Genesis 13

Ablàm ŋêyn Lôt ɨ gwòsɨ̀

¹À nà n-ghɨ ta Ablàm ŋêyn wî ŋweyn nɨ̀n lû sɨ a Ijìb sɨ kasi sɨ koʼ a Negèf, Ablàm ɨ lì nô mɨ ghà ta wu nà n-kelɨ. Lôt ɨ boŋ lù ŋêyn àŋena. ²A ghɨ tì ma Ablàm ghaʼ meyn nà kelɨ nyamsɨ nɨ̀ aso ɨkwo a baŋnɨ-a nɨ a fɨfâ nô sɨ idvɨ̀.

³Ablàm ɨ lù sɨ a Negèv ɨ nà ndû kɨ alêʼ nɨ̀ àleʼ à ɨ læ jelɨ kɨ têyn ɨ kasi ndu chem alèʼ ghè a wu n-læ kas ɨ two ŋweyn vzɨ̀ afu tì ighami nɨ̀ Betèl nɨ̀ Ây, ⁴kɨ̀mɨ alèʼ ghè a wù n-læ bàʼlɨ abaŋ ifu a kɨ asɨ kì ateyn tì ɨ nà sɨ koʼsɨ̂ Bôbo Fɨyini afu.

⁵Lôt ta ŋêyn Ablàm nà n-jelɨ̀ amoʼ nà n-kelɨ kɨmɨ bzɨsɨ nɨ̀ nyamsɨ nô sɨ idvɨ̀, fî kelɨ kɨmɨ ghelɨ. ⁶Nyamsɨ àŋenasɨ nà sɨ dvɨ̂ chwôsɨ̀-à, aleʼà ɨ læ̂ ghaʼ àŋena sɨ nà duʼ alêʼ àmòʼ ghɨ̀ jɨ̀m bòm ta ɨfwo àŋena nà n-dvɨ̂ chwôsɨ̀. ⁷Àngùmnɨ̀-à ɨ fvɨ̀ antêynɨ̀ nɨ̀ nchìsɨ nyâmsɨ̀ nɨ̀ Ablàm nɨ sɨ Lôt sɨ̀. À na n-ghɨ tì ghelɨ Kenàn nɨ̀ ghelɨ Belìz ɨ bu chî kɨ afu.

⁸Ablàm ɨ yvɨ ta nchì sìsɨ̀ sɨ gûmnɨ̀ tî ɨ kæ be sɨ̂ Lôt na, “Yi n-jofɨ̀ wì na ghelɨ ghesɨ̀và na nu-à, jofɨ̀ wì na ghesɨ̀và keli ibef bòm ta wà n-ghɨ kɨ nô wayn wom, a ghɨ wi sɨ afi. ⁹Ba à n-ghaʼ ndû kɨ nse a wa asɨ tèyn? Ghesɨ̀và gwosɨ afêyn. Wà kæ choʼnɨ sɨ ndù dzɨ ɨkœ nɨ̂nkœ̀ a mà ndu dzɨ ɨkœ ɨ two, wà ndû dzɨ ɨkœ ɨ two a mà ndu dzɨ ɨkœ nɨ̂nkœ̀.”

¹⁰Lôt ɨ se sɨ ki sɨ kal ɨ yeyn ibal i Jodàn nô ì jɨ̀m kɨ̀ sɨ zɨ̀tɨ̀ afu sɨ ndù sɨ chem a Zuwà yi yvɨ̂tɨ̀ jofɨ̀ kɨ ta gvêyn Bôbo, lutɨ̂ sû sayn kɨ ta nsê Ijìb. À nà n-ghɨ tì Bôbo Fɨyini ɨ bu duʼ tɨ̀ bebsɨ Sodòm nɨ̀ Gòmolà. ¹¹Lôt ɨ choʼnɨ sɨ lì abâs ibal i Jodàn nô à jɨ̀m dzɨ abàs ghè a ɨchfɨ-iyvɨ i nɨn sal ateyn ɨ lù ɨ nà sɨ ndû afu. À ti ta ŋêyn Ablàm nɨn læ gwòsɨ. ¹²Ablàm ɨ faŋ kɨ a Kenàn. Lôt ɨ ndù ɨ kas ɨtwo ŋweyn ɨ nà sɨ chî a ntèʼ ì lì yi baʼsɨ̂ a Sodòm. ¹³A ghɨ tì ghelɨ Sodòm ɨ ghɨ kɨ nô ghelɨ ghɨ bɨ nî chwôsɨ̀ àwo a bɨ-a asɨ nɨ̀ Bôbo Fɨyini.

¹⁴Lôt nɨ̀n læ lù tî Bôbo Fɨyini ɨ taŋi sɨ̂ Ablàm ɨ bè na, “Làysɨ asɨ à kya kɨ̀ alèʼ ghè a wà n-ti ateyn tì ɨ ki kal kɨ ɨbyâs ɨ̀ jɨ̀m. ¹⁵Mɨ n-fu àlêʼ kì a wà n-yeyn tî nô à jɨ̀m sɨ̂ và zɨ̂ woyn ghya kɨ̀ samoʼ. ¹⁶Mɨ n-fu woyn sɨ̂ và ghɨ dvɨ̂ kɨ ta abɨ̂l a nse ma wùl kàʼ wu bû taŋ. Woyn ghya læ̀ nà dvɨ̂ kɨ ta abɨ̂l. ¹⁷Ndù læ̂ ɨ jèlɨ ki kal nɨ̀ tɨ̀ghami tɨ nse nâ tèyntɨ̀ nô tì jɨ̀m bòm ta mɨ n-fu sɨ̂ và.”

¹⁸Bôbo tàŋi tì nô mɨ ɨlvɨ gha Ablàm ɨ lù ɨ ndù ɨ nà sɨ chî baʼsɨ̂ a ngùŋ ɨ̀nkàʼ mɨ̀ ôksɨ̀ nɨ̀ Mamlè ghè a ntèʼ Heblòn tì ɨ læ bàʼlɨ̀ àbaŋ ifu afu sɨ̂ Bôbo.