2 Kings 13

Jèhohàz ɨ koʼ ɨfôyn a Isìlæ̀

¹Jèhohàz ɨ wâyn Jehù nɨn læ koʼ ɨfôyn a Isìlæ̀, ma à sɨ ghɨ bèŋsɨ̀ mɨ̀vɨm ɨ̀m bò njvàsɨ̀ tal ta Jòwâsh ɨ wâyn Ahàzayà nɨn saʼ Judà. Jèhohàz nɨn læ saʼ Isìlæ̀ sɨ a bèŋsɨ̀ njvàsɨ̀ nsòmbo chî a Sàmalìyà. ²Wu n-ni meyn mbɨ asɨ nɨ̀ Bôbo Fɨyini bòm ta wù n-læ nà nî kɨ àwo a bɨ-a kì a Jèlobòwàm ɨ wâyn Nebàt nɨn læ nà ni-à ɨ nì ghelɨ Isìlæ̀ ɨ nì mbɨ. Wù n-bu læ kasi sɨ a ibàm i mbɨsɨ nâ ghè. ³Wu n-nì tî Bôbo Fɨyini ɨ nyòʼsɨ̀ ɨ̀toŋ sɨ̂ ghelɨ Isìlæ̀ nô sɨ a ndyèyn ìdyà ɨ nì Hazèl ɨ fòyn Alàm ŋêyn wâyn ŋweyn Ben-hadàd ɨ tɨm yɨ ghelɨ Isìlæ̀ kɨ̀ ingal ingal.

⁴Jèhohàz ɨ kæ dzɨ sɨ̂ Bôbo Fɨyini na wù dyeyn atem a juŋà, Bôbo Fɨyini ɨ yvɨ idzɨ̂ i ŋweyn bòm ta wù n-læ meyn yeyn dzɨ zɨ̀ a ghelɨ Alàm nɨn nyablɨ nɨ̀ ghelɨ Isìlæ̀ ateyn. ⁵Bôbo Fɨyini ɨ tum wul na wù gamtɨ ghelɨ Isìlæ̀, wu gàmtɨ̀ ɨ fsɨ àŋena sɨ awu nɨ̀ ghelɨ Alàm. Wu n-fsɨ tî, àŋena ɨ kasî nà chî a àŋena mɨ̂bè kɨ̀ ta ghɨ nà n-chɨ sɨ asɨ. ⁶Mɨtì àŋena ɨ faŋ tɨ̀ kàsi sɨ a ibàm i mbɨsɨ ghê a Jèlobòwàm ŋêyn ghelɨ ndo nɨ̀ ŋweyn nɨn læ nà ni-à ɨ nì ghelɨ Isìlæ̀ ɨ faŋ ɨ na nî kɨ mbɨ. Àŋena nɨn fi meyn visi ànfèʼsɨ̀ a Ashelà kɨ nà ti kɨ a Sàmalìyà.

⁷Ghɨ n-læ meyn zuetɨ sugèyʼsɨ Jèhohàz a faŋ kɨ sugèyʼ sìsɨ̀ a sɨ n-nyɨŋ atû nyamsɨ kfaŋ mɨ̀vɨm ɨ̀n tâyn nɨ̀ mɨ̀nchaʼ ìvɨm baʼsɨ̂ nɨ̀ sugèyʼ sîsɨ̀ a sɨ n-jelɨ̀ nɨ̀ ɨ̀vɨ nkamsɨ ìvɨm bòm ta fòyn Alàm nà n-ghɨ ma wù zuetɨ meyn sɨ lisɨ. Wù n-læ meyn gvàsɨ̀ àŋena, àŋena nà ghɨ ta abɨ̂l àlèʼ ghè a ghɨ n-chyeʼ asaŋ ateyn.

