2 Kings 25

¹Zèdèkayà nɨn læ to nɨ̀ atu-a sɨ̂ Bôbo Fɨyini tì, a nà ghɨ a mɨchi ìvɨm a njoŋsɨ ìvɨm a bêŋsɨ̀ bulamòʼ ta wù n-saʼ, Nèbùkànezà ɨ fòyn Babilòn ŋêyn sugèyʼsɨ ŋweynsɨ nô sɨ̀ jɨ̀m ɨ gvì sɨ nu ghelɨ Jèlusalèm. Àŋena nɨn gvì tî ɨ gèmtɨ̀ ɨ kal nɨ̀ ntèʼ àteyn ɨ bàʼlɨ̀ ɨ̀fwo sɨ nà timî atu àteyn nû ghelɨ Jèlusalèm. ²Àŋena nɨn læ gèmtɨ kal nɨ̀ ntèʼ àteyn ɨ faŋ kɨ afu sɨ chem a bêŋ ta Zèdèkayà nɨn saʼ. ³A nà ghɨ a mɨchi bulamòʼ a njoŋ sɨ̀ kæ̀, jèŋ i bemnɨ ɨ ku ntèʼ àteyn, nô àfo a ɨ nà ghɨ wi sɨ yɨ. ⁴Sugèyʼsɨ Babilònsɨ̀ ɨ bùʼ àbûʼ ɨwuyn mbàyn Jèlusalèm, a ni nà ghɨ nɨ̀ntuʼ, sugèyʼsɨ Judàsɨ̀ nô sɨ̀ jɨ̀m ɨ leʼ fvɨ̀ ɨchfɨ mbàyn afî a wu nà n-ghɨ a nfaynɨsɨ mbàyn sɨ̀ bò a ngùŋ gvèyn nɨ̀ fòyn nô mɨ ta sugèyʼsɨ Babilònsɨ̀ nà n-ghɨ ma sɨ jɨŋ meyn kàli ntèʼ nâ zɨ̀. Àŋena nɨn fvɨ̀ tî ɨ nyɨŋ ndù dzɨ a ibal i Alabà. ⁵Mɨtì sugèyʼsɨ Babilònsɨ̀ ɨ nyɨŋ ibàm nɨ̀ fòyn Zèdèkayà ɨ ndu ghal ŋweyn ibal i Jèlikò. Sugèyʼsɨ ŋweynsɨ nô sɨ̀ jɨ̀m ɨ leʼ visi ŋweyn ɨ gwòsɨ̀ ɨ nyɨŋnɨ, ⁶ghɨ ghal ŋweyn ɨ ndù nɨ̀ ŋweyn sɨ̂ fòyn Babilòn a Liblà wu saʼ ŋweyn. ⁷Sugèyʼsɨ Babilònsɨ̀ ɨ zuetɨ woyn ghɨ lûmnɨ̀ nɨ̀ Zèdèkayà kɨ̀ nô a ŋweyn asɨ ɨ bòʼ ɨ fvɨ̀sɨ̀ àsɨ a ŋweyn ɨ kul ŋweyn nɨ̀ nchaʼsɨ ma ghɨ faytɨ nɨ̀ ìdyayn i ɨ li ndù nɨ̀ ŋweyn a Babilòn.

⁸A nà ghɨ a mɨchi nsòmbo a njoŋ sɨ̀ tâyn a bêŋsɨ̀ njvàsɨ̀ bulamòʼ ta Nèbùkànezà ɨ fòyn Babilòn nɨn saʼ, Nèbùzaladàn ɨ wul ɨ̀ felɨnɨ nɨ̀ fòyn Babilòn, atu a Sugèyʼsɨ̀ kì a sɨ n-chi fòyn ɨ gvì a Jèlusalèm. ⁹Wu n-gvì tî ɨ nyòʼ ndô Bôbo Fɨyini nɨ̀ ntoʼ baʼsɨ̂ nɨ̀ ndo sɨ jûŋsɨ̀ a Jèlusalèm nô sɨ̀ jɨ̀m. ¹⁰Sugèyʼsɨ Babilòn sìsɨ̀ nô sɨ̀ jɨ̀m a Nèbùzaladàn nà n-tisɨ nɨn bɨytɨ meyn mɨ̀zɨ mɨ̀ mbàyn mzɨ̀ a yì jɨ̀ŋ kàli ntèʼ Jèlusalèm. ¹¹Nèbùzaladàn, atu a sugèyʼsɨ̀ nɨ̀ fòyn Babilòn ɨ ghaytɨ ɨ lù nɨ̀ ghelɨ ghì a ghɨ n-faŋ a ntèʼ Jèlusalèm baʼsɨ̂ nɨ̀ ɨghî a ghɨ n-læ fu ngeŋsɨ àŋena sɨ̂ fòyn Babilòn wu ghaytɨ àŋena. ¹²Mɨtì Nèbùzaladàn ɨ visi ghelɨ ànfɨf ghɨ li a ntèʼ nâ ghè na ghɨ na felɨ̀ gveynsɨ mɨ̂tam nɨ̀ gveynsɨ ɨfwo ɨ yɨnɨ.

