2 Kings 9

Ghɨ yisi Jehù sɨ a fòyn a Isìlæ̀

¹Elishà ɨ nfèʼtɨ̀ ì ghaʼnɨ nɨn tum meyn jàŋ wul antêynɨ̀ nɨ̀ nfèʼtɨ̀ sɨ ghaʼnɨsɨ ɨ bè sɨ̂ ŋweyn na, “Màʼ ndzɨ shyasɨ ɨ kul aku ɨ lì nshɨ̀ŋ mɨ̀vɨ̀l yèyn ɨ ndù nɨ̀ ɨ̀nyeyn a Lamòt Gilèd. ²Wà ndû, wa kɨŋ Jehù ɨ wâyn wâyn Nimshì. Wà yeyn ŋweyn wa bè wù fvɨ sɨ antêynɨ̀ nɨ̀ ngvàʼ ŋweyn wà li zɨ nɨ̀ ŋweyn antêynɨ̀ ndo. ³Wà zɨ wa lì nshɨ̀ŋ mɨ̀vɨl zɨ̂ ɨ fsɨ̀ytɨ̀ a ŋweyn atu ɨ bè na, Bôbo Fɨyini bè na, ‘Mɨ n-yisî và sɨ a fòyn Isìlæ̀.’ Wà nî wa leʼ lù ka wa n-làytɨ.”

⁴Ɨkuŋ nâ vzɨ̀ a a n-ghɨ nfèʼtɨ̀ i ghaʼnɨ tî ɨ lu ndù a Lamot Gilèd. ⁵Wu n-ndu chem afu ɨ yeyn ɨtu sugèyʼsɨ Isìlæ̀ wu duʼ kɨ alêʼ àmòʼ, wu bè na, “Mɨ n-kelɨ ntum sɨ làʼi sɨ̂ và a bô.”

Jehù ɨ bɨf na, “Wà n-taŋî sɨ̂ ndà a ghès antêynɨ̀ a?” Wu bèynsɨ̀ ɨ bè na, “Mɨ n-taŋî sɨ̂ và.”

⁶Jehù ɨ làli ɨ zɨ a ndo. Wu n-zɨ tî, nfèʼtɨ̀ ì ghaʼnɨ zɨ̀ ɨ sfɨ̀s mɨ̀vɨl mzɨ̀ atu nɨ̀ Jehù ɨ bè na, “Bôbo Fɨyini, ɨ Fɨyini fɨ Isìlæ̀fɨ̀ bè na, ‘Mɨ n-yisî và na wà na saʼ ghelɨ Isìlæ̀ ɨ ghelɨ Bôbo Fɨyini. ⁷Wa n-zuetɨ̂ woyn Ahàb ɨ bò ìfèl nɨ̀ và, a mà sɨsɨ mɨluŋ mɨ̀ nfèʼtɨ̀ sɨ ghaʼnɨsɨ nɨ̀ mɨ̀lûŋ mɨ̀ ghelɨ ghɨ felɨnɨ nɨ̀ Bôbo Fɨyini ghɨ li ghì a Jezebèl nɨ̂n læ zuetɨ. ⁸Isas i ndo nɨ̀ Ahàb nɨn kelɨ sɨ kfɨtɨ nô ì jɨ̀m. Mɨ n-zuetɨ̂ woyn ghɨ lûmnɨ̀ nɨ̀ Ahàb nô ghɨ̀ jɨ̀m a Isìlæ̀ kèsa à n-ghɨ àkôs ma wul ɨ̀ Isìlæ̀ a. ⁹Mɨ n-nì kɨ ìwo zɨ̀ sɨ̂ ghelɨ ndo nɨ̀ Ahàb a mɨ n-læ nì sɨ̂ ghelɨ ndo nɨ̀ Jèlobòwàm ɨ wâyn Nebàt nɨ̀ ghelɨ ndo nɨ̀ Bashà ɨ wâyn Ahijà. ¹⁰Bɨsɨ nɨn kfɨlɨ ìgvɨyn i Jezebèl a gvêyn afî a ntèʼ Jezlèl, a nô wùl ɨ̀ faŋ tɨ̀ gvɨ̀mi ŋweyn. Nfèʼtɨ̀ ì ghaʼnɨ nâ zɨ̀ nɨn taŋi tî ɨ dzɨ̀sì ɨ̀chfɨ ndo ɨ nyɨŋ.