⁸Awo a li-a kì a kɨ n-læ gàyn ta Jèhohàz nà n-saʼ nɨ̀ àwo kì a wù n-læ nì baʼsɨ̂ nɨ̀ tɨ̀woŋ tìtɨ̀ a sugèyʼsɨ ŋweynsɨ nɨn tɨm yɨ nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Isìlæ̀tɨ̀. ⁹Jèhohàz nɨn læ kfɨ ɨ kfa ndu yeyn ghɨ̀bo ŋweyn ghɨ gvɨ̀mì ŋweyn a Sàmalìyà, wâyn ŋweyn Jèhowàsh ɨ koʼ ɨfôyn.

Jèhowàsh ɨ koʼ ɨfôyn a Isìlæ̀

¹⁰Jèhowàsh ɨ wâyn Jèhohàz nɨn læ koʼ ɨfôyn a Isìlæ̀ ma à sɨ ghɨ bèŋsɨ̀ mɨ̀vɨm ɨ̀n tal njvàsɨ̀ nsòmbo ta Jòwâsh nɨn nsaʼ Judà. Jèhowàsh nɨn læ saʼ Isìlæ̀ sɨ a bèŋsɨ̀ njvàsɨ̀ ntufa chî a Sàmalìyà. ¹¹Wu n-ni meyn mbɨ asɨ nɨ̀ Bôbo Fɨyini bòm ta wù n-bu læ kasɨ sɨ ibàm awo a bɨ-a ghê a Jèlobòwàm ɨ wâyn Nebàt nɨn læ nà ni-à ɨ nì ghelɨ Isìlæ̀ ɨ nì mbɨ. Jèhowàsh nɨn læ meyn faŋ ɨ nà chî kɨ antêynɨ̀ mbɨsɨ nâ ghè.

¹²Awo a li-a kì a kɨ n-læ gàyn ta Jèhowàsh nà n-saʼ nɨ̀ àwo kì a wù n-læ nì kɨ̀mɨ nɨ̀ tɨ̀woŋ tìtɨ̀ a sugèyʼsɨ ŋweynsɨ nɨn læ tɨm yɨ baʼsɨ̂ nɨ̀ ìwoŋ zɨ̀ a wù n-læ tɨm ŋêyn Amàzayà ɨ fòyn Judà nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨfôyn tɨ Isìlæ̀tɨ̀.

¹³Jèhowàsh nɨn læ kfɨ ɨ kfa ndu yeyn ghɨ̀bo ŋweyn ghɨ gvɨ̀mì ŋweyn a ngvɨ̀misɨ nɨ̀ tɨ̀fôyn tɨ Isìlæ̀tɨ̀ a Sàmalìyà, wâyn ŋweyn Jèlobòwàm ɨ koʼ ɨfôyn.

¹⁴À nà n-ghɨ ɨtuʼ fɨli jæ ta ka fòyn Jehowàsh kfɨ, ikoʼi i bemnɨ-i i li ɨ ku Elishà wu ghɨ sɨ ndu kɨ indû ateyn, Jèhowàsh ɨ fòyn Isìlæ̀ ɨ kàli ndù sɨ kini ŋweyn. Wu n-kàli tî ɨ nà sɨ dzɨ-à bɨfɨ sɨ̂ ŋweyn na, “Bò ìfèl nɨ̀ mà, bò ìfèl nɨ̀ mà! Sugèyʼsɨ Isìlæ̀sɨ̀ ti kàʼ sɨ nì nô ghà bula vâ a?”

¹⁵Elishà ɨ be sɨ̂ ŋweyn na, “Li gvi nɨ̀ fɨ̀nchyafɨ nɨ̀ àwoŋa,” wu li gvì nɨ̀ ɨ̀ŋweyn. ¹⁶Elishà ɨ fi bè sɨ̂ fòyn Isìlæ̀ na, “Ghal fɨ̀nchya ɨ nà gvɨ̂tɨ̀ sɨ tɨm.” A nà ghɨ ta fòyn ghal fɨ̀nchya fɨ ateyn, Elishà ɨ ghal ɨwu ŋweyn. ¹⁷Wu n-ghàl tî ɨ bè sɨ̂ fòyn na, “Dzɨ̀si wundù zɨ̀ a yì n-ghɨ abàs ghè a ɨchfɨ̂-iyvɨ i nɨn sal ateyn ɨ tɨm fvɨ̀sɨ̀ ìwoŋ ateyn. Wu dzɨ̀si kɨ ta Elishà bè ɨ tɨm fvɨ̀sɨ̀ ìwoŋ ateyn Elishà ɨ bè na, “À n-ghɨ fɨ̀nchya fɨ Bôbo Fɨyini dyêyn na wu nì ni-à a wà tɨm yɨ ɨ̀ mèsì kɨ̀ mesi ghelɨ Alàm nɨ̀ ɨ̀nfeynfɨ a Afèk.”

