2 Chronicles 19
1Jèhoshafàt ɨ fòyn Judà nɨ̀n læ meyn kasi kfa kɨ nô a jûŋ sɨ a ŋweyn a ntoʼ a Jèlusalèm nɨ̀ mbôynɨ̀/a jûŋ. 2À nà n-ghɨ ta wù kfa, Jehù ɨ wâyn Hànanì ɨ nfèʼtɨ̀ ì ghaʼnɨ ɨ ndu yeyn ŋweyn ɨ bè sɨ̂ Jèhoshafàt na, “Wà n-kelɨ wi sɨ gàmtɨ ghelɨ awo a bɨ-a nɨ̀ ghelɨ ghì a ghɨ n-kôŋ wi Bôbo Fɨyini.” Bòm ìwo nâ yèynì têyn, ndòyn Bôbo Fɨyini nɨn fê a wa atu. 3Mɨtì awo a juŋà a li-a nɨn ghɨ ta wà nì, wà bebsɨ meyn mɨ̀yìnì mzɨ̀ a ghɨ fàytɨ nɨ̀ ɨ̀nkàʼ ilaʼ nâ ghàyn ɨ̀ bàʼtɨ mɨ̀tem mzɨ sɨ nà koʼsɨ Bôbo Fɨyini.
4Jèhoshafàt ɨ nà sɨ chî a Jèlusalèm ɨ læ fvɨ ndù àntêynɨ̀ nɨ̀ ghelɨ. Sɨ zɨ̀tɨ̀ a Betshebà sɨ ndù sɨ chem a ilaʼ i kfɨynsɨ a Eflèm ɨ kfa nɨ̀ ghelɨ ateyn ɨ fu sɨ̂ Bôbo Fɨyini ɨ Fɨyini fɨ ghɨ̀bo àŋena. 5Wu n-læ meyn choʼtɨ ɨ lèm ghelɨ ghɨ saʼnɨ ilaʼ i Judà nô ì jɨ̀m a ntèʼsɨ ghê a ghɨ n-bàʼlɨ mbàynsɨ̀ ɨ jɨŋ kal. 6Wu n-læ bè sɨ̂ àŋena na, “Yì na faytɨ̂ kfaʼtɨ̀-à jæ ta ka yì teyn nsaʼ bòm ta yi n-saʼ wi sɨ̂ ghelɨ mɨtì saʼ sɨ̂ Bôbo Fɨyini wu lum ghɨ zɨ̂ àŋena amoʼ nô mɨ ɨlvɨ gha ta yi n-saʼ nsaʼ. 7Yì na ngvɨmlɨ̂ Bôbo Fɨyini, saʼ a jûŋ/àtì-ati bòm ta Bôbo Fɨyini nɨn kôŋ wì na ghɨ saʼ ɨ̀ fyèʼtɨ nsaʼ kèsa sɨ yuyntɨ nsaʼ.
8Jèhoshafàt nɨn læ meyn choʼtɨ ghelɨ a Jèlusalèm ɨ lèm na àŋena na saʼ nsaʼsɨ kûm ìsaʼ i Bôbo Fɨyini nɨ̀ nsaʼ sìsɨ̀ a ghelɨ nɨn kelɨ ŋêyn ghelɨ ghɨ li. 9Wù n-læ lèm tî ɨ bè sɨ̂ àŋena na, “Yi n-kelɨ sɨ na nî kɨ iwo zɨ̀ a yi n-kelɨ sɨ nà ni-à nɨ̀ àtem à ki-a à jɨ̀mà. 10Wâynà vzɨ, chî a ntèʼ ì li gvî nɨ̀ nsaʼ sɨ̂ zɨ̀ nô mɨ ɨlvɨ gha, yi tebtɨ ŋweyn wù na kya dzɨ zɨ̀ a wù n-kelɨ sɨ ghalɨ ngêŋ ŋweyn ateyn ɨlvɨ ta ghɨ n-saʼ nsaʼ àteyn. Yi n-ghɨ tèyn ta ka wà faŋ tɨ̀ nì mbɨ sɨ̂ Bôbo Fɨyini, à n-ghɨ nsaʼ kûm ìzue i wûl, kèsa kûm tɨ̀saʼ tɨ Bôbo Fɨyini ma awo kì a ghɨ yèʼi zɨ nɨ̀ ànkeyna. Yì ni têyn ka ndòyn Bôbo suʼi atu nɨ̀ zɨ̂ woynà ghi. Yì kæ nà nî ìfêl ì zɨ-i a yì faŋ tɨ̀ ni mbɨ asɨ nɨ̀ Bôbo Fɨyini.
11“Àmalìyà ɨ ngàŋ ndô Fɨyini i ngaŋtɨnɨ na saʼ teyn nsaʼsɨ sìsɨ̀ a sɨ n-kûm Bôbo Fɨyini, Zèbàdiyà ɨ wâyn Ishmayèl ɨ wul ɨ vzɨ̀ a wù n-tisɨ ghelɨ ndo nɨ̀ Judà ɨ saʼ teyn nsaʼ sìsɨ̀ a sɨ n-kelɨ iwo kûm fòyn. Ghelɨ ndo nɨ̀ Levì nà n-felɨ ta chyeʼsɨ yeyn na ghɨ n-nî ìwo zɨ̀ a isaʼi nɨn bê. Yì na kelɨ àtem a to-a, felɨ̀ kɨ ta ghɨ bè, Bôbo Fɨyini na ghɨ ŋêyn ghelɨ ghì a ghɨ n-ghɨ a jûŋ.