Deuteronomy 27
Ŋwàlɨ̀ Ditòlonomì
Mosìs ɨ bè, ghɨ nyàʼ tɨ̀saʼ tɨ Fɨyini a ngòʼsɨ̀
1Mosìs ŋêyn ghelɨ ghɨ tisinɨ a Isìlæ̀ nɨn læ meyn bè sɨ̂ ghelɨ Isìlæ̀ na, “Yì na lèm tɨ̀saʼ tèyntɨ̀ a mà fù sɨ̂ zɨ̀ layn tèyn kɨ tɨ̀ jɨ̀m. 2Yi dyâŋ jvâ Jodàn, ɨ̀ zɨ a ilaʼ ghè a Bôbo Fɨyini nɨ̀n fu sɨ̂ zɨ̀, yi tomtɨ ngòʼsɨ ghaʼlɨnɨsɨ, ɨ yoʼ nɨ̀ àfvɨ abayn a. 3Yi yoʼ, yi nyàʼ tɨ̀saʼ tèyntɨ̀ a Bôbo Fɨyini fifɨ fù sɨ̂ zɨ̀ nô tɨ̀ jɨ̀m a ngòʼsɨ̀ nâ ghè. Ilaʼ ateyn i nɨn jofà, ɨfwo ɨ yɨnɨ ɨ koʼ ateyn nô sɨ a idvɨ̀, kɨ̀ ighel ta Bôbo Fɨyini, ɨ Fɨyini fɨ ghɨ̀bo ghifɨ nɨn læ chfɨ̀nɨ sɨ̂ zɨ̀. 4Yi dyâŋ jvâ Jodàn ɨ̀ zɨ a ilaʼ afu nô mɨ ɨlvɨ gha, yi tomtɨ ngòʼ nâ sìsɨ̀, ɨ yoʼ nɨ̀ àfvɨ abayn a kɨ̀ ighel ta mà bè sɨ̂ zɨ̀ layn. 5Yi dyâŋ chèm a ilaʼ nâ ghè, yi bàʼlɨ̀ àbaŋ ifu afu nɨ̀ ngòʼsɨ̀ sɨ̂ Bôbo Fɨyini, ɨ Fɨyini fifɨ. 6Yì baʼlɨ abaŋ ifu sɨ̂ Bôbo Fɨyini, ɨ Fɨyini fifɨ nɨ̀ ngòʼsɨ̀ bula ghɨ chuyn chuyn, nà nyôʼ ìfu ateyn sɨ̂ ŋweyn. 7Yi bâʼlɨ̀ yi nà fu tɨ̀fu ateyn sɨ nà chi nɨ̀ mbôynɨ̀, yɨ afu, fî saŋlɨ-à asɨ nɨ̀ Bôbo Fɨyini ɨ Fɨyini fifɨ. 8Yi yoʼ ngòʼsɨ ateyn, yi faytɨ nyàʼ tɨ̀saʼ tèyntɨ̀ ateyn nô tɨ̀ jɨ̀m ta ka ghelɨ na kelî sɨ jàŋ.”
Bôbo Fɨyini ɨ te ghelɨ ghì a ghɨ n-yvɨnɨ wi ŋweyn
9Mosìs ŋêyn ngàŋsɨ ndô Fɨyini nɨn læ meyn bè sɨ̂ ghelɨ Isìlæ̀ nô ghɨ̀ jɨ̀m na, “Yì yvɨtɨ a ghelɨ Isìlæ̀, sɨ zɨ̀tɨ layn, yì sɨ ghɨ ghelɨ Bôbo Fɨyini ɨ Fɨyini fifɨ. 10Yì na yvɨnɨ̂ Bôbo Fɨyini, ɨ Fɨyini fifɨ, lêm tɨ̀saʼ tɨ ŋweyn tèyntɨ̀ a mà fù sɨ̂ zɨ̀ layn, nî nô mɨ ghà ta wù bè na yì ni.”
11Mosìs nɨ̀n be meyn kɨmɨ sɨ̂ ghelɨ Isìlæ̀ achi nâ ghè na,
12Yi dyâŋ jvâ Jodàn, ghelɨ Simìyòn, nɨ̀ ghelɨ Judà, kɨ̀mɨ nɨ̀ ghelɨ Isakà, nɨ̀ ghelɨ Josèf, baʼsɨ̂ nɨ̀ ɨ ghɨ Benjamìn ɨ koʼ timi a kfɨ̂yn Gelizɨ̀m, ɨ jèm sɨ̂ Bobo Fɨyini wù boysɨ ghelɨ ŋweyn. 13Ghelɨ Lubèn nɨ̀ ghelɨ Gâd, nɨ̀ ghelɨ Ashà, nɨ̀ ghelɨ Zebulòn, nɨ̀ ghelɨ Dân, baʼsɨ̂ nɨ ɨ ghɨ Naftalì ɨ koʼ a kfɨ̂yn Ebàl, ɨ yvɨ ta Bôbo Fɨyini nɨn te ghelɨ.
