2 Kings 19

Fòyn Hèzèkayà ɨ taŋi ŋêyn Isayà ɨ nfèʼtɨ̀ ì ghaʼnɨ

¹À nà n-ghɨ ta fòyn Hèzèkayà yvɨ saʼgha zɨ̀ a ghɨ gvì nɨ̀ ɨ̀nyeyn, wu bàytɨ̀ ndzɨsɨ ŋweyn ɨ màʼ fɨ̀ntsɨ ɨ zɨ a ndo nɨ̀ Bôbo Fɨyini. ²Wù n-tum meyn Elìyakìm ta wù nà n-tisɨ awo a ntoʼ nɨ̀ Shebnà ɨ wul ɨ̀ nyaʼnɨ nɨ̀ ngàŋ ndô Fɨyini i lema, ma àŋena màʼ kɨ fɨ̀ntsɨ na àŋena ndu yeyn nfèʼtɨ̀ Isayà ɨ wâyn Amòz. ³Àŋena ndù ɨ bè sɨ̂ ŋweyn na fòyn Hèzèkayà bè na, “Layn nɨn ghɨ àchi a bɨ-a, achi a ngeʼ, achi a wumɨnɨ-a, achi ɨlvɨ ta ɨlvɨ kfeyn na ghɨ bzɨ wayn, nà ateyn na kelɨ wi adyaʼ sɨ tsɨyn. ⁴Mɨ n-jêm na Bôbo Fɨyini ɨ Fɨyini fɨ ghesɨ̀nà yvɨ ndi sèynsɨ̀ a fòyn Asilìyà tum na atu a sugèyʼsɨ̀ nɨ̀ ŋweyn a gvi tèlɨ̀ Fɨyini fìfɨ̀ a fɨ n-chi, jêm na Bôbo Fɨyini ɨ fyafɨ fu ngeʼ sɨ̂ ŋweyn bòm àwo kì a wù bè. Mɨ n-chwotɨ̂ na wà jem sɨ̂ ghesɨ̀ ghî a ghɨ faŋ.”

⁵A nà n-ghɨ ta ghelɨ ntum nɨ̀ fòyn Hèzèkayà ndù fèʼtɨ̀ iwo zɨ̀ sɨ̂ nfèʼtɨ̀ Isayà a fòyn bè, ⁶wu bè na àŋena ndu bè sɨ̂ bò ìfèl nɨ̀ àŋena na Bôbo Fɨyini bè na, “Ka wa n-fàyn bòm ndi sìsɨ̀ a ghelɨ ghɨ felɨnɨ nɨ̀ fòyn Asilìyà gvì tèlɨ ma nɨ̀ ɨ̀nseynsɨ. ⁷Yvɨtɨ, mɨ n-ni-à a fòyn Asilìyà yvɨ saʼgha a yì ni a wù kasi kfa sɨ a ŋweyn ilaʼ a ghɨ zue ŋweyn iwòŋ afu.”

⁸À nà n-ghɨ ta atu a sugèyʼsɨ̀ nɨ̀ ghelɨ Asilìyà kàsi ndù a Lakìsh ɨ yvɨ na fòyn Asilìyà ndù meyn sɨ nu ntèʼ Libnà, wu ndù afu sɨ yeyn fòyn.

