Genesis 10

Woyn woyn Nuwà

¹Akeynà nɨn ghɨ àzɨyn a woyn ghɨ lûmnɨ̀ nɨ̀ Shêm ŋêyn Hâm nɨ̀ Jafèt ma à ti woyn Nuwà nɨ̀ woyn woyn àŋena ta ànkuŋa nɨn læ chwò àŋena bzɨ. ²Woyn Jafèt nɨn læ nà ghɨ Gomà ŋêyn Magòk a fî ghɨ Madày ŋêyn Javàn nɨ̀ Tubàl kɨ̀mɨ nɨ̀ Meshèk ŋêyn Tilàs. ³Woyn Gomà nɨn læ nà ghɨ Ashkenàs ŋêyn Lifàt nɨ̀ Togamà. ⁴Woyn Javàn ɨ ghɨ Elishà ŋêyn Tashìsh nɨ̀ ghelɨ Kitìm nɨ̀ ghelɨ Dodanìm. ⁵Woyn Javàn nâ ghèyn ti n-ghɨ ghelɨ ghì a àŋena nɨ̂n læ bzɨ ghelɨ ghì a ghɨ n-læ ku ɨlwêʼ a mbæ̀sɨ jvâ ìghaʼnɨ ɨ bàʼlɨ ndù nɨ̀ tɨ̀laʼtɨ àŋenatɨ afu. Àŋena nà n-bâʼlɨ̀ kɨ asas a ndosɨ asas a ndosɨ. Nô mɨ ìsas i ndo ì kà ɨ lemâ ndû kɨ sɨ ilaʼ i yi lû-ì, nô mɨ ìlaʼ ì kà ɨ kelɨ kɨ ìtaŋi i àŋena. ⁶Woyn Hâm nɨn læ nà ghɨ Kûsh ŋêyn Ijìb nɨ̀ Bût ŋêyn Kenàn. ⁷Woyn Kûsh nɨn læ nà ghɨ Sebà ŋêyn Hàvilà nɨ̀ Sabtà a fî ghɨ Lamà ŋêyn Sabtekà, woyn Lamà ɨ ghɨ Shebà ŋêyn Dedàn.

⁸Kûsh nɨ̀n fi meyn bzɨ kfeynsɨ wayn ɨlumnɨ̀ ɨ̀lvì izɨyn i ŋweyni ghɨ Nimlòd. Nimlòd nâ wèyn nɨ̀n læ nà ghɨ kɨ nô bò ndo ìwòŋ ɨghaʼnɨ. À n-læ nà ghɨ ŋweyn bò ndo ìwòŋ ɨghaʼnɨ ɨwû àsɨ a mbzɨ. ⁹Bôbo Fɨyini nɨ̀n læ meyn gàmtɨ̀ Nimlòd wu nà kya sɨ byem nyamsɨ nô sɨ a ŋaŋ. À ti iwo zɨ̀-ì a sɨ chem layn, wùl nɨ̀n se sɨ faytɨ sɨ byem ghɨ nà bê na, “Fɨyini fɨ gamtɨ meyn wù na byem kɨ ta Nimlòd.” ¹⁰Nimlòd nɨ̀n læ zɨ̀tɨ sɨ saʼ ta fòyn a ntèʼ Babilòn ɨ saʼ a ntèʼ Elèk ɨ fi saʼ a ntèʼ Akàd nɨ̀ ntèʼ Kalnè. Ntèʼ nâ sèynsɨ nà n-chɨ̂yntɨ̀ ghɨ kɨ ilaʼ i Shinà. ¹¹Wù n-læ meyn lù sɨ afu ɨ fi ndu saʼ ilaʼ i Asilìyà ɨ bàʼlɨ̀ ntèʼ Ninevè nɨ̀ ntèʼ Lehobot Ay nɨ̀ ntèʼ Kalà, ¹²kɨ̀mɨ nɨ̀ ntèʼ Lesèn, alèʼ ghè a Ninevè nɨ̀ ntèʼ ìghaʼnɨ zɨ̀ a ghɨ nà n-toŋtɨ na Kalà nà n-lem ighami ateyn. ¹³Ijìb ma à ti wâyn Hâm ɨ̀lvì vzɨ̂ nà n-ghɨ bæ̀ sɨ̂ ghelɨ Ludìm nɨ̀ ghelɨ Anamìn, ghɨ kɨmɨ bæ̀ sɨ̂ ghelɨ Lehabìm nɨ̀ ghelɨ Nabtuhìm. ¹⁴Wù nà n-fi ghɨ kɨmɨ bæ̀ sɨ̂ ghelɨ Batlusìm nɨ̀ ghelɨ Kasluhìm, ghelɨ Kasluhìm nâ ghèyn ɨ ghɨ àŋena ghì a ghɨ n-læ nà ghɨ ghɨ̀bo ghelɨ Fìlisìyà. Ijìb nà n-ghɨ kɨmɨ bæ̀ sɨ̂ ghelɨ Kaftolìm. ¹⁵Wâyn Hâm ɨ̀lvì vzɨ̂ a ghɨ nà n-toŋtɨ na Kenàn tì nà n-ghɨ bò Sidòn, a fî ghɨ kɨmɨ bæ̀ sɨ̂ ghelɨ Hêt. A nà n-ghɨ tì Sidòn ɨ ghɨ wayn ɨlwema nɨ̀ Kenàn. ¹⁶Kenàn nà n-ghɨ kɨmɨ bæ̀ sɨ̂ ghelɨ Jebùs fî ghɨ kɨmɨ bæ̀ sɨ̂ ghelɨ Amò nɨ̀ ghelɨ Gigàsh. ¹⁷Wù nà n-ghɨ kɨmɨ bæ̀ sɨ̂ ghelɨ Hîv nɨ̀ ghelɨ Ak, ghɨ kɨmɨ bæ̀ sɨ̂ ghelɨ Sîn, ¹⁸nɨ̀ ghelɨ Avàd fî ghɨ kɨmɨ bæ̀ sɨ̂ ghelɨ Zemà nɨ̀ ghelɨ Hamà. Ghelɨ asas a ndosɨ nâ ghèyn a Kenàn nà n-ghɨ bæ̀ sɨ̂ àŋena têyn nɨ̀n læ meyn gwòsɨ ndù sɨ a ghelɨ tɨ̂laʼ tɨlitɨ. ¹⁹Ighami ilaʼ nɨ̀ woyn Kenàn nâ yèynì nà n-zɨ̂tɨ̀ a ntèʼ Sidòn kalì chwô a ntèʼ Gelà yi ndu chem a ntèʼ Gazà, fì lù sɨ afu yi tala chwò dzɨ a ntèʼ Sodòm, yi fi ndu chwò ntèʼ Gòmolà nɨ̀ ntèʼ Admà, yi ndu chem a ntèʼ Zeboyìm ɨ ndu gòʼsɨ̀ a ntèʼ Lashà.

