2 Chronicles 36
Fòyn Joyahàz ɨ saʼ Judà
1Ghelɨ ilaʼ nâ ghèyn nɨn li meyn Jèhòyahàz ɨ wâyn Jòsayà ɨ yisi ŋweyn sɨ a fòyn a Jèlusalèm wu yɨ ndô bò ŋweyn. 2Jèhòyahàz nɨn koʼ ɨfôyn a Judà, ghɨ bèŋsɨ̀ mɨ̀vɨm ɨ̀n bò njvàsɨ̀ tal ɨ saʼ a Jèlusalèm sɨ a njoŋsɨ̀ tal. 3Nekò ɨ fòyn Ijìb ɨ suʼsɨ ŋweyn sɨ a fòyn ɨ nì na ghelɨ Judà laʼ kilùsɨ aso ɨkwo a fɨfâ nkamsɨ̀ tal nɨ̀ ìghɨ ì tal kɨ̀mɨ nɨ̀ kilùsɨ aso ɨkwo a baŋnɨ-a mɨ̀vɨm ɨ̀n tal njvàsɨ̀ kæ̀. 4Fòyn Ijìb ɨ yisi Elìyakìm ɨ wâynà Jèhòyahàz sɨ a fòyn a Judà nɨ̀ Jèlusalèm ɨ kfɨnɨ ìzɨyn i ŋweyn ɨ fu Jèhòyakìm. Mɨtì ɨ bèʼi ndù nɨ̀ Jèhòyahàz a Ijìb.
Jèhòyakìm ɨ koʼ ɨfôyn a Judà
5Jèhòyakìm nɨn læ koʼ ɨfôyn a Judà ghɨ bèŋsɨ̀ mɨ̀vɨm ɨ̀n bò njvàsɨ̀ tâyn ɨ saʼ sɨ a bèŋsɨ̀ ìvɨm njvà ìmòʼ. Wù n-læ meyn nì mbɨ sɨ̂ Bôbo Fɨyini ɨ Fɨyini fɨ ŋweyn. 6Nèbukànezà ɨ fòyn Babilòn ɨ læ nù ŋweyn ɨ kulɨ ŋweyn nɨ̀ mɨ̀nchaʼ ma ghɨ faytɨ nɨ̀ ìdyayni ɨ ndù nɨ̀ ŋweyn a Babilòn. 7Nèbòkànezà nɨn li meyn kɨmɨ ɨ̀fwo ɨkwo ɨtwo sɨ a ndo nɨ̀ Bôbo Fɨyini ɨ ndu lèm a ŋweyn a ntoʼ.
8Awo a li-a kì a Jèhòyakìm nɨn nì ta wu nà n-saʼ baʼsɨ̂ nɨ̀ àwo a bɨ-a kɨ̀mɨ nɨ̀ àwo a nyelɨnɨ-a nɨn ghɨ a ŋwàʼlɨ̀ nɨ̀ tɨ̀fôyntɨ Judàtɨ̀ nɨ̀ ɨtɨ Jèlusalèmtɨ̀ ta ghɨ nyàʼ lèm. Jèhòyakìm ɨ koʼ ɨfôyn a ŋweyn alèʼ.
Jèhòyakìm ɨ saʼ a Judà
9Jèhòyakìm nɨ̀n læ koʼ ɨfôyn a Judà ghɨ bèŋsɨ̀ ìvɨm njvàsɨ̀ nfama ɨ nà saʼ a Jèlusalèm sɨ a njoŋsɨ̀ tal nɨ̀ mɨ̀chi ìvɨm. Wù n-læ meyn nì mbɨ asɨ nɨ̀ Bôbo Fɨyini. 10A nà n-ghɨ ta bèŋ chfɨ̀, fòyn Nèbòkànezà ɨ tum ghɨ ndu lì ɨ gvì nɨ̀ ŋweyn a Babilòn ɨ li baʼsɨ ɨ̀fwo ɨ jûŋ vzɨ̀ a wu nà n-ghɨ a ndo nɨ̀ Bôbo Fɨyini, wu yisi Zèdèkayà sɨ a fòyn a Judà.
Zèdèkayà ɨ saʼ ɨfôyn a Judà
11Zèdèkayà nɨ̀n læ koʼ ɨfôyn a Judà ghɨ bèŋsɨ̀ mɨ̀vɨm ɨ̀n bò njvà ìmòʼ ɨ saʼ a Jèlusalèm sɨ a bèŋsɨ̀ njvà ìmòʼ. 12Wu n-læ meyn nì mbɨ asɨ nɨ̀ Bôbo Fɨyini ɨ Fɨyini fɨ ŋweynfɨ ɨ faŋ tɨ̀ ngvɨ̀mlɨ ngêŋ ŋweyn sɨ yvɨtɨ iwo i Bôbo Fɨyini zɨ̀ a Jèlìmayà ɨ nfèʼtɨ̀ ì ghaʼnɨ nà n-fêʼtɨ̀. 13Wù n-læ meyn to nɨ̀ àtu-a sɨ̂ fòyn Nèbòkanezà vzɨ̀ a wù n-læ tsɨyn ŋweyn wu yɨ mɨkâyn izɨyn nɨ̀ Fɨyini fɨ/ nì ìchfɨ̂nɨ̀ na wù na yvɨnɨ̂ ŋweyn. Zèdèkayà ɨ læ kasi nà to nɨ̀ àtu-a ɨ tosɨ àtem a ŋweyn ɨ bèyn jɨm sɨ̂ Bôbo Fɨyini ɨ Fɨyini fɨ Isìlæ̀. 14Ngàŋsɨ ndô Fɨyini sìsɨ̀ a sɨ nà n-tisɨ sɨ lisɨ nɨ̀ ghelɨ ghɨ tisɨnɨ nô ghɨ̀ jɨ̀m ɨ bèynlɨ̀ ɨ nà sɨ to ndû kɨ ndu nɨ̀ àtu-a, jûmtɨ̀ àwo a bɨ-a kì a ghelɨ tɨlaʼ ghì a ghɨ n-chi a àŋena ngùŋ nɨn nî. Àŋena nɨn nì tî ɨ bebsɨ ndô Fɨyini zɨ̀ a wu n-lèm sɨ a nyɨŋ a Jèlusalèm.
