Genesis 29

Jàkôb ɨ ndu chem a Badan Alàm

¹Jàkôb nɨn læ meyn lù sɨ a Betèl ɨ jelɨ kɨ têyn ɨ ndu chem a ilaʼ ili abàs ghè a ɨchfɨ-iyvɨ i nɨn sal ateyn. ²A nà ghɨ ta wù ndù chèm afu ɨ yeyn ibɨ i mu ili a ɨtwaʼ, bzɨsɨ ɨ nyɨŋ a ngùŋ àteyn inôyn ì tal bòm ta sɨ nà n-gvî nyvɨ mu afu. Ibɨ i mu ateyn i nà n-ghɨ ma ghɨ chɨytɨ meyn nɨ̀ ngòʼ yi ghaʼ kɨ tèyn. ³Bzɨsɨ nà n-gvî yvɨ̂ŋtɨ̀ afu nô mɨ ɨlvɨ gha, nchìsɨ ateynsɨ bɨŋ lìsì ngòʼ àteyn sɨ a ɨchfɨ ibɨ i mu nâ ghè ɨ̀ fù mu sɨ̂ bzɨsɨ àŋena sɨ nyvɨ ɨ̀ mèsì, àŋena kasi chɨytɨ.

⁴Jàkôb ɨ bɨf sɨ̂ nchì sɨ ateynsɨ na, “Yì lù wo a woynà ghem?” Àŋena bèynsɨ̀ na, “Ghèsɨ̀ lù a Halàn.”

⁵Wu fi bɨf sɨ̂ àŋena na, “Yi n-kya Labàn ɨ wâyn wâyn Nahò a?” Àŋena bèynsɨ̀ na, “Ghès nɨn kya ŋweyn.”

⁶Jàkôb ɨ bɨf ɨ kfeynsɨ na, “Wù ti n-ghɨ ɨwuyn ɨtwo a?” Àŋena ɨ bèynsɨ̀ ɨ bè na, “Wù n-ghɨ kɨ nô ɨwuyn ɨtwo. À n-gvî wayn ɨ wi nɨ̀ ŋweyn Lashèl ti nɨ̀ bzɨsɨ.”

⁷Jàkôb ɨ bè sɨ̂ àŋena na, “Lvɨ̂yn bu ghɨ kɨ nɨ̀nchuè bula ɨlvɨ kfeyn sɨ kfasɨ bzɨsɨ. Yì fu mu sɨ nyvɨ, yì kasi ndù nɨ̀ ɨ̀nseynsɨ ɨtwaʼ.”

⁸Àŋena bèynsɨ̀ ɨ bè na, “Ɨ̀ngaŋ! Bzɨsɨ nɨn yvɨ̀ŋtɨ̀ mesì-à, a ghèsɨ̀ bɨŋ lìsì ngòʼ yèyn sɨ a ɨchfɨ̀ ibɨ i mu jæ ta ka ghèsɨ̀ fu mu sɨ nyvɨ.”

⁹Jàkôb nà n-bu taŋî kɨ ŋêyn àŋena, Lashèl ɨ gvì nɨ̀ bzɨsɨ bò ŋweynsɨ bòm ta wù nà n-ghɨ nchì bzɨsɨ ìki. ¹⁰Wu nà yeyn gvî nɨ̀ Lashèl ɨ wâyn lùmsɨ nà ŋweyn Labàn nɨ̀ bzɨsɨ têyn ɨ ndu bɨŋ lìsi kɨ lisi ngòʼ zɨ̀ sɨ a ɨchfɨ̀ ibɨ i mu ɨ fu mu sɨ̂ bzɨsɨ lùmsɨ nà ŋweynsɨ. ¹¹Jàkôb nɨn nì tî iwo ateyn i ɨ nà fom a ŋweyn ɨwùyn nô sɨ a ŋaŋ wu baʼnɨ Lashèl ɨ bɨ̀sà kɨ nɨ̀ ìdzɨ-ì, ¹²ɨ bè sɨ̂ Lashèl na, “Mɨ n-ghɨ wâyn jèmtɨ̀ bò vâ, nà wom ɨ ghɨ Làbikà.” Lashèl ɨ nyɨŋ ɨ ndu fèʼtɨ̀ sɨ̂ bò ŋweyn ɨ Labàn.

