Exodus 32

Ànfèʼsɨ̀ a wâyn nyàm mbòloʼ

¹À nà n-ghɨ ta ghelɨ Isìlæ̀ yeyn na Mosìs lala meyn a kfɨyn, àŋena ndù ɨ bè sɨ̂ Alòyn na, “Faytɨ fɨyini, fɨ na ndû asɨ nɨ̀ ghès tisɨ̂ ghès. Ghès nɨn kya wi na à gàyn ghà sɨ̂ Mosìs wèyn a wù tî fvɨ̀sɨ̀ ghes sɨ a ilaʼ i Ijìb tèyn a.” ²Alòyn ɨ bèynsɨ̀ ɨ bè sɨ̂ àŋena na, “Yì choʼtɨ ɨ̀ gvì nɨ̀ mɨ̀yèli mzɨ̀ ɨtùŋlɨ nɨ̀ ghɨ̀ki ghi nɨ̀ woyn ghi ghɨ lûmnɨ̀ nɨ ghɨki a ghɨ fàytɨ nɨ̀ àso ɨkwo a baŋnɨ-a tî, ɨ̀ fu sɨ̂ mà.” ³Alòyn ɨ bè tì, nô ghelɨ ghɨ̀ jɨ̀m ɨ choʼtɨ mɨ̀yèli ma ghɨ fàytɨ nɨ̀ àso ɨkwo a baŋnɨ-a sɨ a àŋena ɨtùŋlɨ ɨ gvì ɨ fu sɨ̂ ŋweyn. ⁴Alòyn ɨ fsɨ mɨ̀yèli mɨ̀ ateyn ɨ buŋsɨ, ɨ faytɨ ànfèʼsɨ̀ nɨ̀ ɨ̀mêyn kɨ ghɨ ta wâyn nyàm mbòloʼ ɨ lûmnɨ̀. Wu n-fàytɨ tî, ghelɨ Isìlæ̀ ɨ bè na, “Yì yeyn a, ɨfêynfɨ̀ nɨn ghɨ fɨyini fìfɨ̀ a fɨ n-fvɨ̀sɨ zɨ sɨ a Ijìb.” ⁵A nà ghɨ ta Alòyn yeyn na àŋena nɨn kôŋ ìwo ateyn, wu bàʼlɨ̀ àbaŋ ifu asɨ a ànfèʼsɨ̀ nâ ghè ɨ jàŋ ɨ làʼì sɨ̂ àŋena na, “À læ̀ nà ghɨ a libɨs, a ghesɨ̀nà yɨ ayɨ sɨ koʼsɨ Bôbo Fɨyini.” ⁶Wu n-làʼi tî, ɨtuʼ layn, àŋena bɨs lalì kɨ bɨsì bɨsì ɨ lì nyam sɨ lisɨ ɨ fu ifu i nyoʼnɨ-i ateyn baʼsɨ̂ nɨ̀ ìfu i sɨ nà chî nɨ̀ mbôynɨ̀. Àŋena fu tî, ɨ dùʼì ɨ yɨ ɨ fi nyvɨ ɨ làlì ɨ nà bɨyna, chî nɨ̀ ghɨ̀ki.

⁷Àŋena nɨn se sɨ nì awo nâ kì tî, Bôbo Fɨyini ɨ bè sɨ̂ Mosìs na, “Lù a ɨ nyàŋsɨ kàlì bòm ta ghelɨ̀ ghya ghì a wà tî fvɨ̀sɨ̀ sɨ a Ijìb tì ni meyn mbɨ. ⁸Àŋena visi meyn ìwo zɨ̀ a mà tî bè sɨ̂ àŋena kɨ̀ sɨ a lvɨ̂yn, ɨ̀ fàytɨ ànfèʼsɨ̀ a wâyn nyàm mbòloʼ ɨ lûmnɨ̀ nà koʼsɨ-à, fu tɨ̀fu sɨ̂ ànkeyna bê na, ‘Yì yeyn a ghelɨ Isìlæ̀, ɨfêynfɨ̀ nɨn ghɨ fɨyini fìfɨ̀ a fɨ n-fvɨ̀sɨ zɨ sɨ a Ijìb.’”

