Isaiah 1

Fɨyini fɨ ɨ yòl sɨ̂ ghelɨ Judà.

²Isayà nɨn læ bè na, Bôbo Fɨyini bè na:

“Iyvɨ i, mɨ n-kɨŋ sɨ nà taŋi-à wa yvɨtɨ-à! Nsê, mà na taŋi-à wa yvɨtɨ-a.

Ma toʼnɨ meyn nɨ̀ woyn, ɨ̀ lèmsɨ àŋena ghɨ lema koʼ nà to nɨ̀ àtu-a sɨ̂ mà.

³Nô mɨ mbòŋ nɨ̀n kya bò àteyn,

njàkâs ɨ kya fɨ̀kɨ fìfɨ̀ a yì n-yɨ ateyn.

Mɨtì, ghelɨ Isìlæ̀ ɨ kya wi ma.

Ghelɨ̀ ghem nɨn kya wi abâs kì a àŋena nɨn ti ateyn.

⁴Ghelɨ Isìlæ̀, yi n-ghɨ kɨ nô ghelɨ ghɨ bɨ.

Yi n-nî meyn chwòsɨ̀ àwo a bɨ-a kɨ na yeʼtɨ̂ zɨ̀.

Yi nî àwo a bɨ-a kɨ̀ ta ghɨ̀bo ghi nɨ̀n læ nà ni-à.

Yi n-nî wì iwo àtì-ati nô ìmòʼ.

Yi chasɨ meyn Bôbo Fɨyini.

Yi kasi meyn sɨ ibam nɨ̀ Fɨyini fɨ laynɨ fɨ ɨ Fɨyini fɨ Isìlæ̀.

Yi mô meyn ŋweyn.

⁵Yi n-bɨ̂ to nɨ̀ àtu-a têyn bòm ghà?

Yi ti n-ndyêyn na mà na fu kɨ fu ngeʼ sɨ̂ zɨ̀ ma?

Ɨtu ɨ̀vzɨ sɨ kelɨ ɨ̀lwemtɨ kɨ̀ ɨbyâs ɨ̀ jɨ̀m.

Nô mɨ ndà a yi antêynɨ̀ sɨ zɨnɨ̂ kɨ zɨnɨ.

⁶Nô àlêʼ a juŋà bu ghɨ wi a yi ɨwùyn nô sakos.

Ɨwûyn vzɨ nɨn ghɨ ma ghɨ kwosɨ meyn kɨ ɨ̀byâs ɨ̀ jɨ̀m, ɨ̀mbɨ̀blɨ nɨ̀ ɨ̀lwêʼ ɨ yafɨnɨ ɨ ghɨ kɨ ɨbyâs ɨ̀ jɨ̀m,

bula ghɨ sû, bula ghɨ yoʼtɨ, bula ghɨ kul.

⁷Ghɨ n-nyoʼ meyn ntèʼ sisɨ,

ilaʼ ì zɨ-i na sɨ kèʼ kɨ ta ghɨ màʼì maʼi.

Ghelɨ ɨtum chuyn meyn ɨ̀fwo ɨ yɨnɨ sɨ a yi a gvêynsɨ̀ nô ɨ̀ jɨ̀m,

yi na ki-a, kelɨ wi iwo sɨ bè.

Mbàynɨ̀ sisɨ bebsɨ meyn ìlaʼ ì zɨ-i.

⁸Lvɨ̂yn sɨ ghɨ ma à sɨ ti kɨ Jèlusalèm ɨ ntèʼ Zayòn iyvɨ.

Jèlusalèm sɨ ghɨ kɨ ta ɨtwo nchì a gvêyn,

yì sɨ ti kɨ ta ɨtwo a gvêyn.

Yì sɨ ti kɨ ta ntèʼ ɨlvɨ ta mbàynɨ̀sɨ̀ gèmtɨ̀ kal.