¹³Labàn ɨ yvɨ saʼgha kûm wâyn jèmtɨ̀ ŋweyn Jàkôb nô mɨ ɨlvɨ gha ɨ nyɨŋ fvɨ ndu yeyn ŋweyn ɨ baʼnɨ ɨ toŋtɨ ŋweyn ɨ li kfa nɨ̀ ŋweyn a ndo. Jàkôb ɨ fèʼtɨ̀ nô mɨ ghà sɨ̂ Labàn ta yi gàyn. ¹⁴Labàn ɨ bè sɨ̂ ŋweyn na, “Samoʼ wà n-ghɨ kɨ nô wâyn wom a ghɨ wi sɨ a afi.” Jàkôb ɨ chi ŋêyn ŋweyn sɨ a njoŋ.

Jàkôb ɨ mala Liyà ŋêyn Lashèl

¹⁵A læ nà ghɨ achi a li-a, Labàn ɨ bè sɨ̂ Jàkôb na, “A ti bè na wà na felɨ̀ kɨ sɨ̂ mà salû tèyn bòm ta mɨ n-ghɨ lùmsɨ nà vâ a? Fèʼtɨ na mà na lâʼ ti vâ a.”

¹⁶À nà n-ghɨ tì Labàn ɨ kelɨ woyn ghɨ̂kì ghɨ̀bò, ɨlwema ɨ ghɨ Liyà ànkùmtɨ̀-à ɨ ghɨ Lashèl. ¹⁷Liyà nà n-kelɨ kɨ nô ìkêʼ i juŋì mɨtì Lashèl ɨ jofɨ̀ chwô ŋweyn. ¹⁸Jàkôb ɨ nà sɨ kôŋ Lashèl ɨ bè sɨ̂ Labàn na, “Mɨ n-felɨ̀ sɨ̂ và sɨ a bèŋsɨ̀ nsòmbo a wà fu Lashèl sɨ̂ ma sɨ a wi.” ¹⁹Labàn ɨ bè na, “Dùʼi læ̂ wa felɨ̀-à. Yi n-jofɨ̀ na mà kwo fù ŋweyn sɨ̂ và chwô ta ka mà fu sɨ̂ wùl ɨ wûlù.” ²⁰Jàkôb ɨ fèl sɨ a bèŋsɨ̀ nsòmbo sɨ keli Lashèl sɨ a wi mɨtì bèŋsɨ ateynsɨ nà ghɨ kɨ̀ sɨ̂ ŋweyn tèyn ta mɨchi bòm ta wu nà n-koŋ Lashèl nô a jûŋ.

²¹A nà ghɨ ta Jàkôb felɨ̀ mèsì, wu bè sɨ̂ Labàn na, “Ma felɨ meyn mèsì bèŋsɨ̀ nsòmbo, fu læ̂ wî wom sɨ̂ mà.”

²²Wu n-bè tî Labàn ɨ làʼì ghelɨ ntèʼ nâ ghì nô ghɨ̀ jɨ̀m na àŋena gvi yɨ malâ. ²³A ni nà ghɨ nɨ̀ntuʼ, Labàn ɨ kwo lì Liyà ɨ wâyn ɨlwema nɨ̀ ŋweyn ɨ fu sɨ̂ Jàkôb wu chi nɨ̀ ŋweyn. ²⁴Labàn nɨn læ meyn fu kɨmɨ wâyn wi ɨ̀ felɨnɨ nɨ̀ ŋweyn ghɨ toŋtɨ̂ na Zilbà na wù na gâmtɨ̀ Liyà.

