Daniel 5

Awu a wul à ɨ nyàʼ ìwo ɨwuyn ndo.

¹Fòyn Bèlshazà nɨ̀n læ koʼ ɨfôyn a Babilòn, a nà ghɨ achi a li-a wu jàŋ àyɨ ŋêyn ghelɨ ghɨ felɨnɨ nɨ̀ ŋweyn nkam ɨ nà yɨ-a fî nyɨ-a. ²A nà ghɨ ta Bèlshazà nyvɨ mɨlûʼ mɨ̀ zɨtɨ̀ sɨ ku ŋweyn, wu bè na ghɨ ndu lì gvì nɨ̀ bom sisɨ̀ a bò ŋweyn ɨ fòyn Nèbùkànezà nɨn læ ndu lì a ndô Fɨyini a Jèlusalèm ma ghɨ faytɨ nɨ̀ àso ɨkwo a baŋnɨ-a nɨ̀ a fɨfâ. Wu n-bè na ghɨ gvi nɨ̀ ɨ̀nseynsɨ ŋêyn ghelɨ ghɨ felɨnɨ nɨ̀ ŋweyn nɨ̀ ghɨ̀ki ŋweyn baʼsɨ̂ nɨ̀ ghɨ̀ki ibàm nɨ̀ ŋweyn na nyvɨ mɨ̀lûʼ ateyn. ³Wu n-bè tî ghɨ ndu lì gvì nɨ̀ bom nâ sìsɨ̀ a ghɨ n-læ lì a ndô Fɨyini a Jèlusalèm tì ma ghɨ fàytɨ nɨ̀ àso ɨkwo a baŋnɨ-a nɨ̀ a fɨfâ, ŋêyn ghelɨ ghɨ felɨnɨ nɨ̀ ŋweyn nɨ̀ ghɨ̀ki ŋweyn baʼsɨ̂ nɨ̀ ghɨ̀kì ibàm nɨ̀ ŋweyn ɨ nà nyvɨ mɨ̀lûʼ ateyn. ⁴Àŋena nà n-yvɨ tì koʼsɨ̂ mɨyini ma ghɨ faytɨ nɨ̀ àso ɨkwo a baŋnɨ-a, nɨ̀ a fɨfâ nɨ̀ ɨmzɨ̂ a ghɨ fàytɨ nɨ̀ ìdyayn i, kɨ̀mɨ nɨ̀ ɨmzɨ̂ a ghɨ fàytɨ nɨ̀ àkasa nɨ̀ ɨmzɨ̂ a ghɨ fàytɨ nɨ̀ ɨ̀nkàʼ baʼsɨ nɨ̀ ɨmzɨ̂ a ghɨ fàytɨ nɨ̀ ngòʼsɨ̀.

⁵A nà ghɨ ta àŋena nɨn yvɨ, koʼsɨ̂ mɨyini mɨ̀ àŋena ɨ gvɨtɨ yeyn awu ta kɨ n-nyâʼ ɨwuyn ndo a ngùŋ alèʼ ghè a ghɨ n-tomtɨ lâmsɨ̀ ateyn a ntoʼ. Fòyn nɨn yeyn meyn kɨmɨ ta awu ateyn a nɨn nyâʼ. ⁶Fòyn nɨn læ yeyn tî ifayn ì ɨ ku ŋweyn, ikêʼ i ŋweyni ɨ kasi ɨ nà sɨ fɨfɨ-fɨfɨ alvɨ a ŋweyna nà chɨŋa afyeyn a ŋweyna ɨ boli-à.

⁷Fòyn ɨ byal bè na ghɨ jaŋtɨ gvì nɨ̀ ghelɨ mɨnyaʼ nɨ̀ ɨghî a ghɨ n-fêʼtɨ̀ jemsɨ, nɨ̀ ghelɨ ghɨ fɨyntɨnɨ baʼsɨ̂ nɨ̀ ɨghɨ̂ a ghɨ n-yeʼi awo kûm mɨ̀njêyn. Àŋena nɨ̂n gvì, fòyn ɨ bè sɨ̂ àŋena na, “À kæ jaŋ nô mɨ ndà iwo zɨ̀ a ghɨ nyàʼ ɨwuyn ndo ɨ̀ fèʼtɨ̀ ìwo zɨ̀ a yi n-bê, a mà maʼ ndzɨsɨ tɨ̂fòyn a ŋweyn ɨwùyn, ɨ̀ we tɨ̀fwo tɨ ntoʼ a ŋweyn ɨmzɨ̀ ma ghɨ faytɨ nɨ̀ àso ɨkwo a baŋnɨ-a, a wù na ghɨ ànkùmtɨ̀ sɨ̂ wùl vzɨ̀ a wù n-kûmtɨ̀ sɨ̂ mà.”