⁹Bôbo ɨ taŋi tì, ɨ bè sɨ̂ Mosìs na, “Mɨ n-kya ghelɨ ghèyn. Àŋena nɨn ghɨ tèyn, to nɨ̀ àtu a nô sɨ a ŋaŋ. ¹⁰Ka wa n-fì bè ìwo i li sɨ̂ mà kûm àŋena. À ti lvɨ̂yn a ka mà dyeyn ɨtoŋ ɨ baŋnɨ nɨ̀ mà sɨ̂ àŋena. Mɨ n-bebsɨ̂ àŋena mɨtì ɨ̀ nì a zɨ̂ wôyn ghya læ nà ghɨ ìlaʼ i ghaʼnɨ-i.”

Mosìs ɨ chwotɨ Bôbo Fɨyini.

¹¹Mɨtì Mosìs ɨ jem, ɨ chwotɨ Bôbo Fɨyini ɨ Fɨyini fɨ ŋweyn ɨ bè na, “Ô Bôbo Fɨyini, bòm ghà ta wà n-yôʼsɨ̀ ɨtoŋ sɨ̂ ghelɨ̀ ghya ghì a wà tî fvɨ̀sɨ̀ sɨ a Ijìb nɨ̀ adyaʼ a bemnɨ a nɨ̀ và a? ¹²Ka wa n-nì ìwo na ghelɨ Ijìb na bê na wà tî fvɨ̀sɨ̀ ghelɨ ghèyn sɨ gvì sɨ zuetɨ àŋena a kfɨynsɨ ta ka àŋena mæ sɨ a mbzɨ. Ka wa n-fì nyòʼsɨ̀ ɨ̀toŋ sɨ̂ ghelɨ nâ ghèyn, kfɨnɨ ikfâʼtɨ̀ ì zæ, ka wa n-bèbsɨ àŋena. ¹³Ka wa n-lèsɨ̀ ìchfɨ̂nɨ̀ zɨ̀ a wà n-læ chfɨ̀ nɨ sɨ̂ ghelɨ ghɨ felɨnɨ nɨ̀ và ɨ Abɨ̀làhâm nɨ̀ Yisàk nɨ̀ Jàkôb a wa izɨyn ɨ bè na, ‘Mà læ̀ fu woyn sɨ̂ zɨ̀ ghɨ dvɨ̂ kɨ tèyn ta mɨnjêyn iyvɨ, ɨ̀ fu ilaʼ yèynì a mà chfɨ̀nɨ̀ têyn sɨ̂ àŋena nô ì jɨm kɨ̀ samoʼ.’” ¹⁴Mosìs ɨ taŋi tì Bôbo Fɨyini ɨ kfɨnɨ ìkfâʼtɨ̀ i ŋweyn ɨ faŋ tɨ̀ fì tɨ̀ fù ngeʼ zɨ̀ a wu nì nà kɨŋ sɨ fu sɨ̂ ghelɨ ŋweyn.

¹⁵Mosìs ɨ bèynlɨ̀ ɨ nà sɨ kasî kalì-à nɨ̀ ɨ̀bwâŋtɨ̀ ɨ ngòʼsɨ̀ vzɨ̀ ɨ̀ bwò a ŋweyn awu ma Bôbo Fɨyini nyâʼ meyn tɨ̀saʼ ateyn kɨ ɨbyâs ɨ̀ jɨ̀m, nyâʼ asɨ, nyâʼ ibàm. ¹⁶Ɨbwâŋtɨ̀ ɨ ngòʼsɨ̀ nâ wèyn nà n-ghɨ ma à faytɨ kɨ̀ nô Fɨyini, ɨ̀ nyàʼ tɨ̀saʼ tìtɨ̀ a tɨ nà n-ghɨ ateyn kɨ̀ nô nɨ̀ àwu a ŋweyn a. ¹⁷A nà ghɨ ta Joshwà yvɨ̀ ta ghelɨ nɨn byaytɨ nô sɨ a ŋaŋ, wu bè sɨ̂ Mosìs na, “Mɨ n-yvɨ ta ghelɨ nɨn nû alèʼ ghè a ghɨ tî bɨ̀ ateyn.”