²⁰À ti ta woyn Hâm nà n-ghɨ asas a ndosɨ asas a ndosɨ, lû sɨ afu gwôsɨ̀ ndû sɨ a ntèʼsɨ, ntèʼsɨ ateynsɨ lema ndù sɨ a tɨ̂laʼ, nô mɨ ìlaʼ ì kà ɨ kelɨ kɨ ìtaŋi i àŋena. ²¹Shêm ma à ti wâynà Jafèt ɨlwema nà n-kelɨ kɨmɨ woyn ghɨ lûmnɨ̀ ghɨ li. Wù n-læ nà ghɨ bæ̀ sɨ̂ woyn Ebà nô ghɨ̀ jɨ̀m. ²²Woyn Shêm nɨ̀n læ nà ghɨ Elàm ŋêyn Ashù nɨ̀ Afazàd a fî ghɨ Lûd ŋêyn Alàm. ²³Woyn Alàm nà n-ghɨ Uz ŋêyn Hûl a fî ghɨ Getà ŋêyn Meshèk. ²⁴Woyn Afazàd nɨ̀n læ nà ghɨ Shelà, Shelà ɨ ghɨ bò Ebà. ²⁵Ebà nɨn læ bzɨ woyn woyn ghɨ lûmnɨ̀ ghɨ̀bò ɨ fu izɨyn i ɨ̂lvɨ̀ na Belèk bòm ta a nà n-ghɨ ɨtuʼ nâ ghè ma mbzɨ gwosɨ meyn. Izɨyn i wâynà Belèk nà n-ghɨ Joktàn. ²⁶Joktàn nà n-ghɨ bò Amodàd ŋêyn Shelèf a fî ghɨ kɨmɨ bò Hàzamavèt ŋêyn Jelà, ²⁷ghɨ kɨmɨ bò Hadolàm ŋêyn Uzàl nɨ̀ Diklà, ²⁸fî ghɨ kɨmɨ bò Obàl ŋêyn Abimèl nɨ̀ Shebà, ²⁹ghɨ kɨmɨ bò Ofì ŋêyn Hàvilà nɨ̀ Jobàb. Ghelɨ nâ ghèyn nô ghɨ̀ jɨ̀m nà n-ghɨ kɨ woyn Joktàn. ³⁰Alêʼ kì a àŋena nà n-chi ateyn nà n-zɨ̂tɨ̀ a Meshà ndû chem a Sefà a ghɨ ilaʼ i kfɨynsɨ i li abàs ghè a ɨchfɨ-iyvɨ i nɨn nsal ateyn. ³¹Woyn Shêm nâ ghèyn nɨn læ meyn lù sɨ asas a ndosɨ ɨ lema ndù sɨ a ntèʼsɨ ɨ lù sɨ a ntèʼsɨ ɨ lema ndù sɨ a tɨ̂laʼ, nô mɨ ìlaʼ ì kà ɨ kelɨ kɨ ìtaŋi àŋena. ³²Asas a ndo nâ kèynà nô à jɨ̀m nɨ̀n læ chɨ̀yntɨ fvɨ kɨ ɨntweŋ nɨ̀ Nuwà, nô mɨ ìsas i ndo ì kà ɨ nà sɨ lemâ ndû kɨ sɨ a ntèʼ lû sɨ afu ndû kɨ sɨ ilaʼ. Nô tɨ̀laʼ tɨ̀ jɨ̀m a mbzɨ nɨn læ fvɨ̀ kɨ ɨntweŋ nɨ̀ Nuwà nâ ghàyn ta ànkuŋa nɨn læ chwò àŋena bzɨ.