Exodus 9

Bôbo Fɨyini ɨ nì nyamsɨ ghelɨ Ijìbsɨ̀ ɨ kfɨtɨ nô sɨ̀ jɨ̀m

¹À nà n-ghɨ ta fòyn Ijìb fì tòsɨ kɨ̀ tosɨ atem a ŋweyn, Bôbo Fɨyini ɨ bè sɨ̂ Mosìs na wù ndu yeyn fòyn Ijìb ɨ bè sɨ̂ ŋweyn na, “Bôbo Fɨyini, ɨ Fɨyini fɨ ghelɨ Hibɨ̀lù bè na, ‘Visi ghelɨ̀ ghem àŋena ndu nà koʼsɨ̂ mà.’ ²Wà kæ ghal ɨ̀ lèm kɨ̀ lêm àŋena, ɨ̀ faŋ tɨ̀ vìsi na àŋena lu, ³a Bôbo Fɨyini dyeyn adyaʼ a ŋweyn a ikoʼi i bemnɨ-i ku nyâm shyasɨ ɨtwaʼ nô sɨ̀ jɨ̀m, ma à ti nyamsɨ kfaŋ nɨ̀ njàkâysɨ̀ nɨ̀ kàmêlsɨ̀ kɨ̀mɨ nɨ̀ nyamsɨ mbòloʼsɨ nɨ̀ bzɨsɨ njɨ̀sɨ̀ nɨ̀ ɨsɨ ndoŋsɨ. ⁴Mɨtì a Bôbo Fɨyini fî dyèyn ɨ̀ bàynsɨ sɨ a nyɨŋ a nyâmsɨ̀ nɨ̀ ghelɨ Isìlæ̀ nɨ̀ ɨsɨ ghelɨ Ijìbsɨ̀, a nyàm wùl ɨ̀ Isìlæ̀ nô ɨ̀mòʼ faŋ tɨ̀ kfɨ. ⁵Bôbo Fɨyini lem meyn ɨ̀lvɨ ɨ̀ bè na, ‘A læ̀ nà ghɨ a libɨs a mà, ɨ Bôbo Fɨyini, ni iwo nâ yèynì a ilaʼ i Ijìb.’”

⁶Ɨtuʼ ɨ bɨs layn Bôbo Fɨyini ɨ ni kɨ iwo zɨ̀ a wù tî bè, nyamsɨ ghelɨ Ijìbsɨ̀ ɨ kfɨtɨ nô sɨ̀ jɨ̀m mɨtì nô nyàm wùl ɨ̀ Isìlæ̀ ɨ faŋ tɨ̀ kfɨ nô ìmòʼ. ⁷Fòyn Ijìb ɨ tum ghelɨ, àŋena fvɨ̀ ɨ bɨbtɨ ɨ keli na nô nyàm wùl ɨ̀ Isìlæ̀ bû kfɨ. Mɨtì fòyn Ijìb ɨ fi tosɨ kɨ tosɨ atem a ŋweyn ɨ faŋ tɨ̀ vìsi na ghelɨ Isìlæ̀ lu.

Bôbo Fɨyini ɨ lɨŋ ilaʼ i Ijìb nɨ̀ mɨ̀mɨ̂

⁸À nà n-ghɨ ta fòyn Ijìb fì tòsɨ kɨ̀ tosɨ atem a ŋweyn tì, Bôbo Fɨyini ɨ bè sɨ̂ Mosìs ŋêyn Alòyn na, “Yì myeytɨ ɨwu ɨ fɨ̂ndì, Mosìs waŋ iyvɨ asɨ nɨ̀ fòyn Ijìb. ⁹Wu n-waŋa, a fɨ kasi sɨ abvɨ ɨ̀ bvɨ ndù kɨ ilaʼ i Ijìb ì jɨ̀m, a mɨ̀mɨ̂ koʼ ghelɨ baʼsɨ̂ nɨ̀ nyamsɨ kɨ ilaʼ ì jɨ̀m.”

¹⁰Bôbo Fɨyini ɨ bè tì àŋena myèl fɨ̀ndî ɨ ndu timi asɨ nɨ̀ fòyn, Mosìs ɨ waŋ iyvɨ, mɨ̀mɨ̂ ɨ koʼ ghelɨ kɨ ghɨ̀ jɨ̀m baʼsɨ̂ nɨ̀ nyamsɨ. ¹¹Ghelɨ ghɨ kuʼnɨ ghì a Ijìb ɨ nà sɨ wo sɨ timi asɨ nɨ̀ Mosìs bòm mɨ̀mɨ̂ mzɨ̀ a mɨ nà n-ghɨ ma mɨ̀ koʼ meyn àŋena baʼsɨ̂ nɨ̀ ghelɨ Ijìb nô ghɨ̀ jɨ̀m. ¹²Mɨtì Bôbo Fɨyini ɨ tosɨ àtem a fòyn Ijìb wu faŋ tɨ̀ yvɨ iwo zɨ̀ a Mosìs ŋêyn Alòyn bè kɨ ighel ta Bôbo Fɨyini nɨn læ bè sɨ̂ Mosìs.

