2 Chronicles 30
Hèzèkayà ɨ yɨ ayɨ i yaʼsɨ
1Fòyn Hèzèkayà nɨn læ meyn tum jàŋtɨ̀ Isìlæ̀ nɨ̀ ghelɨ Judà nô ghɨ̀ jɨ̀m ɨ nyàʼ ŋwàʼlɨ̀sɨ̀ sɨ̂ ghelɨ Eflèm nɨ̀ ghelɨ Mànasè ɨ jàŋtɨ̀ àŋena na ghɨ gvi a ndo nɨ̀ Bôbo Fɨyini ghè a yì nà n-ghɨ a Jèlusalèm ɨ yɨ ayɨ iyaʼsɨ sɨ̂ Bôbo Fɨyini ɨ Fɨyini fɨ Isìlæ̀. 2Fòyn ŋêyn ghelɨ ghɨ tisɨnɨ baʼsɨ̂ nɨ̀ nchɨ̀yntɨ ghelɨ a Jèlusalèm nɨn choʼ meyn sɨ yɨ ayɨ iyaʼsɨ nâ kèynà a ànkùmtɨ̀ a njoŋ. 3Àŋena nà n-kaʼ ghɨ bû yɨ ayɨ nâ kèynà ɨlvɨ ghê a ghɨ n-nî ghɨ nà yɨ ateyn bòm ta ngàŋsɨ ndô Fɨyini sìsɨ̀ a sɨ n-lèm ngeŋsɨ àŋena nɨ̀ ìlayni ta isaʼi nɨn kɨŋ nà n-dvɨ̂ wì, afî ghɨ ta ghelɨ nà n-ghɨ bula ghɨ yvɨ̂ŋtɨ̀ a Jèlusalèm. 4Ikfâʼtɨ̀ nâ yeyni nà n-ghɨ àti-ati sɨ̂ fòyn Hèzèkayà ŋêyn ghelɨ nô ghɨ̀ jɨ̀m, 5àŋena ɨ kæ tum sɨ jàŋtɨ ghelɨ Isìlæ̀ nô ghɨ̀ jɨ̀m sɨ zɨ̀tɨ̀ a Beshebà sɨ ndù sɨ chem a Dân na àŋena gvi a Jèlusalèm ɨ̀ yɨ̀ ayɨ iyaʼsɨ sɨ̂ Bôbo Fɨyini ɨ Fɨyini fɨ Isìlæ̀.
6Fòyn nɨn tum meyn ghelɨ ghɨ teynɨ Isìlæ̀ nɨ̀ Judà ì jɨ̀m. Àŋena nà ndû nɨ̀ ŋwàʼlɨ̀sɨ̀ ma ghɨ fsɨ̀ sɨ̂ fòyn nɨ̀ sɨ lisɨ ma ghɨ fsɨ̀ sɨ̂ ghelɨ ghɨ tisɨnɨ ma ghɨ nyaʼ meyn ateyn na,
“Ghelɨ Isìlæ̀ yì kasi gvì sɨ̂ Bôbo Fɨyini ta ka wù kasi gvì a yi antêynɨ̀ zɨ̀ ghî a yì bœ̀ awu nɨ̀ tɨ̀fôyn tɨ Àsilìyàtɨ̀. 7Ka yì na ghɨ ta ghɨ̀bo ghi nɨ̀ woynà ghi a ghɨ nà n-yvɨnɨ wi Bôbo Fɨyini ɨ Fɨyini fɨ ghɨ̀bo àŋena wu wumsɨ àŋena kɨ̀ ta yì yeyn. 8Ka yì na to nɨ̀ àtu-a ta ghɨ̀bo ghi nɨn læ to. Yì na yvɨnɨ̂ Bôbo Fɨyini, yì gvi nà koʼsɨ̂ Bôbo Fɨyini a ndo ghè a wù lèm sɨ a nyɨŋ sɨ a mɨlvɨ ɨ̀n jɨ̀m ta ka wù na bu yabsɨ̂ wì ɨtoŋ sɨ̂ zɨ̀.