15Bôbo Fɨyini ɨ Fɨyini fɨ ghɨ̀bo àŋena nɨn tum meyn ghelɨ ntum sɨ̂ àŋena ɨ fi tum bòm ta wu nà n-kelɨ ìkoynsɨ isuyn sɨ̂ àŋena kôŋ wì sɨ bebsɨ alêʼ kì a wù n-chi ateyn. 16Mɨtì, àŋena nà lûʼsɨ̀ ghelɨ ɨtum ghì a Fɨyini fɨ tum ɨ chas iwo i Fɨyini, chyeʼtɨ̂ nfèʼtɨ̀sɨ Fɨyini sɨ ghaʼnɨsɨ. Àŋena nà n-nî kɨ tì nô ta ka Bôbo Fɨyini nyoʼsɨ ɨtoŋ sɨ̂ ghelɨ ŋweyn, ma nô wùl kàʼ wu bû bèynsɨ. 17Bôbo Fɨyini ɨ nì fòyn Babilòn ɨ koʼ nù àŋena ɨ zuetɨ woyn tɨ̂kùŋ nɨ̀ woynda ngòynsɨ̀, ɨ zuetɨ kɨmɨ ghɨ̀lûmnɨ̀ nɨ̀ ghɨ̀ki nô mɨ nɨ̀ ghelɨ ghì a ghɨ nà n-ghɨ a ndo nɨ̀ Bôbo Fɨyini nɨ̀ fɨ̀nyuefɨ. Bôbo Fɨyini nɨn fu meyn ghelɨ Judà nô ghɨ̀ jɨ̀m awu nɨ̀ Nebòkànezà. 18Fòyn Babilòn nɨn læ meyn bèʼi ndù nɨ̀ ɨ̀fwo vzɨ̀ a wu nà n-ghɨ a ndo nɨ̀ Bôbo Fɨyini, ɨbelɨnɨ nɨ̀ ɨlelɨnɨ ɨ beʼi kɨmɨ ìghaʼ i ndô Fɨyini kɨ̀mɨ nɨ̀ izɨ i fòyn kɨ̀mɨ nɨ̀ izɨ i chyeʼsɨ. 19Àŋena nɨn nyoʼ meyn ndô Bôbo Fɨyini nɨ̀n ntòʼsɨ̀ nô sɨ̀ jɨ̀m ɨ bebsɨ nô mɨ àfo a juŋà à kà ta kɨ nà n-ghɨ ateyn ɨ bèytɨ̀ mbàyn Jèlusalèm.
20Wu n-nì tî ɨ beʼi lù nɨ̀ ghelɨ ghì a àŋena nɨn leʼ na ka ghɨ zue àŋena ɨ ndù nɨ̀ àŋena a Babilòn sɨ a ghelɨ a wù ghàytɨ iwòŋ. Àŋena nɨn ndù tî ɨ nà sɨ felɨ̀ sɨ̂ Nèbòkànezà ŋêyn woyn ŋweyn sɨ chem ta ɨfôyn Babilòn ndu sɨ̂ ghelɨ Belsìyà. 21À ti ta iwo zɨ̀ a Bôbo Fɨyini nɨn bè ɨ toynɨ a Jèlìmayà nɨn læ kfeyn. Nse ìlaʼ nâ yèyn nà n-kelɨ sɨ chi sɨ a bèŋsɨ̀ mɨ̀vɨm nsòmbo bula ghɨ fêl sɨ luynsɨ mɨchi mɨ̀ ɨ̀tuʼ ilaʼ mzɨ̀ a ghelɨ ateyn nà n-lêm.
22À nà n-ghɨ a bèŋ àsɨ ghè a Silùs ɨ fòyn Belsìyà nɨn zɨtɨ sɨ saʼ Babilòn, Bôbo Fɨyini ɨ kùm àtem a Silùs sɨ chwòsɨ isaʼ kɨ̀ ilaʼ afî a wu nà n-saʼ ì jɨ̀m ɨ fi nì na ghɨ nyaʼ nyaʼ. Wu n-nì têyn sɨ luynsɨ iwo zɨ̀ a Bôbo nɨn bè toynɨ̂ a Jèlìmayà. 23À ti iwo zɨ̀ a Silùs ɨ fòyn Belsìyà bè,
“Bôbo Fɨyini ɨ Fɨyini fìfɨ̀ a fɨ n-ghɨ iyvɨ fu meyn tɨ̀laʼ tɨ mbzɨ nô tɨ̀ jɨ̀m sɨ̂ mà, wù choʼ meyn na mà na bàʼlɨ̀ ndô ŋweyn a Jèlusalèm ilaʼ i Judà. Nô mɨ ndà vzɨ̀ a wù n-ghɨ wul ɨ̀ Fɨyini ndu afu ghɨ ni ifêl nâ yèynì, ma jêm na Bôbo Fɨyini ɨ Fɨyini fɨ ŋweynfɨ na ghɨ ŋêyn ŋweyn amoʼ.”