Daniel 7

Jèm ɨ chɨ Danìyèl kûm nyam sɨ̀ kæ̀

¹À nà n-ghɨ a bêŋ ɨyî àsɨ ta fòyn Belshazà nɨn saʼ Babilòn, Danìyèl ɨ kfa nyìŋì ɨ nà buni-à, jèm ɨ chɨ ŋweyn wu nyàʼ ìwo zɨ̀ a wù yèyn a jêm nâ ghè.

²Danìyèl nɨ̂n bè na, “Jem tî kfa chɨ ma ma yeyn àfyef a to-a kɨ chwô kɨ tɨghaŋ tɨ mbzɨ tɨ̀ jɨ̀m, nêʼ jva ighaʼnɨ. ³Tɨ̀nki tɨ nyâm tɨ̀ nɨn fɨ meyn koʼ a jvâ nâ ghè tɨ̀ kæ̀ ghaʼlɨ̂ kɨ tèyn.”

⁴“Nyàm ɨyî àsɨ nà n-kêʼ ta bzɨ̀kem mɨtì kelɨ tɨ̀wô tɨ ghɨ ta ɨ tɨ mbuʼ àwumawumtɨ, ma se sɨ ki ɨ̀ yeyn ghɨ choʼtɨ tɨ̀wô tɨ ateyn yì timi nɨ̀ àfyeyn à bò ta wul, ɨ̀ nà sɨ kelɨ ìkfâʼtɨ̀ i wûl.”

⁵“Ànkùmtɨ̀ a nyâm a nà n-kêʼ ta bɨ ɨ̀twaʼ ti nɨ̀ àfyeyn ibàm a, ma yì fal meyn tɨ̀ghâʼlɨ̀ tɨ nyâm tɨ̀ tal a ŋweyn asòŋ, ghɨ bè sɨ̂ ɨ̀nyeyn na, ‘Ndu kfɨl njwò ɨ kfeyn kɨ ta wà n-kôŋ.’”

⁶“Mɨ nà n-bu ki kɨ ki, ɨ fi yeyn nyam ì lì yi kêʼ ta nyamàbo. Yi nà n-kelɨ tɨ̀wô tɨ fɨ̂nyùyn a jɨm, kelɨ ɨ̀tu ɨ̀ kfæ̀, kelɨ àdyaʼ sɨ nà saʼa.”

⁷“À nà n-bu ghɨ kɨ a jem nâ ghè, ma fi yeyn nyam ì lì na à na sɨ ghɨ nyam sɨ̀ kæ̀. Nyàm àteyn nà n-bem nô a bɨ fî kelɨ àdyaʼ, asoŋ a nyâm nâ kì ɨ belɨ̂ kɨ tèyn a ghɨ àkas. Yi nà n-kfɨlɨ nyam sɨ lisɨ, à bɨsɨ mɨ ghà, yi jèylɨ̀ nɨ̀ ɨ̀vɨ. Nyàm nâ yèyn nà n-ghɨ sɨ a nyɨŋ sɨ̂ sɨlisɨ sì sɨ̀ tal, kelɨ ndoŋsɨ ìvɨm.”

⁸“Mɨ n-se sɨ faytɨ sɨ ki ndoŋsɨ nyâm nâ sìsɨ̀, ɨ yeyn itelâ yi fvɨ̂ koʼ antêynɨ̀ ndoŋsɨ nâ ghè, yi chɨyn ɨ choʼtɨ ndoŋ sɨlisɨ sɨ̀ tal. Ndoŋ nâ yèyn nà n-kelɨ àsɨ kɨ ghɨ ta asɨ a wûl, kelɨ ɨ̀chfɨ̂ wu taŋî kɨ ìtaŋi ighaŋsɨ ɨwùyn.”

⁹“Mɨ n-se meyn sɨ fì sɨ ki,

ɨ yeyn ta ghɨ n-tomtɨ mɨchɨ mɨ̀ tɨ̀fòyn.

Ghɨ n-tom tî, ɨvzɨ̂ a wù nà n-ghɨ a n-zɨ̀tɨ ɨ dùʼì achɨ a tɨ̂fòyn nɨ̀ ŋweyn.

Ndzɨsɨ ŋweynsɨ nà n-fɨfɨ ta awœ,

nyuŋsɨ atu nɨ̀ ŋweynsɨ ɨ fɨfɨ ta iwî i njɨ̀.

Ɨvɨs ɨ nà n-balî achɨ a tɨ̂fòyn nɨ̀ ŋweyn,

balî kɨmɨ akal.

¹⁰Ɨvɨs ɨ nà n-fvɨ̂ a ŋweyn asɨ kalì ta jva.