⁹Sènàchelèb ɨ fòyn Asilìyà nɨn yvɨ meyn na Tilhakà, ɨ wul ɨ̀ Kûsh ma à ti fòyn Ijìb nɨn gvî sɨ nu ŋweyn. Wu n-yvɨ tî ɨ fi tum ghelɨ ghɨ felɨnɨ nɨ̀ ŋweyn sɨ̂ fòyn Hèzèkayà ɨ bè na, ¹⁰“Yì ndu bè sɨ̂ Hèzèkayà ɨ fòyn Judà na, ka wa n-vìsi fɨyini fìfɨ̀ a wà n-yeʼtɨ ateyn tì lɨsɨ vâ ɨlvɨ ta fɨ bè na, ‘Fòyn Asilìyà nɨn tɨm yɨ wi Jèlusalèm.’ ¹¹Samoʼ wà yvɨ meyn awo kì nô à jɨ̀m a tɨfôyn tɨ Asilìyàtɨ̀ nì sɨ̂ tɨ̀laʼ tɨ litɨ ɨ̀ bèbsɨ tɨ̀laʼ tɨ ateyn tɨ nô tɨ̀ jɨ̀m. Ka wà na kfâʼtɨ̀ na fɨyini fyafɨ nì bœ̂sɨ̀ và. ¹²Mɨ̀yìnì mɨ̀ tɨ̀laʼ tìtɨ̀ a ghɨ̀bo ghem nɨn læ bebsɨ nɨn bu læ gàmtɨ tɨlaʼ tɨ ateyn. À nà n-ghɨ mɨyini mɨ̀ Gozàn nɨ̀ ɨmzɨ̂ Halàn nɨ̀ ɨmzɨ̂ Lesèf nɨ̀ ɨmzɨ̂ ghelɨ Edɨ̀n ghì a ghɨ nà n-chi a Tel Asà. ¹³Fòyn Hamàt nɨ̀ fòyn Alfàd bà? Fòyn Layì nɨ̀ fòyn Sèfàvayìm nɨ̀ fòyn Henà baʼsɨ̂ nɨ̀ ɨ wû Ivà bà?”

Hèzèkayà ɨ jèm

¹⁴Fòyn Hèzèkayà nɨn læ fsɨ ŋwàʼlɨ̀ zɨ̀ sɨ̂ ghelɨ ntum ghì a fòyn Asilìyà tum ɨ jàŋ ŋwàʼlɨ̀ àteyn, ɨ lu koʼ ndù a ndô Fɨyini ɨ yàs ɨ lèm ŋwàʼlɨ̀ àteyn asɨ nɨ̀ Bôbo Fɨyini. ¹⁵Wu n-lèm tî ɨ jèm sɨ̂ Bôbo Fɨyini bê na, “Bôbo Fɨyini, Fɨyini fɨ Isìlæ̀ wà n-duʼ achɨ a tɨ̂fòyn nɨ̀ và antêynɨ̀ nɨ̀ chelùbsɨ̀ atû àntayntayn a mɨ̂kàyn. À n-ghɨ kɨ và a wà n-saʼ tɨlaʼ tɨ̀ jɨ̀m a mbzɨ ma à fàytɨ và iyvɨ nɨ̀ nse. ¹⁶Yeyn awo kì a kɨ n-gâyn sɨ̂ ghès a Bôbo Fɨyini. Yvɨ ndi sìsɨ̀ a Sènàchelìb tum na ghɨ gvi tèlɨ và, ɨ Fɨyini fìfɨ̀ a fɨ n-chi nɨ̀ ɨ̀nseynsɨ a.

¹⁷Bôbo Fɨyini, yi n-ghɨ kɨ nô samoʼ na tɨfôyn tɨ Asilìyàtɨ zuetɨ meyn ghelɨ tɨlaʼ ghèyn ɨ̀ bèbsɨ tɨ̀laʼ tɨ ateyn. ¹⁸Tɨfôyn nâ tèyntɨ nyoʼ meyn bèbsɨ ɨ̀nfyèʼsɨ̀ ɨ tɨlaʼ nâ wèyn bòm ta ɨfwo nâ wèyn nà n-ghɨ ma à fàytɨ ghelɨ nɨ̀ ɨ̀nkàʼ ɨ̀ fàytɨ kɨ̀mɨ nɨ̀ ngòʼsɨ̀. ¹⁹Bôbo Fɨyini feyfɨ, fvɨ̀sɨ læ̂ ghès lvɨ̂yn sɨ awu nɨ̀ fòyn Asilìyà ta ka tɨlaʼ tɨ̀ jɨ̀m a mbzɨ keli na à n-ghɨ kɨ và Bôbo Fɨyini ghɨ Fɨyini.”

Isayà ɨ tum ntum sɨ̂ fòyn Hèzèkayà

²⁰Nfèʼtɨ̀ Isayà ɨ wâyn Amòz nɨn tum meyn ntum sɨ̂ fòyn Hèzèkayà ɨ bè na, “Bôbo Fɨyini ɨ Fɨyini fɨ Isìlæ̀fɨ̀ bè na, ma yvɨ meyn ìjêm ì zæ kûm Sènachelìb ɨ fòyn Asilìyà. ²¹À n-ghɨ ìwo zɨ̀ a Bôbo Fɨyini bè kûm ŋweyn tèyn:

“Waynda ngòyn Zayòn wu kya wi wùl ɨ lûmnɨ̀

nɨn ki và wa ghɨ wi afo fî wêsɨ̀ và.