⁸Ghelɨ ghɨ tofɨnɨ nɨ̀ fòyn nâ ghì ɨ gvì nô ghɨ̀ jɨ̀m, mɨtì nô wùl ɨ̀mòʼ ɨ nà kya wi sɨ jàŋ iwo zɨ̀ a ghɨ nyàʼ ɨwuyn ndo kèsa sɨ fèʼtɨ iwo zɨ̀ sɨ̂ fòyn a yi n-bê. ⁹Yi n-gàyn tî ifayn i bemnɨ-i ɨ ku fòyn Bèlshazà ikêʼ i ŋweyni ɨ nà sɨ fɨfɨ kɨ tèyn mbvɨ, achfɨ-a ɨ yum chyeʼsɨ ŋweyn.

¹⁰Nàfòyn nɨn yvɨ meyn ta ghelɨ nɨn taŋi sɨ idvɨ̀ ɨ zɨ alèʼ ghè a ghɨ nà n-yɨ ayɨ nâ kì ateyn ɨ bè sɨ̂ fòyn na, “Mɨ̀chi myâ dyebtɨ a Mbæ̀! Ka wa n-fì fàyn, ka wa n-fì kèʼ ìkêʼ yèynì. ¹¹Wùl nɨ̀n ghɨ ilaʼ afêyn a Mbæ̀, kelɨ àyvɨs a mɨyini ɨ̀n laynɨ̂. À n-læ nà ghɨ ɨtuʼ ta bò vâ ɨ fòyn Nèbùkànezà nɨ̀n saʼ, ghɨ keli na wùl nâ wèyn nɨn kelɨ ìtof i mɨyini, kya àwo. Bò vâ ɨ lèm ŋweyn na wù na ghɨ àtu sɨ̂ ghelɨ mɨnyaʼ nɨ ɨghî a ghɨ n-fêʼtɨ̀ jemsɨ, nɨ̀ ghelɨ ghɨ fɨyntɨnɨ baʼsɨ̂ nɨ̀ ɨghî a ghɨ n-yeʼi awo kûm mɨ̀njêyn. ¹²Izɨyn i wûl nâ wèyn nà n-ghɨ Danìyèl, fòyn Nèbùkànezà ɨ fu izɨyn i Babilòn sɨ̂ ŋweyn na Bèlteshazà. Danìyèl nâ wèyn nà n-kelɨ ìtof kya sɨ fèʼtɨ iwo zɨ̀ a jemsɨ nɨn bê, kya sɨ fèʼtɨ̀ sɨ baynsɨ awo a tɨmlɨnɨ-a, fî kya sɨ fèʼtɨ awo kì a kɨ n-ghɨ a n-lèytɨ. Jàŋ Danìyèl a ka wù feʼtɨ iwo zɨ̀ sɨ̂ và a ghɨ nyàʼ ɨwuyn ndo tèyn.”