Nchìsɨ ŋweynsɨ nà n-felɨ̀ sɨ̂ ŋweyn ghɨ taŋ lê ɨ̀tu,

ghelɨ ghɨ li ɨ ti a ŋweyn asɨ.

Ghelɨ ghì a ghɨ n-saʼ nsaʼsɨ ɨ duʼ a àŋena mɨ̂chɨ,

ma ghɨ yas meyn ŋwàʼlɨ̀ sɨ nsaʼ.”

¹¹“Mɨ nà n-bu ki kɨ ki yvɨ ta ndoŋ itelâ zɨ̀ bu taŋi kɨ itaŋi ighaŋsɨ ɨwùyn, ma faŋ ɨ nà ki kɨ ki ɨ ni yeyn ta ghɨ zuè nyam àteyn ɨ̀ màʼ ɨvɨ̀s ghê a wu n-bali tî. ¹²(À nà n-ghɨ tì ma ghɨ ghalɨ meyn fsɨ adyaʼ a nyâm sɨlisɨ sìsɨ̀ sɨ̀ tal mɨtì ɨ̀ vìsi na sɨ fî chìtɨ sɨ a fɨ̂lêŋnɨ̀ fɨ ɨlvɨ.)”

¹³“Jem àteyn nà n-bu chɨ kɨ chɨ ma, ma yeyn wul ɨ̀ lvì wu ghɨ ta wâyn wùl, wu suʼî gvî antêynɨ̀ mbàʼsɨ̀. Wu n-suʼi tî ɨ ndù ɨ dyèyn ngêŋ ŋweyn sɨ̂ fòyn vzɨ̀ a wu nà n-ghɨ a nzɨ̀tɨ mbzɨ tì. ¹⁴Fòyn vzɨ̀ a wu nà n-ghɨ a nzɨ̀tɨ mbzɨ nɨn fu meyn àdyaʼ na wù na saʼ tɨ̀laʼ tɨ mbzɨ kɨ tɨ̀ jɨ̀m. Ghelɨ nà koʼsɨ̂ ŋweyn kɨ̀ mbzɨ ì jɨ̀m kèsa ghɨ lù nô mɨ abàs à kà, taŋî nô mɨ ìtaŋi ilaʼ ì kà. Ɨfôyn ŋweyn nɨn ghɨ ma wu faŋ meyn kɨ̀ samoʼ, ghɨ wi sɨ læ̀ sɨ mæ̀.”

Ghɨ fèʼtɨ̀ ìwo zɨ̀ a jemsɨ ateynsɨ nɨn bê

¹⁵Danìyèl nɨ̀n bê meyn na, “Awo kì a mɨ n-yèyn a Jêm nɨn fu meyn ngeʼ sɨ̂ mà, ma nà faynà, ¹⁶ɨ kɨŋtɨ ndu baʼsɨ a ngùŋ nɨ̀ wùl ɨ̀ lvì antêynɨ̀ nɨ̀ ghelɨ ghì a ghɨ nà n-ti afu, ɨ bɨf iwo zɨ̀ sɨ̂ ŋweyn a jèm àteyn nɨn bê.”

“Wùl àteyn ɨ kæ fèʼtɨ iwo zɨ̀ sɨ̂ mà a jem àteyn nɨn bê. ¹⁷Wu n-bè na, ‘Nyam sɨ ghaʼlɨnɨ sìsɨ̀ sɨ̀ kæ̀ nɨn ghɨ tɨ̀fôyn tɨ̀ kæ̀ ta tɨ n-læ̀ koʼ ɨfôyn a mbzɨ. ¹⁸Mɨtì a Fɨyini fìfɨ̀ a fɨ ngàŋtɨ chwò fu adyaʼ sɨ̂ ghelɨ ŋweyn a àŋena na saʼ kɨ saʼ nô ta ka ghɨ̀ læ̂ ghɨ̀.’”

