Deuteronomy 10

Bôbo Fɨyini ɨ fi fu tɨsaʼ sɨ̂ Mosìs

¹Mosìs nɨn be meyn sɨ̂ ghelɨ Isìlæ̀ na, “À nà ghɨ ta mɨchi mzɨ̀ mɨ̀vɨm ɨ̀n kæ̀ chwò Bôbo Fɨyini ɨ bè sɨ̂ mà na, ‘Chuyn ɨbyâs ngòʼsɨ̀ ɨlvɨ ɨ̀ bwò, wu na ghɨ kɨ ta ɨvzɨ̂ a mɨ læ fu sɨ̂ và sɨ asɨ tì. Wà chuyn wa bayn àntayntayn nɨ̀ fɨ̀kâʼfɨ̀, ɨ koʼ gvì a kfɨyn afêyn. ²Mɨ n-kasî nyâʼ kɨ àwo kì a kɨ tî nà ghɨ ɨbyàs ngòʼsɨ̀ ghê a wà tî zuèlɨ tî, a wà we antayntayn nâ ghè.’”

³Fɨyini fɨ nɨn læ bè tî, ma faytɨ àntayntayn nɨ̀ fɨ̀kâʼ fɨ àkasìyà fɨ̀, ɨ chuyn ɨbyâs ngòʼsɨ̀ ɨ̀ bwò wu ghɨ kɨ ta ɨvzɨ̂ a wu nà n-ghɨ sɨ asɨ, ɨ lì koʼ nɨ̀ ɨ̀ŋweyn a kfɨyn nâ ghè. ⁴A nà ghɨ ta mà koʼ nɨ̀ ɨ̀byâs ɨ ngòʼsɨ̀ ateyn a kfɨyn nâ ghè, Bôbo Fɨyini ɨ kasi ɨ nyàʼ àwo kì a wu n-læ nyàʼ sɨ asɨ tì ɨ fu sɨ̂ mà a ghɨ tɨsaʼ tìtɨ̀ ìvɨm a wu n-læ taŋi gvìsɨ̀ sɨ̂ zɨ̀ antêynɨ̀ ɨ̀vɨ̀s, achi ghè a yi n-læ yvɨ̀ŋtɨ isas i kfɨyn. ⁵A nà ghɨ ta Bôbo Fɨyini nyàʼ fu tɨsaʼ nâ tìtɨ̀ sɨ̂ mà ɨbyàs ɨ ngòʼsɨ̀ nâ ghè, ma kasi ɨ kàlì ɨ we sɨ antayntayn afî a mɨ bayn tî, kɨ̀ ta wù bè.

⁶Ghelɨ Isìlæ̀ nɨn læ lù a Belot Bènè Jakàn/alèʼ ghè a tɨbɨ tɨ mu nɨ̀ ghelɨ Jakàn nà ghɨ ateyn, ɨ ndù a Moselà, Alòyn ɨ kfɨ afu ghɨ gvìmì ŋweyn, Elezà ɨ lì àlêʼ a ŋweyn ta Ngàŋ ndô Fɨyini. ⁷Àŋena nɨn læ lù afu, ɨ ndù a Gudgodà, ɨ læ lù a Gudgodà ɨ ndù a Jotbatà, a ghɨ ìlaʼ kelɨ jvasɨ sɨ dvɨ̂ kɨ tèyn. ⁸Bôbo Fɨyini nɨn læ choʼ ghelɨ ndo nɨ̀ Levì ɨtuʼ nâ ghè na àŋena na bèʼì àntayntayn a mɨ̂kàyn nɨ̀ Bôbo Fɨyini, felɨ̀ sɨ̂ ŋweyn ta ngàŋsɨ ndô Fɨyini, jemà Bôbo boysɨ̂ ghelɨ, kɨ têyn ta àŋena nɨn nî layn. ⁹À ti iwo zɨ̀ a ghelɨ Levì nɨn bu læ keli alêʼ a nse, ta woynà àŋena ghɨ li. Afo kì a àŋena nɨn læ keli nà n-ghɨ kɨ na àŋena na ghɨ ngàŋsɨ ndô Fɨyini, felɨ̀ sɨ̂ ŋweyn, kɨ̀ ighel ta wù n-læ chfɨ̀nɨ.