Bôbo Fɨyini ɨ suʼsɨ awœ a Ijìb

¹³Bôbo Fɨyini nɨn tòsɨ atem a fòyn Ijìb tì, ɨ bè sɨ̂ Mosìs na wù bɨs làlì nô nɨ̀ntuʼ ɨ̀ ndù tìmi asɨ nɨ̀ fòyn Ijìb ɨ̀ bè sɨ̂ ŋweyn na, “Bôbo Fɨyini, ɨ Fɨyini fɨ ghelɨ Hibɨ̀lù bè na mà be sɨ̂ và na, ‘Visi ghelɨ̀ ghem àŋena ndu nà koʼsɨ̂ mà. ¹⁴Wà kæ sɨ faŋ tɨ̀ vìsi lvɨ̂yn na àŋena lu, a mà fu ngeʼsɨ bemnɨsɨ sɨ̂ và, zɨ̂ chyeʼ shyasɨ nɨ̀ ghelɨ̀ ghya ta ka wà yeyn kèli na wul ɨ̀lvì bu ghɨ wi a mbzɨ ta ma. ¹⁵À nà ghɨ sɨ nà ghɨ lvɨ̂yn, ma ma naysɨ meyn àwu à kema, ɨ̀ màʼ ngeʼ ì bemnɨ a wa ɨwùyn zɨ̂ ghelɨ̀ ghya, yi kfɨtɨ nô ghɨ̀ jɨ̀m sɨ a nse afêyn. ¹⁶Mɨtì ma visi và sɨ dyèyn adyaʼ à kema sɨ̂ và, sɨ fì sɨ nì na izɨyn ì yemi yam kɨ̀ mbzɨ ì jɨ̀m. ¹⁷Wà bu ghaŋsɨ̂ kɨ ɨ̀wuyn, dyêyn kɨ àdyaʼ visî wì na ghelɨ̀ ghem lu. ¹⁸Bòm tèyn, a læ̀ nà ghɨ kɨmɨ aleŋ a lvɨ̂yn a libɨs, a mà ni a awœ suʼi bem chwô nô mɨ à kà ta ghelɨ Ijìb tìmi yeyn kɨ̀ sɨ a ɨtuʼ ta ghɨ n-læ ku Ijìb sɨ koʼ sɨ chem lvɨ̂yn. ¹⁹Chwòsɨ isaʼ lvɨ̂yn ghɨ li kfa nɨ̀ nyâm shyasɨ baʼsɨ̂ nɨ̀ ɨ̀fwo vâ nô ɨ̀ jɨ̀m ɨ̀ zɨsɨ a ndo bòm ta awœ ateyn a kæ suʼi atu nɨ̀ wùl kèsa nyam ta ghɨ bû zɨ̀sɨ a ndo a kɨ zue kɨ̀ zue.’”

²⁰Chyeʼsɨ fòyn Ijìb sîsɨ̀ a sɨ n-yvɨ iwo zɨ̀ a Bôbo Fɨyini bè, ɨ nà faynà ɨ nyɨŋ ndu lì ɨ kfa nɨ̀ ɨ̀kôs ɨ àŋena, baʼsɨ̂ nɨ̀ nyamsɨ àŋenasɨ, ɨ zɨsɨ a ndo. ²¹Mɨtì ɨsîsɨ̀ a sɨ n-faŋ tɨ̀ lì iwo ateyn sɨ iwo ɨ visi ɨ̀kôs ɨ àŋena baʼsɨ̂ nɨ̀ nyamsɨ àŋenasɨ kɨ̀ ɨtwaʼ.

