2 Chronicles 32

Ghelɨ Asilìyà ɨ nù ghelɨ Judà

¹A nà n-ghɨ ta Hèzèkayà nì awo nâ kèynà nɨ̀ àtem a ŋweyn à jɨ̀mà, Sènàchelìb ɨ fòyn Asilìyà ɨ gvì sɨ nu Judà. Wu n-gvì tî ɨ jɨŋ kal ntèʼ zɨ̀ a ghɨ bàʼlɨ mbàyn jɨ̀ŋ kal kfâʼ kɨ na yi n-tɨm yɨ ntèʼsɨ ateyn nà kelɨ sɨ a ŋweyn a ngeŋ. ²Hèzèkaya ɨ yvɨ kɨmɨ na Sènàchelìb nà n-kɨŋ sɨ nu Jèlusalèm, ³wu bɨf sɨ̂ ghelɨ ghì a ghɨ nà n-tebtɨ ŋweyn baʼsɨ̂ nɨ̀ ghelɨ ghì a ghɨ nà n-ghɨ ɨtu sugèyʼsɨ̀ na àŋena feyn mu mɨ̀ ìsi i lɨmà-lɨ̀mà zɨ̀ a yi n-ghɨ wi antêynɨ̀ mbàyn, àŋena ɨ gàmtɨ̀ ŋweyn. ⁴Àŋena nɨn læ yvɨ tî ɨ baʼtɨ ànôyn a ghɨlûmnɨ̀ kɨ dvɨ-à àŋena ɨ fèyntɨ̀ àsɨ a lɨmà-lɨ̀mà nɨ̀ jva sìsɨ̀ a sɨ n-teynɨ chwô ilaʼ nâ ghàyn. Àŋena nà n-nî tèyn bòm ta àŋena nà n-bê sɨ a àŋena ngeŋsɨ na fòyn Asilìyà nɨn kelɨ wi sɨ gvì sɨ yeyn mu a Jèlusalèm sɨ idvɨ̀. ⁵Hèzèkayà ɨ kæ fèlɨ nô sɨ a ŋaŋ ɨ kasi bàʼlɨ̀ ɨ̀lwêʼ vzɨ̀ a wu nà n-ghɨ ma wu bɨytɨ meyn mbàyn Jèlusalèm ɨ bàʼlɨ̀ nchisɨ a mbàyn afu. Wù n-læ meyn bàʼlɨ̀ mbàyn ì lì ibàm i mbàyn nâ ghè ɨ faytɨ ɨ̀lwêʼ vzɨ̀ a ghɨ n-læ kfɨ̀ysɨ a ntèʼ Devìt. Wù n-læ meyn faytɨ kɨmɨ ɨ̀fwo iwòŋ kɨ̀ sɨ idvɨ̀ nɨ̀ nkyàsɨ iwòŋsɨ.

⁶Wu n-læ meyn choʼtɨ ɨ̀tu sugèyʼsɨ̀ na wu na tisɨ̂ ghelɨ ɨ yvɨ̀ŋtɨ̀ àŋena a ŋweyn asɨ ɨchfɨ mbàyn àyìsi ɨ tebtɨ àŋena ɨ bè na, ⁷“Yì tosɨ mɨtem mzɨ nà to-a. Ka yì na faynà kèsa sɨ boli bòm fòyn Asilìyà nɨ̀ ànôyn a sugèyʼsɨ̀ kèyn a kɨ ghɨ n-ghɨ ŋêyn ŋweyn bòm ta adyaʼ a dvɨnɨ-a nɨn ghɨ sɨ̂ ghesɨ̀nà chwô akî a kɨ n-ghɨ sɨ̂ àŋena. ⁸Wù n-kelɨ sugèyʼsɨ̀ sɨ dvɨ-à mɨtì a ghɨ kɨ ghelɨ. Bôbo nɨn ghɨ a ghesɨ̀nà abàs sɨ gàmtɨ ghesɨ̀nà sɨ nù a ghesɨ̀nà alèʼ.” Wu n-bè têyn, ghelɨ ŋweyn ɨ keli àdyaʼ ɨ tosɨ mɨ̀tem.