¹³Fòyn ɨ kæ tum sɨ jaŋ Danìyel, wu gvì, fòyn ɨ bɨf sɨ̂ ŋweyn na, “À n-ghɨ và Danìyèl ɨ wul ɨ̀mòʼ antêynɨ̀ nɨ̀ ghelɨ Jûsɨ̀ ghì a bò wom ɨ fòyn Nèbùkànezà nɨ̂n ghaytɨ a Judà ɨ kfa nɨ̀ àŋena tî a? ¹⁴Ma yvɨ meyn na wà n-kelɨ àyvɨs a mɨyini ɨ̀n laynɨ̂, kelɨ ìtof, faytɨ̂ kya àwo nô a jûŋ. ¹⁵Ghelɨ ghɨ felɨnɨ nɨ̀ ma lî meyn gvì nɨ̀ ghelɨ mɨnyaʼ nɨ̀ ghelɨ ghɨ tofɨnɨ na ghɨ jaŋ ɨ̀ fèʼtɨ̀ ìwo zɨ̀ sɨ̂ mà a ghɨ nyàʼ ɨwuyn ndo, mɨtì àŋena wo sɨ fèʼtɨ̀ iwo zɨ̀ a yi n-bê. ¹⁶Ma yvɨ meyn lvɨ̂yn na wà kàʼ a wà feʼtɨ iwo zɨ̀ a jemsɨ nɨn bê, fêʼtɨ̀ baynsɨ̂ àwo kì a kɨ n-ghɨ a n-lèytɨ. Wà kæ jàŋ iwo zɨ̀ a ghɨ nyàʼ ɨwuyn ndo ɨ̀ fèʼtɨ̀ ìwo zɨ̀ a yi n-bê, a mà maʼ ndzɨsɨ tɨ̂fòyn a wa ɨwùyn, ɨ̀ we tɨ̀fwo tɨ ntoʼ a wa ɨmzɨ̀ ma ghɨ fàytɨ nɨ̀ àso ɨkwo a baŋnɨ-a, a wà na ghɨ ànkùmtɨ̀ sɨ̂ wùl vzɨ̀ a wù n-kûmtɨ̀ sɨ̂ mà.”

¹⁷Danìyèl ɨ bèynsɨ̀ ɨ bè na, “ Mɨ n-fsɨ wi afo a Mbæ̀, wà kàʼ a wà fu sɨ̂ wûlù mɨtì mɨ n-jàŋ ìwo zɨ̀ a ghɨ nyàʼ ɨwuyn ndo ɨ̀ fèʼtɨ̀ ìwo zɨ̀ sɨ̂ và a yi n-bê.”

¹⁸“Mbæ̀, Fɨyini fìfɨ̀ a fɨ ngàŋtɨ chwò ti meyn lèm bò vâ ɨ fòyn Nèbùkànezà wù na kelɨ àdyaʼ, saʼ tɨfôyn tɨ litɨ fì nì wù na koʼnɨ-à ghɨ ngvɨmlɨ̂ ŋweyn. ¹⁹Fɨyini fɨ nɨn nî meyn Nèbùkànezà ɨ nà ghɨ fòyn ɨ̀ngaŋtɨnɨ, ghelɨ tɨlaʼ tɨ mbzɨ, kèsa ghɨ lù abàs ilaʼ à kà, taŋî nô mɨ ìtaŋi ilaʼ ì kà ɨ nà fâyn ŋweyn nô sɨ a ŋaŋ. Wu nà n-kôŋ sɨ zue wul, wu zue kɨ zue, nà kôŋ sɨ visi wul na wù na chi-à, wu visi kɨ visi. Wù nà n-kôŋ sɨ lèm wul achɨ a ngaŋtɨnɨ-a wu lèm, ɨ̀ nà kôŋ sɨ suʼsɨ wul wu suʼsɨ kɨ suʼsɨ. ²⁰Mɨtì a nà ghɨ ta wù n-to nɨ̀ àtu a, fî ghaŋsɨ̂ ɨ̀wuyn, Fɨyini fɨ ɨ sù ŋweyn sɨ a fòyn ghɨ nà bu ngvɨmlɨ̂ wì ŋweyn. ²¹Ghɨ n-saŋ meyn fvɨ̀sɨ̀ ŋweyn sɨ antêynɨ̀ nɨ̀ ghelɨ, Fɨyini fɨ̀ ɨ nì ikfâʼtɨ̀ i ŋweyni ɨ nà sɨ ghɨ kɨ ta ikfâʼtɨ̀ i nyâm. Wu ndu nà sɨ chî ŋêyn njàkâysɨ̀ ɨtwaʼ kfɨl kɨ ɨ̀yol ta nyâm mbòloʼ a yvɨ̂sɨ̀ kɨ amyâʼ yvɨ̂sɨ̀ ɨ̀wuyn ŋweyn sɨ chem ta wù yeyn kèli na Fɨyini fìfɨ̀ a fɨ ngàŋtɨ chwò nɨ̀n kelɨ àdyaʼ atû nɨ̀ tɨ̀fôyn tɨ mbzɨ tɨ, lêm nô mɨ ndà sɨ a fòyn ta wù n-kôŋ.”

