Esther 9

Ghelɨ Jûsɨ̀ ɨ tɨm yɨ mbàynɨ̀sɨ àŋena

¹A n-læ nà ghɨ a mɨchi njvàsɨ̀ tal a njoŋsɨ njvàsɨ̀ bò ɨ njôŋ Adà, ghelɨ Jûsɨ̀ ɨ kelɨ sɨ zuetɨ ghelɨ ghì a ghɨ kèʼ àŋena kɨ̀ ta isaʼi fòyn ì bè. Achi nâ kèyna nà ghɨ kɨmɨ àchi kì a mbàynɨ̀sɨ ghelɨ Jûsɨ̀ nà n-kfâʼtɨ̀ na àŋena nɨn zuetɨ̂ ghelɨ Jûsɨ̀ ateyn mɨtì awo ateyni bèynlɨ̀, ghelɨ Jûsɨ̀ ɨ nà sɨ kelɨ àdyàʼ atu nɨ̀ ghelɨ̀ ghì a ghɨ nà n-bâyn àŋena. ²Ghelɨ Jûsɨ̀ nɨ̀n yvɨ̀ŋtɨ a ntèʼsɨ afî a àŋena nà n-chi ateyn, ɨbyàs ilaʼ nɨ̀ fòyn Zekzès nô ɨ̀ jɨ̀m sɨ kèʼ ghelɨ ghì a ghɨ nà n-kɨŋ sɨ zuetɨ àŋena. Nô wùl nà n-ghɨ wi a wù kàʼ a wù keʼ ghelɨ Jûsɨ̀ bòm ta ghelɨ tɨlaʼ tɨ litɨ nô ghɨ̀ jɨ̀m nà n-fâyn àŋena. ³Chyeʼsɨ ɨbyàs ilaʼ nâ ghè nô sɨ̀ jɨ̀m nɨ̀ ghelɨ ghɨ ghɨtisɨnɨ baʼsɨ̂ nɨ̀ nchìsɨ ndosɨ nɨn gamtɨ meyn ghelɨ Jûsɨ̀ bòm ta àŋena nà n-fâyn Mòdèkayà. ⁴Adyaʼ a Mòdèkayà nà n-kfeynsɨ̂ kɨ kfeynsɨ a ntoʼ, ghɨ nà kya ŋweyn kɨ ɨbyâs ilaʼ ɨ̀ jɨ̀m fî ngvɨmlɨ̂ ŋweyn.

⁵Ghelɨ Jûsɨ̀ nɨn nû meyn ɨ zuetɨ mbàynɨ̀sɨ àŋena nô sɨ̀ jɨ̀m nɨ̀ mɨ̀nyuè ɨ nì nô mɨ ghà ta ghɨ nà n-kôŋ nɨ̀ ghelɨ ghì a ghɨ nà n-bâyn àŋena. ⁶A nà n-ghɨ a ntèʼ ì ghaʼnɨ a Suzà ghelɨ Jûsɨ̀ ɨ zuetɨ ghelɨ ighɨ ì tâyn. ⁷Àŋena nɨ̀n zue meyn kɨmɨ Bàshàndatà nɨ̀ Dalfòn nɨ̀ Asbatà, ⁸ŋêyn Bòlatà baʼsɨ̂ nɨ̀ Àdalìyà nɨ̀ Àlidatà, ⁹ɨ zue Bàlmashtà nɨ̀ Àlìsayì nɨ̀ Àlìdayì ŋêyn Vàyìzatà. ¹⁰Ghelɨ nâ ghèyn ìvɨm a ghɨ n-zuètɨ nà n-ghɨ woyn ghɨ lûmnɨ̀ nɨ̀ Hamàn ɨ wâyn Hamedatà ɨ mbàynɨ̀ ghelɨ Jûsɨ̀. Ghɨ n-zuetɨ mɨtì ɨ faŋ tɨ̀ li ɨfwo àŋena.

