2 Chronicles 25

Amàzayà ɨ nà saʼ Judà

¹Amàzayà nà n-ghɨ bèŋ mɨ̀vɨm ɨ̀n bò njvàsɨ̀ tâyn ghɨ yisi ŋweyn sɨ a fòyn, wu nà saʼ a Jèlusalèm sɨ a bèŋsɨ̀ mɨ̀vɨm ɨ̀n bò njvàsɨ̀ bulamoʼ. Izɨyn i nà ŋweyni nà n-ghɨ Jèhòyadà a ghɨ wul ɨ wi Jèlusalèm. ²Wu nà n-nî àwo kì a Bôbo Fɨyini nà n-kɨŋ mɨtì nî wì nɨ̀ àtem a ŋweyn à jɨ̀mà. ³A nà ghɨ ta wù sɨ faytɨ saʼ, wu zuetɨ chyeʼ sìsɨ̀ a sɨ n-læ zuetɨ bò ŋweyn ɨ fòyn. ⁴Mɨtì ɨ faŋ tɨ̀ zuètɨ woyn àŋena bòm ta wu nà n-ni kɨ àwo kì a Mosìs nɨ̀n læ nyàʼ a ŋwàʼlɨ̀ ìsaʼ nɨ̀ Bôbo Fɨyini na, “Ghɨ n-kelɨ wi sɨ zue bò wùl bòm mbɨ wayn ŋweyn kèsa sɨ zue wayn bòm mbɨ bò ŋweyn, wùl na kfɨ kɨ bòm mbɨ ŋweyn.”

⁵Fòyn Amàzayà nɨn njaŋtɨ meyn yvɨ̀ŋtɨ̀ ghɨ̀lûmnɨ̀ a Judà nô ghɨ̀ jɨ̀m ɨ choʼtɨ ghelɨ asas a ndosɨ na ghɨ na tisɨ̂ ìnôyn i ghêl nkamsɨ nɨ̀ ili ɨvɨ a Judà nɨ̀ Benjamìn. Wù n-læ meyn yvɨ̀ŋtɨ̀ ghɨ̀lûmnɨ̀ ghì a ghɨ nà n-ghɨ bèŋsɨ̀ mɨ̀vɨm ɨ̀n bò sɨ ndù asɨ, àŋena kya sɨ nu nɨ̀ àwoŋa nɨ̀ mɨ̀nchya a nà chɨ̂yntɨ̀ ghɨ ghelɨ nkamsɨ ighɨ ì tal. ⁶Wù n-yuyntɨ meyn sugèyʼsɨ bemnɨsɨ a Isìlæ̀ nkamsɨ ɨvɨ sɨ aso ɨ kwo a fɨfâ kɨ dɨlɨ̀ chem ndû tonsɨ̀ tal nɨ̀ àbeʼa.

⁷Nfèʼtɨ̀ ì lì ɨ gvì ɨ bè sɨ̂ ŋweyn na, “Mbæ̀ ka wa n-lì sugèyʼsɨ Isìlæ̀ sèynsɨ̀ bòm ta Bôbo Fɨyini nɨn ghɨ wi ŋêyn ghelɨ Isìlæ̀, ghɨ wi ŋêyn wùl ɨ̀ Eflèm. ⁸Wà kæ visi àŋena ndu zɨ̂ àŋena amoʼ, yi ndu nù nɨ̀ àdyaʼ nô mɨ ti a ghɨ tɨm yɨ̀ zɨ, Bôbo Fɨyini nɨn fu zɨ̀ sɨ̂ àŋena bòm ta wù n-kelɨ adyaʼ sɨ nì na yì tɨm yɨ kèsa sɨ nì na ghɨ tɨm yɨ̀ zɨ.

⁹Amàzayà ɨ bɨf sɨ̂ nfèʼtɨ̀ Fɨyini na ɨkwo vzɨ̀ a wù tî fu nì jèlɨ̀ ti-a?

Nfèʼtɨ̀ àteyn ɨ bè na, “Bôbo Fɨyini kàʼ a wù fu ɨkwo sɨ̂ và chwô ɨ̀vɨ. ¹⁰Amàzayà ɨ kæ bè na, sugèyʼ sìsɨ̀ a wu n-yuyntɨ kasi kfa a Eflèm, àŋena ɨ nà nyôʼsɨ̀ ɨ̀toŋ sɨ kfa.

