Deuteronomy 30

Ghelɨ Isìlæ̀ læ̀ kasî gvî sɨ̂ Bôbo Fɨyini

¹Mosìs nɨn læ meyn bè sɨ̂ ghelɨ Isìlæ̀ na, “À læ̀ nà ghɨ ta awo a juŋà nɨ̀ a bɨ-a kèyn a mà fèʼtɨ̀ sɨ̂ zɨ̀ têyn gàyn, a Bôbo Fɨyini ɨ Fɨyini fifɨ sas zɨ, a yì lu ndù nà chî a tɨlaʼ tɨlitɨ, ɨ̀ kæ sɨ kfàʼtɨ̀ awo nâ kèynà a mà bè sɨ zɨ̀ layn tèyn.” ²Zɨ̂ woyn ghi kæ sɨ læ̀ kàsi gvì sɨ̂ Bôbo Fɨyini nɨ̀ àtem à ki-a à jɨ̀mà, nà yvɨnɨ̂ tɨ̀saʼ tɨ ŋweyn tèyntɨ̀ a mɨ n-fu sɨ̂ zɨ̀ layn tèyn, ³a Bôbo Fɨyini, ɨ Fɨyini fifɨ, koynsɨ isuyn sɨ̂ zɨ̀, ɨ̀ kàsi kfa nɨ̀ zɨ̀ sɨ a tɨlaʼ ghè a wù tî wàŋtɨ ndù nɨ̀ zɨ̀ ateyn. ⁴Wùl sɨ̂ zɨ̀ læ̀ nà ghɨ nô mɨ ilaʼ ì kà a mbzɨ, Bôbo Fɨyini, ɨ Fɨyini fifɨ ɨ kasi kfa nɨ̀ ŋweyn. ⁵Bôbo Fɨyini, ɨ Fɨyini fifɨ, læ̀ kasî kfâ nɨ̀ zɨ̀ a ilaʼ nɨ̀ ghɨ̀bo ghi, ɨ̀ fù sɨ̂ zɨ̀ a à na kelɨ kɨ nô zɨ̀. Wù læ̀ ni-à, a yì bzɨ, nà dvɨ̂ chwô ghɨ̀bo ghi, lêm àwu nô mɨ gha, yi nà ndû kɨ nɨ̀ àsɨ-a. ⁶Bôbo Fɨyini ɨ Fɨyini fifɨ læ̀ bêynsɨ̀ mɨ̀tem mɨ̀ zɨ̂ woyn ghi a yì na yvɨnɨ̂ ŋweyn/kôŋ ŋweyn nɨ̀ àtem à ki-a à jɨ̀mà, nɨ̀ adyaʼ à ki-a à jɨ̀mà, ta ka mɨchi mzɨ̂ dyebtɨ a ilaʼ afu. ⁷Bôbo Fɨyini, ɨ Fɨyini fifɨ læ̀ mâʼ ngeʼ sèynsɨ̀ nô sɨ̀ jɨ̀m atu nɨ̀ mbàynɨ̀ sisɨ sì a sɨ n-bâyn zɨ choʼ àvɨ à ki-a. ⁸Yì læ̀ kasi-à nà yvɨnɨ̂ Bôbo Fɨyini lêm tɨ̀saʼ tɨ ŋweyn tèyntɨ̀ a mɨ n-fu sɨ̂ zɨ̀ layn tèyn kɨ tɨ̀ jɨ̀m. ⁹Bôbo Fɨyini, ɨ Fɨyini fifɨ læ̀ ni-à, a yì na lèm àwu à ki-a nô mɨ a gha, yi nà ndû kɨ nɨ̀ àsɨ-a, ɨ̀ nì, a yì bzɨ woyn kɨ̀ sɨ a idvɨ̀, ɨ̀ boysɨ zɨ̀ nɨ̀ ɨ̀fwo ɨ yɨnɨ kɨ sɨ a idvɨ̀, ɨ̀ bòysɨ zɨ̀ nɨ̀ nyamsɨ mbòloʼsɨ baʼsɨ̂ nɨ̀ njìsɨ̀ kɨ̀ sɨ a idvɨ̀. Bôbo Fɨyini læ̀ kasî nà saŋlɨ sɨ̂ zɨ̀ kɨ̀ ta wu n-læ nà saŋlɨ sɨ̂ ghɨ̀bo ghi, ɨ nì àŋena nà lêm àwu nô mɨ a gha, yi ndû kɨ nɨ̀ àsɨ-a. ¹⁰Bôbo Fɨyini ɨ Fɨyini fifɨ ɨ nì na saŋlɨ̂ sɨ̂ zɨ̀ ɨlvɨ ta yi n-lêm tɨsaʼ tìtɨ̀ a ghɨ nyàʼ a ŋwàʼlɨ̀ ìsaʼ afêyn nô tɨ̀ jɨ̀m, yvɨnɨ̂ ŋweyn. Wu nì nî àwo nâ kèynà ɨlvɨ ta yì kàsi gvì sɨ̂ ŋweyn kɨ nɨ̀ àtem à ki-a à jɨ̀mà nɨ̀ àyvɨs à ki-a à jɨ̀mà.

