Exodus 1
Ŋwàʼlɨ̀ Exodus
Woyn Isìlæ̀ ɨ ndù a Ijìb
1Akeynà nɨn ghɨ àzɨyn a woyn ghɨ lûmnɨ̀ nɨ̀ Jàkôb ghì a ŋêyn àŋena nɨn læ ndù a Ijìb amoʼ, nô mɨ ndà ɨ ndû kɨ ŋêyn ghelɨ ndo nɨ̀ ŋweyn. 2À nà n-ghɨ Lubèn nɨ̀ Simìyòn nɨ̀ Levì ŋêyn Judà, 3baʼsɨ̂ nɨ̀ Isakà ŋêyn Zebulòn kɨ̀mɨ nɨ̀ Benjamìn, 4nɨ̀ Dân ŋêyn Naftalì kɨ̀mɨ nɨ̀ Gâd ŋêyn Ashà. 5À nà n-ghɨ tì ma Josèf sɨ chî a Ijìb. Woyn Jàkôb nà n-chɨ̂yntɨ̀ ghɨ mɨ̀vɨm nsòmbo.
6Ajâŋ nâ kì a ɨtuʼ nâ ghè ɨ læ kfɨtɨ nô à jɨ̀m baʼsɨ̂ nɨ̀ Josèf ŋêyn woynà ŋweyn. 7Mɨtì woyn Isìlæ̀ ɨ faŋ nà bzɨ̂ kɨ bzɨ, dvɨ̂ ndû kɨ asɨ ɨ luyn kɨ ilaʼ ì jɨ̀m, ɨ nà sɨ kelɨ àdyaʼ nô sɨ a ŋaŋ.
8Fòyn ɨ̀lvì ɨ læ koʼ achɨ a Ijìb kya wi awo kì a Josèf nì a Ijìb. 9Wu n-kòʼ tî ɨ bè sɨ̂ ghelɨ ŋweyn na, “Ghelɨ Isìlæ̀ ghèyn sɨ dvɨ̂ chwô ghesɨ̀nà. 10Ghesɨ̀nà nɨn kelɨ sɨ kɨŋ dzɨ sɨ nì na ka àŋena fî bzɨ ɨ̀ dvɨ̀ a bu tì iwoŋ i kæ fvɨ̀ a àŋena chɨyntɨ mbàynɨ̀ sɨ ghesɨ̀nà ɨ̀ nù ghesɨ̀nà ɨlvɨ fɨli ɨ̀ leʼ lù.”
11Wu taŋi tì, àŋena kæ sɨ lem ghelɨ na ghɨ na nyâblɨ̀ nɨ ghelɨ Isìlæ̀, kâyntɨ̀-à àŋena felɨ̀ fɨ̀koli. Àŋena fèlɨ kɨ têyn ɨ bàʼlɨ̀ ntèʼ Bitòm nɨ̀ ntèʼ Lamesès ta ka fòyn na bɨsɨ̂ ɨ̀fwo ɨ yɨnɨ ateyn. 12Mɨtì ghɨ se sɨ nyàblɨ nɨ̀ àŋena tî, àŋena nà kwo dvɨ̂ ndû kɨ asɨ, yam ndû kɨ ìlaʼ ì jɨ̀m. Ghelɨ Ijìb ɨ nà sɨ fàyn àŋena nô sɨ a ŋaŋ. 13Àŋena nɨn se sɨ fayn tî ɨ nà sɨ fì nyâblɨ̀ nɨ̀ Ghelɨ Isìlæ̀ nô sɨ a ŋaŋ, 14ni-à àŋena felɨ̀ ta ɨkôs bâʼlɨ̀ ndosɨ fî nî kɨ tɨ̀nkì tɨ tɨ̂fèl tɨ̀ jɨ̀m. Tɨ̀nkì tɨ tɨ̂fèl nâ tèyntɨ̀ ɨ nì mɨ̀tem mɨ̀ àŋena ɨ nà yafa. Ghelɨ Ijìb nà n-nyâblɨ̀ nɨ̀ àŋena koynsɨ̂ wì isuyn nô sakos.
15Fòyn Ijìb ɨ bè sɨ̂ Shiflà ŋêyn Buwà, ɨ ghelɨ ghì a ghɨ nà n-bzɨsɨ ghɨ̀kì na, 16“Yi na se sɨ bzɨsɨ ghɨ̀ki Hibɨ̀lù ɨ̀ yeyn a ghɨ wayn ɨ̀ lûmnɨ̀ yi zue kɨ zue à na ghɨ wâyn wi yi visi.” 17Ghelɨ nâ ghì a ghɨ nà n-bzɨsɨ ghɨ̀kì nà n-fâyn Fɨyini ɨ leʼ na ghɨ na zuetɨ̂ wì woyn ghɨ lûmnɨ̀ ta fòyn bè. 18Fòyn ɨ tum ɨ jàŋ àŋena ɨ bɨf na, “Yì vìsi woyn ghɨ lûmnɨ̀ tɨ̀ zuètɨ bòm ghà?”
19Àŋena bèynsɨ̀ ɨ bè sɨ̂ fòyn Ijìb na, “Ghɨ̀ki Hibɨ̀lù nɨn ghɨ wi têyn ta ghɨ̀ki Ijìb. Àŋena nɨn kelɨ àdyaʼ nì nà ghɨ sɨ bzɨ ghɨ bzɨ jæ ta ka ghèsɨ̀ baʼsɨ.”
20Fɨyini fɨ ɨ dyèyn àtem a juŋà sɨ̂ ghɨ̀kì nâ ghèyn a ghɨ n-nà bzɨsɨ ghɨ̀kì têyn ɨ nì ghelɨ Isìlæ̀ ɨ nà fî dvɨ̂ ndû kɨ asɨ, ɨ nà sɨ kelɨ àdyaʼ. 21Ghelɨ nâ ghì a ghɨ nà n-bzɨsɨ ghɨ̀kì tî, nà n-fâyn Fɨyini, Fɨ boysɨ àŋena ɨ fu woyn sɨ̂ àŋena nô sɨ idvɨ̀.
22Fòyn ɨ fu isaʼ sɨ̂ ghelɨ Ijìb nô ghɨ̀ jɨ̀m na, “Ghɨ n-kelɨ sɨ nà maʼ nô mɨ wâyn ɨ̀lûmnɨ̀ Hibɨ̀lù ɨ̀ kfà ta ghɨ bzɨ a jvâ Nâyl visî kɨ woyn ghɨ̂kì.”