¹¹Fòyn Amàzayà ɨ tosɨ àtem a ŋweyn ɨ fvɨ nà tisɨ̂ ndû nɨ̀ sugèyʼsɨ ŋweynsɨ ibal i li ghɨ toŋtɨ̂ na Ibal i Fɨngvaŋ. Wu n-læ nù afu ɨ zuetɨ ghelɨ gugèyʼsɨ Edòm nkamsɨ ìvɨ̀m. ¹²Sugèyʼsɨ Judàsɨ̀ nɨn ghaytɨ meyn kɨmɨ ghelɨ Edòm nkamsɨ ìvɨm ɨ li ndù nɨ̀ àŋena iwu ɨ maʼ suʼsɨ àŋena abo, àŋena felɨ ɨ sàytɨ̀.

¹³A nà n-ghɨ tì ma sugèyʼsɨ Isìlæ̀ sìsɨ̀ a Amàzayà nɨn læ bè na sɨ kasi kfa tì ku meyn ntèʼsɨ Judà sɨ lisɨ sɨ zɨ̀tɨ̀ a Sàmalìyà sɨ ndù sɨ chem a Bet Holòn. Àŋena nɨn nu meyn ɨ zuetɨ ghelɨ nkamsɨ̀ tal ɨ bèʼi lù nɨ̀ ɨfwo kɨ̀ sɨ idvɨ̀.

¹⁴À nà n-ghɨ ta Amàzayà tɨm yɨ̀ ghelɨ Edòm wu se sɨ kasi ɨ lì mɨ̀yìnì mɨ̀ ɨ̀nfyèʼsɨ̀ mɨ̀ àŋena ɨ gvi lèm sɨ a mɨyìnì mɨ̀ ŋweyn, ɨ nà ngvɨmtɨ̂ asɨ nɨ̀ mɨ̀yìnì mɨ̀ àteyn nyôʼ tɨ̀fu sɨ̂ ɨ̀mêyn. ¹⁵Bòm tèyn, ɨtoŋ Bôbo Fɨyini ɨ yaf nô sɨ a ŋaŋ wu tum nfèʼtɨ̀ ì ghaʼnɨ na wù ndu bɨ̀f sɨ̂ fòyn na, “Bòm ghà ta wù n-koʼsɨ mɨ̀yìnì mɨ̀ ghelɨ Edòm ma mɨ̀ kàʼ mɨ bû fsɨ̀ ghelɨ ateyn a wa awu-a?”

¹⁶A nà ghɨ ta wù bu taŋi kɨ taŋi, fòyn ɨ tàysɨ̀ ɨ bɨf sɨ̂ ŋweyn na, “À lèm ndà vâ sɨ nà fu itebtɨ sɨ̂ fòyn a? Chimi moŋ ka mà be a ghɨ zue vâ.

Wu n-bè tî, nfèʼtɨ̀ ì ghaʼnɨ ɨ chimi ɨ bè na, “Mɨ n-kya na Bôbo Fɨyini baʼtɨ meyn sɨ bebsɨ vâ bòm ìwo yèynì a wà nì ɨ̀ fì leʼ na wa n-yvɨtɨ̂ wì itebtɨ ì yemi.

¹⁷Fòyn Amàzayà ɨ kæ bebsɨ iwo ateyn ŋêyn ghelɨ ghì a ghɨ n-tebtɨ ŋweyn. Wu n-tum ntum sɨ̂ fòyn Isìlæ̀ ɨ Jèhowàs na wù gvi nù ŋweyn. Jèhowàs nà n-ghɨ wâyn Jèhòwahàs ɨ wâyn Jehù.