²⁵Ɨtuʼ ɨ bɨsɨ layn, Jàkôb ɨ kwo yeyn a nyɨŋ Liyà a ŋweyn a ngùŋ. Wu ndù ɨ bɨf sɨ̂ Labàn na, “Wà mòm ghà sɨ̂ mà têyn a? Mà tî nà felɨ̀ sɨ̂ và na wà fu Lashèl sɨ̂ mà, wà lɨsɨ mà bòm ghà?”

²⁶Labàn ɨ bèynsɨ̀ ɨ bè sɨ̂ ŋweyn na, “À n-ghɨ a nchînɨ̀ ìlaʼ nɨ̀ ghès ghɨ fu wi wayn ìbàm sɨ̂ lum sɨ asɨ nɨ̀ ɨ̀lwema. ²⁷Visi ɨwe ayɨ wèyn chwo, ghèsɨ̀ fu Lashèl sɨ̂ và, wà felɨ̀ kfèynsɨ bèŋsɨ̀ nsòmbo.”

²⁸Jàkôb ɨ chitɨ koʼ nɨ̀ ɨ̀we nâ vzɨ̀ ŋêyn Liyà kɨ̀ ta Labàn bè. Ɨwe ateyn ɨ mæ Labàn ɨ fi fu Lashèl sɨ̂ Jàkôb sɨ a wi. ²⁹Labàn ɨ fu wâyn wi ɨ̀ felɨnɨ nɨ̀ ŋweyn ghɨ toŋtɨ̂ na Bilhà sɨ̂ Lashèl na wù na gâmtɨ̀ ŋweyn. ³⁰Jàkôb ɨ boŋ chi nɨ̀ Lashèl. Wù nà n-kôŋ Lashèl chwo ta wu nà n-koŋ Liyà, ɨ fi fèl sɨ̂ Labàn sɨ a bèŋsɨ̀ nsòmbo.

Woyn Jàkôb

³¹A nà ghɨ ta Bôbo Fɨyini yèyn na Jàkôb nɨ̀n kôŋ wì Liyà, wu nì Liyà ɨ nà bzɨ-à mɨtì Lashèl ɨ bzɨ̂ wì. ³²Liyà ɨ timi ɨlvâ ɨ bzɨ wayn ɨ̀ lûmnɨ̀ ɨ chfɨ̀ izɨyn i ŋweyn na Lubèn bê na, “Bôbo yeyn meyn àfɨm à kema, lûm wom na kòŋ mà lvɨ̂yn.”

³³Wu fi timi ɨlvâ ɨ bzɨ kfeynsɨ wayn ɨ̀ lûmnɨ̀ ɨ chfɨ̀ ìzɨyn i ŋweyn na Simìyòn bê na, “Bôbo yeyn meyn na lûm wom nɨn kôŋ wì ma ɨ̀ fì fu kfèynsɨ wayn wèyn sɨ̂ mà.”

³⁴Wù n-fi meyn timi ɨlvâ ɨ fi bzɨ kɨ wayn ɨ̀ lûmnɨ̀ ɨ bè na, “Bòm ta ma bzɨ meyn woyn ghɨ̂ lûmnɨ̀ ghɨ̀ tal sɨ̂ lûm wom, wù na sɨ baʼsɨ̂ sɨ̂ mà lvɨ̂yn.” Wu n-tàŋi tî ɨ chfɨ̀ ìzɨyn i wayn àteyn na Levì.

³⁵Liyà nɨ̀n læ meyn fi timi ɨlvâ ɨ bzɨ kfeynsɨ wayn ɨ̀ lûmnɨ̀ ɨ bè na, “Mà na koʼsɨ̂ Bôbo Fɨyini lvɨ̂yn.” Wu n-tàŋi tî ɨ chfɨ̀ ìzɨyn i wayn àteyn na Judà, ɨ dùʼì ɨ nà bu fì bzɨ̂ wì.