14Ghelɨ ndo nɨ̀ Levì na gvì timi-à, ghɨ jaŋ làʼì nô nɨ̀ gyà ì to sɨ̂ ghelɨ Isìlæ̀ kɨ ghɨ̀ jɨ̀m na,
15“Ndoyn Fɨyini na ghɨ atu nɨ̀ wùl ɨ̀ vzɨ a wù chuf, kèsa bom ànfèʼsɨ̀ nà koʼsɨ-à. Bôbo Fɨyini nɨ̀n kôŋ wì na wùl ɨ̀ nyaʼtɨ̂ fàytɨ àfo nà koʼsɨ-à.” A ghelɨ Isìlæ̀ beynsɨ kɨ ghɨ̀ jɨ̀m na, “Àmèyn!”
16“Ndoyn Fɨyini na ghɨ atu nɨ̀ wùl ɨ̀ vzɨ̀ a wù n-yvɨnɨ wi bò ŋweyn, yvɨnɨ̂ wi nà ŋweyn.”
Ghelɨ Isìlæ̀ ɨ bèynsɨ̀ kɨ ghɨ̀ jɨ̀m na, “Àmèyn!”
17“Ndoyn Fɨyini na ghɨ atu nɨ̀ wùl ɨ̀ vzɨ̀ a wù choʼ kɨ̀ŋtɨ nɨ̀ fɨkâʼ fɨ ighami nɨ̀ wùl ɨ̀ vzɨ̀ a ŋêyn ŋweyn nɨn lêm ighami amoʼ.”
Ghelɨ Isìlæ̀ ɨ bèynsɨ kɨ ghɨ̀ jɨ̀m na, “Àmèyn!”
18“Ndoyn Fɨyini na ghɨ atu nɨ̀ wùl ɨ̀ vzɨ̂ a wù yeyn ànfèf a dzɨ ɨ̀ jɨ̀ŋsɨ̀.”
Ghelɨ Isìlæ̀ ɨ bèynsɨ̀ kɨ ghɨ̀ jɨ̀m na, “Àmèyn!”
19“Ndoyn Fɨyini na ghɨ atu nɨ̀ wùl ɨ̀ vzɨ̀ a wù saʼ yeʼtɨ wul àtum, nɨ̀ wâyn nkfɨ, nɨ̀ wî nkfɨ.”
Ghelɨ Isìlæ̀ ɨ bèynsɨ̀ kɨ ghɨ̀ jɨ̀m na, “Àmèyn!”
20“Ndoyn Fɨyini na ghɨ atu nɨ̀ wùl ɨ̀ vzɨ̀ a wù chi nɨ̀ wî bò ŋweyn, bòm ta wù yasɨ meyn ndzɨsɨ isas nɨ̀ wî bæ̀, a ghɨ ìwo iwuminɨ-i.”
Ghelɨ Isìlæ̀ ɨ bèynsɨ̀ kɨ ghɨ̀ jɨ̀m na, “Àmèyn!”
21“Ndoyn Fɨyini na ghɨ atu nɨ̀ wùl ɨ̀ vzɨ̀ a wù chi nɨ̀ nyàm.”
A ghelɨ Isìlæ̀ beynsɨ kɨ̀ na, “Àmèyn!”
22“Ndoyn Fɨyini na ghɨ atu nɨ̀ wùl ɨ̀ vzɨ̀ a wù chi nɨ̀ jêmtɨ̀, kèsa à n-ghɨ wâyn bò ŋweyn a, kèsa ŋêyn ŋweyn fvɨ̀ ɨlvâ mòʼ a.”
Ghelɨ Isìlæ̀ ɨ bèynsɨ̀ kɨ ghɨ̀ jɨ̀m na, “Àmèyn!”
23“Ndoyn Fɨyini na ghɨ atu nɨ̀ wùl ɨ̀ vzɨ̀ a wù chi nɨ̀ nà wi.”
Ghelɨ Isìlæ̀ ɨ bèynsɨ̀ kɨ ghɨ̀ jɨ̀m na, “Àmèyn!”
24“Ndoyn Fɨyini na ghɨ atu nɨ̀ wùl ɨ̀ vzɨ̀ a wù nyaʼtɨ zue wâynà ŋweyn.”
Ghelɨ Isìlæ̀ ɨ bèynsɨ̀ kɨ ghɨ̀ jɨ̀m na, “Àmèyn!”
25“Ndoyn Fɨyini na ghɨ atu nɨ̀ wùl ɨ̀ vzɨ̀ a ghɨ yùyntɨ ŋweyn na wù zuè wul salû.”
Ghelɨ Isìlæ̀ ɨ bèynsɨ̀ kɨ ghɨ̀ jɨ̀m na, “Àmèyn!”
26“Ndòyn Fɨyini na ghɨ atu nɨ̀ wùl ɨ̀ vzɨ̀ a wù n-yvɨnɨ wi tɨsaʼ nâ tèyntɨ̀.”
Ghelɨ Isìlæ̀ ɨ bèynsɨ̀ kɨ ghɨ̀ jɨ̀m na, “Àmèyn!”