Isaiah 22

Saʼgha kûm ghelɨ Jèlusalèm

¹Ɨyêyn nɨn ghɨ saʼgha zɨ̀ a Fɨyini fɨ fu/tùm sɨ̂ mà kûm ghelɨ Jèlusalèm, ibal zɨ̀ a wu n-dyèyn awo ateyn (ta wù dyèyn) a jêm.

A n-gâyn ghà a ntèʼ afêyn a? Bòm ghà ta ghelɨ ghɨ̀ jɨ̀m nɨn leʼ koʼ kɨ ɨtu ndosɨ a?

²Ntèʼ î jɨ̀n nɨ̀n ghɨ ghelɨ shɨŋ kɨ shɨŋ, mɨ n-yeyn tɨ̀gvɨyn tɨ ghêl tɨ nyɨŋ kɨ ɨlwêʼ ɨ̀ jɨ̀m a ntèʼ afêyn a Fɨyini fɨ nɨn fèʼtɨ baynsɨ awo ateyn tèyn. Ghelɨ ateyn nɨn ghɨ bula ghɨ zuetɨ iwòŋ mɨtì ma à zuè jeŋ nɨ̀ tɨ̀koʼitɨ.

³Ghelɨ ghɨ tisɨnɨ nɨ̀ zɨ leʼnɨ meyn nô ghɨ̀ jɨ̀m. Àŋena lèʼnɨ bula ghɨ tɨm mɨ ìwoŋ na yi to ghaʼ̀ ghaʼ àŋena mɨtì ghelɨ ghɨ li na mômsɨ̀ sɨ leʼnɨ ghɨ boŋ ghaytɨ̂ kɨ ghaytɨ àŋena.

⁴À ti iwo zɨ̀ a mà bè na, “Visi mà dzɨ ghelɨ̀ ghem ghèyn a ghɨ n-zuetɨ àŋena têyn ma yeyna. Ka wùl nɨ̂n fì mòmsɨ̀ sɨ kfɨmtɨ ma.

⁵Ɨlvɨ wèyn nɨn ghɨ kɨ nô ɨ̀lvɨ ngeʼ, ghɨ tɨm meyn yɨ̀ ghesɨ̀nà. Ghesɨ̀na jɨŋ meyn a ntèʼ afêyn a ghɨ n-fêʼtɨ̀ baynsɨ awo ateyn tèyn. Ghesɨ̀na nɨn ghɨ a ngeʼ ma à nì Bôbo Fɨyini ɨ Bò Ɨ̀dwaʼ ɨ̀ Jɨ̀m. Ghɨ bɨytɨ meyn mbàyn ntèʼ nɨ̀ ghesɨ̀nà, ghelɨ na dzɨ̀ a kfɨynsɨ na ghɨ gamtɨ àŋena.

⁶Sugèyʼsɨ Elàmsɨ gvi meyn sɨ nu ghes nyɨŋ a mɨ̂nchaʼ mɨ̀ ìwòŋ a gufɨ̀ nyamsɨ kfaŋ. Àŋena gvì ma ghɨ beʼi meyn àwoŋ baʼ;sî nɨ̀ mɨ̀nchya. Ghelɨ/sugèyʼsɨ Kîlsɨ gvî nɨ̀ nkyàsɨ iwòŋ nɨ̀ àŋenasɨ gvɨ̂tɨ̀ sɨ tɨm iwoŋ.

⁷Gveyn sɨ jûŋsɨ̀ ibal i Judà nɨn ghɨ ma à luyn kɨ mɨ̀nchaʼ mɨ̀ ìwòŋ ateyn, sugèyʼ sìsɨ̀ a sɨ nyɨŋ nyamsɨ kfaŋ timi ɨchfɨ mbàyn (ɨ̀ kèʼ) Jèlusalèm.