9Bôbo Fɨyini nɨn dyèyn àtem a juŋà fì kòynsɨ ìsuyn ma yì kæ kasi gvi sɨ̂ ŋweyn a wù ni a ghelɨ ghì a ghɨ n-to ghaytɨ lù nɨ̀ woynà ghi baʼsɨ̂ nɨ̀ woyn ghi koynsɨ isuyn sɨ̂ àŋena ɨ vìsi a àŋena kasi kfa sɨ ilaʼ afêyn. Yì kæ kasi gvì sɨ̂ Bôbo wù bû bèyn jɨm sɨ̂ zɨ̀.
10Ghelɨ ntum nâ ghì nɨn jelɨ meyn kɨ ntèʼ nɨ̀ ntèʼ ilaʼ i Eflèm nɨ̀ ìlaʼ i Mànasè ɨ ndu chem a Zevulùn. Mɨtì ghelɨ ateyn ɨ nà chyeʼ ghelɨ ntum ateyn. 11Àŋena nɨn chyeʼ mɨtì, ghɨli a Ashèl nɨ̀ Mànasè kɨ̀mɨ nɨ̀ Zebulùm ɨ suʼsɨ ngeŋsɨ àŋena ɨ ndù a Jèlusalèm. 12Fɨyini fɨ nɨn tisɨ meyn kɨmɨ ghelɨ Judà, àŋena nà kelɨ kɨ ìkfâʼtɨ̀ ìmòʼ iwo ghè a fòyn ŋêyn ghelɨ ghɨ tisɨnɨ nɨ̂n bè a ghɨ ìwo zɨ̀ a ŋwàʼlɨ̀ Fɨyini nà n-bê.
13A nà ghɨ a ànkùmtɨ̀ a njoŋ, anôyn a ghelɨ kɨ̀ sɨ idvɨ̀ ɨ yvɨ̀ŋtɨ̀ a Jèlusalèm sɨ yɨ ayɨ abayn bula fɨ̀shɨ̀k. 14A nà ghɨ ta àŋena zɨ̀tɨ̀ sɨ fèl, àŋena fvɨ̀sɨ̀ ɨbwâs ifu nɨ̀ mɨ̀yìnì baʼsɨ̂ nɨ̀ ɨvzɨ̂ a ghɨ nà n-nyoʼ ileŋ ateyn ɨ màʼ afoŋlɨ a Kidlòn.
15A se sɨ nà ghɨ a mɨchi mɨ̀vɨm ɨ̀n kæ̀ a ànkùmtɨ̀ a njoŋ, ghelɨ ateyn ɨ sɨ ayaʼ ayɨ iyaʼsɨ, ngàŋsɨ ndô Fɨyini baʼsɨ̂ nɨ̀ ghelɨ ndo nɨ̀ Levì ɨ nà sɨ wumi-à ɨ kæ lem ngeŋsɨ àŋena nɨ̀ ìlayni ta isaʼ i nà n-dyêyn ɨ gvi kɨmɨ nɨ̀ ìfu i nyoʼnɨ-i a ndo nɨ̀ Fɨyini fɨ. 16Àŋena nɨn nì tî ɨ kæ sɨ nà felɨ̀ ɨlwèʼ ghè isaʼ i Bôbo Fɨyini nɨn bè sɨ̂ àŋena toynɨ̂ a Mosìs ɨ wul ɨ̀ felɨnɨ nɨ̀ ɨ̀nfeynfɨ. 17Ghelɨ ndo nɨ̀ Levì nɨn sɨ meyn woyn njɨ̀sɨ̀ a yɨ iyaʼsɨ kɨ̀ sɨ idvɨ bòm ta àŋena nà n-layn wi ta isaʼi nɨn dyêyn ma àŋena kàʼ ghɨ bû lèm woyn njɨ̀ nɨ̀ àŋena sɨ a nyɨŋ sɨ̂ Bôbo Fɨyini. 18Nô mɨ ta ndvɨ̀ ghelɨ ghì a ghɨ n-gvì a Eflèm nɨ̀ Mànasè nɨ̀ Isakà kɨ̀mɨ nɨ̀ Zebulùn nɨ̀n bu læ lèm ngeŋsɨ àŋena nɨ̀ ìlayni ta isaʼi nɨn dyêyn, àŋena nɨn læ meyn yɨ ɨfwo ɨ yɨnɨ ayɨ iyaʼsɨ. Àŋena nà n-kelɨ wi sɨ yɨ kɨ ighel ta ghɨ n-læ nyàʼ mɨtì Hèzèkayà ɨ jèm sɨ̂ àŋena na Bôbo Fɨyini vzɨ̀ a wù n-nî awo a jûŋ lesɨ fu àŋena nô ghɨ̀ jɨ̀m/nô mɨ ndà. 19Wu nà n-jem na Bôbo lesɨ fù ghelɨ ghì a ghɨ n-læ choʼnɨ sɨ nà koʼsɨ/yvɨnɨ Bôbo Fɨyini ɨ Fɨyini fɨ ghɨ̀bo àŋena kèsa àŋena nɨn layn ta isaʼi nɨn dyêyn ma àŋena nɨn layn wi a.” 20Bôbo Fɨyini ɨ yvɨ ijêm i Hèzèkayà ɨ faŋ tɨ̀ fu ngeʼ sɨ̂ ghelɨ ateyn.
