Amos 1

¹Ɨyêyn nɨ̀n ghɨ ntum zɨ̀ a Bôbo Fɨ̀yini nɨn lae tum Amos nɨ̀ ɨ̀nyeyn. À n-ghɨ àwo kì a Bobo nɨ̀n lae dyèyn a ndayn kûm Isɨlae sɨ̂ Amos ɨwâyn wùl nteʼ Tekuwa vzɨ̀ a wù nà n-ghɨ nchì bzɨsɨ. Wu n-lae yeyn awo nâ kèynà ɨtùʼ nɨ̀ fòyn Uzaya vzɨ̀ a wu nà n-saʼ a Juda. Ta wù yeyn tì, bèŋsɨ chwo kɨ sɨ̀ bò, nse ɨ nèʼà nô sɨ a ŋaŋ a Isɨlae, kfɨ̀msɨ nà seynlɨ ²Amos nɨ̀n lae bè na, “Ma yeyn meyn ta Bobo Fɨyini nɨ̀n bwaytɨ atû kfɨ̂yn Zayon, bwaytɨ̂ tì ɨvɨ i boŋ bwaytɨ̂ sɨ a Jelusalem. Ma yeyn meyn ta ɨ̀nfùʼ mzɨ̀ a nchì sɨ bzɨsɨ nɨn yɨsɨ bsɨsɨ ateyn yum sɨ atû kfɨ̂yn Kamel.”

