2 Chronicles 5

¹À nà n-ghɨ ta Sòlomòn bàʼlɨ̀ mèsì ndô Bôbo Fɨyini, wu zɨsɨ ɨ̀fwo vzɨ̀ a bò ŋweyn Devìt nɨ̀n læ lèm sɨ a nyɨŋ sɨ̂ Bôbo Fɨyini ateyn. Ɨfwo ateyn nà n-ghɨ àso ɨkwo a baŋnɨ-a nɨ̀ a fɨfâ baʼsɨ̂ kɨmɨ nɨ̀ ɨ̀fwo ɨlvɨ. Wu n-lèm ɨfwo nâ wèyn ɨlwèʼ ghè a n-ghɨ lem ɨfwo ateyn a ndo nɨ̀ Bôbo Fɨyini.

Ghɨ gvì nɨ̀ àntayntayn a mɨ̂kàyn nɨ̀ Bôbo a ndô Fɨyini.

²Fòyn Sòlomòn nɨ̀n læ meyn jàŋtɨ chyeʼsɨ Isìlæ̀sɨ̀ nɨ̀ ghelɨ ghì a ghɨ n-tisɨ asas a ndosɨ a Isìlæ̀ nô ghɨ̀jɨ̀m na ghɨ gvi a Jèlusalèm. Wu nà n-kɨŋ na àŋena li àntayntayn a mɨ̂kàyn nɨ̀ Bôbo a ntèʼ nɨ̀ Devìt a Zayòn gvì nɨ̀ ànkeyna a ndo nɨ̀ Bôbo Fɨyini a Jèlusalèm. ³Aŋena yvɨ̀ŋtɨ̀ nô ghɨ̀ jɨ̀m asɨ nɨ̀ fòyn achi àyɨ i baʼlɨ mɨtwò a njoŋsɨ nsòmbo.

⁴A nà ghɨ ta chyeʼsɨ Isìlæ̀sɨ̀ gvì meyn, ghelɨ ndo nɨ̀ Levì ɨ chàʼsɨ̀ àntayntayn a mɨ̂kàyn nɨ̀ Bôbo Fɨyini, ⁵baʼsɨ̂ nɨ̀ fɨ̀ndo fɨ Bôbo Fɨyini fɨ nɨ̀ ɨ̀fwo ɨ laynɨ vzɨ̀ a wu n-ghɨ antêynɨ̀ àteyn ɨ koʼ nɨ̀ ɨ̀ŋweyn a Jèlusalèm. À n-læ bèʼi ngàŋsɨ ndô Fɨyini ɨ ghelɨ ndo nɨ̀ Levì ɨfwo ateyn. ⁶Fòyn Sòlomòn ŋêyn ghelɨ Isìlæ̀ ghì nô ghɨ̀ jɨ̀m ɨ chɨ̀yntɨ̀ ɨ yvɨ̀ŋtɨ̀ asɨ àntayntayn a mɨ̂kàyn nɨ̀ Bôbo Fɨyini ɨ sɨ bzɨsɨ nɨ̀ nyamsɨ mbòloʼsɨ sɨ ifu ma ghɨ kàʼ ghɨ bû taŋ.