⁹Bôbo Fɨyini ɨ bò ɨ̀dwaʼ ɨ̀ jɨ̀m bu tî kòynsɨ ìsuyn ɨ̀ vìsi ghesɨ̀nà ghɨ li na ghɨ na bu chi-à,

ma ilaʼ i ghesɨ̀nà i sɨ ghɨ kɨ ta ntèʼ Sodòm nɨ̀ ntèʼ Gòmolà ɨtuʼ ghê a Fɨyini fɨ nɨn læ bebsɨ tî.

¹⁰Zɨ̀ ghelɨ ghɨ tisɨnɨ, yì lì kɨ̀ avɨ̀ nɨ̀ ghelɨ Sodòm. Yì yvɨtɨ iwo zɨ̀ a Bôbo Fɨyini nɨn bê.

Zɨ̀ ghelɨ Judà, yì lì kɨ̀ avɨ̀ nɨ̀ ghelɨ Gòmolà.

Yì yvɨtɨ iwo zɨ̀ a Bôbo Fɨyini nɨ̀n yeʼi zɨ nɨ̀ ìnyeyni.

¹¹Bôbo Fɨyini bè na, “Ka yì na kfâʼ na mɨ n-kôŋ tɨ̀fu tèyntɨ̀ a yi n-fu sɨ̂ mà tɨ dvɨ̂ tèyn.

Yi sɨ meyn chwòsɨ̀ nyamsɨ sɨ̂ mà, ma na bu kôŋ wì tɨfu tɨ nyoʼnɨtɨ nɨ̀ zɨ̀ nâ tèyntɨ̀ bòm ta yi n-fu wi nɨ̀ mɨ̀tem ɨn laynɨ̂.

Yi sɨ meyn ɨ̀ywaʼ sɨ̂ mà wu kfeyn,

ɨ̀ fu ɨlwêʼ ɨ nyâmsɨ̀ ɨ jûŋ vzɨ̀ a wu n-kelɨ iso sɨ̂ mà, wu kfeyn.

Nyamsɨ mbòloʼsɨ nɨ̀ njɨ̀sɨ̀ baʼsɨ̂ nɨ̀ bzɨsɨ ndoŋ sèynsɨ̀ a yi n-sɨ bu fì fom wi sɨ̂ mà.

¹²Yi n-se sɨ gvì sɨ koʼsɨ ma,

yi lì ɨ̀fwo nâ wèyn ɨ gvi nà kûʼlɨ̀ chwô nɨ̀ ɨ̀ŋweyn a ma a ndo ma à bè ndà?

¹³Ka yì fî gvì nɨ̀ tɨ̀fu nâ tèyntɨ̀. Tɨ n-kelɨ wi ifêl sɨ̂ mà.

Alɨ̂m ileŋ kì a yi n-nyôʼ nɨn chaʼnɨ̂ sɨ̂ mà nô sɨ a ŋaŋ.

Yi n-fvɨ̂ nô mɨ ɨchfɨ njoŋ ì kà yi yɨ ayɨ, fî baʼtɨ̂ mɨ̀chì mɨ̀ àyɨ ɨ̀n ghaʼnɨ̂ ɨ̀n lì, bam mɨ̀chi mɨ̀ ɨ̀tuʼ ilaʼ, nî àwo nâ kèynà têyn bê na yi n-koʼsɨ̂ mà.

Mɨtì ma kôŋ wì awo à bɨ-a nɨ̀ zɨ̀ nâ kèynà nô sakos.

¹⁴Mɨ n-faytɨ̂ bâyn kɨ nô bayn ayɨ nâ kèynà a yi n-fvɨ̂ nô mɨ ɨchfɨ njoŋ ì kà yɨ-a,

bâyn mɨ̀chi mɨ̀ àyɨ ɨn ghaʼnɨ̂ nɨ̀ zɨ̀ ɨ̀n lì.

Ka yì fî sèʼlɨ̀ mà nɨ̀ àwo nâ kèynà.

Ma bolɨ meyn.

¹⁵Yì na jêm sɨ̂ mà lvɨ̂yn ɨ̀ lâysɨ̀ mɨ ɨ̀wu iyvɨ,

ma buʼsɨ kɨ buʼsɨ.