Waynda ngòyn Jèlusalèm nɨ̀n ki và ta wà nyɨŋ leʼ ndû

nêʼtɨ̀ àtu.

²²Wà n-telɨ̂ ndà bê àwo a bɨ-a kûm ŋweyn a?

Wà n-byal sɨ̂ ndà?

Wà n-ki ndà ikèʼ a?

Wà n-taŋî sɨ̂ Fɨyini fɨ laynɨfɨ nɨ̀ ghelɨ Isìlæ̀fɨ̀.

²³Wà tum meyn ghelɨ,

ghɨ gvî tèlɨ Bôbo Fɨyini.

Wà be meyn na,

“Mɨ n-kelɨ mɨ̀nchaʼ mɨ̀ ìwòŋ mɨ dvɨ̂ kɨ̀ tèyn.

Ma koʼ meyn chem a kfɨynsɨ,

ma koʼ meyn chem nô a fɨ̂nchoynchoyn fɨ kfɨ̂yn Lebanòn.

Ma gvelɨ meyn ɨ̀nkâʼ mɨ̀ lebanòn mzɨ̀ a mɨ̀ n-dyêblɨ̀ chwô ɨ̂n lì ghɨ jâŋ na ɨnkâʼ mɨ̀ sedà,

ma gvelɨ meyn ɨ̀gum ɨ jûŋ

Ma ndu meyn chèm a ngòʼsɨ akù a Lebanòn,

akù afî a ɨ̀nkàʼ ɨ̀n jùŋ nɨ̀n ghɨ ateyn.

²⁴Ma tɨm meyn tɨ̀bɨ tɨ mu a tɨlaʼ tɨ atum

ɨ̀ nyvɨ̀ mû mɨ̀ àteyn.

Mà tî nà kelɨ sugèyʼsɨ̀ sɨ nyɨŋ ta ngumisɨ,

sɨ zɨ̂ se sɨ dyàŋ a jvasɨ Ijìb, ɨvɨ àŋena yumsɨ mu nô ɨ̀n jɨ̀m.”

²⁵“‘Samoʼ wà yvɨ meyn.

Na mɨ n-læ baʼtɨ iwo nâ yèynì nô sɨ a ndyèyn.

Mɨ n-læ baʼtɨ iwo ateyn nô sɨ ɨtuʼ ɨ mu.

Ma nî meyn lvɨ̂yn yi gâyn.

Wà bɨytɨ meyn ntèʼsɨ ghaʼlɨnɨ sìsɨ̀ a ghɨ bàʼlɨ̀ mbàyn jɨ̀ŋ kàli,

à faŋ kɨ̀ mɨchɨ mɨ̀ ndosɨ.

²⁶Àŋena bu tî nà fî kelɨ àdyaʼ,

ɨ̀ nà sɨ faynà fî wumi-à.

Àŋena sɨ ghɨ ta ɨnfûʼ ɨtwaʼ.

Ta afûʼ a bola.

Ta afûʼ a kɨ fvɨ̀ atû ndo,

ɨ̀ se sɨ koʼ chuè nyôʼ kɨ kfɨ.

²⁷Mɨtì mɨ n-kya àlêʼ kì a wà n-chi ateyn

kya ɨlvɨ vzɨ̀ a wà n-seʼ ateyn nɨ̀ ɨ̀lvɨ vzɨ̀ a wà n-kfa,

kya àwo kì a wà n-bê kûm mà nɨ̀ ɨ̀toŋ ɨ yafɨnɨ.

²⁸Mɨ n-wê fɨ̀nchaʼ femfɨ a wa azue

ɨ̀ we fɨ̀nchaʼ a wa ɨchfɨ̀ nà gûbtɨ̀ và ateyn.

ɨ̀ nì a wà kasi

ɨ̀ ndù kɨ̀ a dzɨ ghê a wà tî gvì ateyn,

bòm ta wà n-bê àwo a bɨ-a kûm mà,

ma ma yvi meyn na wà n-to nɨ̀ àtu a.’

