2 Samuel 6

Ghɨ gvì nɨ̀ àntayntayn a mɨ̂kàyn nɨ̀ Bôbo a Jelusalèm

¹Fòyn Devìt nɨn fi meyn choʼtɨ kfeynsɨ sugèyʼsɨ a Isìlæ̀ nkamsɨ mɨ̀vɨm ɨ̀n tal ɨ yvɨ̀ŋtɨ̀ alêʼ àmoʼ, ²ŋêyn àŋena ɨ ndù a Balà a Judà sɨ lì sɨ koʼ nɨ̀ antayntayn a mɨ̂kàyn nɨ̀ Bôbo Fɨyini ɨ Bò ɨ̀dwaʼ ɨ̀ jɨ̀m, ɨ̂ŋweyn vzɨ̀ a wù n-duʼ ma nchìsɨ jɨŋ meyn kàl ŋweyn. ³Àntayntayn ateyn a nà n-ghɨ a ndo nɨ̀ Abinadàb atû kfɨ̀yn. Àŋena bèʼi àntayntayn ateyn atû fɨ̀nchaʼ fɨ ghɨ kɨ fɨ fɨ, a tisɨ̂ Uzà ŋêyn Ahìyò ɨ woyn Abinadàb. ⁴Uzà nà n-jêl ndû a mbæ̀ fɨ̀nchaʼ, Ahìyò ɨ ndû asɨ. ⁵Devìt ŋêyn ghelɨ Isìlæ̀ ghɨ̀ jɨ̀m ɨ nà dyal nô sɨ a ŋaŋ ndû asɨ nɨ̀ Bôbo Fɨyini, yem njàŋsɨ̀ toŋ tɨ̀soŋ fî buʼ nchùmsɨ kɨ̀ a tɨ̂nkì a tɨ̂nkì.

⁶Àŋena ni gvi chem alèʼ ghè a Nakòn nà n-leŋ asaŋ ateyn, nyamsɨ ɨ dyamtɨ, àntayntayn a mɨ̂kàyn nɨ̀ Bôbo kì ɨ nà sɨ kɨŋ sɨ fe, Uzà ɨ ghal na ka kɨ fe. ⁷Ɨtoŋ Bôbo Fɨyini ɨ yaf bòm ìwo zɨ̀ a Uzà nì, Fɨ nì wu fe ɨ kfɨ a ngùŋ àntàyntayn a mɨ̂kàyn nɨ̀ Bôbo.

⁸Devìt ɨ nyòʼsɨ̀ ɨ̀toŋ bòm ta Bôbo Fɨyini dyèyn ɨtoŋ ɨ yafɨnɨ nɨ̀ Ŋweyn sɨ̂ Uzà. À ti iwo zɨ̀ a yi n-nì ghɨ zɨ̀tɨ̀ ɨ nà sɨ toŋtɨ̂ àlêʼ ateyn na Belez-Uzà, ma à ti alêʼ kì a ghɨ n-læ zue Uzà ateyn.

⁹Devìt ɨ fàyn Bôbo Fɨyini achi nâ ghè ɨ nà sɨ bɨf nâ, “Mɨ n-jèl ti na àntayntayn a mɨ̂kàyn nɨ̀ Bôbo kèynà ndu chèm a Jèlusalèm a?” ¹⁰Wù n-bu nà fî kɨŋ sɨ ndù nɨ̀ ànkeyna a Jèusalèm ɨ kwo lì ɨ ndù nɨ̀ akeyna dzɨ a ndo nɨ̀ Obed-Edòm a ntèʼ Gât. ¹¹Àntayntayn a mɨ̂kàyn nɨ̀ Bôbo nâ kì ɨ chi a ndo nɨ̀ Obed-Edòm sɨ a njoŋ sɨ̀ tal. Bôbo Fɨyini ɨ boysɨ ŋweyn ŋêyn ghelɨ ndo nɨ̀ ŋweyn nô ghɨ̀ jɨ̀m.