⁹A nà ghɨ achi a li-a, Sènachelìb ɨ nà sɨ ghɨ a Lakìsh ɨ tum chyeʼsɨ ŋweyn a Jèlusalèm sɨ̂ Hèzèkayà ŋêyn ghelɨ ghì a ghɨ nà n-chi a Jèlusalèm.

¹⁰Wù n-læ bè na yi n-kelɨ àtem a to-a yeʼtɨ̂ a gha ta yi n-ghɨ a Jèlusalèm ma ghɨ jɨŋ meyn kàl zɨ-a? ¹¹Wu n-be meyn kɨmɨ na Hèzèkayà nɨn lɨsɨ̂ zɨ̀ na yì jɨŋ kfɨ̀tɨ, kelɨ wi mu sɨ nyvɨ ta wù bè na, ‘Bôbo Fɨyini ɨ Fɨyini fɨ ghesɨ̀nà nɨn boysɨ̂ ghesɨ̀nà awu nɨ̀ fòyn Asilìyà.’ ¹²À n-læ bebsɨ kɨ nô Hèzèkayà ɨ bebsɨ ɨ̀lwêʼ vzɨ̀ nɨ̀ ɨ̀bwaŋ vzɨ̀ a ghɨ nà n-koʼsɨ Fɨyini ateyn ɨ bè sɨ̂ ghelɨ Judà nɨ̀ ghelɨ Jèlusalèm na yi n-kelɨ sɨ nà koʼsɨ Fɨyini kɨ̀ alèʼ àmòʼ, fu tɨ̀fu atû àbaŋ àmòʼ.

¹³Wà n-kya àwo kì a ghɨ̀bo ghem nɨ̀ mà nì sɨ̂ ghelɨ tɨlaʼ tɨ litɨ. Mɨ̀yìnì mɨ̀ ghelɨ tɨlaʼ nà n-kaʼ ghɨ bû fsɨ tɨlaʼ nâ tìtɨ̀ a ma awu. ¹⁴Wu n-be meyn kɨmɨ na fɨyini fɨ nɨn ghɨ wi a mɨyìnì mɨ̀ tɨ̀laʼ tèyntɨ̀ a ghɨ̀bo ghem nɨn læ bebsɨ a fɨ kàʼ a fɨ bœsɨ ghelɨ ɨ̀nfeynfɨ a ma awu. Wà na sɨ kfàʼ na fɨyini fyafɨ kàʼ a fɨ bœsɨ vâ sɨ a ma awu-a. ¹⁵Ka yi n-yvɨ̀tɨ sɨ̂ Hèzèkayà, wù n-lɨsɨ̂ zɨ̀. Fɨyini fɨ ilaʼ i li nɨn ghɨ wi a fɨ kàʼ a fɨ bœsɨ ghelɨ ilaʼ nâ ghì a ma awu, kèsa awu nɨ̀ ghɨ̀bo ghem. Fɨyini fɨ nɨn kfeynɨ̂ wì sɨ bœ̀sɨ zɨ sɨ a ma awu.

