Deuteronomy 18

Ifu zɨ̀ a ghɨ n-fu yi ndû sɨ̂ Ngàŋsɨ ndô Fɨyinisɨ̀

¹Mosìs nɨn læ meyn bè sɨ̂ ghelɨ Isìlæ̀ na, Ngàŋsɨ ndô Fɨyinisɨ̀, ma à ti ghelɨ ndo nɨ̀ Levì, læ̀ nà kelɨ wi afo a Isìlæ̀, àŋena læ̀ nà yɨ kɨ tɨ̀fu tìtɨ̀ a ghɨ n-fu sɨ̂ Bôbo Fɨyini. ²Àŋena læ̀ nà kelɨ wi ɨlwêʼ ɨ nse ta ghelɨ Isìlæ̀ ghɨ li, àŋena læ̀ na ghɨ kɨ ghelɨ ghɨ felɨnɨ nɨ̀ Bôbo Fɨyini kɨ̀ ighel ta wù sɨ ghɨ ma wù chfɨnɨ, meyn sɨ̂ àŋena.

³Ghɨ na sɨ nyam ìfu nô mɨ ɨlvɨ gha, kèsa à n-ghɨ bzɨ ma nyam mbòloʼ a, ghɨ fu awu, nɨ̀ ɨ̀gvêʼ ateyn, baʼsɨ̂ nɨ̀ ɨ̀fwo ɨlvà sɨ̂ àŋena. ⁴Yì na kfì àsaŋ nô mɨ abêŋ ì kà, yi fu mɨtam mɨ̀ àsɨ sɨ̂ àŋena. Yi zɨtɨ̀ sɨ kœ mɨtam, yi fu mɨlûʼ ɨ mɨ̂ àsɨ nɨ̀ mɨ̀vɨ̂l mɨ̀ àsɨ sɨ̂ àŋena, ɨ̀ zɨ̀tɨ̀ sɨ kom iwî i njɨ̀, yi fu iyi asɨ-i sɨ̂ àŋena. ⁵Yi n-kelɨ sɨ nà ni tî bòm ta, Bôbo Fɨyini ɨ Fɨyini fifɨ nɨn læ choʼ Levì ŋêyn woyn ŋweyn a Isìlæ̀ na àŋena na fèlɨ̀ kɨ sɨ̂ ŋweyn nô ta ka ghɨ̀ læ̂ ghɨ̀.

⁶Wùl ɨ̀ ndo nɨ̀ Levì kæ sɨ lù nô mɨ a ntèʼ i kà a Isìlæ̀, nà kôŋ sɨ gvì alèʼ ghè a ghɨ n-koʼsɨ Bôbo Fɨyini ateyn, ⁷wù kâʼ a wù gvi nà fèlɨ sɨ̂ Bôbo Fɨyini ɨ Fɨyini fɨ ŋweyn kɨ̀ ta woynà ŋweyn ɨ ghelɨ ndo nɨ̀ Levì ghɨ li nɨn felɨ̀. ⁸Wù kæ gvì alèʼ ghè a ghɨ n-koʼsɨ Bôbo Fɨyini ateyn, a ghɨ na kelɨ sɨ nà fu ɨfwo sɨ̂ ŋweyn kɨ̀ ighel ta ghɨ n-fu sɨ̂ ngàŋsɨ ndô Fɨyini, sɨ baʼsɨ sɨ ɨkwo ghè a ghɨ bèyʼlɨ ɨfwo isas i ndo nɨ̀ àŋena ɨ̀ fù sɨ̂ ŋweyn.

