Genesis 50

¹Josèf nɨn læ yeyn nô mɨ ɨlvɨ gha na bò ŋweyn kfɨ meyn ɨ fe a ŋweyn atu ɨ nà sɨ dzɨ à. ²Wu n-dzɨ̀ tî ɨ jàŋ ghelɨ ndo àfvɨ̀ ghî a ghɨ nà n-felɨ sɨ̂ ŋweyn na ghɨ gvi ɨ̀ fàytɨ bò ŋweyn, àŋena gvi faytɨ. ³Àŋena nɨn læ lì mɨchi mɨ̀vɨm ɨ̀n kæ̀ sɨ faytɨ ɨgvɨyn i Jàkôb kɨ̀ ta ghɨ nà n-nî a Ijìb. Ghelɨ Ijìb ɨ dzɨ̀ ìkfɨ-i ŋweyn sa mɨchi mɨ̀vɨm nsòmbo. ⁴A nà ghɨ ta ghɨ dzɨ̀ mèsì ikfɨ, Josèf ɨ bè sɨ̂ nchìsɨ ntoʼsɨ na, “Yi na kòŋ kɨ nô mà, yi taŋi sɨ̂ fòyn sɨ̂ mà. Yi be sɨ̂ ŋweyn na, ⁵‘Bò wom tî se sɨ kfɨ ɨ̀ nì ma yɨ mɨkâyn na, mà læ̀ gvɨmì kɨ ŋweyn a Kenàn, a isè ma a n-læ tɨm kɨ nô ŋweyn. Yì be sɨ̂ ŋweyn na mɨ n-chwotɨ̂ na wù visi mà koʼ gvɨ̀mì bò wom ɨ kæ kasi sɨ kàlì.’ ” ⁶Àŋena ndù, fòyn ɨ bè na, “Yì be sɨ̂ ŋweyn na wù koʼ gvɨ̀mì bò ŋweyn kɨ̀ ta bò ŋweyn tî bè na wù gvɨmi.” ⁷Wu n-bè tî Josèf ɨ lì bò ŋweyn ɨ koʼ sɨ gvɨ̀mì a Kenàn. Wu n-læ se sɨ koʼ, nchìsɨ ntoʼsɨ nɨ̀ ghelɨ ghɨ felɨnɨ nɨ̀ fòyn nô ghɨ̀ jɨ̀m nɨ̀ chyeʼsɨ Ijìbsɨ̀ nô sɨ̀ jɨ̀m ɨ ndù a ŋweyn ibàm. ⁸Àŋena nɨn læ ndu baʼsɨ sɨ̂ ghelɨ ndo nɨ̀ Josèf nɨ ɨ ghɨ bò ŋweyn nɨ̀ woynà ŋweyn. Ghɨ n-læ lù a Goshèn, a faŋ kɨ woynda nɨ̀ nyamsɨ. ⁹Ghelɨ nɨn læ meyn koʼ mɨ̀nchaʼ, ghɨli koʼ nyamsɨ kfaŋ ɨ ndù a ibàm nɨ̀ Josèf sɨ gvɨmi bò ŋweyn. Anôyn kì a kɨ n-læ ndù a ŋweyn ibàm nà n-dvɨ à.

¹⁰A nà ghɨ ta àŋena jèlɨ̀ ndù chem alèʼ a li-a ghɨ chyeʼ àsaŋ ateyn a Atàd, a mbæ̀ jvà Jodàn, àŋena ɨ timi afu ɨ dzɨ̀ nô sa ŋaŋ. Josèf nɨn læ dzɨ̀ ikfɨ i bò ŋweyn afu sa mɨchi nsòmbo. ¹¹Ghelɨ Kenàn ghì a ghɨ n-læ nà chi afu ɨ yeyn ta ghɨ n-dzɨ̂ alèʼ nâ ghè a ghɨ nà n-chyeʼ asaŋ ateyn tì ɨ nà sɨ bè kɨ sɨ sa àŋena ngeŋsɨ na, “Ghelɨ Ijìb nɨn kelɨ ìkfɨ afêyn yi bema.” À ti iwo zɨ̀ a yi n-læ nì ghɨ nà sɨ toŋtɨ̂ kɨ àlêʼ nâ kì na Abel Mizlèm.

¹²Yi ti n-dyêyn na woyn Jàkôb nɨn læ ni kɨ iwo zɨ̀ a wù n-læ bè na àŋena ni. ¹³Àŋena nɨn læ meyn lì ɨ ndu gvɨ̀mì ŋweyn a Kenàn a ifò a gvêyn afî a Abɨ̀làhâm nɨn læ yuyn a Makbelà tì, a ngùŋ Mamlè. Wu n-læ yuyn sɨ̂ Eflòn ɨ wul ɨ̀ Hêt sɨ a ngvɨ̀misi. ¹⁴A nà n-ghɨ ta Josèf gvɨ̀mi bò ŋweyn, ŋêyn woynà ŋweyn nɨ̀ ghelɨ ghì a ghɨ n-læ ndù a ŋweyn ibàm ɨ kasi ɨ kàlì a Ijìb.