Yi kôŋ yi jèm nô mɨ ti,

ma bu yvɨ.

Yi zue meyn chwòsɨ̀ ghelɨ. Mɨ̀lûŋ nɨ̀n ghɨ a yi ɨwu.

¹⁶Yì su ngêŋ sisɨ nà ghɨ nɨ̀ ìlayn i,

Mà bu kôŋ wì sɨ yeyn mbɨ̂ sisɨ nâ sèynsɨ̀

Yì maʼi awo a bɨ-a,

¹⁷ɨ̀ yèʼi sɨ nà nî awo a àtì-atì.

Yì na saʼ nsaʼsɨ fyeʼtɨ̂ wì iwo,

kfɨmtɨ̂ ghelɨ ghì a ghɨ n-yeʼtɨ àŋena.

Yì na tôʼnɨ̀ nɨ̀ woyn nkfɨ,

tôʼnɨ̀ nɨ̀ ghɨ̀ki nkfɨ.

¹⁸Yì gvi læ̂ ghesɨ̀nà tisɨ iwo nâ yèynì.

À n-bê mà Bôbo Fɨyini.

Yi n-ghɨ kɨ nô samoʼ na mbɨ sisɨ sɨ bâŋ kɨ tèyn mbùŋ,

sɨ nì layna ɨ̀ nà fɨfɨ kɨ ta awœ.

Mbɨ sisɨ sɨ bâŋ kɨ tèyn nkàŋ,

ghɨ sɨ nì sɨ layn sɨ nà fɨfɨ kɨ tèyn mbvɨ.

¹⁹Yì kæ choʼnɨ nà yvɨnɨ̂ mà,

a yì na yɨ ɨ̀fwo ɨ jûŋ vzɨ̀ a wu n-koʼ ilaʼ nâ ghàyn.

²⁰Mɨtì ma yì kæ to nɨ̀ àtu-a, ɨ̀ faŋ tɨ̀ yvɨ iwo zɨ̀ a mà bè,

a mbàynɨ̀ sisɨ zuetɨ mèsì zɨ̀ ɨtwaʼ iwòŋ.

À n-bê mà Bôbo Fɨyini.

²¹Ghelɨ Jèlusalèm nɨ̀n læ nà yvɨnɨ̂ kɨ nô mà têyn, à tî gàyn ghà àŋena kasi nà koʼsɨ̂ mɨ̀yìnì ɨ mɨ̂nlù a?

Ghɨ n-læ nà nî kɨ àwo àtì-ati a Jèlusalèm.

Ghɨ n-bu læ nà saʼ nsaʼ afu fyeʼtɨ̂ ìwo,

mɨtì lvɨ̂yn na sɨ ghɨ ghɨ zuetɨ̂ kɨ ghelɨ salû.

²²Jèlusalèm nɨ̀n læ nà layn kɨ ta aso ɨkwo a fɨfâ sɨ asɨ, mɨtì lvɨ̂yn na sɨ ghɨ yi ghɨ kɨ ta afo a maʼinɨ-a.

Jèlusalèm tî nà jôf kɨ ta mɨlûʼ ɨ̀n jùŋ mɨtì nà sɨ ku kɨ lvɨ̂yn ta ghɨ fyes nɨ̀ mû.

²³Ghelɨ ghɨ tisɨnɨ nɨ̀ zɨ sɨ to nɨ̀ àtu-a sɨ̂ mà,

jelɨ̀ kɨ ŋêyn ghelɨ ghɨ choŋnɨ.

Àŋena nɨn kôŋ kɨ sɨ nà nî iwo ma ghɨ yùyntɨ yuyntɨ,

lum ki kɨ na ghɨ na fu ɨ̀fwo sɨ̂ àŋena.

Àŋena bû tìmi nà tôʼnɨ̀ nɨ̀ wâyn nkfɨ,

tôʼnɨ̀ wi nɨ̀ ghɨ̀ki nkfɨ.