⁸Sugèyʼ sɨ Judà sìsɨ̀ a sɨ tî nà ti asɨ iwòŋ ti meyn lèʼnɨ nô sɨ̀ jɨ̀m, yì nyɨŋ ndù lì ɨ̀fwo iwòŋ nɨ̀ zɨ̀ alèʼ ghè a ghɨ n-lêm ɨfwo iwòŋ ateyn.

⁹Yi ti meyn fàytɨ ki yeyn ɨlwêʼ vzɨ̀ a wù bɨytɨ̀ ɨwuyn mbàyn Jèlusalèm. Yì we mu achɨ̀m ghê a kɨ n-ghɨ abàs itsɨyn.

¹⁰Yi ti meyn tàŋtɨ/lì àkôyn a ndosɨ a Jèlusalèm, ɨ̀ bɨ̀ytɨ̀ ndo sɨ lisɨ (sɨ) lì ngòʼ sɨ ateyn ɨ̀ kàsi bàʼlɨ̀ ɨ̀lwêʼ vzɨ̀ a wu bɨ̀ytɨ̀ ɨwuyn mbàyn.

¹¹Yi tɨm meyn ìbɨ i mu a nfaynɨsɨ mbàynsɨ̀ afî sɨ̀ bò a sɨ jɨ̀ŋ kal Jèlusalèm, ta ka mû na fvɨ̂ ibɨ (i mu) afî a yi tî nà ghɨ afu sɨ asɨ, zɨ̂ ateyn. Mɨtì yi n-yvɨnɨ̂ wi (Fɨyini fìfɨ̀ a fɨ) wul ɨ vzɨ̀ a wù tî nì na alêʼ ateyna na ghɨ tì, yvɨnɨ̂ wì mɨ ɨvzɨ̂ a wù n-læ baʼtɨ kɨ nô ɨtuʼ ɨmu na alêʼ ateyna na ghɨ tì.

¹²Bôbo Fɨyini ɨ Bò Ɨ̀dwaʼ ɨ̀ jɨ̀m ɨ nà jâŋ zɨ̀ ɨtuʼ nâ ghè bê na, “Yì na dzɨ-à, yì na dzɨ̀ nô sɨ a ŋaŋ, yì kom ɨtu vzɨ ɨ̀ màʼ fɨ̀ntsɨ a yi ɨwùyn.

¹³Mɨtì yi nà kwo dyalɨ kɨ dyalɨ fî yɨ-a (yɨ ɨ̀wuyn vzɨ). Yi sɨ bzɨsɨ, sɨ nyamsɨ mbòloʼ kfɨla, nyvɨ mɨ̀lûʼ bê na, “Ghès na yɨ-a fî nyvɨ-a bòm ta ghèsɨ̀ kàʼ a ghɨ kfɨtɨ a libɨs.

¹⁴Bôbo Fɨyini ɨ Bò Ɨ̀dwaʼ ɨ̀ Jɨ̀m dyeyn meyn bàynsɨ ìwo sɨ ateyn ma bê na, “Mà læ̀ lêsɨ̀ fu wi zɨ bòm mbɨ nâ yèyn sɨ chem ta ka yì læ̂ kfɨ̀tɨ nô ghɨ̀ jɨ̀m. À bè mà Bôbo Fɨyini ɨ Bò Ɨ̀dwaʼ ɨ̀ Jɨ̀m.

¹⁵Ɨyêyn nɨn ghɨ ntum zɨ̀ a Bôbo Fɨyini ɨ Bò Ɨ̀dwaʼ ɨ̀ Jɨ̀m tùm ma nɨ̀ ɨ̀nyeyn. Wù bè na,

“Ndu Bɨf sɨ̂ Shebnà ɨ wul ɨ vzɨ̀ a wù n-tôʼnɨ nɨ̀ ɨ̀fwo a ntoʼ na,

¹⁶‘Wà n-kfâʼ na wà n-ghɨ nô ghà? A n-fu ndà adyaʼ sɨ̂ và na wà gvel isê ì zæ afêyn nà faytɨ̂ bâʼlɨ̀ àlêʼ a yvɨtɨnɨ-a nɨ̀ và iwu a kfɨyn afêyn a?’”