Tɨsaʼ tɨ Bôbo Fɨyinitɨ̀ nɨn to wi sɨ a ŋaŋ

¹¹Mosìs nɨn læ meyn bè sɨ̂ ghelɨ Isìlæ̀ na, “Tɨsaʼ tèyntɨ̀ a mɨ n-fu sɨ̂ zɨ̀ layn tèyn nɨn to wi sɨ lèm, to wi sɨ yvɨ sɨ keli.” ¹²Tɨsaʼ tɨ ateyn tɨ nɨn ghɨ wi iyvɨ ta ka yì na sɨ kayn nâ, “A ti n-koʼ ndà a iyvɨ sɨ kàli nɨ̀ ɨ̀nteyntɨ, sɨ yeʼi ghes ta ka ghèsɨ̀ keli sɨ nà lêm a?” ¹³Tɨ n-ghɨ wi a injɨyn i jva ìghaʼnɨ ta ka yì na sɨ kayn nâ, “A ti n-dyàŋ lî ndà sɨ gvì sɨ yeʼi ghes nɨ̀ ɨ̀nteyntɨ ta ka ghèsɨ̀ na kya sɨ lèm a?” ¹⁴Ɨ̀ngaŋ! Iwo i Fɨyini nɨn baʼsɨ̂ kɨ tèyn sɨ̂ zɨ̀. Yi n-ghɨ a yi ɨchfɨ̀ fî ghɨ a yi a mɨ̂tèm ta ka yì na yvɨnɨ-à.

¹⁵“Mɨ n-visî zɨ̀ layn, a yì choʼnɨ na yì na chî nchînɨ̀ ì jùŋ, awo à ki-a ndû a jûŋ ma, yì na chî nchînɨ̀ i bɨ ɨ̀ kfɨ̀tɨ a. ¹⁶Yi kæ nà lèm tɨsaʼ tɨ Bôbo Fɨyini ɨ Fɨyini fifɨ tèyntɨ̀ a mɨ n-fu sɨ̂ zɨ̀ layn tèyn, kôŋ ŋweyn, yvɨnɨ̂ tɨ̀saʼ tɨ ŋweyn kɨ tɨ̀ jɨ̀m, a yì lema, nà ghɨ ìlaʼ i ghaʼnɨ-i, a wù boysɨ zɨ a ilaʼ nâ ghàyn a yi n-kɨŋ sɨ li têyn.”

¹⁷Mɨtì ma yì kæ sɨ to nɨ̀ àtu a, nà yvɨnɨ̂ wì, ɨ̀ kàsi ndù nà koʼsɨ̂ mɨyini ɨn lì, ¹⁸a mà na bè sɨ̂ zɨ̀ layn na yi n-kfɨtɨ-à. Yì nà kya na yi n-chitɨ̂ wì a ilaʼ nâ ghè a yi n-dyâŋ ndu sɨ lì a injɨyn i Jvâ Jodàn tì na à na kelɨ kɨ nô zɨ̀.

¹⁹Mɨ n-taŋî sɨ zɨ̀ layn tèyn, nse yèyn nɨ̀ ìvɨ i ɨ ghɨ nchwò saʼ sɨ̂ mà. Yì choʼnɨ læ̂ layn na yì na chî nchînɨ̀ ì jùŋ, awo à ki-a ndû a jûŋ ma, yì na chî nchînɨ̀ i bɨ ɨ̀ kfɨ̀tɨ a. Yì choʼnɨ nchînɨ̀ ì jùŋ ta ka zɨ̂ woyn ghi na chi-à. ²⁰Yì choʼnɨ sɨ nà kôŋ Bôbo Fɨyini ɨ Fɨyini fifɨ, yvɨnɨ̂ ŋweyn, ni kɨ ìwo zɨ̀ a wù bè bòm ta à n-nî ŋweyn na zɨ̀ na chi-à, ta ka mɨ̀chi mɨ̀ zɨ̂ woyn ghi dyebtɨ a ilaʼ nâ ghàyn a wu n-læ chfɨ̀nɨ sɨ fu sɨ̂ ghɨ̀bo ghi têyn, ɨ Abɨ̀làhâm nɨ̀ Yisàk nɨ̀ Jàkôb.