¹¹A nà ghɨ ta Jehù kàsi fvɨ̀ ndù sɨ yeyn ɨtu ɨ sugèyʼsɨ̀ ɨlvɨ̀ vzɨ̀ abe, atu a li-a ɨ bɨf sɨ̂ ŋweyn na, “À n-befɨ ghà? Wul ɨ̀ jaʼnɨ wèyn gvì sɨ yeyn vâ sɨ a gha?”

Jehù ɨ bèynsɨ̀ ɨ bè sɨ̂ ŋweyn na, “Wà n-kya kɨmɨ wul ɨ vzɨ̀ a wù n-ghɨ ɨ̀ŋweyn nɨ̀ àwo kì a wù n-bê.”

¹²Àŋena ɨ bè sɨ̂ ŋweyn na, “Ka wa n-wam. Fèʼtɨ iwo zɨ̀ a wù bè.”

Jehù ɨ bè sɨ̂ àŋena na, “Wù gvì bè sɨ̂ mà na Bôbo Fɨyini bè na, ‘Mɨ n-yisî và sɨ a fòyn a wà na saʼ Isìlæ̀.’”

¹³Àŋena nɨn yvɨ iwo ateyn nô mɨ ɨlvɨ gha ɨ nyàŋsɨ ɨ choʼtɨ ɨ̀waf àŋena ɨ màʼ a mbaŋisɨ Jehù ɨ timi atu àteyn, àŋena toŋ isoŋ ɨ byal ɨ bè na, “Jehù nɨ̀n ghɨ fòyn!”

Jehù ɨ zue fòyn Jolàm ŋêyn fòyn Ahàzayà

¹⁴Ghɨ n-lèm Jehù ɨ wâyn Jèhoshafàt ɨ wâyn wâyn Nimshì sɨ a fòyn tì, wu baʼtɨ sɨ zue Jolàm. (À nà n-ghɨ tì Jolàm ŋêyn ghelɨ Isìlæ̀ nô ghɨ̀ jɨ̀m ɨ nû Hazèl ɨ fòyn Alàm na ka wù tɨm yɨ Lamot Gilèd. ¹⁵Mɨtì ma fòyn Jolàm kasi meyn kfa a Jezlèl sɨ chuʼ ɨlwemtɨ vzɨ̀ a ghelɨ Alàm nɨn tɨm ɨ lemsɨ ŋweyn ta wu nà n-nû ŋêyn Hazèl ɨ fòyn Alàm.) Jehù ɨ bè sɨ̂ sugèyʼ sìsɨ̀ a ŋêyn àŋena nà n-ghɨ amoʼ na, “Yì kæ nà kɨŋ kɨ nô samoʼ na mà na ghɨ fòyn ka yi n-vìsi wùl ɨ̀ fvɨ a Lamot Gilèd ɨ̀ ndù fèʼtɨ̀ ìbaʼtɨ ì yemi a ntèʼ Jezlèl.” ¹⁶Wu n-tàŋi tî ɨ koʼ a fɨchaʼ fɨ iwòŋ nɨ̀ ŋweyn ɨ ndù a Jezlèl bòm ta Jolàm nà n-koʼi afu ma Ahàzayà ɨ fòyn Judà kali meyn sɨ toŋtɨ ŋweyn.

¹⁷Nchì ntèʼ nâ zɨ̀ nà n-ti atû àbaŋ a nchì a Jezlèl ɨ yeyn ta sugèyʼsɨ Jehùsɨ̀ nɨn gvî, wu byal ɨ bè na, “Mɨ n-yeyn ta sugèyʼsɨ lisɨ nɨn gvî.”

Jolàm ɨ bè na, “Yì tum wul wu nyɨŋ nyam kfaŋ wù ndu kòynɨ̀ nɨ̀ àŋena ɨ̀ bɨ̀f sɨ̂ àŋena na, ‘A wà ti n-gvî nɨ̀ mbôynɨ̀ a?’”

¹⁸Wùl àteyn ɨ koʼ atû nyàm ɨ ndu kòynɨ̀ nɨ̀ Jehù ɨ bè na, “Fòyn bè na ma gvi bɨ̀f sɨ̂ và na, ‘A wà ti n-gvî nɨ̀ mbôynɨ̀ a?’

Jehù ɨ bɨf sɨ̂ ŋweyn na, “Wà n-kelɨ ghà sɨ ni nɨ̀ mbôynɨ̀ a? Chwo timi a ma ibàm.”

Wùl ɨ̀ vzɨ̀ a wù n-chi ntèʼ ɨ bè sɨ̂ fòyn na, “Wùl ɨ̀ vzɨ̀ a ghesɨ̀nà tum ndu meyn kòynɨ̀ nɨ̀ àŋena nà sɨ kasî gvî wì.”