¹⁸Jèhowàs ɨ fòyn Isìlæ̀ ɨ bèynsɨ̀ ɨ bè na, “À n-læ meyn nà ghɨ achi a li-a, sùnjoŋnjoŋ a kfɨyn ɨ tum ɨ bè sɨ̂ fɨ̀kâʼ fɨ sedàfɨ̀ akù a Lebanòn na wù fu wayn wi nɨ̀ ŋweyn sɨ̂ wâyn lûmnɨ̀ nɨ̀ ŋweyn sɨ a wi. Ta wù bè mèsì kɨ̀ têyn, nyam ɨ̀twaʼ a Lebanòn ɨ chwò ɨ jèylɨ̀ ɨ zue sùnjoŋnjoŋ àteyn.” ¹⁹Wà n-ghaŋsɨ̂ ɨ̀wuyn bê na wà tɨm meyn yɨ̀ ghelɨ Edòm. Mɨ n-tebtɨ̂ và na wà duʼi a wa ndo ka wa n-fì kɨ̀ŋ ngeʼ ma yì kàʼ a yì fe a wa atu zɨ̂ ghelɨ Judà.”

²⁰Mɨtì Amàzayà ɨ faŋ tɨ̀ yvɨ̀tɨ bòm ta a nà n-ghɨ ma Fɨyini fɨ baʼtɨ meyn na Jèhowàsh tɨm yɨ̀ ŋweyn bòm ta wù tî nà koʼsɨ mɨ̀yìnì mɨ̀ ghelɨ Edòm/ɨnfyèʼsɨ̀. ²¹Wu n-faŋ tɨ yvɨtɨ tî, Jèhowàsh ɨ ndu nù fòyn Amàzayà a Bet Shemèsh ilaʼ i Judà. ²²Sugèyʼsɨ Isìlæ̀sɨ̀ ɨ tɨm yɨ ghelɨ Judà nô mɨ wul ɨ̀ Judà ɨ̀ kfà ɨ nyɨŋ ɨ kfa a ŋweyn a ndo. ²³Jèhowàsh ɨ fòyn Isìlæ̀ ɨ ghal Amàzayà ɨ fòyn Judà ɨ wâyn Jòwâsh, Jòwâsh ɨ ghɨ wâyn Ahàzayà. Wu n-læ ghalɨ ŋweyn a Bet Shemèsh ɨ gvì nɨ̀ ŋweyn a Jèlusalèm ɨ bɨsɨ zɨ a mbàyn Jèlusalèm sɨ zɨ̀tɨ̀ a Eflèm sɨ ndù sɨ chem a ɨchfɨ mbàyn ibvɨ alèʼ kɨ dyefɨ̀ chem ntàmsɨ̀ ighɨ ì bò. ²⁴Wù n-læ meyn lì àso ɨkwo a baŋnɨ-a nɨ̀ a fɨfâ nô à jɨ̀m nɨ̀ ɨ̀fwo vzɨ̀ a wu nà n-ghɨ a ndo nɨ̀ Bôbo Fɨyini Obed Edòm ɨ tôʼnɨ̀ nɨ̀ ŋweyn. Wu n-li meyn kɨmɨ ɨ̀fwo ɨ jûŋ a ntoʼ baʼsɨ̂ nɨ̀ ghelɨ ghì a ghɨ n-tisɨ.

²⁵Amàzayà ɨ fòyn Judà nɨn læ meyn fi chi sɨ a bèŋsɨ̀ njvàsɨ̀ tâyn sɨ ibàm ta Jèhowàs ɨ fòyn Isìlæ̀ nɨn læ kfɨ. ²⁶Awo a fòyn Amàzayà a li-a kɨ̀ a n-zɨ̀tɨ sɨ koʼ sɨ chem a ngòʼsɨ nɨn ghɨ a ŋwàʼlɨ̀sɨ tɨ̂fòyn tɨ Judà nɨ̀ ɨ tɨ Isìlæ̀ ta ghɨ nyàʼ lèm. ²⁷Amàzayà nɨn læ kasi/bèynlɨ ibàm nɨ̀ Bôbo Fɨyini, ghɨ baʼtɨ sɨ zue ŋweyn a Jèlusalèm, wu leʼ ndù a ntèʼ Lakìsh mɨtì mbàynsɨ ŋweynsɨ ɨ jùmtɨ ndù nɨ̀ ŋweyn afu ɨ zue ŋweyn. ²⁸Ghɨ n-læ gvi nɨ̀ ìgvɨyn i ŋweyni atû nyàm kfaŋ ɨ gvi gvɨ̀mì ŋêyn ghɨ̀bo ŋweyn a ntèʼ Devìt.