¹⁸Mosìs ɨ bèynsɨ̀ ɨ bè na,

“À n-ghɨ wi gyasɨ ghêl ɨlvɨ ta ghɨ yɨ̀ iwoŋ,

a ghɨ wi gyasɨ ghêl ta ghɨ yɨ àŋena iwòŋ.

Mɨ n-kwo yvɨ gyâ njàŋ.”

¹⁹A nà ghɨ ta Mosìs kàlì nà chem gvî kɨ afu tèyn, yeyn ànfèʼsɨ̀ a wâyn nyàm mbòloʼ kì, fì yèyn têyn ta ghelɨ nɨn bɨyn jɨ̂ŋ kali ànfèʼsɨ̀ ateyn, ɨtoŋ ŋweyn ɨ yaf nô sɨ a ŋaŋ wu màʼ ɨ zuelɨ ɨ̀bwâŋtɨ̀ ɨ ngòʼsɨ̀ vzɨ̀ a wu nà n-kelɨ a ŋweyn awu isas i kfɨyn, wu nà ghɨ kɨ ɨshwemlɨ ɨshwemlɨ. ²⁰Mosìs ɨ lì ànfèʼsɨ̀ a nyâm mbòloʼ nâ kì ɨ nyòʼ ɨ gvà kɨ nà ghɨ ta ɨnkfɨ̂ŋ, wu we a mu ɨ kàyn ghelɨ Isìlæ̀ ɨ nyvɨ.

²¹Mosìs ɨ bɨf sɨ̂ Alòyn na, “Ghelɨ ghèyn nì ghà sɨ̂ và wà visi àŋena nî mbɨ ì bemnɨ yèyn a?”

²²Alòyn ɨ bèynsɨ̀ ɨ bè sɨ̂ ŋweyn na, “Ka wa nyòʼsɨ̀ ɨ̀toŋ sɨ̂ mà a bô. Wà n-kya kɨ nô na ghelɨ ghèyn nɨn duʼ nô mɨ ɨlvɨ gha kôŋ kɨ sɨ nà nî mbɨ. ²³Àŋena tî bè sɨ̂ mà na, ‘Faytɨ fɨyini, fɨ na ndû asɨ nɨ̀ ghès, tɨsî ghès. Ghès nɨn kya wi nâ à gàyn ghà sɨ̂ Mosìs wèyn a wu n-fvɨ̀sɨ ghès sɨ a ilaʼ i Ijìb tèyn a,’ ²⁴ma kæ bè sɨ̂ àŋena na nô mɨ ndà na kelɨ mɨ̀yèli ma ghɨ fàytɨ nɨ̀ àso ɨkwo a baŋnɨ-a, wu choʼtɨ ɨ fu sɨ̂ mà. Àŋena choʼtɨ fu, ma màʼ ɨvɨ̀s ànfèʼsɨ̀ a nyâm mbòloʼ kèyna ɨ fvɨ kɨ fvɨ.”