¹⁹Wu n-bè tî fòyn ɨ fi tum wul wu nyɨŋ nyam na wù ndu yeyn àŋena. Wu ndù ɨ kòynɨ̀ nɨ̀ àŋena ɨ bè na, fòyn bè na mà gvi ɨ̀ bɨ̀fɨ̀ na, “À yi ti n-gvî nɨ̀ mbôynɨ̀ a?”

Jehù ɨ fi bɨf kɨ na, “Wà n-kelɨ ghà sɨ ni nɨ̀ mbòynɨ̀ a? Chwo timi a ma ibàm.”

²⁰Nchì ntèʼ zɨ̂ ɨ fi bè sɨ̂ fòyn na, “Wùl ɨ̀ ntum vzɨ̀ ndu meyn kòynɨ̀ nɨ̀ àŋena nà sɨ boŋ kasî gvî wì, wùl ɨ̀ vzɨ̀ a wù n-gufɨ fɨ̀nchaʼ fìfɨ̀ a fɨ n-gvî asɨ nɨn gûf kɨ ta Jehù ɨ wâyn Nimshì. Wù n-gûf kɨ ta wul ɨ̀ jaʼnɨ.”

²¹Jolàm ɨ bè na, “Yì baʼtɨ fɨ̀nchaʼ femfɨ.” Ghɨ baʼtɨ wu lù ŋêyn Ahàzayà ɨ fòyn Judà ɨ ndù sɨ kòynɨ nɨ̀ Jehù, nô mɨ ndà ɨ ghɨ kɨ atû fɨnchaʼ nɨ̀ ŋweyn. Àŋena nɨn ndu kòynɨ nɨ̀ ŋweyn a gvêyn ma à n-læ nà kelɨ Nabòt ɨ wul ɨ̀ Jezlèl. ²²A nà ghɨ ta Jolàm yeyn Jehù wu bɨf sɨ̂ ŋweyn na, “Jehù, a wà ti n-gvî nɨ̀ mbôynɨ̀ a?”

Jehù ɨ bèynsɨ̀ ɨ bè na, “Mbôynɨ̀ kàʼ yi bû læ̀ nà ghɨ yi bu koʼsɨ̂ kɨ mɨyini, kfɨl àvɨ̂ŋ kɨ̀ ta na vzɨ jezebèl.”

²³Jolàm ɨ bèynsɨ̀ fɨ̀nchaʼ fɨ ŋweyn ɨ nyɨŋ. Wù n-læ se sɨ nyɨŋ ɨ jaŋ bè sɨ̂ Ahàzayà na, “Ahàzayà ghɨ lɨsɨ meyn ghesɨ̀nà!”

²⁴Jolàm nɨn læ se sɨ nyɨŋ tî, Jehù ɨ gùf fɨ̀chya ɨ tɨm, iwoŋ ateyn i ɨ zɨ a ŋweyn a jɨm ɨ ndu kùm àtem a ŋweyn a wu fe ɨ kfɨ kɨ a fɨnchaʼ nɨ̀ ŋweyn. ²⁵Jehù ɨ bè sɨ̂ Bidkà ɨ wul ɨ vzɨ̀ a wù n-gufɨ fɨ̀nchaʼ fɨ iwòŋ nɨ̀ ŋweyn na, “Bèʼi ŋweyn ɨ ndu màʼ a gvêyn afî a à n-læ nà kelɨ Nabòt ɨ wul ɨ̀ Jezlèl vzɨ̀ tì. Kfàʼtɨ ta ghesɨ̀và nɨn læ nà gufɨ ndû nɨ̀ mɨ̀nchaʼ ibàm nɨ̀ Ahàb ɨ bò ŋweyn, Bôbo Fɨyini ɨ taŋi kûm ŋweyn. Wù n-læ bè na, ²⁶‘À ti nà ghɨ iyoni ma yeyn mɨ̀luŋ mɨ̀ Nabòt nɨ̀ ɨmzɨ̂ woyn ŋweyn, ghɨ sɨ læ̀ sɨ nì na wà laʼ mɨluŋ mɨ̀ àteyn alèʼ a nse afêyn. À n-taŋî mà Bôbo Fɨyini.’ Bèʼi ŋweyn lvɨ̂yn ɨ ndu màʼ alèʼ a nse nâ ghè kɨ̀ ighel ta Bôbo Fɨyini nɨ̀n læ bè.”