⁷Ngàŋsɨ ndô Fɨyinisɨ̀ ɨ kæ bèʼi àntayntayn a mɨ̂kàyn nɨ̀ Bôbo Fɨyini sɨ zɨ sɨ lèm isas i tɨ̂wòtɨ chelùbsɨ̀ afî alèʼ ghè a kɨ layn gòʼsɨ̀ a ndo nɨ̀ Bôbo Fɨyini. ⁸Tɨwôtɨ chelùb nâ titɨ̀ ɨ chɨytɨ àntayntayn ateyna baʼsɨ̂ nɨ̀ mbàŋ sîsɨ̀ a ghɨ n-ghalɨ chàʼsɨ̀ àntayntayn a mɨ̂kàyn nâ kì ateyn. ⁹Mbàŋsɨ ateynsɨ nà n-dyêblɨ̀ nô sɨ a ŋaŋ ma wùl ɨ̀ timi asɨ alèʼ ghè a kɨ layn gòʼsɨ̀ a wù na yeyn alèʼ ki a sɨ ndù gòʼsɨ̀ ateyn, mɨtì ma wùl ɨ̀ tìmi abe wù bû yeyn. Mbàŋ nâ sìsɨ̀ bu ghɨ kɨ afu sɨ koʼ sɨ chem layn. ¹⁰À nà ghɨ kɨ ɨ̀bwâŋ ɨ ngòʼsɨ̀ vzɨ̀ ɨ̀ bwò a Mosìs nɨn læ we antàyntayn a mɨ̂kàyn nâ ghè a kfɨyn Sinày alèʼ ghè a Bôbo Fɨyini nɨn læ yɨ mɨkâyn ŋêyn ghelɨ Isìlæ̀ ta àŋena fvɨ̀ sɨ a Ijìb.

¹¹Ngàŋsɨ ndô Fɨyinisɨ̀ nɨn zɨsɨ àntayntayn a mɨ̂kàyn nâ kì tî ɨ fvɨ̀ sɨ alèʼ ghè a kɨ layn gòʼsɨ̀. Ngàŋsɨ ndô Fɨyini sìsɨ̀ nô sɨ̀ jɨ̀m a sɨ nà n-ghɨ afu nà n-ghɨ ma sɨ lêm meyn ngeŋsɨ àŋena sɨ a nyɨŋ sɨ̂ Bôbo Fɨyini kèsa ghɨ fvɨ̀ nô mɨ anòyn àkà. ¹²Ghelɨ ndo nɨ̀ Levì ghì a ghɨ n-yem njàŋsɨ̀ nà n-ti a ngùŋ àbaŋ ifu abàs ghè a ɨchfɨ̂ iyvɨ i nɨn sal ateyn. À nà n-ghɨ Asàf ŋêyn Hemàn nɨ̀ Jedutùn nɨ̀ woyn àŋena ghɨlûmnɨ baʼsɨ̂ nɨ̀ ghelɨ ndo nɨ̀n àŋena. Àŋena nà n-ghɨ ma ghɨ màʼ meyn dàla sɨ fɨfâsɨ̀ ma ghɨ faytɨ meyn tɨm, buʼ ɨ̀fwo ɨ kfasɨnɨ, buʼ nchùmsɨ nɨ̀ tɨ̀luŋtɨ . Àŋena nà n-buʼ tì, ngàŋsɨ ndò Fɨyinisɨ̀ ɨ ti a àŋena a ngùŋ ɨvɨ nɨ̀ ghelɨ mɨvɨm bò toŋ tɨ̀soŋ. ¹³Ghelɨ ghì a ghɨ nà n-toŋ tɨsoŋ nɨ̀ ghelɨ ghɨ yemnɨ nà chɨ̂yntɨ yem koʼsɨ̂ Bôbo Fɨyini fî fu àyòŋnɨ̀ sɨ̂ ŋweyn. Àŋena nà n-yem nô nɨ̀ gyasɨ tosɨ toŋ tɨ̀soŋ buʼ ɨ̀fwo ɨ kfasɨnɨ nɨ̀ ɨ̀fwo ɨ buʼnɨ ɨlvɨ Koʼsɨ̂ Bôbo Fɨyini bê na,

“Bôbo Fɨyini nɨn jofà, ikôŋ i mɨ̂kàyn nɨ̀ ŋweyni faŋ meyn kɨ̀ samoʼ.”

Kɨ̀ têyn mbàʼsɨ̀ ɨ suʼi ɨ luyn a ndô nɨ̀ Bôbo Fɨyini. ¹⁴Sɨ n-lùyn tî, yi nà bu boynɨ̂ wì sɨ̂ ngàŋsɨ ndô Fɨyini sɨ nà nî ifêl i àŋena bòm ta iŋwâʼ i Bôbo Fɨyini nà ghɨ ma yi lùyn meyn a ndô Fɨyini.