèʼ Heblòn. À ti ntèʼ sîsɨ̀ a ghɨ n-læ tɨm mbàyn ɨ jɨŋ kali a Judà nɨ̀ Benjamìn. ¹¹Wù n-læ meyn bàʼlɨ̀ ntèʼ sɨ ateyn sɨ nà to ɨ lèm ɨtu sugèyʼsɨ̀ nô mi a ntèʼ ìkà ɨ lêm ɨ̀fwo ɨ yɨnɨ, nɨ̀ mɨ̀vɨl mɨ̀ olìfsɨ̀ baʼsɨ̂ nɨ̀ mɨ̀lûʼ ɨnto. ¹²Wù n-lem meyn kɨmɨ nkyàsɨ iwòŋ nɨ̀ àwoŋa a ntèʼsɨ nâ ghàyn ɨ faytɨ kɨ̀ŋtɨ̀, Judà nɨ̀ Benjamìn ɨ faŋ kɨ a ŋweyn isas isaʼ.

¹³Mɨtì ngàŋsɨ ndô Fɨyinisɨ̀ nɨ̀ ghelɨ ndo nɨ̀ Levì a ntèʼsɨ Isìlæ̀ nô sì jɨ̀m nà n-tôʼ Lèhobòwàm. ¹⁴Jèlobowàm ŋêyn woyn ŋweyn nɨn bu læ visi na ghelɨ ndo nɨ̀ Levì na felɨ̀ ta ngàŋsɨ ndô Fɨyini. À ti iwo zɨ̀ a ghelɨ ndo nɨ̀ Levì nɨn læ visi ɨ̀twaʼ ɨ nyâmsɨ̀ nɨ̀ àŋena baʼsɨ̂ nɨ̀ ɨ̀fwo àŋena ɨlvɨ ɨ ndù a Judà nɨ̀ Jèlusalèm. ¹⁵Jèlobòwàm ɨ choʼtɨ ngàŋsɨ ndô Fɨyini nɨ̀ ŋweyn na sɨ na felɨ̀ ɨlweʼ ghè a ghɨ nà n-koʼsɨ̂ ɨ̀nfyèʼsɨ̀ bzɨ ndong nɨ̀ ɨwu wâyn nyàm mbòloʼ vzɨ̀ a wù n-læ faytɨ. ¹⁶Ghelɨ ghì nô ghɨ̀ jɨ̀m a ghɨ n-chòʼnɨ sɨ nà koʼsɨ Bôbo Fɨyini asas a ndosɨ a Isìlæ̀ nɨ̀ mɨtem mɨ̀ àŋena ɨ̀n jɨ̀m ɨ jùmtɨ ndù nɨ̀ ghelɨ ndo nɨ̀ Levì a Jèlusalèm sɨ fu tɨfu sɨ̂ Bôbo Fɨyini ɨ Fɨyini fɨ ghɨ̀bo àŋena. ¹⁷Àŋena nɨ̀n læ meyn nì ilaʼ i Judà ì ɨ nà to-a, ɨ fi gàmtɨ̀ Lèhobòwàm ɨ wâyn fòyn Sòlomòn sɨ a bèŋsɨ̀ tal, chî kɨ ta fòyn Devìt ŋêyn fòyn Sòlomòn nà n-chi.

Isas i ndo nɨ̀ Lèhobòwàm

¹⁸Lèhobòwàm nɨn læ lì Màhalàt sɨ a wi a ghɨ wâyn wâyn Devìt. Bò Màhalàt nà n-ghɨ Jelimòt nà ŋweyn ɨ ghɨ Abihèl, Abihèl ɨ ghɨ wâyn Elìyàb, Elìyàb ɨ ghɨ wâyn Jesì. ¹⁹Lèhobòwàm ŋêyn Màhalàt ɨ bzɨ woyn ghɨ lûmnì ghɨ̀ tal a ghɨ Jehùsh, nɨ̀ Shèmalìyà baʼsɨ̂ nɨ̀ Zahàm. ²⁰Lèhobòwàm ɨ lì Makà ɨ wâyn Absalòm sɨ a àkùmtɨ̀ a wi, ŋêyn ŋweyn ɨ bzɨ woyn ghɨ̀ kæ̀ a ghɨ Àbijà nɨ̀ Atày nɨ̀ Zizà baʼsɨ̂ nɨ̀ Shelomìt. ²¹Lèhobòwàm nà n-kôŋ Makà ɨ wâyn Absalòm chwô ta wù nà n-kôŋ nô mɨ wî ŋweyn ɨ̀ kfà nɨ̀ suynsɨ ŋweynsɨ/ghɨ̀kì ibàm. Wù nà n-chɨ̂yntɨ̀ kelɨ ghɨ̀kì njvàsɨ̀ nfama nɨ̀/suynsɨ/ghɨ̀ki ibàm mɨ̀vɨm ntufa, kelɨ woyn ghɨlûmnɨ̀ mɨ̀vɨm ɨ̀n bò njvàsɨ̀ nfama, nɨ̀ ghɨki mɨ̀vɨm ntufa.

²²Lèhobòwàm nɨn læ choʼ Àbijà ɨ wâyn Makà na wù na tisɨ̂ woyn ntoʼ sɨ dyeyn samoʼ na à ti wul ɨ vzɨ̀ a ka wù læ̂ koʼ ɨfôyn. ²³Lèhobòwàm nɨn læ meyn tof ɨ lèm woyn ŋweyn ghɨlûmnɨ̀ ghɨ li a ntèʼsɨ Judà nɨ̀ ɨsɨ Benjamìn sîsɨ̀ a sɨ nà ghɨ antêynɨ̀ mbàyn nò sɨ̀ jɨ̀m. Wu nà fu ɨ̀fwo ɨ yɨnɨ sɨ̂ àŋena nô sɨ a idvɨ̀ ɨ ndù ghɨ̀kì sɨ̂ àŋena.