¹¹Ghɨ n-læ meyn fèʼtɨ akôyn a ghêl kì a ghɨ n-zuètɨ a Suzà ɨ ntèʼ ì ghaʼnɨ kɨ̀ achi nâ ghè sɨ̂ fòyn. ¹²Fòyn ɨ bè sɨ̂ Està ɨ wî ntoʼ na, “Ghelɨ Jûsɨ zuetɨ meyn ghelɨ ighɨ ì tâyn nɨ̀ woyn Hamàn ìvɨm a Suzà ɨ ntèʼ ì ghaʼnɨ. Àŋena ti nì ghà ɨbyàs ilaʼ ɨlvɨ-a? Wà n-kɨŋ na mà ni gha sɨ̂ và lvɨ̂yn a? Wà bɨfɨ nô mɨ ghà a mà fu.”

¹³Està ɨ bèynsɨ̀ ɨ bè na, “Yi kæ nà kfeynɨ̂ sɨ̂ và a mbæ̀, wa fu adyaʼ sɨ̂ ghelɨ Jûsɨ̀ ghì a ghɨ n-ghɨ a Suzà, àŋena læ̂ nì kɨ̀mɨ ìwo zɨ̀ a libɨs a isaʼ i fu adyaʼ àŋena nî layn. Fi fu adyaʼ, ghɨ shɨŋsɨ̀ woyn Hamàn ghì ìvɨm a mɨ̂kfɨ̀s.”

¹⁴Està nɨn bè tî fòyn ɨ chwòsɨ̀ ìsaʼ a Suzà na ghɨ shɨŋsɨ tɨgvɨyntɨ woyn Hamàn tìtɨ̀ ìvɨ̀m, ghɨ shɨ̀ŋsɨ̀. ¹⁵Ghelɨ Jûsɨ̀ ghì a ghɨ nà n-chi a Suzà ɨ yvɨ̀ŋtɨ̀ a mɨchi njvàsɨ̀ kæ̀ a njôŋ Adà ɨ zuetɨ ghelɨ ighɨ ì tal a Suzà mɨtì ɨ faŋ tɨ̀ li ɨfwo àŋena.

¹⁶Ghelɨ Jûsɨ̀ ghì a ghɨ nà ghɨ ɨbyas ilaʼ ɨlvɨ nà n-ghɨ ma ghɨ yvɨŋtɨ meyn sɨ zuetɨ mbàynsɨ̀ àŋena sɨ nà chi nɨ̀ mbôynɨ̀. Àŋena nɨ̀n zuetɨ mbàynɨ̀sɨ àŋena nkam mɨ̀vɨm nsòmbo nɨ̀ ghelɨ nkam sɨ̀ tâyn mɨtì ɨ faŋ tɨ kùm afo a wûl. ¹⁷Iwo nâ yèynì nɨn læ gàyn a mɨchi njvàsɨ̀ tal a njôŋ Adà a nà ghɨ a mɨchi njvàsɨ̀ kæ̀ àŋena yvɨ̀tɨ̀, ɨ lèm àchi ateyn nà à na ghɨ àchi ayɨ, ghɨ yɨ-a saŋlɨ̂-à.

Ghɨ yɨ ayɨ a Bùlîm

¹⁸Ghelɨ Jûsɨ̀ ghì a ghɨ nà n-chi a Suzà nɨn læ yvɨ̀ŋtɨ a mɨchi njvàsɨ̀ tal nɨ̀ mɨ̀chi njvàsɨ̀ kæ̀ ɨ kwo yvɨ̀tɨ̀ a mɨchi njvàsɨ̀ tâyn ɨ lèm àchi ateyn nà à na ghɨ àchi ayɨ, ghɨ yɨ-a saŋlɨ̂-à.