¹⁰Mosìs nɨn læ meyn fi taŋi sɨ̂ ghelɨ Isìlæ̀, ɨ bè na, “Mɨ n-læ meyn fi koʼ ɨ chi a kfɨyn nâ ghè sɨ a mɨchi mɨ̀vɨm ɨ̀n kæ̀, chî kɨ tèyn lalì yisi-à, kɨ̀ ta mɨ n-læ chi sɨ asɨ. Bôbo Fɨyini ɨ fi yvɨ ijêm ì yemi. Wu n-bu læ nà kôŋ sɨ bebsɨ zɨ. ¹¹Bôbo Fɨyini ɨ kæ bè sɨ̂ mà na, ‘Ndù lì zɨ nɨ̀ ghelɨ Isìlæ̀ a ilaʼ ghè a mɨ n-læ chfɨ̀nɨ sɨ fu sɨ̂ ghɨ̀bo ghi.’”

Yì na Koʼsɨ̂ Bôbo Fɨyini fî Ngvɨmlɨ̂ ŋweyn

¹²Mosìs nɨn fi meyn bè sɨ̂ ghelɨ Isìlæ̀ na, “Iwo zɨ̀ a Bôbo Fiyini ɨ Fɨyini fifɨ nɨn kɨŋ nɨn ghɨ na yì na kôŋ ŋweyn, ngvɨmlɨ̂ ŋweyn, koʼsɨ̂ ŋweyn, lêm tɨ̀saʼ tɨ ŋweyn kɨ tɨ̀ jɨ̀m, fî felɨ̀ sɨ̂ Bôbo Fɨyini ɨ Fɨyini fifɨ kɨ nɨ̀ àtem à ki-a à jɨ̀m à. ¹³Wù n-kɨŋ na yì na yvɨnɨ̂ tɨsaʼ tɨ ŋweyn tìtɨ̀ a mà fu sɨ̂ zɨ̀ layn nô tɨ̀ jɨ̀m, ta ka awo a na ndû kɨ a jûŋ sɨ̂ zɨ̀.”

¹⁴“Mbzɨ yèyn nô ì jɨ̀m, baʼsɨ̂ nô mɨ nɨ̀ ghà ta kɨ n-ghɨ ateyn nɨn kelɨ kɨ Bôbo Fɨyini, ɨ fɨyini fifɨ/À n-kelɨ Bôbo Fɨyini iyvɨ nɨ̀ nse baʼsɨ̂ nô mɨ nɨ̀ ghà ta kɨ n-ghɨ ateyn. ¹⁵Mɨtì Bôbo Fɨyini nɨn n-læ meyn nà kôŋ ghɨ̀bò ghi nô sɨ a ŋaŋ ɨ choʼ zɨ ɨ woyn àŋena antêynɨ̀ tɨ̀laʼ tɨ mbzɨ nô tɨ̀ jɨ̀m kɨ̀ ighel ta yi ghɨ layn. ¹⁶Yì su mɨtem mzɨ̂ mɨ̀ n啊a layna sɨ zɨ̀tɨ layn sɨ ndu asɨ, yì na yvɨnɨ̂ Bôbo Fɨyini. ¹⁷Bôbo Fɨyini, ɨ Fɨyini fifɨ nɨn ngaŋtɨ̂ chwô mɨyini nô ɨ̀n jɨ̀m, kelɨ àdyaʼ fî bema. Wu nî wì iwo sɨ̂ wùl ɨ̀ sɨ a nyɨŋ ma wul ɨ̀ kàʼ wu bû yùyntɨ ŋweyn. ¹⁸Wù n-tôʼnɨ̀ nɨ̀ woyn nkfɨ, tôʼnɨ̀ nɨ̀ ghɨ̀ki nkfɨ. Wù kôŋ ghelɨ ɨtum ghì a ghɨ chi a yi antêynɨ̀, fu ɨ̀fwo yɨnɨ sɨ̂ àŋena nɨ̀ dzɨsɨ. ¹⁹Yi n-kelɨ sɨ nà kôŋ ghelɨ ɨtum bòm ta yi n-læ meyn nà ghɨ kɨmɨ ɨ̀tum a Ijìb. ²⁰Yì na ngvɨmlɨ̂ Bôbo Fɨyini ɨ Fɨyini fifɨ, koʼsɨ̂ kɨ ŋweyn. Yì na yeʼtɨ̂ kɨ ɨwùyn nɨ̀ ŋweyn, yɨ mɨ̀kâyn kɨ̀ a izɨyn nɨ̀ ŋweyn. ²¹Wù ghɨ Fɨyini fifɨ yi kelɨ sɨ nà koʼsɨ kɨ ŋweyn. Yi yeyn meyn àwo a ɨchfɨ̀ ɨyumnɨ kì a wù nì sɨ̂ zɨ̀. ²²Ghɨ̀bo ghi nɨn læ ndù a Ijìb ghɨ kɨ mɨ̀vɨm nsòmbo, à na sɨ ghɨ layn ma Bôbo Fɨyini boysɨ meyn zɨ̀, yi dvɨ̂ tèyn, ghɨ na taŋ lè ɨ̀tu.”