2 Samuel 11

Devìt ŋêyn Betshebà

¹A nà n-ghɨ ɨtuʼ nâ ghè, bèŋ se sɨ chfɨ̀ sɨ gvì tɨfôyntɨ̀ ɨ seʼ sɨ tɨm iwoŋ. A nà ghɨ ta bèŋ nɨ̀n chfɨ̂ gvî, fòyn Devìt ɨ duʼi kɨ a Jèlusalèm ɨ tum Jowàb ŋêyn ghelɨ ŋweyn nɨ̀ sugèyʼsɨ Isìlæ̀ nô sɨ̀ jɨ̀m na àŋena dyaŋ injɨyn i jva Jodàn ɨ̀ ndù tɨm iwoŋ ŋêyn ghelɨ Amòn. Àŋena ndù ɨ tɨm yɨ ɨ jɨŋ kal ntèʼ Labà.

²A nà ghɨ aleŋ ɨlvɨ ikfa achi a li-a Devìt ɨ làlì ɨkuyn ɨ koʼ nà ghaynɨ̂ kal atû ndo a ntoʼ ɨ làŋ ìsɨ ɨ yeyn wul ɨ wi ɨlvɨ̀ wu sû ɨ̀wuyn, jôf kɨ tèyn. ³Devìt ɨ tum wul na wù ndu bɨf nâ wùl ɨ wi nâ vzɨ̀ nɨn ghɨ ndà a. Wùl ateyn ɨ fèʼtɨ̀ na à n-ghɨ Betshebà ɨ wâyn Elìyàm, a ghɨ wî Yùliyà ɨ wul ɨ̀ Hêt. ⁴Devìt ɨ tum ghɨ ndu jàŋ wul ɨ wi àteyn, wu gvì Devìt ɨ chi nɨ̀ ŋweyn wu kasi ndù sɨ a ŋweyn a ndo. A nà n-ghɨ tì ma wù sù mèsì kɨ ɨwuyn ŋweyn a dzɨ̀ ghê a wul ɨ wi nà n-nî wu sù ɨlvɨ ta wù yeyn mesì ɨlvɨ ŋweyn. ⁵Mɨ̀chi chwò ɨ̀nseʼ wu yeyn na yi n-ghɨ ɨlvâ ɨ tum fèʼtɨ̀ sɨ̂ Devìt.

⁶Devìt ɨ yvɨ tî ɨ tum bè sɨ̂ Jowàb na wù tsɨynsɨ Yulìyà ɨ wul ɨ̀ Hêt wù kasi kfa yèyn zɨ. Jowàb ɨ bè wu kfa ɨ yeyn Devìt. ⁷Wu n-kfa ti Devìt ɨ bɨf sɨ̂ ŋweyn nâ iwoŋi nɨn ndû ti-a, Jowàb ɨ ghɨ ti ŋêyn sugèyʼ sɨ lisɨ a? ⁸A nà ghɨ ta ŋêyn ŋweyn tàŋi, Devìt ɨ bè na wu lu ndù a ŋweyn a ndo ɨ̀ yvɨ̀tɨ̀. Wu fvɨ̀ Devìt ɨ tum wul nɨ̀ afo na wù ndu ɨ̀ fù sɨ̂ ŋweyn. ⁹Wu fvɨ̀ tì ɨ faŋ tɨ̀ ndù a ŋweyn a ndo ɨ kwo chi kɨ ɨfchfɨ ntoʼ ŋêyn nchìsɨ ntoʼ sɨ lisɨ.

¹⁰Ɨtuʼ layn ghɨ fèʼtɨ̀ sɨ̂ Devìt na Yulìyà bu tî ndù a ŋweyn a ndo. Devìt ɨ jàŋ ŋweyn ɨ bɨf sɨ̂ ŋweyn nâ, “Wà ti gvì ma wà chitɨ meyn abe ɨ̀ faŋ tɨ̀ ndù tɨ̀ yèyn wî vâ bòm ghà?”

¹¹Yulìyà ɨ bè sɨ̂ Devìt na, “Àntayntayn a Mɨ̂kaynà, nɨ̀ sugèyʼsɨ Isìlæ̀sɨ nɨ ɨsisɨ Judàsɨ̀ nɨn chî a mɨ̂twò. Bò ìfèl nɨ̀ mà Jowàb ŋêyn ghelɨ ŋweyn ɨ chî kɨ ɨtwaʼ. Mà ti nà n-kaʼ ma ndù ti a ma ndo sɨ nà yɨ-a, nyvɨ-a, chî nɨ̀ wî wom a? Mɨ n-bê sɨ̂ và samoʼ na mà kaʼ ma bû mòm ɨ̀nki wo tì.”

¹²Wu taŋi tì Devìt ɨ bè na wù fî chi ɨtuʼ layn wù kæ sɨ lù. Yulìyà ɨ kæ sɨ chi mɨchi ɨ̀m bò a Jèlusalèm. ¹³Devìt ɨ ni jàŋ na wù gvi ŋêyn ŋweyn yɨ. Wu gvì ɨ yɨ Devìt ɨ fu mɨlûʼ wu nyvɨ mɨ ku ŋweyn. Ɨtuʼ ni jɨ wu faŋ tɨ̀ kfa a ŋweyn a ndo ɨ fi ndu nyìŋì kɨ a ŋweyn a fɨ̂ghàm ɨ chi kɨ ŋêyn nchìsɨ ntoʼsɨ.