Mosìs ɨ fu nfàsì-fàsì kûm àwo kì a Bôbo Fɨyini nɨn bâyn

⁹Mosìs nɨn læ meyn bè sɨ̂ ghelɨ Isìlæ na, “Yi zɨ ilaʼ nâ ghàyn a Bôbo Fɨyini ɨ Fɨyini fifɨ nɨn fu sɨ̂ zɨ̀ têyn, ka yi n-læ̀ sɨ̀nɨ àwo a bɨ-a kì a ghelɨ ilaʼ nâ ghì nɨn nî. ¹⁰Ka wùl sɨ̂ zɨ̀ nɨn læ̀ nyòʼ wayn ŋweyn sɨ a ifu sɨ̂ mɨyini, ka wùl nɨn læ̀ nà fyeŋ fɨ̀nyaʼ, fêʼtɨ̀ àwo kɨ ghɨ sɨ jæ sɨ gàyn, ka wùl nɨn læ̀ nà kfɨl àvɨ̂ŋ. ¹¹Ka wùl nɨn læ̀ nà jelɨ̀ nɨ̀ mbas. Ka wùl nɨn læ̀ nà bê na yi n-taŋî ŋêyn ɨ̀yvɨsɨ, kèsa ŋêyn nkfɨsɨ nsesɨ. Ka wùl nɨn læ̀ nà kfɨl àvɨ̂ŋ, kèsa wul ɨ̀ tùʼ. ¹²Bôbo Fɨyini, ɨ Fɨyini fifɨ, nɨn kôŋ wì ghelɨ ghɨ nî àwo a chaʼnɨnɨ-a nâ kèynà, à ti iwo zɨ̀ a wù n-sâŋ fvɨsɨ̀ ghelɨ ilaʼ nâ ghèyn a yi asɨ. ¹³Yi n-kelɨ sɨ nà yvɨnɨ kɨ Bôbo Fɨyini ɨ Fɨyini fifɨ.”

Bôbo Fɨyini ɨ chfɨ̀nɨ̀ sɨ tum nfèʼtɨ̀ ighaʼnɨ a Isìlæ̀

¹⁴Mosìs nɨn læ meyn fi bè sɨ̂ ghelɨ Isìlæ̀ na, “Ghelɨ ghì a yi n-ndû sɨ sàŋ sɨ fvɨ̀sɨ̀ ilaʼ nâ ghè nɨn fyeŋ fɨ̀nyaʼ, fî nî àwo a chaʼnɨnɨ-a a li-a mɨ̀tì Bôbo Fɨyini ɨ Fɨyini fifɨ ɨ kôŋ wì sɨ yeyn na wùl sɨ̂ zɨ̀ mom ìnkì iwo nâ zɨ̀. ¹⁵Bôbo Fɨyini ɨ Fɨyini fifɨ nɨn choʼ nfèʼtɨ̀ ighaʼnɨ a yi antêynɨ̀, wu ghɨ kɨmɨ ta ma, yi kelɨ sɨ nà ni kɨ ta wù n-bê. ¹⁶A n-læ nà ghɨ ta yì yvɨ ta Bôbo Fɨyini nɨ̀n taŋi gvîsɨ̀ antêynɨ̀ ɨ̀vɨ̀s a Holèb, yi nà chwotɨ̂ bê na ka mɨ n-fì vìsi wù taŋi sɨ̂ zɨ̀, na yi n-kôŋ wì sɨ fì sɨ yeyn ɨvɨs ateyn a bu tì a yì kfɨtɨ.”

¹⁷Bôbo Fɨyini ɨ yvɨ iwo zɨ̀ a yì bè, ɨ kæ be sɨ̂ mà na, “Iwo zɨ̀ a àŋena bè nɨn ghɨ samoʼ. ¹⁸Mɨ n-choʼ nfèʼtɨ̀ ighaʼnɨ a àŋena antêynɨ̀, wù ghɨ kɨ ta vâ, fêʼtɨ̀ kɨ ìwo zɨ̀ a mà bè na wù feʼtɨ sɨ̂ àŋena. ¹⁹Mà kæ sɨ tum ŋweyn wù bê ìwo, à faŋ nô mɨ ndà tɨ̀ ni iwo zɨ̀ a wù be, à mà fu ngeʼ sɨ̂ wùl àteyn. ²⁰Nô mɨ nfèʼtɨ̀ ì kà kæ bè iwo bula ma tum na wù be, kèsa wù bè ìwo izɨyn nɨ̀ mɨyini ɨn lì, a wù na kelɨ sɨ kfɨ.”

²¹Yì kàʼ a yì na kayn nâ yì na kelî sɨ a gha na iwo zɨ̀ a nfèʼtɨ̀ nɨ̀n bê lù sɨ̂ Bôbo Fɨyini a. ²²Wù kæ sɨ bè iwo, yi faŋ tɨ̀ gàyn, a yì keli na iwo ateyn i bû lù sɨ̂ Bôbo Fɨyini. À ti n-ghɨ na nfèʼtɨ̀ àteyn kàŋtɨ̀ kaŋtɨ iwo ateyn kɨ̀ sɨ a ŋweyn a ngeŋ. Ka yì na fàyn ŋweyn.