²²Mɨtì và ɨ Bèlshazà ɨ wâyn ŋweyn bû ngvɨ̀mlɨ ngêŋ zyâ, nô mɨ ta wà n-kya awo nâ kèynà a kɨ n-gàyn têyn nô à jɨ̀m. ²³Wà chas meyn Fɨyini fìfɨ̀ a fɨ n-ghɨ iyvɨ. Wà tî bè ghɨ lî gvì nɨ̀ bom sisɨ̀ a ghɨ n-læ lì a ndô Fɨyini a Jèlusalèm zɨ̂ ghelɨ ghɨ felɨnɨ nɨ̀ và nɨ̀ ghɨ̀ki ghya baʼsɨ̂ nɨ̀ ghɨ̀ki ibàm nɨ̀ và na nyvɨ mɨ̀lûʼ ateyn. Zɨ̂ àŋena tî nà nyvɨ-a koʼsɨ̂ mɨyini ma ghɨ fàytɨ nɨ̀ àso ɨkwo a baŋnɨ-a, nɨ̀ àso ɨkwo a fɨfâ, nɨ̀ ɨmzɨ̂ a ghɨ fàytɨ nɨ̀ ìdyayn i, nɨ̀ ɨmzɨ̂ a ghɨ fàytɨ nɨ̀ àkasa kɨ̀mɨ nɨ̀ ɨmzɨ̂ a ghɨ fàytɨ nɨ̀ ɨ̀nkàʼ baʼsɨ̂ nɨ̀ ɨmzɨ̂ a ghɨ fàytɨ nɨ̀ ngòʼsɨ̀. Mɨyini nâ mèyn nɨ̀n ghɨ yeyn wi ɨlwêʼ, yvɨ wi, kya wi awo. Mɨtì wà bû ngvɨ̀mlɨ Fɨyini fìfɨ̀ a fɨ n-nî na wà na chi-à fî tisɨ̂ nô mɨ ghà ta yi ngâyn sɨ̂ và. ²⁴À ti iwo zɨ̀ a Fɨyini fɨ nì awu a nyâʼ ìwo yèynì ɨwuyn ndo.”

²⁵“Iwo zɨ̀ a ghɨ nyàʼ nɨn ghɨ na:

MENE MENE TEKEL BASÌN.”

²⁶“Awo nâ kèynà nɨn bê na:

Menè, ma à ti akôyn nɨn bê na, Fɨyini fɨ taŋ meyn mɨ̀chi mzɨ̀ a ka wà saʼ ɨfôyn va ateyn mɨ̀ koʼ mæ̀.

²⁷Tekèl ma à ti ɨfyêʼ nɨn bê na, Fɨyini fɨ feʼ meyn và ɨfyèʼ nɨ̀ ŋweyn ɨ̀ yeyn wa kfeynɨ̂ wì.

²⁸Basìn ma à ti àngwòsɨ̀ nɨn bê na, Fɨyini fɨ gwotɨ meyn ìlaʼ ì zæ ɨ̀ fù abâs a li-a sɨ̂ ghelɨ Medès ɨ̀ fu abâs a li-a sɨ̂ ghelɨ Besìyà.”

²⁹Danìyèl nɨn fèʼtɨ iwo zɨ̀ a ghɨ nyàʼ ɨwuyn ndo nô mɨ ɨlvɨ gha fòyn Bèlshazà ɨ bè ghelɨ ghɨ felɨnɨ nɨ̀ ŋweyn ɨ màʼ ndzɨsɨ tɨ̂fòyn ɨwùyn nɨ̀ Danìyèl ɨ we tɨ̀fwo a ŋweyn ɨmzɨ̀ ma ghɨ faytɨ nɨ̀ àso ɨkwo a baŋnɨ-a ɨ lèm ŋweyn wù na ghɨ ànkùmtɨ̀ sɨ̂ wùl ɨ̀ vzɨ̀ a wù n-kûmtɨ̀ sɨ̂ fòyn.

³⁰A nà ghɨ kɨ nɨ̀ntuʼ achi nâ ghè, ghɨ zue Belshazà ɨ fòyn Babilòn, ³¹Daliyùs ɨ wul ɨ̀ Medès ɨ koʼ ɨfôyn ghɨ bèŋsɨ̀ mɨ̀vɨm ntufa njvàsɨ̀ bò.