2 Chronicles 16

Bèŋ sîsɨ̀ a Asà nɨn læ saʼ gòʼsɨ ateyn

¹À nà n-ghɨ ta Asà chem bèŋsɨ̀ mɨ̀vɨm ɨ̀n tal nɨ̀ bèŋsɨ ntufa sɨ a fòyn, Bashà ɨ fòyn Isìlæ̀ ɨ koʼ ndù a ntèʼ Judà ɨ tɨm mbàyn ɨ jɨŋ keli ntèʼ àteyn na ka wùl fî fvɨ̀ kèsa sɨ zɨ a ilaʼ nɨ̀ Asà ɨ foòyn Judà.

²Bashà nɨ̂n nì tî, Asà ɨ lì àso ɨkwo a fɨfâ nɨ̀ a baŋnɨ-a kì alèʼ ghè a ghɨ n-lêm ɨfwo ateyn a ndô Fɨyini, ɨ lì akî a kɨ n-ghɨ a ŋweyn a ntoʼ, ɨ tum sɨ̂ Ben Hadàd ɨ fòyn Alàm ta wu nà n-saʼ Dàmaskùs. ³Wu n-tum tî ɨ bè sɨ̂ ŋweyn na, “Ghesɨ̀và yɨ mɨkâyn kɨ̀ ta bò wom nɨ̀ bò vâ nɨn læ yɨ. Ma tum meyn àsɨ ɨkwo a fɨfâ sɨ̂ và nɨ̀ a baŋnɨ-a. Chyeʼsɨ mɨkâyn mzɨ̀ a wà tî yɨ̀ zɨ̂ fòyn Bashà ɨ fòyn Isìlæ̀ ta ka wù kasi sɨ a ma ibàm.”

⁴Ben Hadàd ɨ bɨmi sɨ ni iwo zɨ̀ a Asà bè ɨ tum ɨtu sugèyʼsɨ̀ nɨ̀ ŋweyn na wu ndu nù Isìlæ̀. Àŋena ndu tɨm yɨ ntèʼ Ijòn nɨ̀ Dân kɨ̀mɨ̀ nɨ̀ Abel Mayìm baʼsɨ̂ nɨ̀ ntèʼ sîsɨ̀ a ghɨ nà n-lêm ɨfwo ateyn a Naftalì. ⁵A nà ghɨ ta Bashà yvɨ iwo nâ yèynì, wu faŋ tɨ̀ fì tɨ̀ bàʼlɨ ntèʼ Lamà ɨ visi kɨ ifêl ateyn. ⁶Fòyn Asà ɨ yvɨ̀ŋtɨ̀ ghɨ̀lûmnɨ̀ a Judà nô ghɨ̀ jɨ̀m ɨ bè na àŋena beʼi lù nɨ̀ ngòʼsɨ̀ nɨ̀ ɨ̀nkâʼ mzɨ̀ a Bashà nà n-bêʼlɨ̀ Lamà ateyn. Asà ɨ lì ɨ̀fwo ateyn ɨ bàʼlɨ̀ ntèʼ Gebà nɨ̀ ɨzɨ̂ Misbà.

⁷À nà n-ghɨ ɨtuʼ nâ ghè, Hànanì ɨ nfèʼtɨ̀ ì ghaʼnɨ ɨ gvi bè sɨ̂ Asà ɨ fòyn Judà na, “Sugèyʼsɨ fòyn Alàm leʼ meyn và bòm ta wà n-yetɨ̂ kɨ ɨwùyn nɨ̀ Alàm, yeʼtɨ̂ ẁ ɨwuyn nɨ̀ Bôbo Fɨyini ɨ Fɨyini fyafɨ. ⁸Ghelɨ Kûsh nɨ̀ ghelɨ Libìyòn nà n-ghɨ ghelɨ iwòŋ ghɨto, kelɨ mɨ̀nchaʼ mɨ̀ ìwòŋ nɨ̀ ghelɨ ghì a ghɨ nyɨŋ atû nyamsɨ kfaŋ. Mɨtì yi nà yeʼtɨ̂ kɨ ɨwuyn nɨ̀ Bôbo Fɨyini, wu fu àŋena a yi ɨwu/wu nì yi tɨm yɨ àŋena. ⁹Bôbo Fɨyini nɨn ki yeyn mbzɨ nô ì jɨ̀m, ghɨ sɨ fu adyaʼ sɨ̂ ghelɨ ghì a ghɨ n-kôŋ ŋweyn nɨ̀ mɨ̀tem mɨ̀ àŋena ɨ̀n jɨ̀m/yeʼtɨ̂ kɨ a ŋweyn/. Yi nî meyn kɨ̀ nô ìwo angù ghɨ sɨ faŋ sɨ nà lum tɨm kɨ ìwoŋ /lûm nû kɨ nu.”

¹⁰Iwo ateyni ɨ yaf Asà nô sɨ a ŋaŋ, wu ghalɨ fò Hànanì/ɨ nfèʼtɨ̀ ì ghaʼnɨ àteyn a ndô nchaʼ. Wu n-fò tî, ɨ zɨ̀tɨ̀ sɨ nà nyâblɨ̀ nɨ̀ ghelɨ ghɨ li nô sɨ a ŋaŋ.

¹¹Awo kì a Asà nì kɨ̀ sɨ a nzɨ̀tɨ sɨ chem ateyn nɨ̀ a goʼsɨnɨ-a ɨtuʼ ta wu nà n-ghɨ fòyn nɨn ghɨ ma ghɨ nyaʼ meyn a ŋwàʼlɨ̀ nɨ̀ tɨ̀fôyn tɨ Judà nɨ̀ ɨtɨ Isìlæ̀. ¹²À nà n-ghɨ ta Asà chem bèŋsɨ̀ mɨ̀vɨm ɨ̀n tal nɨ̀ bèŋsɨ̀ bulamòʼ, ikoʼi i bemnɨ-i ɨ ku ŋweyn a ŋweyn afyeyn. Yi n-ku mɨ tì wu faŋ tɨ̀ loyn igâmtɨ̀ sɨ̂ Bôbo Fɨyini ɨ kwo ndu kɨ sɨ̂ ghelɨ mɨ̂fvɨ̀ nò mɨ ta ikoʼi ateyn nà n-bem nô abɨ. ¹³A nà ghɨ ta wù chem bèŋ mɨ̀vɨm ɨ̀n kæ̀ nɨ̀ bèŋ ìmòʼ achɨ, wu kfɨ. ¹⁴Wù n-læ kfɨ ghɨ gvɨ̀mì ŋweyn isè ta wù n-læ gvèl ɨ lèm sɨ̂ ngêŋ ŋweyn a ntèʼ nɨ̀ Devìt. Ghɨ n-læ lèm ŋweyn a ànkyà ma ghɨ yoʼ meyn nɨ̀ ɨ̀fwo ɨ lɨmtɨnɨ nɨ̀ mɨ̀yìsi ɨ̀n lɨ̀mtɨnɨ̂, ɨ kwò ɨ̀vɨ̀s a mbæ̀ nô sɨ a ŋaŋ sɨ dzɨ̀ ŋweyn.