¹⁹À ti iwo zɨ̀ a ghelɨ Jûsɨ̀ ghì a ghɨ n-chi a ntèʼ sɨ lælɨnɨsɨ afî a ghɨ bu tɨm mbàyn jɨ̀ŋ kàli nɨn yɨ ayɨ nâ kèynà a mɨchi njvàsɨ̀ kæ̀ a njôŋ Adà a ghɨ àchi àŋena yɨ-a saŋlɨ-à gwôtɨ̀ ɨ̀fwo antêynɨ̀ nɨ̀ àŋena.

²⁰Mòdèkayà nɨn nyaʼ meyn àwo nâ kèyna ɨ tum sɨ̂ ghelɨ Jûsɨ̀ nô ghɨ̀ jɨ̀m ɨbyàs ilaʼ nɨ̀ fòyn Zekzès nô ɨ̀ jɨ̀m. Wu n-tum ɨbyàs ilaʼ ghè a wu n-baʼsɨ nɨ̀ ɨvzɨ̂ a wu n-ghɨ a ndyèyn, ²¹bê na àŋena nɨn n-kelɨ sɨ nà yɨ àyɨ nâ kèynà a mɨ̀chi njvàsɨ̀ kæ̀ nɨ̀ mɨ̀chi njvàsɨ̀ tâyn nô mɨ a bêŋ ì kà a njôŋ Adà. ²²Ghelɨ Jûsɨ̀ nà n-kelɨ sɨ nà yɨ ayɨ nâ kèynà kfâʼtɨ̀ ta àŋena nɨn læ tɨm yɨ mbàynɨ sɨ àŋena ɨ nà chî nɨ̀ mbôynɨ̀. Àŋena nà fî kelɨ sɨ nà kfâʼtɨ̀ njoŋ àteyn bòm ta a n-ghɨ njoŋ zɨ̀ a ikoynsɨ isuyn nɨ̀ àŋena nɨn læ kasi sɨ a isaŋlɨ, idzɨ-i àŋena ɨ kasi sɨ a idyal. Wu n-læ nyàʼ na mɨchi nâ mèyn na ghɨ mɨchi mɨ̀ àyɨ, àŋena yɨ a saŋlɨ̂-à fî gwôtɨ̀ ɨ̀fwo ɨ yɨnɨ antêynɨ̀ nɨ̀ àŋena, fu tɨ̀fu sɨ̂ ghelɨ ànfɨf.