¹⁴Ɨtuʼ layn Devìt ɨ nyàʼ ɨ fu ŋwàʼlɨ̀ na Yulìyà ndu ɨ̀ fu sɨ̂ Jowàb. ¹⁵Wu n-nyàʼ ateyn na, “Tsɨynsɨ Yulìyà asɨ iwòŋ alèʼ ghè a iwoŋi nɨn to ateyn. Wà tsɨynsɨ wa kòyʼtɨ̀ ibàm ta ka ghɨ zue ŋweyn.”

¹⁶A nà ghɨ ta Jowàb jàŋ ŋwaʼlɨ̀ àteyn, àŋena ni jɨŋ kali ntèʼ zɨ̂ a àŋena ndù sɨ nù nô mɨ ɨlvɨ gha, wu lèm Yulìyà abàs ghè a iwoŋi nɨn to ateyn ta ka mbàynɨ̀sɨ àŋena zue ŋweyn. ¹⁷A nà ghɨ ta ghelɨ ntèʼ nâ ghì fvɨ̀ sɨ nu àŋena ɨ zuetɨ sugèyʼsɨ fòyn Devìt sɨ lisɨ ɨ boŋ zue Yulìyà ɨ wul ɨ̀ Hêt vzɨ̀.

¹⁸Jowàb ɨ tum fèʼtɨ nô mɨ ghà sɨ̂ Devìt ta yi gàyn ɨtwaʼ iwòŋ. ¹⁹Wù n-be meyn kɨmɨ sɨ̂ wùl ɨ̀ ntum nâ vzɨ̀ na, “Wà ndû fèʼtɨ̀ awo nâkèynà, ²⁰fòyn nyôʼsɨ̀ ɨ̀toŋ ɨ̀ bɨ̀f sɨ̂ và nâ yì nì ndù baʼsɨ mèsì a ntèʼ nâ ghè bòm ghà, yi bu nà kya na àŋena kàʼ a ghɨ timi a mbàyn nɨ̀ àŋena na tɨmlɨ̂ suʼsɨ̂ nɨ̀ zɨ̀ â? ²¹Ba yi n-kya na à n-læ zue wul ɨ wi ɨ zue Abimelèk ɨ wâyn Jèlub-Beshèt? Wùl ɨ wi àteyn nɨn læ timi atû mbàyn a Tebèz ɨ màʼ ɨ suʼsɨ nɨ̀ ìti a ŋweyn atu wu kfɨ. Wù kæ bɨf têyn wa bè sɨ̂ ŋweyn na, wul ɨ̀ felɨnɨ nɨ̀ ŋweyn Yulìyà ɨ wul ɨ̀ Hêt boŋ meyn kfɨ.”

²²Wùl àteyn ɨ ndu bè nô mɨ ghà sɨ̂ Devìt kɨ̀ ighel ta Jowàb nì bè. ²³Wu n-bè sɨ̂ Devìt na, “Mbàynɨ̀ seysɨ nì fvɨ̀ ɨ̀ gvɨ̀ ghès a dzɨ ɨ̀ to chwò ghès mɨtì ghèsɨ kasi tsɨyn àŋena ndù chem ɨchfɨ mbàyn. ²⁴Ghelɨ àŋena ghì a ghɨ n-nû nɨ̀ mɨ̀chya timi atû mbàyn ɨ̀ kæ tɨm sɨ zuetɨ sugèyʼsɨ ghesɨ̀nà sɨ lisɨ, sɨ fì sɨ zue wul ɨfelɨnɨ nɨ̀ và Yulìyà ɨ wul ɨ̀ Hêt.

²⁵Devìt ɨ bè sɨ̂ wùl ɨ̀ ntum nâ vzɨ̀ na wù ndu ɨ̀ bè sɨ̂ Jowàb na ka wu n-vìsi iwo ateyn i kobsɨ ŋweyn bòm ta ghɨ nî ghɨ nà kya wi na a n-kfɨ ndà iwòŋa, na àŋena se sɨ fì sɨ nù, ghɨ nà nû nô nɨ̀ àdyaʼa ɨ bebsɨ ntèʼ àteyn. Wu n-bè na wù ndu bè ìwo nâ yèynì sɨ̂ Jowàb ɨ̀ lùmsɨ̀ ŋweyn ka wù bol.

²⁶A nà ghɨ ta wî Yulìyà yvɨ na ghɨ zue meyn lûm ŋweyn, wu dzɨ̀ ŋweyn. ²⁷Wu n-dzɨ mèsi ikfɨ i lûm ŋweyn, Devìt ɨ tum ghɨ li gvì nɨ̀ ŋweyn sɨ a ŋweyn a wi, wu bzɨ wayn ɨ lûmnɨ̀ sɨ̂ ŋweyn. Bôbo Fɨyini ɨ nà saŋlɨ wì kûm iwo zɨ̀ a Devìt ɨ̀ nì.