¹⁸Wu n-taŋi tî ɨ bè sɨ̂ fòyn na wù li awoŋ a li-a kì a kɨ faŋ, wu lì Elishà ɨ bè sɨ̂ ŋweyn na, wù tɨm sùʼsɨ a nse, wu tɨm kɨ ìngal ì tal ɨ visi. ¹⁹Ɨtoŋ Elishà ɨ yaf wu bè na, “Wà nì nà ghɨ sɨ tɨm ìngal ì tâyn kèsa ntufa ta ka wà tɨm yɨ̀ ghelɨ Alàm ɨ̀ bèbsɨ àŋena nô ghɨ̀ jɨ̀m. Mɨtì wa n-tɨm yɨ àŋena lvɨ̂yn kɨ ìngal ì tal.”

²⁰Elishà ɨ taŋi tì ɨ kfɨ ghɨ gvìmì ŋweyn.

A nà n-ghɨ tì ghelɨ Mowàb ɨ zɨ̂ choŋ ɨ̀fwo ɨ ghelɨ Isìlæ̀ nɨ̀ bèŋ kɨ bèŋ sɨ̀ jɨ̀m. ²¹A læ nà ghɨ achi a li-a ghelɨ Isìlæ̀ ghɨ li ɨ nà gvɨmì wul kɨ̀ têyn ɨ yeyn ta anôyn a ghelɨ ghɨ choŋnɨ-a nɨn gvî, àŋena màʼ ìgvɨyn i wûl àteyn isè nɨ̀ Elishà. Ghɨ n-màʼ tî igvɨyn ateyn i ɨ kùm ɨ̀vɨf ɨ Elishà, wùl àteyn ɨ kasi làlì sɨ a ikfɨ, ɨ làlì ɨ timi iyvɨ.

²²Hazèl ɨ fòyn Alàm nɨn nyablɨ meyn nɨ̀ ghelɨ Isìlæ̀ a mɨchi ghè a fòyn Jèhohàz nà n-saʼ Isìlæ̀ ateyn. ²³Mɨtì Bôbo Fɨyini ɨ koynsɨ ìsuyn sɨ̂ àŋena ɨ dyèyn àtem a juŋà sɨ̂ àŋena bòm mɨ̀kâyn mzɨ̀ a wù n-læ yɨ ŋêyn Abɨ̀làhâm nɨ̀ Yisàk nɨ̀ Jàkôb. Bôbo Fɨyini bû tìmi nà kôŋ sɨ bebsɨ àŋena kèsa sɨ beyn jɨm sɨ̂ àŋena sɨ koʼ sɨ chem layn.

²⁴Hazèl ɨ fòyn Alàm nɨn læ kfɨ, wâyn ŋweyn Ben-hadàd ɨ koʼ ɨfôyn. ²⁵Ben-hadàd ɨ wâyn Hazèl nɨ̂n koʼ ɨfôyn tì, Jèhowàsh ɨ wâyn Jèhohàz ɨ kasi tɨm yɨ ntèʼsɨ Isìlæ̀ sîsɨ̀ a Hazèl nɨn læ tɨm yɨ sɨ̂ bò ŋweyn ɨ Jèhohàz. Jèhowàsh nɨn læ tɨm yɨ Ben-hadàd ìngal ì tal ɨ kæ kasi sɨ fsɨtɨ ntèʼsɨ Isìlæ̀ nâ sìsɨ̀.