²⁵À nà n-ghɨ ta Mosìs yeyn na ghelɨ sɨ kolî mɨ ghà nî kɨ ni bòm ta Alòyn vìsi meyn àŋena, ghɨ na sɨ to ghaʼ sɨ tisɨ, mbàynɨ̀sɨ àŋenasɨ fî chyeʼtɨ̂ àŋena, ²⁶Mosìs ɨ timi ɨchfɨ alèʼ ghè a àŋena bɨ̀ ateyn ɨ byal ɨ bè na, “À na yvɨnɨ̂ nô mɨ ndà Bôbo Fɨyini, wu kɨŋtɨ ɨ gvi baʼsɨ sɨ̂ mà.” Ghelɨ isas i ndo nɨ̀ Levì ɨ fvɨ̀ nô ghɨ̀ jɨ̀m ɨ ndu yvɨ̀ŋtɨ̀ a ŋweyn a ngùŋ. ²⁷Mosìs ɨ kæ sɨ bè sɨ̂ àŋena na, “Bôbo Fɨyini ɨ Fɨyini fɨ ghelɨ Isìlæ̀ bè na, ‘Nô mɨ ndà li ifô i ŋweyn ɨ̀ kul a ŋweyn akuʼtɨ ɨ̀ jèl tòynɨ chwò alèʼ ghàyn a ghɨ bɨ̀ ateyn tèyn, ndû kɨ ighaŋ nɨ̀ ìghaŋ i, nô mɨ ndà ɨ zuetɨ̂ woynà ŋweyn, zuetɨ̂ ghelɨ i jèl nɨ̀ ŋweyn, zuetɨ̂ ghelɨ ghì a ghɨ n-chi baʼsɨ sɨ̂ ŋweyn.’” ²⁸Ghelɨ isas i ndo nɨ̀ Levì nâ ghèyn ɨ ni kɨ ta Mosìs bè, ɨ zuetɨ ghelɨ achi nâ ghè ghɨ chem ndû nkamsɨ̀ tal. ²⁹Àŋena nɨn zuètɨ ghelɨ tî, Mosìs ɨ bè sɨ̂ àŋena na, “Bôbo Fɨyini choʼ meyn zɨ̀ layn ɨ̀ lèm sɨ a nyɨŋ na yi na felɨ̀ sɨ̂ ŋweyn. Wù bòysɨ zɨ̀ bòm ta yi bû ghèʼnɨ̀ sɨ zuetɨ wôyn ghɨ lûmnɨ̀ nɨ̀ zɨ̀ baʼsɨ̂ nɨ̀ woynà ghi.”

³⁰Ɨtuʼ ɨ layn Mosìs ɨ bè sɨ̂ ghelɨ Isìlæ̀ na, “Yi ni meyn mbɨ ì bemnɨ. Mɨtì mɨ n-kasi koʼ a kfɨyn asɨ nɨ̀ Bôbo Fɨyini ɨ̀ chwòtɨ ŋweyn, lvɨ fɨli a wù lesɨ fù zɨ.” ³¹Mosìs nɨn tàŋi tî, ɨ kasi koʼ ɨ bè sɨ̂ Bôbo Fɨyini na, “Ô Bôbo Fɨyini, ghelɨ ghèyn ni meyn mbɨ ì bemnɨ. Àŋena faytɨ meyn fɨyini fɨ àŋena nɨ̀ aso ɨkwo a baŋnɨ-a, nà koʼsɨ-à. ³²Mɨtì ma na chwotɨ̂ và lvɨ̂yn a Bôbo Fɨyini na wà lesɨ fu àŋena. Wà na ghɨ wi sɨ lèsɨ̀ sɨ fu àŋena, wa chyeʼsɨ ìzɨyn ì yemi sɨ a wa ŋwàʼlɨ̀.”

³³Bôbo Fɨyini ɨ bèynsɨ̀ ɨ bè sɨ̂ Mosìs na, “Mɨ n-chyeʼsɨ̂ nô mɨ ìzɨyn i nda vzɨ̀ a wù nì mbɨ sɨ a ma ŋwàʼlɨ̀. ³⁴Ndù læ̂ lvɨ̂yn ɨ lì ghelɨ ateyn ɨ ndù nɨ̀ àŋena alèʼ ghè a mà tî bè sɨ̂ và. Nchì yem na ndû asɨ nɨ̀ và. Mɨtì, wa kya na ɨlvɨ ɨ̀ wom ɨ nì kfeyna, a mà fu ngeʼ sɨ̂ àŋena bòm mbɨ àŋena.” ³⁵Bôbo Fɨyini ɨ taŋi tì ɨ fu ngeʼ sɨ̂ àŋena bòm ìwo zɨ̀ a àŋena nì nɨ̀ ànfèʼsɨ̀ a wâyn nyàm mbòloʼ kì a Alòyn faytɨ.