²⁴Bôbo Fɨyini ɨ bò ɨ̀dwaʼ ɨ̀ jɨ̀m,

ɨvzɨ̂ a wù n-kelɨ adyaʼ atu nɨ̀ ghelɨ Isìlæ̀ kæ sɨ nà sɨ bê na,

Samoʼ, mɨ n-fsɨ ngêŋ yem sɨ awu nɨ̀ mbàynɨ̀ semsɨ.

Mɨ n-sɨ̀sɨ̀ àwo kì a mbàynɨ̀ semsɨ nì sɨ̂ mà.

²⁵Mɨ n-dyèyn ìwo sɨ̂ zɨ̀.

Mɨ n-faytɨ̂ sû kɨ nô su ilɨŋ zɨ̀ a yi n-ghɨ a yi ɨwùyn.

Nô fɨ̀lêʼnɨ̀ fɨ ilɨŋfɨ nɨn faŋ wi a yi ɨwùyn.

²⁶Mɨ n-nì-à a ghelɨ ghɨ tisɨnɨ nɨ̀ zɨ̀ kasi nà saʼ kɨ ta ghelɨ ghì a ghɨ n-læ nà saʼ sɨ asɨ.

Ghelɨ ghì a ghɨ n-tebtɨ àŋena nɨn kasi-à nà felɨ̀ kɨ ta ghɨ n-læ nà felɨ̀ sɨ asɨ.

Sɨ ibàm ateyn a ghɨ kasi nà toŋtɨ̂ zɨ̀ na,

“Ntèʼ Ghelɨ Àtì-ati,

na, Ntèʼ ghelɨ ghì a ghɨ n-yvɨnɨ Fɨyini.”

²⁷Ghelɨ Zayòn læ̀ kasi nà chî nchînɨ̀ àtì-ati, a iwo ateyn i ni a Bôbo Fɨyini yuyn atu a àŋena.

Bôbo læ̀ bœ̂sɨ̀ nô mɨ ndà vzɨ̀ antêynɨ̀ nɨ̀ àŋena a wù kàsi sɨ a ibàm i mbɨ nà yvɨnɨ̂ ŋweyn,

²⁸mɨtì, ɨ̀ fu ngeʼ i bemnɨ sɨ̂ ɨghî a ghɨ n-to nɨ̀ àtu a, nî àwo a bɨ-a.

Wu nì mèsì kɨ mesɨ ɨghî a ghɨ leʼ kàsi sɨ a ŋweyn ibàm.

²⁹Zɨ̀ ghî a yi n-kaʼ tɨfam kôŋ kɨ sɨ nà koʼsɨ mɨyini mzɨ̀ a mɨ̀ n-ghɨ ateyn læ̀ wumi-à.

Zɨ̀ ghî a yì fèlɨ̀ gveynsɨ ɨ̀ nà ndû koʼsɨ̂ mɨyini ateyn læ̀ wumi-à.

³⁰Yì læ̀ nà koynsɨ̂ kêʼ kɨ ta fɨkâʼ fɨ ôksɨ ɨlvɨ ta tɨfvɨ tɨ ateyntɨ yàlà.

Yì læ̀ nà kêʼ kɨ ta gveyn ɨlvɨ ta yì fèlɨ̀ tòʼ chuè teyn.

³¹Ghelɨ ghɨ to ghì antêynɨ̀ nɨ̀ àŋena a ghɨ n-kelɨ adyaʼ læ̀ bola na dvɨytɨ̂ kɨ ta fɨsese fɨ ɨvɨ̀s,

a Bôbo li fɨ̀sese fɨ ɨvɨ̀s nâ fìfɨ̀ ɨ̀ kàsî nyòʼ àŋena nɨ̀ ɨ̀nfeynfɨ baʼsɨ̂ kɨ nɨ̀ àwo a bɨ-a kì a àŋena tî nà ni-à,

a nô dzɨ̀ na ghɨ wi sɨ lɨmsɨ.”