21Ghelɨ Isìlæ̀ ghì a ghɨ nà n-ghɨ a Jèlusalèm nɨn yɨ meyn àyɨ abayn bula fɨ̀shɨ̀k nɨ̀ ìsaŋlɨ-i, ngàŋsɨ ndô Fɨyinisɨ nɨ̀ ghelɨ ndo nɨ̀ Levì ɨ yem njàŋsɨ̀ nô mɨ achi à kà buʼ ɨ̀fwo ɨ Bôbo koʼsɨ̂ ŋweyn sɨ a mɨchi nsòmbo.
22Hèzèkayà ɨ tebtɨ ghelɨ Levì kûm dzɨ zɨ̀ a ka àŋena na kya sɨ faytɨ sɨ tisɨ ghelɨ na ghɨ koʼsɨ̂ Bôbo Fɨyini sɨ mɨchi nsòmbo, àŋena nà yɨ kɨ ɨwu àŋena ɨfwo ɨ yɨnɨ fu tɨ̀fu sɨ nà chi nɨ̀ mbôynɨ̀, koʼsɨ̀ Fɨyini ɨ Fɨyini fɨ ghɨ̀bo àŋena.
23Ghelɨ Isìlæ̀ nô ghɨ̀ jɨ̀m ɨ bɨmi sɨ yɨ sɨ kfeynsɨ ayɨ ateyn sɨ a mɨchi nsòmbo, yɨ-a saŋlɨ-a. 24Fòyn Hèzèkayà nɨn læ fu mbòŋsɨ̀ nkam nɨ̀ bzɨsɨ ighɨ nsòmbo, ghelɨ ghɨ tisɨnɨ ɨ fu mbòŋsɨ̀ nkam nɨ̀ bzɨsɨ nkamsɨ ìvɨm. Ngàŋsɨ ndô Fɨyini sìsɨ̀ kɨ̀ sɨ idvɨ̀ ɨ lèm ngeŋsɨ àŋena nɨ̀ ìlayni. 25Ghelɨ Judà nô ghɨ̀ jɨ̀m nà n-saŋlɨ-à, ngàŋsɨ ndô Fɨyinisɨ ɨ saŋlɨ-à nɨ̀ ghelɨ ndo nɨ̀ Levì baʼsɨ̂ nɨ̀ ghelɨ ghì a ghɨ n-kàli abàs ikuè a Isìlæ̀. Ghelɨ ɨtum ghì a ghɨ n-læ kàli abàs ikuè nɨ̀ ɨghî a ghɨ nà n-chi a Judà nà n-saŋlɨ̂ kɨ saŋlɨ. 26Isaŋlɨ i ghaʼnɨ-i nà n-ghɨ a Jèlusalèm bula yi timi nà ghɨ kɨ̀ sɨ zɨ̀tɨ̀ ɨtuʼ ta Sòlomòn ɨ wâyn fòyn Devìt nɨn koʼ ɨfòyn. 27Ngàŋsɨ ndô Fɨyinisɨ nɨ̀ ghelɨ ndo nɨ̀ Levì ɨ timi nà jêm na Bôbo boysɨ ghelɨ, Fɨyini fɨ yvɨ ijêm i àŋena iyvɨ.