Deuteronomy 34

Ikfɨ i Mosìs

¹Mosìs nɨ̀n læ meyn lù a Mowàb ɨ koʼ a kfɨ̂yn Nebò, ɨ lù sɨ afu ɨ ndu koʼ a kfɨ̂yn Bisgà, injɨyn i Jèlikò. Wu n-læ ndu chem afu, Bôbo Fɨyini ɨ dyèyn ìlaʼ ateyn kɨ ì jɨ̀m sɨ̂ ŋweyn, ilaʼi Gilèd sɨ ndu kɨ têyn sɨ chem a ntèʼ Dân. ²Wu n-dyêyn meyn ìlaʼ i Naftalì sɨ ŋweyn kɨ ì jɨ̀m, ɨ ntèʼ Eflèm, nɨ̀ ntèʼ Mànasè, baʼsɨ̂ nɨ̀ ntèʼ Judà sɨ ndu kɨ têyn, sɨ chem a mbæ̀ jvà ìghaʼnɨ a Mèdìtèlenìyà. ³Bôbo Fɨyini nɨ̀n læ meyn dyeyn kɨmɨ àbâs kì a ghɨ nà n-toŋtɨ na Negèv, abàs itsɨyn a Judà, ɨ dyèyn ìbal zɨ̀ a yi nà n-lû a Zuwà ndû chem a Jèlikò, ghɨ toŋtɨ̂ na Ntèʼ Àsòm. ⁴A n-læ nà ghɨ ta Bôbo Fɨyini dyèyn mèsì ilaʼ ateyn sɨ̂ Mosìs, wu bè sɨ̂ ŋweyn na, “À ti ilaʼ zɨ̀ a mɨ n-læ chfɨ̀nɨ sɨ̂ Abɨ̀làhâm, nɨ̀ Yisàk, nɨ̀ Jàkôb, na mà læ̀ fu sɨ̂ woyn àŋena. Ma dyeyn meyn sɨ̂ và, mɨtì ghɨ wi sɨ visi na wà zɨ ateyn.”

⁵Mosìs, ɨ wul ɨ̀ felɨnɨ nɨ̀ Bôbo Fɨyini, nɨn læ Kfɨ a Mowàb, kɨ̀ ighel ta Bôbo Fɨyini nɨn læ bè. ⁶Bôbo Fɨyini nɨn læ meyn gvìmì ŋweyn a Mowàb, a ɨfyàyn ɨlvɨ, injɨyn i ntèʼ Bet Beyò, mɨ̀tì sɨ koʼ sɨ chem layn, wùl bû tìmi nà faytɨ̂ kya ìsê ateyn. ⁷Mosìs nɨn læ se sɨ kfɨ ma wù sɨ ghɨ bèŋ ɨvɨ nɨ̀ bèŋsɨ mɨ̀vɨm ɨ̀m bò, bu to kɨ tèyn nteŋ, asɨ a ŋweyn a kelɨ wi ngeʼ. ⁸Ghelɨ Isìlæ̀ nɨn læ dzɨ̀ ikfɨ i Mosìs a Mowàb sɨ mɨchi mɨ̀vɨm ɨ̀n tal, kɨ̀ ta nchînɨ̀ ìlaʼ nɨ̀ àŋena nɨn dyêyn.

⁹Mosìs nɨ̀n læ se sɨ kfɨ, ma wù lem meyn àwu atu nɨ̀ Joshwà, ɨ jèm ɨ lèm ŋweyn sɨ a ŋweyn a nyɨ̂ ndo, Bôbo Fɨyini ɨ boysɨ Joshwà, ɨ fu itof sɨ̂ ŋweyn. Ghelɨ Isìlæ̀ ɨ nà sɨ yvɨnɨ̂ Joshwà, lêm tɨ̀saʼ tìtɨ̀ a Bôbo Fɨyini nɨn læ fu sɨ̂ àŋena toynɨ̂ a Mosìs.

¹⁰Kɨ sɨ zɨ̀tɨ̀ ɨtuʼ nâ ghè sɨ koʼ sɨ chem layn, Nfèʼtɨ̀ ighaʼnɨ bû tìmi nà fî ghɨ a Isìlæ̀ ta Mosìs. Bôbo Fɨyini nɨn læ nà lum bêsɨ̀ kɨ nô àwo ŋêyn Mosìs ta wùl ɨ̀ bèsɨ̀ ŋêyn wùl ìjèl nɨ̀ ŋweyn. ¹¹Nfèʼtɨ̀ ìghaʼnɨ ì lì nɨn ghɨ wi a yì tìmi nì nchwæsɨ awo a kaynɨ-a kì a Bôbo nɨn læ tum Mosìs wu nì sɨ̂ fòyn Ijìb nɨ̀ ghelɨ ghɨ felɨnɨ nɨ̀ ŋweyn nô ghɨ̀ jɨ̀m, nɨ̀ ìlaʼ i ŋweyn ì jɨ̀m. ¹²Nfèʼtɨ̀ ìghaʼnɨ nɨn ghɨ wi a yì tìmi nì awo a bemnɨ-a kì a Mosìs nɨn læ nì asɨ nɨ̀ ghelɨ Isìlæ̀.