Bobo læ saʼ tɨ̀laʼ tɨ̀tɨ a tɨ n-chi baʼsɨ sɨ̂ Isɨlæ

³Bobo Fɨyini bè na, “Ghɨlɨ Damaskos ɨ ni meyn mbɨ sɨ̀tal, ghɨ bê tì sɨ ghɨ sɨ̀kæ̀, ma ghɨ wi sɨ faŋ bùla ma dyeyn ɨtoŋ ɨbaŋnɨ nɨ̀ mà sɨ̂ àŋena. Mɨ n-faŋ wi bula ma dyêyn sɨ̂ àŋena na ɨtoŋ baŋ meyn mà. Yi n-kêʼ na ghelɨ Damaskos tî sesɨ bebsɨ Giliyad ɨ nà gvâsɨ̀ àŋena têyn kasî sìsɨ̀-à. ⁴Bòm tèyn, ma na ghɨ sɨ tum ɨvɨs na wu nyoʼ ntôʼ fòyn Hazel ɨ̀ fì nyòʼ mèsì kɨ̀ mesi ɨwuyn mbàyn sɨ ghaʼlɨnɨ sìsɨ a ghɨ bàʼlɨ̀ na sɨ na kɨ̂ŋtɨ̀ ntôʼ fòyn Ben-hadad. ⁵Mɨ n-kôl ɨ̀chvɨ mbàyn Damaskos. Mɨ n-zue fòyn vzɨ̂ a wù n-saʼ afoŋlɨ a Aven. Mɨ n-zue wul vzɨ̂ a wù n-saʼ Bet Eden. Ghɨ nì sâŋ ghelɨ Alam a àŋena ndu nà chî a Kil. À tàŋi Bobo Fɨyini.” ⁶Bobo Fɨyini bè na, “Ghelɨ Gaza ni meyn mbɨ sɨ tal, ghɨ bê tɨ̀ sɨ ghɨ sɨ̀kæ̀. Ma ghɨ wi sɨ faŋ bula ma dyeyn ɨtoŋ ɨ baŋnɨ nɨ̀ mà sɨ̂ àŋena. Mɨ n-faŋ wi bula ma dyeyn sɨ̂ àŋena na ɨtôŋ wom bâŋ meyn bòmta àŋena tî lì ghelɨ ilàʼ kɨ ghɨ̀jɨm ndù bèylɨ sɨ̂ ghelɨ Edom. ⁷Mɨ n-tum ɨ̀vɨs a wu nyòʼ mbàyn Gaza, a ɨvɨs ateyn nyoʼ mbàyn sɨ ghaʼlɨnɨ nâ sìsɨ̀ a ghɨ bàʼlɨ̀ na sɨ na kɨ̂ŋtɨ̀ nteʼ Gaza. ⁸Mɨ n-zue wul vzɨ̀ a wù n-saʼ Ashdod ɨ zue ɨvzɨ̂ a wù n-saʼ Ashkelon. Mɨ n-kèʼ ghelɨ Eklon ɨ̀ zuètɨ àŋena. Nô wùl ɨ mòʼ nɨn faŋ wi antêynɨ̀ nɨ̀ ghelɨ Filisyà.” À tàŋi Bobo Fɨyini. ⁹Bobo Fɨyini bè na, “Awo-a nɨn ghɨ àtal ta ghelɨ Taya nì, ghɨ bê tì kɨ ghɨ àkæ̀. Ma ghɨ wi sɨ faŋ bula ma dyêyn ɨ̀toŋ ɨ baŋnɨ nɨ̀ mà sɨ̂ àŋena. Mɨ n-faŋ wi bula ma dyeyn sɨ̂ àŋena na ɨtoŋ baŋ meyn mà bòmta àŋena tî bèyʼlɨ ghelɨ ntèʼ sɨlisɨ kɨ ghɨ̀jɨ̀m sɨ̂ ghelɨ Edom. Àŋena bu tî sesɨ beỳʼlɨ àŋena ɨ̀ faŋ tɨ̀ fì kfàʼtɨ̀ na ŋêyn àŋena nɨ̀n lae meyn yɨ mɨkâyn sɨ nà chi ta woyn ghɨ̂nì. ¹⁰Bòm tèyn, ma na ghɨ sɨ tum ɨvɨs na wu nyoʼ mbàyn nteʼ Taya. Mɨ n-tum ɨ̀vɨs a wu nyoʼ mbàyn ighaʼnɨ zɨ̀ a yì n-kɨ̂ŋtɨ ntèʼ nâ zɨ̀ kɨ ìjɨ̀m.” ¹¹Bobo Fɨyini bè na, “Ghelɨ Edom ni meyn mbɨsɨ sɨ̀tal, ghɨ bê tì sɨ ghɨ sɨ̀kæ̀. Ma ghɨ wi sɨ faŋ bula ma dyèyn ɨtoŋ ɨ baŋnɨ nɨ̀ mà sɨ̂ àŋena. Àŋena tî nyɨŋ ibam nɨ̀ ghelɨ Isɨ̀lae nɨ̀ mɨ̀nyue, a ghɨ woynà àŋena ɨ̀ fàŋ tɨ̀ kòynsɨ isuyn mɨtì ɨ̀ zuètɨ àŋena. Yi ti n-dyeyn na ɨtoŋ àŋena ti meyn yaf faŋ kɨ̀ faŋ, aŋena na bu kfâʼtɨ̀ wì iwo. ¹²Bòm tèyn, mɨ n-nyòʼ ntèʼ Teman. Ɨvɨsɨ nɨn nyòʼ ɨwuyn mbàyn Bozla.” ¹³Bobo Fɨyini bè na, “Ghelɨ Amon ni meyn mbɨ sɨ̀ tal, ghɨ bê tì sɨ ghɨ sɨ̀kæ̀. Ma ghɨ wi sɨ faŋ bula ma dyêyn ɨtoŋ ɨbaŋnɨ nɨ̀ mà sɨ̂ àŋena. Àŋena tî nà kɨŋ sɨ tɨm sɨ yɨ ghelɨ Giliyad ɨ ndù na sɨ chuʼlɨ̂ ghɨ̀nà ɨwoyn mɨ̂lɨ̀ nɨ̀ mɨ̀nyuè. ¹⁴Yi ti n-dyêyn na mɨ n-tum ɨ̀vɨs a nteʼ Laba, a wu nyoʼ mbàyn ighaʼnɨ zɨ̀ a yì n-kɨ̂ŋtɨ nteʼ ateyn. A læ̀ nà ghɨ achi iwòŋ nâ ghè, a gyasɨ na kòʼ kɨ afu tèyn. A læ̀ nà ghɨ achi iwòŋ nâ ghè a Amon, a inu ì nà chwônɨ̀ kɨ tèyn ta afyef ato a. ¹⁵À læ̀ nà ghɨ achi nâ ghè, a ghɨ ghal fòyn Amon bàʼsɨ nɨ̀ chyeʼsɨ ŋweynsɨ ɨ̀ lì ndù nɨ̀ àŋena ɨlaʼ atum.” À tàŋi Bobo Fɨyini.