²⁹Nfèʼtɨ̀ Isayà nɨn taŋi tî, ɨ bè sɨ̂ fòyn Hèzèkayà na, “Ɨyêyn nɨn ghɨ nchwæ sɨ dyeyn sɨ̂ và na Bôbo Fɨyini nɨn taŋî kɨ samoʼ.

“À na ghɨ a bêŋ afêyn a wà yɨ ɨfwo ɨ yɨnɨ bula wà fêl,

a à na ghɨ ànkùmtɨ̀ a bêŋ a wà yɨ ɨ̀nchwò ateyn.

Mɨtì à na ghɨ ibàm i bêŋsɨ̀ nâ ghàyn sɨ̀ bò a wà toʼ ɨfwo ɨ̀ kfì,

ɨ̀ yel ɨnkâʼ mɨ̀ mɨ̀tam nà kfɨl mɨ̀tam mɨ̀ àteyn.

³⁰Ghelɨ ghì a ghɨ n-faŋ a Judà

nɨn lemâ ɨ̀ bzɨ woyn kɨ̀ ta aghaŋ ɨnkàʼ a nî kɨ to a nse mɨ lema ɨ kola mɨ̀tam.

³¹Ghelɨ ghɨ li nɨn faŋ a Jèlusalèm,

a anôyn a ghêl à faŋ a kfɨ̂yn Zayòn.

Bôbo Fɨyini ɨ nì nî ìwo ateyn bòm ìkôŋ i ŋweyn sɨ̂ ghelɨ ŋweyn.

³²“Iyeynì nɨn ghɨ ìwo zɨ̀ a Bôbo Fɨyini bè kûm fòyn Asilìyà.

“Wù læ̀ bu zɨ̂ wì a ntèʼ afêyn,

kèsa sɨ tɨm nô mɨ ìwoŋ na yi zɨ chèm ateyn.

Wù læ̀ bu gvî wì a ntèʼ nâ ghàyn nɨ̀ nkyà ìwòŋ,

ɨ̀ læ̀ faŋ tɨ̀ gèmtɨ̀ sɨ kal nɨ̀ ntèʼ àteyn.

³³Fòyn Asilìyà læ̀ kasî kfâ kɨ a dzɨ ghê a wù tî gvì ateyn.

Wù læ̀ bu zɨ̂ wì a ntèʼ afêyn.

À bè Bôbo Fɨyini.

³⁴Mɨ nì kɨ̂ŋtɨ̀ ntèʼ yèyn ɨ̀ bœ̀sɨ̀ ntèʼ àteyn,

bòm wul ɨ vzɨ̀ a mɨ n-ghɨ ɨ̀ŋweyn ɨ̀ bœ̀sɨ̀ bòm Devìt ɨ wul ɨ̀ felɨnɨ nɨ̀ mà.”

³⁵A nà ghɨ nɨ̀ntuʼ achi nâ ghè nchì Bôbo Fɨyini ɨ ndu zuetɨ ghelɨ nkam ɨvɨ nɨ̀ ghelɨ nkamsɨ mɨ̀vɨm nfama njvàsɨ̀ tâyn alèʼ ghè a ghelɨ Asilìyà bɨ̀ ateyn. Ghelɨ ghì a ghɨ faŋ ɨ bɨs ɨ làlì ɨ yeyn tɨgvɨyn tɨ ghêl kɨ̀ ɨlwêʼ ɨ̀ jɨ̀m. ³⁶Sènàchelìb ɨ fòyn Asilìyà ɨ yeyn tî ɨ leʼ lù sɨ alèʼ ghè a àŋena bɨ̀ ateyn ɨ kasi ndù ɨ nà chî a Ninivè.

³⁷A læ nà ghɨ achi a li-a wu koʼsɨ̂ Nislòch ɨ fɨyini fɨ ŋweyn a ndo nɨ̀ ɨnfeynfɨ, woyn ghɨ lûmnɨ̀ nɨ̀ ŋweyn ghɨ̀ bò, ɨ Adlamelèk ŋêyn Shàlezà ɨ zue ŋweyn ɨ leʼ ndù ilaʼ i Alalàt, Esàhadòn ɨ wâyn ŋweyn ɨ lûmnɨ̀ ɨ koʼ ɨfôyn.