²⁷A nà ghɨ ta Ahàzayà ɨ fòyn Judà yeyn iwo zɨ̀ a yi gàyn, wu leʼ koʼ dzɨ a dzɨ ghê a yì ndû a Bet Hagàn. Jehù ɨ nà nyɨŋ a ŋweyn ibàm byalɨ bê na, “Yì boŋ zuè ŋweyn.” Ghɨ tɨm lemsɨ ŋweyn a fɨnchaʼ nɨ̀ ŋweyn ta wù n-leʼ koʼ a Gûl a ngùŋ ntèʼ Iblìm. Mɨtì wu leʼ ndu kfɨ a ntèʼ Megidò. ²⁸Ghelɨ ghɨ felɨnɨ nɨ̀ ŋweyn ɨ bèʼì ìgvɨyn i ŋweyn a fɨnchaʼ fɨ iwòŋ ɨ ndù nɨ̀ ìnyeyni a Jèlusalèm ɨ gvɨ̀mì a ngvɨmisɨ nɨ̀ ghɨ̀bo ŋweyn a ntèʼ nɨ̀ Devìt. ²⁹(Ahàzayà nɨn læ se sɨ koʼ ɨfôyn a Judà ma à sɨ ghɨ bèŋsɨ̀ ta Jolàm ɨ wâyn Ahàb nɨn saʼ Isìlæ̀.)

Jezebèl ɨ kfɨ

³⁰Ahàzayà nɨn læ kfɨ, Jehù ɨ lù ɨ ndù a Jezlèl. Jezebèl ɨ yvɨ na Jehù gvi meyn a Jezlèl, wu yoʼ asɨ a ŋweyn ɨ faytɨ àtu a ŋweyn ɨ timi a wundù a ntoʼ ɨ nà ki fvɨ̀sɨ̀ nɨ̀ àbe a. ³¹Jehù ɨ se sɨ zɨ sɨ gvì ɨchfɨ ntoʼ wu bè na, “A ti n-gvî nɨ̀ mbôynɨ̀ a? Wà n-ghɨ kɨ ta Zimlì, wà zue meyn bò ìfèl nɨ̀ và?”

³²Jehù ɨ ki koʼsɨ nɨ̀ ŋweyn a wundù ɨ byal ɨ bɨf na, “À n-ghɨ ndà a ma abàs a? Wùl nɨ̀n ghɨ a wù n-kɨŋ sɨ gàmtɨ ma na ghesɨ̀ ŋweyn nu a?” Wu nà n-taŋî tì ghelɨ ghɨ felɨnɨ ghɨ li a ntoʼ nâ ghè ɨ ki suʼsɨ̂ nɨ̀ ŋweyn a wundù nâ ghè. ³³Wu bè sɨ̂ àŋena na, “Yì maʼ sùʼsɨ gvì nɨ̀ ŋweyn.” Ghɨ màʼ wu fe mɨ̀lûŋ ɨ fvɨ̀ a ŋweyn ɨwùyn ɨ chèsì ɨ̀wuyn ndo, ɨ chèsì nyamsɨ kfaŋ nɨ̀ Jehù. Jehù ɨ nì nyamsɨ kfaŋsɨ ɨ dyàŋ a ŋweyn atu.

³⁴Jehù ɨ zɨ a ntoʼ ɨ yɨ têyn ɨ fi nyvɨ ɨ bè sɨ̂ ghelɨ ghɨ felɨnɨ na, “Yì faytɨ gvɨ̀mì ìgvɨyn i wûl ɨ wi ɨ bɨ wèyn a ndòyn Fɨyini nɨn ghɨ a ŋweyn atu tèyn. Wù tî nà ghɨ wâyn ntoʼ.” ³⁵Mɨtì àŋena fvɨ ndù sɨ gvɨ̀mi ŋweyn ɨ yeyn kɨ ighoʼ atu nɨ̀ àfyeyna baʼsɨ̂ nɨ̀ àkœ a, ³⁶ɨ kasi zɨ ndù ɨ fèʼtɨ̀ ìwo ateyn sɨ̂ Jehù. Ghɨ n-fèʼtɨ wu bè na, “Iyeynì nɨn ghɨ ìwo zɨ̀ a Bôbo Fɨyini nɨn læ bè sɨ̂ Elajà ɨ wul ɨ̀ Tîshbì vzɨ̀ ɨ bè na, ‘Bɨsɨ nɨn læ̀ kfɨlɨ ìgvɨyn i Jezebèl a gvêyn nɨ̀ Nabòt a Jezlèl. ³⁷Igvɨyn i Jezebèl nɨn læ̀ nà ghɨ ta mànyvɨ-à a gvêyn nâ ghè, a nô wùl ɨ̀ mòʼ na bû yeyn kelî wì na à n-ghɨ Jezebèl.’”