¹⁷“Wa tôʼnɨ̀-à, wà n-ghɨ kɨ nô wul kelɨ àdyaʼ/ɨngaŋtɨnɨ mɨtì Bôbo Fɨyini ɨ ghɨ sɨ (nì na adyaʼ à kya mæ) làŋ sɨ màʼi vâ.

¹⁸Wu nì lî và ta ghɨ lì (fɨ̀tè) bôl ɨ̀ làŋ màʼì ilaʼ yi ghaʼ kɨ tèyn a wa kfɨ kɨ̀ afu. Wà læ̀ kfɨ a ngùŋ mɨ̀nchaʼ mɨ̀ ìwoŋ nɨ̀ và mzɨ̀ a wà lì nà ghaŋsɨ̂ ɨ̀wuyn bòm ɨ̀mêyn. Wà læ̀ wumsɨ̂ bò ìfèl nɨ̀ và. (Wà læ̀ nà ghɨ ìwumsɨ sɨ̂ bò ìfèl nɨ̀ và)

¹⁹Bôbo Fɨyini læ̀ fsɨ ìfêl ateyni sɨ̂ và, ɨ̀ sùʼsɨ và sɨ alèʼ a ngaŋtɨnɨ-a nâ ghè.”

²⁰“Bôbo Fɨyini bè na, ‘À læ̀ nà ghɨ ɨtuʼ nâ ghè a mà tum jàŋ Elìyakìm ɨ wul ɨ felɨnɨ nɨ̀ mà. Elìyakìm nɨn ghɨ wâyn Hìlkayà. ^21Màlæ̀ mâʼ dàla zyâ a ŋweyn ɨwùyn, ɨ̀ kul awaf à kya atû ndzɨsɨ nɨ̀ ŋweyn, ɨ̀ fu adyaʼ ifèl nɨ̀ và sɨ̂ ŋweyn. Wù læ̀ nà ghɨ bæ̀ sɨ̂ ghelɨ ghì a ghɨ n-chi a Jèlusalèm, ghɨ bæ̀ sɨ̂ ghelɨ Judà nô ghɨ̀ jɨ̀m. ²²Mà læ̀ fu ànchoʼ ɨchfɨ ndo nɨ̀ fòyn Devìt sɨ̂ ŋweyn a ghɨ àlêʼ a ngaŋtɨnɨ-a a ntoʼ. Wù læ̀ nà dzɨsì ɨ̀chfɨ ndo, wùl ɨ nà kelɨ wi sɨ kɨ̀ŋ, wù kɨ̂ŋ ɨ̀chfɨ ndo, wùl ɨ nà kelɨ wi sɨ dzɨ̀sì. ²³Mà læ̀ lêm ŋweyn alèʼ a aghaŋ a ŋweyna na to kɨ ta ànkùm a ghɨ bayn a nse. Ghɨ læ̀ nà ngvɨmlɨ̂ ghelɨ isas i ndo nɨ̀ àŋena bòm ŋweyn. ²⁴Elìyakìm/wù læ̀ nà kelɨ àdɨli kɨ bem kɨ tèyn mɨtì ɨ̀ nì a ghɨ na ngvɨmlɨ̂ nô mɨ wul ɨ bol vzɨ̀ a wù n-ghɨ isas i ndo nɨ̀ àŋena.

²⁵Bôbo Fɨyini ɨ Bò Ɨ̀dwaʼ ɨ̀ jɨ̀m nɨn bê na, “À læ̀ nà ghɨ ɨtuʼ nâ ghè a fɨchoʼ fìfɨ̀ a ghɨ tî bayn fɨ na to kɨ tèyn alèʼ kɨ kelɨ mbôynɨ̀ læ̀ fu dzɨ a ghɨ kos a fɨ fe, a ɨtwo vzɨ̀ a wù tî nà ghaŋlɨ̂ ateyn teyntɨ. À bè mà Bôbo Fɨyini.