¹⁹“Ghɨ n-fèʼtɨ tî, ma fi bɨf iwo zɨ̀ a nyàm ìgoʼsɨnɨ zɨ̀ a yì tî nà ghɨ sɨ a nyɨŋ nɨ̀ sɨ lisɨ tî bèm chwô ɨ̀nseynsɨ nɨn dyêyn. Nyàm àteyn nà n-kelɨ àsoŋ a ghɨ àkas, ngèsɨ ŋweynsɨ ɨ ghɨ ìdyayn. Yì nà n-zue nô mɨ nyam ì kà, ɨ̀ kfɨl à bɨsɨ nô mɨ ghà yi jèylɨ̀. ²⁰Mɨ n-bɨfɨ meyn kɨmɨ ìwo zɨ̀ a ndoŋ sìsɨ̀ ìvɨm atu nɨ̀ nyàm nâ zɨ̀ nɨ̀n dyêyn, ɨ fi bɨf iwo kûm ndoŋ zɨ̀ a yi n-læ fvɨ̀ sɨ ibàm jæ na sɨlisɨ sìsɨ̀ sɨ̀ tal tì choʼtɨ. Ndoŋ nâ yèyn nà n-kelɨ àdyaʼ chwô sɨ lisɨ sìsɨ̀, kelɨ àsɨ fî kelɨ ɨ̀chfɨ̂ taŋî kɨ ìtaŋi i ghaŋsɨ ɨwùyn. ²¹A nà ghɨ ta mà bu ki kɨ ki ndoŋ nâ yèyn, ɨ yeyn yi sêʼ ìnû sɨ̂ ghelɨ ghɨ laynɨ nɨ̀ Fɨyini fɨ tɨm yɨ àŋena, ²²sɨ chem ta ka ɨvzɨ̂ a wu nà n-ghɨ sɨ a nzɨ̀tɨ gvi saʼ fù nsaʼ ghelɨ ghɨ laynɨ nɨ̀ Fɨyini fìfɨ̀ a fɨ ngàŋtɨ chwò. Ɨlvɨ kfeyn, ghelɨ Fɨyini ɨ keli àdyaʼ ɨ nà saʼa”

²³“Wùl nâ vzɨ̀ nɨ̂n be baynsɨ sɨ̂ mà na, ‘Nyàm zɨ̀ a yì n-læ fvɨ̀ na sɨ na sɨ ghɨ sɨ̀ kæ̀ tì nɨn dyêyn ɨ̀fôyn ɨlvi ta wu læ̀ koʼ a mbzɨ na à na sɨ ghɨ tɨ̀fôyn tɨ̀ kæ̀. Ɨfôyn nâ wèyn læ̀ nà ghɨ sɨ a nyɨŋ sɨ̂ tɨ̀fôyn tɨ litɨ tìtɨ̀ tɨ̀ tal. Ɨfôyn nâ wèyn læ̀ tɨm yɨ mbzɨ ì jɨ̀m ɨ̀ jèylɨ̀ bèbsɨ nô mɨ ghà ateyn. ²⁴Ndoŋ sìsɨ̀ ìvɨm nɨn dyêyn tɨ̀fôyn ìvɨm ta tɨ n-læ̀ koʼ ɨfôyn ilaʼ nâ ghàyn, a fòyn ɨ̀lvì koʼ ghɨ sɨ a nyɨŋ sɨ̂ tɨ̀fôyn nâ tìtɨ̀ a tɨ tî kòʼ sɨ asɨ tì. Wù læ̀ saʼ yeʼtɨ̂ tɨ̀fôyn tɨ litɨ tìtɨ̀ tɨ̀ tal. ²⁵Fòyn nâ wèyn læ̀ nà bê àwo a bɨ-a kûm Fɨyini fìfɨ̀ a fɨ ngàŋtɨ chwò, saʼ yeʼtɨ̂ ghelɨ ghɨ laynɨ nɨ̀ ɨ̀nfeynfɨ. Wù læ̀ nà mômsɨ̀ sɨ kfɨnɨ mɨchi mɨ̀ àyɨ nɨ̀ àŋena nɨ̀ tɨsaʼ tɨ Fɨyinitɨ̀. Wù læ̀ saʼ ghelɨ ghɨ laynɨ nɨ̀ Fɨyini fɨ sɨ a bèŋsɨ̀ tal nɨ̀ àbeʼa.”

²⁶“Mɨtì a ghelɨ ghì a ghɨ n-saʼ nsaʼsɨ iyvɨ duʼi a mɨ̂chɨ nɨ̀ àŋena ɨ̀ fsɨ adyaʼ a ŋweyn ɨ̀ bèbsɨ ŋweyn kɨ̀ samoʼ. ²⁷Ghɨ n-læ̀ bebsɨ-à, a Fɨyini fìfɨ̀ a fɨ ngàŋtɨ chwò fu adyaʼ sɨ̂ ghelɨ ghɨ laynɨ nɨ̀ ŋweyn, a àŋena na saʼ tɨ̀laʼ tɨ mbzɨ nô tɨ̀ jɨ̀m. Ɨfôyn ŋweyn læ̀ faŋ kɨ samoʼ, a ghelɨ ghɨ saʼnɨ nô ghɨ̀ jɨ̀m na yvɨnɨ̂ ŋweyn ngvɨmlɨ̂ ŋweyn.’”

²⁸“À ti jem zɨ̀ a yì tî chɨ̀ ma têyn. Jèm àteyn tî chɨ̀ ma, ma na fâyn nò sɨ a ŋaŋ ikêʼ ì yemi kasi nà fɨfɨ kɨ tèyn mbvɨ, mɨtì ma faŋ tɨ̀ fèʼtɨ jem àteyn sɨ̂ wùl.”