²²Bôbo Fɨyini ɨ kæ bè sɨ̂ Mosìs na, “Nàysɨ koʼsɨ awu à kya iyvɨ ta ka awœ suʼi atu nɨ̀ ghelɨ ɨ̀ sùʼi atu nɨ̀ nyamsɨ baʼsɨ̂ nô mɨ nɨ̀ gha ɨ̀lvì vzɨ̂ a kɨ n-koʼ a gvêynsɨ̀ a Ijìb.” ²³Mosìs ɨ nàysɨ̀ ɨ koʼsɨ nɨ̀ mbàŋ ŋweyn a iyvɨ, Bôbo Fɨyini ɨ tum ivɨ yi nà myâyntɨ̀ suʼî a nse, fî byaytɨ-à, awœ a suʼi-à. À ti dzɨ zɨ̀ a Bôbo Fɨyini nɨn læ suʼsɨ awœ ateyn a Ijìb. ²⁴Awœ a nà n-suʼî kɨ suʼi, ivɨ i myâyntɨ̀ kɨ myayntɨ. Ìnki awœ nâ kèynà nɨ̀ ìvɨ i myayntɨnɨ-i, nà n-ghɨ ìwo bula yi timi gàyn a Ijìb sɨ ɨtuʼ ta ghɨ n-læ ku ilaʼ ateyn. ²⁵Awœ nâ kèynà nɨn læ suʼi kɨ ilaʼ i Ijìb ì jɨ̀m ɨ chèytɨ̀ ɨ̀nkâʼ nô ɨ̀n jɨ̀m ɨ zuetɨ nô ghelɨ ghɨ̀ jɨ̀m baʼsɨ̂ nɨ̀ nyamsɨ ta sɨ nà n-ghɨ ɨtwaʼ ɨ bebsɨ nô mɨ ghà ta kɨ nà n-koʼ a gvêynsɨ̀.

²⁶Awœ ateyn a nɨn læ faŋ tɨ̀ sùʼi kɨ a Goshèn alèʼ ghè a ghelɨ Isìlæ̀ nà n-chi ateyn.

²⁷Fòyn Ijìb ɨ kæ tum sɨ jàŋ Mosìs ŋêyn Alòyn sɨ bè na, “Ma yeyn meyn lvɨ̂yn na ma jasɨ meyn, ghesɨ̀ ghelɨ̀ ghem nî mbɨ. Bôbo Fɨyini nɨ̀n fu ngeʼ sɨ̂ ghès samoʼ. ²⁸Ivɨ ibyaytɨnɨ-i yèynì nɨ̀ àwœ kèyna ghaʼ meyn ghès. Yì chwotɨ Bôbo Fɨyini wù ni ivɨ nâ yèynì nɨ̀ àwœ nâ kèynà mæ. Mɨ n-visi-à a yì lu, yi n-bu fì chi wì afêyn.”

²⁹Mosìs ɨ bè na, “Mɨ nì fvɨ̂ sɨ a ntèʼ afêyn ɨ̀ làysɨ̀ ɨ̀wu ɨ̀ wom ɨ̀ jèm sɨ̂ Bôbo Fɨyini, a ivɨ ibyaytɨnɨ-i nâ yèynì nɨ̀ àwœ nâ kèynà teyna ta ka wà keli na à n-kelɨ Bôbo Fɨyini kelɨ mbzɨ yèyn. ³⁰Mɨ n-kya kɨ nô na zɨ̂ chyeʼ shyasɨ bu duʼ tɨ̀ nà fâyn Bôbo Fɨyini.”

³¹Asaŋ a balì à nɨ̀n læ meyn bef bòm ta kɨ nà n-ghɨ ma kɨ bi meyn. Flâksɨ̀ ɨ bef bòm ta sɨ nà n-ghɨ ma sɨ busɨ meyn. ³²Ɨfwo tèyn ta wît nɨ̀ sɨ̀bêl nɨn bu læ bef bòm ta wu nà n-bi sɨ a ibàm.

³³Mosìs ɨ lù sɨ a ngùŋ nɨ̀ fòyn Ijìb ɨ fvɨ̀ ntèʼ nâ zɨ̀, ɨ làysɨ̀ ɨ̀wu ŋweyn iyvɨ ɨ jèm sɨ̂ Bôbo Fɨyini, ivɨ ibyaytɨnɨ-i zɨ̀-ì nɨ̀ àwœ kì-à ɨ teyna kɨ teyna, nô mɨ ìvɨ i ɨ faŋ tɨ̀ fì tɨ̀ sùʼi a Ijìb. ³⁴A nà ghɨ ta fòyn Ijìb yèyn na àwœ a bu suʼî wì, ivɨ i myâyntɨ̀ wì, byaytɨ̂ wì, wu fi nì mbɨ, ŋêyn chyeʼsɨ ŋweynsɨ fi tosɨ kɨ tosɨ mɨtem mɨ̀ àŋena. ³⁵Fòyn Ijìb nɨn tòsɨ atem tî ɨ faŋ tɨ̀ vìsi na ghelɨ Isìlæ̀ lu, kɨ ighel ta Bôbo Fɨyini nɨn læ bè toynɨ a Mosìs.