²³Wu nyàʼ tì, ghelɨ Jûsɨ̀ ɨ bɨmi na àŋena na lum yɨ kɨ yɨ ayɨ a ghaʼnɨ-a nâ kì a àŋena zɨ̀tɨ, yɨ a nî ìwo zɨ̀ a Mòdèkayà nɨn n-læ nyàʼ sɨ̂ àŋena. ²⁴Yi nà n-ghɨ tèyn bòm ta Hamàn ɨ wâyn Hàmàdatà ɨ wul ɨ̀ Agàg ɨ mbàynɨ̀ ghelɨ Jûsɨ̀ zɨ̀ nɨn læ meyn baʼtɨ sɨ zuetɨ ghelɨ Jûsɨ̀ ɨ tɨm bèyʼ sɨ keli achi kì a ka ghɨ zuetɨ àŋena ateyn, ghɨ toŋtɨ̂ bèyʼ nâ zɨ̀ na, bûl. ²⁵Mɨtì a nà ghɨ ta fòyn yvɨ iwo ateyn, wu chwòsɨ̀ ìsaʼ na iwo bzɨ-i zɨ̀ a Hamàn bàʼtɨ sɨ ni sɨ̂ ghelɨ Jûsɨ̀ kasi fe a ŋweyn atu. Wu n-fu meyn adyaʼ na ghɨ shɨŋsɨ Hamàn ŋêyn woyn ŋweyn ghɨ lûmnɨ̀ a fɨ̂kfɨ̀s ghè a wu n-yɨ̀s sɨ shɨ̀ŋsɨ Mòdèkayà ateyn. ²⁶(À ti iwo zɨ̀ a ghɨ nà n-toŋtɨ̂ mɨchi mɨ̀ àyɨ nâ mèyn na bùlîm ma ghɨ lì iwo ateyn iwo afêyn na bûl) bòm àwo kì a ghɨ nyàʼ a ŋwàʼlɨ̀ afêyn nô à jɨ̀m nɨ̀ akî a àŋena yeyn baʼsɨ̂ nɨ̀ akî a kɨ gàyn sɨ̂ àŋena. ²⁷Ghelɨ Jûsɨ̀ nɨn choʼnɨ meyn ɨ lèm sɨ a nchînɨ̀ ìlaʼ nɨ̀ àŋena na ŋêyn woyn àŋena baʼsɨ̂ nɨ̀ ghelɨ atum ghì a ghɨ kàsi meyn sɨ a ghelɨ Jûsɨ̀ ìlaʼ nɨ̀ àŋena na lum yɨ kɨ yɨ mɨchi nâ mèyn, kɨ bèŋ sɨ̀ jɨ̀m, kɨ̀ a dzɨ ghè a ghɨ lèm ateyn, nɨ̀ ɨ̀lvɨ vzɨ̀ a ghɨ lèm àteyn. ²⁸Nô mɨ àjâŋ àkà nɨn kelɨ sɨ nà lum bêtɨ̀ kɨ betɨ mɨchi nâ mèyn, nô mɨ abàs ilaʼ à kà bêtɨ̀-à, nô mɨ ìsas i ndo ìka ɨ bêtɨ̀ kɨ betɨ nô mɨ ntèʼ ì kà ɨ bêtɨ̀ kɨ betɨ. Ghelɨ Jûsɨ̀ nɨn kelɨ sɨ nà lum yɨ kɨ yɨ mɨchi mɨ̀ bùlîm nà mèyn. Nô mɨ woyn àŋena ɨ kelɨ wi sɨ læ̀ sɨ lèsɨ̀ mɨchɨ mɨ̀ àteyn.

²⁹Està ɨ wâyn Àbihèl ŋêyn Mòdèkayà ɨ wulɨ̀ Jûsɨ̀ nɨn n-fi meyn nyàʼ ŋwàʼlɨ̀, sɨ tòʼ ayɨ a bùlîm nâ kèynà. ³⁰Mòdèkayà ɨ tum ŋwàʼlɨ̀ àteyn sɨ̂ ghelɨ Jûsɨ̀ nô ghɨ̀ jɨ̀m ɨbyàs ilaʼ nɨ̀ fòyn Zekzès ɨvɨ nɨ̀ ɨ̀byâs ilaʼ mɨ̀vɨm ɨ̀m bò njvàsɨ̀ nsòmbo. Àŋena nɨn læ nyàʼ ŋwàʼlɨ̀ nâ yèyn sɨ̂ ghelɨ Jûsɨ̀ na àŋena na chî ajûŋ chî kɨ nô nɨ̀ mbôynɨ̀, ³¹ɨ chwòsɨ̀ ìsaʼ na ghelɨ Jûsɨ̀ na yɨ mɨ̀chi mɨ̀ bùlîm nâ mèyn kɨ̀ ɨlvɨ ateyn, kɨ̀ ighel ta Mòdèkayà ɨ wul ɨ̀ Jûsɨ̀ ŋêyn Està ɨ wî ntoʼ nyàʼ. Està ŋêyn Mòdèkayà nɨn bè na ghelɨ Jûsɨ̀ nɨn kelɨ sɨ nà bam ɨchfɨ̂, koynsɨ̂ keʼà kɨ ighel ta ŋêyn woyn àŋena lèm na ghɨ na lum ni-à. ³²Isaʼ zɨ̀ a Està nɨ̀n n-chwòsɨ ghɨ nyàʼ lèm a ŋwàʼlɨ̀sɨ̀ nà ntôʼ àwo nâ kèynà a ghɨ nà n-kelɨ sɨ nà ni-à a mɨchi mɨ̀ àyɨ a bùlîm tèyn.