¹³Sugèysɨ Babilònsɨ̀ nɨn koytɨ meyn ɨ̀tôʼ vzɨ̀ a wu nà n-ghɨ a ndo nɨ̀ Bôbo Fɨyini ma ghɨ faytɨ nɨ̀ ìdyayn i nɨ̀ ɨ̀fwo vzɨ̀ a ghɨ n-beʼì mu ateyn wu kelɨ àkal baʼsɨ̂ nɨ̀ àfo a mu a ghaʼnɨ-a kì a ghɨ n-toŋtɨ na jva i ghaʼnɨ ma ghɨ faytɨ nɨ̀ ìdyayn i ɨ li ndù nɨ̀ ìdyayn ateyn i a Babilòn. ¹⁴Àŋena nɨn li meyn lu kɨmɨ nɨ̀ ntòynsɨ̀ nɨ̀ fɨsɨ nɨ̀ ɨ̀fwo vzɨ̀ a ghɨ n-bâʼ abvɨ ateyn a nkfɨ̀sɨ lâm kɨ̀mɨ nɨ̀ ɨ̀kfaŋ baʼsɨ̂ nô mɨ nɨ̀ gha ta ghɨ nà n-nî ifêl ateyn a ndô Fɨyini ma ghɨ faytɨ nɨ̀ ìdyayn i. ¹⁵Nèbùzaladàn ɨ li lù nɨ̀ ɨ̀kfaŋ vzɨ̀ a ghɨ n-chuf ɨvɨ̀s ateyn nɨ̀ ɨ̀kfaŋ ɨ ghaʼlɨnɨ vzɨ̀ a ghɨ nà n-we mɨluŋ mɨ̀ nyamsɨ ateyn sɨ nà mɨsì-à baʼsɨ̂ nô mɨ nɨ̀ ghà vzɨ̂ a ghɨ n-faytɨ nɨ̀ àso ɨkwo a baŋnɨ-a kèsa aso ɨkwo a fɨfâ kɨ kelɨ wi ilɨŋ.

¹⁶Idyayn i ɨtòʼ vzɨ̀ ɨ̀ bwò nɨ̀ iyi afo a mu a ghaʼnɨ-a kì a ghɨ n-toŋtɨ na jva i ghaʼnɨ baʼsɨ̂ nɨ̀ iyi ɨfwo vzɨ̀ a ghɨ n-beʼì mu ateyn kɨ kelɨ àkal a fòyn Sòlomòn nɨn læ faytɨ ɨ lèm a ndô Fɨyini nà n-dvɨ̂ nô sɨ a ŋaŋ ma ghɨ kàʼ ghɨ bû fèʼ. ¹⁷Nô mɨ àtôʼ à kà nà n-dyêf chwô ntàmsɨ̀ nfama, atu ateyn kì a kɨ n-ghɨ ta abalì ma ghɨ faytɨ nɨ̀ ìdyayn i tî ɨ dyefɨ̀ chem ndû ntàm ìmòʼ nɨ̀ àbeʼa ma ghɨ nyòtɨ̀ kal nɨ̀ ɨ̀fwo ta ghɨ bo wu ghɨ ta mɨtam mɨ̀ bòmeglanèt ma ghɨ faytɨ nɨ̀ ìdyayn i. Ɨfwo nâ vzɨ̀ ɨ̀ bwò nà n-ghɨ ma ghɨ faytɨ wu na ghɨ kɨ ighɨ ìmòʼ.

¹⁸Nèbùzaladàn ɨ atu a sugèyʼsɨ̀ kì a kɨ nà n-chi fòyn nɨn ghal meyn Sèlayà ɨ ngàŋ ndô Fɨyini i ghaʼnɨ nɨ̀ Zèfànayà, ankùmtɨ̀ a ngàŋ ndô Fɨyini i ghaʼnɨ nɨ̀ ghelɨ ghì a ghɨ nà n-chî ndô Fɨyini ghɨ̀ tal ɨ lù nɨ̀ àŋena. ¹⁹Wù n-ghal meyn lu kɨmɨ nɨ̀ wul ɨ vzɨ̀ a wù n-tisɨ sugèyʼsɨ̀ baʼsɨ̂ nɨ̀ ghelɨ ghì a ghɨ n-tebtɨ fòyn ghɨ̀ tâyn antêynɨ̀ nɨ̀ ghelɨ ghì a ghɨ n-læ faŋ a ntèʼ. Wù n-li meyn lu kɨmɨ nɨ̀ wul ɨ̀ nyaʼnɨ vzɨ̀ a wu nà n-nyâʼ azɨyn a sugèyʼsɨ̀ a Babilòn baʼsɨ̂ nɨ̀ ghelɨ Judà ghɨ li ghì a ghɨ nà n-bu ghɨ a Jèlusalèm mɨ̀vɨ̂m ntufa. ²⁰Nèbùzaladàn nɨ̂n li àŋena nô ghɨ̀ jɨ̀m ɨ ndù nɨ̀ àŋena sɨ̂ fòyn Babilòn a Liblà. ²¹Fòyn ɨ bè ghɨ zuetɨ àŋena a ntèʼ Liblà a Hamàt.

