Ezra 5

³À nà n-ghɨ aleŋ ɨlvɨ nâ ghè, Tàtènây ɨ wul ɨ vzɨ̀ a Babilòn lèm na wù na saʼ ghelɨ injɨyn i jvâ Yuflèt nɨ̀ Shètà-Bozenày baʼsɨ̂ nɨ̀ ghelɨ ghì a ŋêyn àŋena nɨn felɨ̀ ɨ ndu bɨf sɨ̂ ghelɨ ghì a ghɨ n-bâʼlɨ̀ ndô Fɨyini na, “À fù nda adyaʼ sɨ̂ zɨ̀ na yì baʼlɨ mèsì ndô Fɨyini yèyn ɨ̀ fì fàytɨ-a?” ⁴Àŋena nɨn fi meyn bɨbtɨ àzɨyn a ghêl ghì a ghɨ n-bâʼlɨ̀ ndo àteyn. ⁵Mɨtì àŋena bɨf tî ɨ faŋ tɨ̀ kàyn na ka ghɨ fî bàʼlɨ̀ ndo nâ yèyn ɨ kwo choʼnɨ na ghɨ nyaʼ fèʼtɨ̀ ìwo ateyn sɨ̂ fòyn Dalìyùs wù fu ibêynsɨ̀ sɨ̂ àŋena meyn. Yi n-læ gàyn têyn bòm ta Bôbo nà n-kinî chyeʼsɨ ghelɨ Jûsɨ̀ ateyn.

⁶Ɨyêyn nɨ̀n ghɨ ŋwàʼlɨ̀ zɨ̀ a Tàtènây ɨ wul ɨ vzɨ̀ a Babilòn nɨn læ lèm na wù na tisɨ̂ ghelɨ a injɨyn i Yuflèt tì ŋêyn Shètà-Bozenày nɨ̀ ghelɨ ghì a ŋêyn àŋena nɨn felɨ̀ nɨ̀ chyeʼsɨ alèʼ nâ sèynsɨ̀ nɨn læ tum. ⁷Iwo zɨ̀ a àŋena nɨn læ nyaʼ fèʼtɨ sɨ̂ fòyn nɨn læ nà ghɨ na:

Ŋwàʼlɨ̀ yèyn nɨn ndû sɨ̂ fòyn Dalìyùs.

Ghès nɨn toŋtɨ̂ và a mbæ̀. ⁸Ghès nɨn kɨŋ sɨ fèʼtɨ sɨ̂ và a mbæ̀ na ghès tî ndù a ntèʼ Jèlusalèm alèʼ ghè a ndô Fɨyini fɨ ngaŋtɨnɨ fɨ nɨn ghɨ ateyn ɨ̀ yeyn ghɨ kasî bâʼlɨ̀ ndo àteyn nô nɨ̀ ɨ̀nkàʼ ɨn ghaʼlɨnɨ̂. Ghelɨ ghì a ghɨ n-nî ifêl ateyn ɨ faytɨ̂ nî kɨ nô a jûŋ, ifêl ateyn i fî ndû kɨ nɨ̀ àsɨ-a ta àŋena nɨn kɨŋ.

⁹Ghèsɨ bɨf sɨ̂ chyeʼsɨ ateynsɨ na, “À fù nda adyaʼ sɨ̂ zɨ̀ na yì baʼlɨ mèsì ndo yèyn fì fàytɨ-a?” ¹⁰Ghèsɨ ti meyn bɨ̀btɨ kɨ̀mɨ àzɨyn a chyeʼsɨ àŋena ta ghèsɨ̀ kàʼ a ghɨ nyaʼ nì a wà na kya.

¹¹Ghès tî bɨ̀btɨ àwo nâ kèynà têyn, àŋena bêynsɨ̀ kɨ̀ sɨ̂ ghès na,

“Ghès nɨn ghɨ ghelɨ ghɨ felɨnɨ nɨ̀ Bôbo Fɨyini vzɨ̀ a wù fàytɨ iyvɨ nɨ̀ nse kasî bâʼlɨ̀ ndô Fɨyini zɨ̀ a fòyn ɨ̀ngaŋtɨnɨ nɨ̀ Isìlæ̀ nɨn læ bàʼlɨ ɨ faytɨ nô sɨ a ndyèyn. ¹²Mɨtì bòm ta ghɨ̀bo ghes nɨn læ nì ɨtoŋ Bôbo vzɨ̀ a wù n-ghɨ iyvɨ ɨ yaf wu kæ sɨ visi na fòyn Nèbùkànezà ɨ wul ɨ̀ Chaldiyèn vzɨ̀, ma à ti fòyn Babilòn, tɨm yɨ àŋena iwòŋ ɨ̀ bèbsɨ ndô Fɨyini nâ yèyn fì ghàytɨ ndù nɨ̀ ghelɨ a Babilòn.

¹³Yi n-læ gàyn mɨ a dzɨ nâ ghàyn tèyn a nà ghɨ a bêŋ ɨ yî àsɨ̀ ta Saylùs ɨ fòyn Babilòn koʼ achɨ wu chwòsɨ̀ ìsaʼ na ghɨ kasî bàʼlɨ ndô Fɨyini nâ yèyn. ¹⁴Wù n-fi meyn fvɨ̀sɨ̀ nô àso ɨkwo a baŋnɨ-a nɨ̀ ɨ̀fwo vzɨ̀ a ghɨ faytɨ nɨ̀ àso ɨkwo a fɨfâ sɨ a ndô fɨyini fɨ Babilòn ta Nèbùkànezà nɨn læ li gvì nɨ̀ ɨ̀ŋweyn a ndô Fɨyini a Jèlusalèm ɨ lèm a ndô Fɨyini fɨ Babilòn. Ɨfwo nâ wèyn nà n-ghɨ ma wu lù a ndô Fɨyini.

“Fòyn Saylùs ɨ fvɨ̀sɨ̀ ɨ̀fwo ateyn tì ɨ fu sɨ̂ wùl ɨzɨyn i ŋweyni ɨ ghɨ Shèshbazà ma wù choʼ meyn na wùl àteyn na tisɨ̂ ghelɨ. ¹⁵Wu n-fu tî ɨ bè sɨ̂ Shèshbazà na, “Li ɨfwo wèyn ɨ ndu lèm a ndô Fɨyini a Jèlusalèm ɨ kasi bàʼlɨ̀ ndô Fɨyini kɨ̀ alèʼ ghè a yì nà n-ghɨ ateyn sɨ asɨ.” ¹⁶Shèshbazà nâ wèyn ɨ kæ kasi sɨ gvì sɨ we achɨ a ndô Fɨyini a Jèlusalèm. Sɨ zɨ̀tɨ̀ achi nâ ghè sɨ koʼ sɨ chem layn, ghɨ bu kasî bâʼlɨ̀ kɨ baʼlɨ ndô Fɨyini mɨtì bu duʼ tɨ̀ mèsì.”

¹⁷Yi kæ sɨ nà jôf sɨ̂ và a mbæ̀, wa bè ghɨ kɨŋ yeyn a ŋwàʼlɨ̀ afî a ghɨ n-nyâʼ lêm awo ateyn a ntoʼ Babilòn na fòyn Saylùs nɨn chwosɨ meyn ìsaʼ na ghɨ kasi bàʼlɨ̀ ndô Fɨyini nâ yèyn a Jèlusalèm ta ka mbæ̀ kasi tum fèʼtɨ̀ sɨ̂ ghès nâ ichoʼnɨ i ŋweyni nɨn ghɨ na gha iwo nâ ghàyn a.