¹⁶Chyeʼsɨ Sènachelìbsɨ̀ nà n-taŋî àwo a bɨ-a kûm Bôbo Fɨyini taŋî kûm wul ɨ̀ felɨnɨ nɨ̀ Fɨyini fɨ ɨ Hèzèkayà. ¹⁷Fòyn Sènàchelìb nɨn læ meyn nyaʼ kɨmɨ ŋwàʼlɨ̀sɨ̀ ɨ telɨ Bôbo Fɨyini ɨ Fɨyini fɨ Isìlæ̀ ɨ bè na kɨ ighel ta mɨ̀yinì mɨ̀ tɨ̀laʼ tɨ litɨ nɨn bu læ fsɨ ghelɨ ɨmêyn sɨ a ma awu, Fɨyini fɨ Hèzèkayà nɨn bœ̀sɨ̀ wì ghelɨ ɨ̀nfeynfɨ sɨ a ma awu. ¹⁸Chyeʼsɨ Asilìyà sìsɨ̀ a sɨ n-gvi nɨ̀ ŋwàʼlɨ̀sɨ ateyn ɨ nà byatɨ̂ taŋî itaŋi i Hibɨ̀lù sɨ̂ ghelɨ ghì a ghɨ n-yvɨ̀ŋtɨ ɨwuyn mbàyn ntèʼ, sɨ fàynsɨ àŋena ta ka yi na boynɨ̂ sɨ tɨm sɨ yɨ ntèʼ àteyn. ¹⁹Chyeʼ nâ sèynsɨ nà n-taŋî kûm Fɨyini fɨ Jèlusalèm kɨ̀ ighel ta àŋena nà n-taŋi kûm mɨ̀yìnì mɨ̀ ghelɨ ghɨ li a mbzɨ ma ghɨ faytɨ nɨ̀ ɨ̀wu.

²⁰Wu n-taŋi tî, fòyn Hèzèkayà ŋêyn nfèʼtɨ̀ ì ghaʼnɨ Isayà ɨ wâyn Amòz ɨ jèm sɨ̂ Bôbo Fɨyini iyvɨ dzɨ-à kûm ìwo ateyn. ²¹Bôbo Fɨyini nɨn tum meyn nchì ì lì yi zuetɨ sugèyʼsɨ Asilìyà nɨ̀ ɨ̀tu sugèyʼsɨ ateynsɨ nô ɨ̀ jɨ̀m baʼsɨ̂ nɨ̀ chyeʼsɨ àŋenasɨ. Sènachelìb ɨ nà sɨ kelɨ kɨ sɨ kfa nɨ̀ ìwumi-i. A nà ghɨ ta wù kfa ndù zɨ a ndô fɨyini fɨ ŋweynfɨ, woyn ŋweyn ghɨ li ɨ sù ŋweyn nɨ̀ fɨ̀nyuèfɨ wu kfɨ.

²²À ti ta Bôbo Fɨyini nɨn læ boysɨ Hèzèkayà ŋêyn ghelɨ Jèlusalèm sɨ awu nɨ̀ Sènachelìb ɨ fòyn Asilìyà, ɨ bœsɨ kɨmɨ sɨ ɨwu nɨ̀ ghelɨ ghɨ li ghɨ̀ jɨ̀m. Bôbo ɨ nà tôʼnɨ̀ nɨ̀ àŋena kɨ̀ ɨbwâs ɨ̀ jɨ̀m. ²³Sɨ zɨ̀tɨ̀ achi nâ ghè, ghelɨ ghɨ dvɨnɨ ɨ nà sɨ ngvɨmlɨ̂ fòyn Hèzèkayà, gvî nɨ̀ ìfu-i sɨ̂ Bôbo Fɨyini nɨ̀ ɨ̀fwo ɨ jûŋ sɨ̂ Hèzèkayà. Nô mɨ ìlaʼ ì ka ɨ nà ki Hèzèkayà wu koʼnɨ-à.

Hèzèkayà ɨ koʼi ɨ to ɨ nà ghaŋsɨ̂ ɨ̀wuyn.

²⁴À n-læ meyn nà ghɨ ɨtuʼ nâ ghè, Hèzèkayà ɨ nà sɨ koʼî nô sɨ a ŋaŋ kya kɨ na yi n-kfɨ-a. Wu jèm sɨ̂ Bôbo Fɨyini wu bèynsɨ̀ ɨ dyèyn nchwæ ìwo i kaynɨ-i sɨ̂ ŋweyn. ²⁵Mɨtì Hèzèkayà ɨ nà ghaŋsɨ̂ ɨ̀wuyn ɨ faŋ tɨ̀ fu àyòŋnɨ̀ sɨ̂ Bôbo Fɨyini kûm àwo kì nô à jɨ̀m a wù nì sɨ̂ ŋêyn ghelɨ Judà nɨ̀ ghelɨ Jèlusalèm. ²⁶Hèzèkayà ɨ bèynsɨ̀ àtem a ŋweyn sɨ ɨwuyn ɨ ghaŋsɨnɨ, ghelɨ Jèlusalèm ɨ ni kɨmɨ tì, Bôbo Fɨyini ɨ faŋ tɨ̀ ni ngeʼ sɨ̂ àŋena sɨ chem ta Hèzèkayà kfɨ.