À ti ta fòyn Nèbùkànezà nɨn læ ghaytɨ lu nɨ̀ ghelɨ Judà sɨ a àŋena ilaʼ.

²²Nèbùkànezà ɨ fòyn Babilòn nɨ̀n choʼ Gèdàlayà ɨ wâyn Ahikàm na wù na saʼ ghelɨ ghì a wù vìsi a Judà. Ahikàm nà n-ghɨ wâyn Shafàn. ²³À nà n-ghɨ ta ɨtu sugèyʼsɨ Judà nô ɨ̀ jɨ̀m baʼsɨ̂ nɨ̀ sugèyʼ sìsɨ̀ a àŋena nà n-tisɨ yvɨ na fòyn Babilòn choʼ meyn lèm Gèdàlayà sɨ a bò ntèʼ a Judà, àŋena ndu yeyn ŋweyn a Mizbà. Ɨtu sugèyʼsɨ̀ nâ vzɨ nà n-ghɨ Ishmàyêl ɨ wâyn Nètanayà nɨ̀ Jòhanàn ɨ wâyn Kalìyà kɨ̀mɨ nɨ̀ Sèlayà ɨ wâyn Tanhumèt ɨ wul ɨ̀ Netofàt baʼsɨ̂ nɨ̀ Jàzànayà ɨ wâyn Makà ŋêyn sugèyʼ sɨ ŋweynsɨ. ²⁴Gèdàlayà ɨ yɨ mɨkâyn ŋêyn àŋena nɨ̀ sugèyʼ sìsɨ̀ a àŋena nà n-tisɨ ɨ bè na, “Ka yì na fâyn ghelɨ Babilòn. Yì kæ dùʼì nà chî ilaʼ afêyn, ngvɨmlɨ̂ fòyn Babilòn a nô mɨ ghà na ndû kɨ a jûŋ sɨ̂ zɨ̀.”

²⁵Wu n-bè mɨ tì a nà ghɨ a njoŋsɨ nsòmbo a bêŋ nâ ghè, Ishmàyêl ɨ wâyn Nètanayà, ɨ wâyn Elishamà ɨ wâyn ntoʼ ɨ ndù ŋêyn ghelɨ ìvɨm ɨ zue Gèdalayà kɨmɨ nɨ̀ ghelɨ Judà baʼsɨ̂ nɨ̀ ghelɨ Babilòn ghì a ghɨ nà n-ghɨ ŋêyn Gèdàlayà a Mizbà. ²⁶Yi n-gàyn têyn ghelɨ Judà nô ghɨ̀ jɨ̀m ɨ ghɨ bolɨ nɨ̀ ghɨ to baʼsɨ̂ nɨ̀ ɨ̀tu sugèyʼsɨ̀ ɨ leʼ ndù a Ijìb bòm ta àŋena nà n-fâyn ghelɨ Babilòn.

Ghɨ fvɨ̀sɨ̀ Jèhòyachìn sɨ a nchaʼ

²⁷Ivɨl-Mèlodàk nɨ̀n læ koʼ ɨfôyn a Babilòn ma à sɨ ghɨ bèŋsɨ̀ mɨ̀vɨm ɨ̀n tal njvàsɨ̀ nsòmbo ta ghɨ ghal Jèhòyachìn. A nà ghɨ a mɨchi mɨ̀vɨm ɨ̀m bò njvàsɨ̀ nsòmbo a njoŋsɨ njvàsɨ̀ bò wu fvɨ̀sɨ̀ Jèhòyachìn ɨ fòyn Babilòn sɨ a nchaʼ. Wù n-læ fvɨ̀sɨ ŋweyn a mɨchi mɨ̀vɨm ɨ̀m bò njvàsɨ̀ nsòmbo a njoŋ njvàsɨ̀ bò. ²⁸Wù n-læ fvɨ̀sɨ ŋweyn tì ɨ dyèyn àtem a jùŋà sɨ̂ ŋweyn ɨ nà ngvɨmlɨ̂ ŋweyn chwô tɨ̀fôyn tɨ litɨ tìtɨ̀ a tɨ nà n-ghɨ ŋêyn ŋweyn a Babilòn. ²⁹Jèhòyachìn ɨ kfɨnɨ ndzɨ sìsɨ̀ a wù nà n-mâʼ a ndô nchaʼ, ɨ nà yɨ kɨ ŋêyn fòyn Babilòn mɨchi ɨ̀n jɨ̀m nô ta ka wù læ̂ kfɨ. ³⁰Fòyn Babilòn ɨ nà fu ɨ̀kwo sɨ̂ ŋweyn kɨ̀ mɨlvɨ ɨ̀n jɨ̀m na wù na tôʼnɨ̀ nɨ̀ ngêŋ ŋweyn nô ta ka wù læ̂ kfɨ.