¹²A læ nà ghɨ achi a li-a, Devìt ɨ yvɨ na Bôbo Fɨyini boysɨ meyn Obed-Edòm ŋêyn ghelɨ ndo nɨ̀ ŋweyn bòm ta wù tòʼnɨ̀ nɨ̀ àntayntayn a mɨ̂kàyn nɨ̀ Bôbo, wu kàlì a ndo nɨ̀ Obed-Edòm ɨ ndu lì ɨ nà dyal koʼ nɨ̀ ànkeyna a Ntèʼ nɨ̀ fòyn Devìt. ¹³A nà ghɨ ta ghɨ bèʼi àntayntayn a mɨ̂kàyn nɨ̀ Bôbo ɨ̀ choʼ kɨ̀ ɨvɨ ntufa, fòyn Devìt ɨ sɨ nyâm mbòloʼ ilûmnɨ̀ nɨ̀ wâyn nyàm ma ghɨ yaʼ meyn sɨ a ifu sɨ̂ Bôbo. ¹⁴A nà n-ghɨ tì ma Devìt maʼ meyn ndzɨsɨ ngàŋsɨ ndô Fɨyini nà bɨyn nô sɨ a ŋaŋ asɨ nɨ̀ Bôbo Fɨyini. ¹⁵Devìt ŋêyn ghelɨ Isìlæ̀ nô ghɨ̀ jɨ̀m nà n-koʼ nɨ̀ àntayntayn a mɨ̂kàyn nɨ̀ Bôbo a Jèusalèm tì, yofà toŋ tɨ̀soŋ. ¹⁶A nà ghɨ ta ghɨ n-zɨ ndû nɨ̀ àntayntayn a mɨ̂kàyn nɨ̀ Bôbo a Ntèʼ nɨ̀ fòyn Devìt, wî ŋweyn Mikàl ɨ wâyn Sôl ɨ ki fvɨ̀sɨ̀ a wundù ɨ yeyn fòyn Devìt wu bɨyn asɨ nɨ̀ Bôbo Fɨyini nô sɨ a ŋaŋ, iwo ateyn i yafɨ ŋweyn. ¹⁷Àŋena gvi chem nɨ̀ àntayntayn a mɨ̂kàyn nɨ̀ Bôbo ɨ faytɨ lèm ɨtwò afî a Devìt nɨn kas na ghɨ gvi lèm ateyn. Devìt ɨ fu tɨfu tɨ nyoʼnɨtɨ sɨ̂ Bôbo Fɨyini ɨ fì fu kɨ̀mɨ tɨ̀fu tɨlitɨ sɨ nà chî nɨ̀ mbôynɨ̀ ŋêyn ghelɨ ghɨli. ¹⁸A nà ghɨ ta wu fu mesi tɨfu tɨ ateyn, wu jèm na Fɨyini fɨ̀ ɨ Bò Ɨdwâʼ ɨ̀jɨm boysɨ ghelɨ. ¹⁹Wu n-ni tî ɨ gwòtɨ̀ ɨ̀fwo ɨ yɨnɨ kɨ̀ sɨ̂ ghelɨ ghɨ̀ jɨ̀m afu. Nô mɨ wul Isìlæ̀ ɨ̀kfa, kesa à n-ghɨ wùl ɨ lûmnɨ̀ kesa à n-ghɨ wul ɨ wi ɨ nà kfâ nɨ̀ ìghef abayn i, nɨ̀ njwò nɨ̀ àbayn a kfaŋa baʼsɨ̂ nɨ̀ ɨ̀fwo ɨ saŋnɨ ɨlvɨ ghɨ toŋtɨ̂ na, ‘Lesìns’.

²⁰A nà n-ghɨ ta fòyn Devìt kàsi kfa sɨ jèm na Fɨyini fɨ̀ boysɨ isas i ndo nɨ̀ ŋweyn, wî ŋweyn Mikàl ɨ wâyn Sô ɨ fvɨ̀ ɨ gvi bè sɨ̂ ŋweyn na, “Mɨ n-yeyn na wà nà kfâʼ a mbæ̀ na wà n-kfɨmtɨ̂ nî kɨ nô ta fòyn a dzɨ ghê a wà nà bɨyn ateyn ŋaʼsɨ̂ ndzɨsɨ asɨ nɨ̀ woyn ghɨ̂kì ghɨ felɨnɨ kɨ̀ ta àngù.” ²¹Devìt ɨ bè sɨ̂ Mikàl na, “Mà nì nà bɨyn asɨ nɨ̀ Bôbo Fɨyini ta Fɨ ti kwo chòʼ ma na mà na ghɨ fòyn sɨ̂ ghelɨ Isìlæ̀, a ghɨ wi bò vâ kèsa wul ɨ̀lvì a ŋweyn a ndo. Mà na lum bɨyn kɨ tì asɨ nɨ̀ Nfeynfɨ. ²²Mɨ n-se sɨ bɨyn ɨ̀ fì bɨyn chwò nô tì, nô mɨ ta wà n-kfâʼ na mɨ n-suʼsɨ̂ ngêŋ yem. A n-ghɨ sɨ̂ và a ghɨ iwo i wumini ta mɨ nî mɨtì a ghɨ sɨ̂ ghɨ̀kì ghɨ felɨnɨ nâ ghèyn a wà n-bê têyn, a ghɨ ìwo ikoʼnɨnɨ-i. ²³À ti iwo zɨ̀ a yi n-ni Mikàl ɨ wâyn Sôl ɨ læ faŋ tɨ̀ bzɨ.