Josèf ɨ kfɨmtɨ woynà ŋweyn

¹⁵A nà n-ghɨ ta woynà Josèf yeyn na bò àŋena kfɨ meyn ɨ nà sɨ fàynà, kayntɨ̂ kɨ sɨ a àŋena ngeŋsɨ na, “Ɨtoŋ Josèf ti kæ sɨ yaf wù lêm na yi n-sɨ̀sɨ̀ àwo a bɨ-a kì a ghesɨ̀nà nɨn læ mòm sɨ̂ ŋweyn, ghesɨ̀nà nì nô ghà?” ¹⁶Àŋena nɨn kayntɨ tî nô mɨ ɨlvɨ gha ɨ kæ tum na ghɨ ndu bè sɨ̂ Josèf na, “Bò vâ tî se sɨ kfɨ ɨ̀ bè na, ¹⁷‘Yì be sɨ̂ Josèf na ma be meyn na wù lesɨ fu awo a bɨ-a nɨ̀ woynà ŋweyn nɨ̀ mbɨ sìsɨ̀ a àŋena nɨn læ ni sɨ̂ ŋweyn.’ Ghèsɨ na sɨ chwotɨ̂ và lvɨ̂yn na wà lèsɨ fu ghes bòm ta ghès nɨn koʼsɨ̂ kɨmɨ Fɨyini fɨ bò vâ.” Josèf ɨ yvɨ ntum àteyn nô mɨ ɨlvɨ gha ɨ dzɨ̀. ¹⁸Woynà ŋweyn ɨ ndù ɨ fe a ŋweyn asɨ ɨ bè sɨ̂ ŋweyn na, “Ghès nɨn ghɨ ɨ̀kôs ɨ̀ va.”

¹⁹Mɨtì Josèf ɨ bè sɨ̂ àŋena na, “Ka yì fî fàyn, mɨ n-ghɨ wi Fɨyini sɨ nà saʼ ghelɨ. ²⁰Yi n-læ baʼtɨ sɨ ni mbɨ sɨ̂ mà mɨtì Fɨyini fɨ bêynsɨ̀ sɨ a njùŋ, sɨ bœ̀sɨ ghelɨ ghɨ dvɨnɨ kɨ̀ ta wù n-nî lvɨ̂yn tèyn. ²¹Ka yî n-fì fàyn, mà na yɨsɨ̂ zɨ̀ nɨ̀ wôyn ghi.” Josèf nɨn læ boynɨ taŋi kɨ taŋi ɨ kfɨmtɨ àŋena.

Josèf ɨ kfɨ

²²Josèf nɨn læ meyn faŋ nà chi kɨ a Ijìb ŋêyn ghelɨ bò ŋweyn. Wu n-læ lema nà ghɨ bèŋ ɨvɨ nɨ̀ bèŋsɨ̀ ìvɨm. ²³Wu n-læ meyn yeyn woyn woyn Eflèm koʼ chem ɨjwâŋ ɨ̀ twal. Wù n-yeyn meyn kɨmɨ woyn woyn Mànasè ma à ti woyn Makì ɨ lì sɨ a ŋweyn a woyn.

²⁴A nà n-ghɨ ta Josèf lèma meyn, wu jàŋtɨ̀ woynà ŋweyn ɨ bè sɨ̂ àŋena na, “Ɨlvɨ ɨ̀ wom tɨmsɨ meyn mɨtì ma kya na Fɨyini fɨ nɨn læ̀ gâmtɨ̀ lî zɨ̀ achi a li-a ɨ̀ ndù nɨ̀ zɨ̀ a ilaʼ ghè a Fɨ n-læ chfɨ̀nɨ sɨ̂ Abɨ̀làhâm nɨ̀ Yisàk nɨ̀ Jàkôb.” ²⁵Wu n-taŋi tî ɨ nì woynà ŋweyn ɨ yɨ mɨkâyn na, “Fɨyini fɨ læ̀ gvî sɨ li zɨ sɨ kasi sɨ kfa nɨ̀ zɨ̀ a Kenàn, a yì se sɨ lù ɨ̀ lì lù nɨ̀ ɨ̀vɨf ɨ̀ wom sɨ a Ijìb afêyn.”

²⁶Josèf nɨn læ kfɨ ghɨ bèŋ ɨvɨ nɨ̀ beŋsɨ̀ ìvɨm, ghɨ faytɨ ìgvɨyn ɨ ŋweyn ɨ we lèm antayntayn a Ijìb.