²⁷Ighaʼ i Hèzèkayà ɨ nà n-ndû kɨ nɨ̀ àsɨ-a ghelɨ ngvɨmlɨ̂ ŋweyn. Wù n-baʼlɨ meyn ɨ̀lwêʼ sɨ nà lem aso ɨkwo nɨ̀ ŋweyn ateyn nɨ̀ ngòʼsɨ jûŋsɨ̀ nɨ̀ ɨ̀fwo ɨ lɨmtɨnɨ ɨ jûŋ nɨ̀ nkyàsɨ iwòŋsɨ kɨ̀mɨ nɨ̀ tɨ̀nkì tɨ ɨfwo ɨkwo ɨtwo kɨ tɨ̀ jɨ̀m. ²⁸Wù n-læ meyn bàʼlɨ kɨmɨ ndosɨ sɨ nà lem asaŋ, nɨ̀ mɨ̀lûʼ ɨn fɨ kɨ̀mɨ nɨ̀ mɨ̀vɨ̂l nɨ̀ mbàynsɨ̀, ghɨ lêm nyamsɨ ateyn nɨ̀ sɨ lisɨ ghɨ lêm bzɨsɨ ateyn. ²⁹Bôbo Fɨyini nɨn læ meyn fu ighaʼ i bemnɨ-i sɨ̂ Hèzèkayà wu bàʼlɨ̀ ntèʼsɨ ɨ nà kelɨ nyamsɨ mbòloʼ nɨ̀ bzɨsɨ kɨ̀ sɨ idvɨ̀.

³⁰À n-læ feyn Hèzèkayà ɨchfɨ̂ vzɨ̀ a jvâ Gihòn nà n-fvɨ̂ ateyn ɨ bàs yi kàlì dzɨ abàs ghè a ɨchfɨ̂ iyvɨ nɨn sœ ateyn a ntèʼ Devìt. Wu nà n-lêm àwù nô mɨ a gha yi nà n-ndû kɨ nɨ̀ àsɨ-a. ³¹A nà ghɨ ta ghelɨ ghɨ tisɨnɨ a Babilòn tùm ghelɨ na ghɨ ndu bɨ̀f sɨ̂ Hèzèkayà iwo i kaynɨ-i zɨ̀ a yi tî gàyn a ŋweyn ilaʼ, Fɨyini fɨ ɨ visi ŋweyn sɨ mòm sɨ nà kya ikfâʼtɨ̀ i ŋweyn nô ì jɨ̀m.

³²Awo a li-a kɨ kûm ta Hèzèkayà nɨn læ saʼ nɨ̀ àwo kì a wu nà n-nî ta wù n-yvɨnɨ Fɨyini nɨn ghɨ ma ghɨ nyaʼ meyn a ŋwàʼlɨ̀ nɨ̀ Isayà ɨ nfèʼtɨ̀ ì ghaʼnɨ ɨ wâyn Amòs a ŋwàʼlɨ̀ nɨ̀ tɨ̀fôyntɨ Judà nɨ̀ tɨ̀fôyn tɨ Isìlæ̀tɨ̀. ³³Hèzèkaya nɨn læ kfa yeyn ghɨ̀bo ŋweyn ghɨ gvɨ̀mì ŋweyn a ngvɨ̀misɨ nɨ̀ woyn Devìt abàs ikuè. Ghelɨ Judà nô ghɨ̀ jɨ̀m nɨ̀ ɨ ghɨ Jèlusalèm nɨn læ meyn ngvɨmlɨ ŋweyn ta wù kfɨ, Mànasè ɨ wâyn ŋweyn ɨ koʼ ɨfôyn.