Isaiah 25
This book is a draft. It has been translated but has not yet finished checking, and is published here so the community can read and respond to it.
Yì koʼsɨ̂ Bôbo Fɨyini (njs̀ŋ ì kòʼsɨ
1Bôbo Fɨyini , wà n-ghɨ Fɨyini femfɨ, mà na ngvɨmlɨ̂ và, mà na koʼsɨ̂ ìzɨyn ìzæ. Wà nî meyn àwo a kaynɨ-a, wà nî meyn àwo kì a wà n-læ baʼtɨ nô ndyèyn, wà n-bê mɨ nà gha nî kɨ tì.
2Wà bebsɨ meyn ntèʼ sɨ ghaʼlɨnɨsɨ ɨ̀ nì sɨ na ghɨ kɨ ta ɨtwaʼ, wà bɨytɨ meyn mbàyn sìsɨ̀ a sɨ jɨ̀ŋ kal ntèʼ nâ sèynsɨ̀. Ntoʼ sɨ jûŋ sìsɨ̀ a ghelɨ ɨtum tî bàʼlɨ̀ a ntèʼsɨ nâ ghàyn koli meyn, nô wùl ɨ ghɨ wi sɨ kasi sɨ bàʼlɨ̀.
3Bòm tèyn, ghelɨ tɨ̂laʼ tɨ totɨ a mbzɨ læ̀ nà koʼsɨ̂ và, ghelɨ ntèʼ sɨ ghaʼlɨnɨ ghì a tɨlaʼ tɨ àŋena tɨ n-kelɨ mɨtem ɨm bɨ ɨ fâyn và.
4Mɨtì wà n-ghɨ àlêʼ a leytɨnɨ-a sɨ̂ ghelɨ ànfɨf, kɨ̂ŋtɨ̀ ghelɨ ghɨ jɨŋnɨ ɨlvɨ ta àŋena nɨn ghɨ a ngeʼ. Wà n-kɨ̂ŋtɨ̀ àŋena ɨlvɨ ta afyef ato-a nɨn chwô, chɨytɨ̂ àŋena ɨlvɨ ta chuè bayn to. Yi n-ghɨ tèyn bòm ta ghelɨ mɨ̂tèm ɨmbɨ̂ nɨn fu ngeʼ sɨ̂ àŋena kɨ̀ ta afyef ato a a kɨ n-gvî kfɨ̂yn ɨwuyn ndo,
5fu kɨ ngeʼ ta ɨlwêʼ ɨ lumnɨ a nse i yum. Wà chɨmsɨ meyn achfɨ̂ a ghelɨ ɨtum ghì a ghɨ n-ghaŋsɨ taŋi kɨ ta wà bàʼtɨ ɨ̀ nì sɨ kɨŋtɨ chue ta yì n-lûm/bayn. Wà ni meyn njàŋ sìsɨ̀ a àŋena ti nà yema ta ghɨ tɨm yɨ̀ ghelɨ/iwoŋ mæ.
6Bôbo Fɨyini ɨ Bò Ɨ̀dwaʼ ɨ̀ Jɨ̀m nɨn baʼtɨ̂ àyɨ a ghaʼnɨ-a a kfɨ̂yn Zayòn, kɨ̀ sɨ̂ ghelɨ tɨ̂laʼ tɨ̀ jɨ̀m a mbzɨ. À na ghɨ àyɨ ɨfwo ɨ yɨnɨ ɨ jûŋ ɨ ghɨ ateyn, ayɨ mɨ̀lùʼ ɨ̀n jùŋ ɨ ghɨ ateyn. Njwo ì jùŋ na ghɨ ateyn, ifomi ɨ ghɨ ɨvɨ̀ ateyn. Mɨ̀lùʼ ɨ̂n jùŋ mzɨ̀ a mɨ̀ n-jofɨ̀ gôʼsɨ̀ na ghɨ ayɨ nâ ghàyn.
7Wù læ̀ bebsɨ̂ nô mɨ ghà ta kɨ n-nî na ka ghelɨ tɨ̂laʼ tɨ̀ jɨ̀m na saŋlɨ̂ wì, ɨ̀ lìsì àbâs a ndzɨsɨ kì a kɨ chɨ̀ytɨ tɨlaʼ tɨ̀ jɨ̀m a mbzɨ atû kfɨ̀yn nâ ghàyn.
8Wù læ̀ bebsɨ̂ ìkfɨ kɨ̀ samoʼ. Bôbo Fɨyini ɨ Fɨyini fìfɨ̀ a fɨ n-saʼ mbzɨ ì jɨ̀m læ̀ yesɨ̀ mɨ̀sɨ sɨ asɨ nɨ̀ ghelɨ ghì a ghɨ n-dzɨ̂. Wù læ̀ lisì ìwumi sɨ atu nɨ̀ aghelɨ ŋweyn a mbzɨ nô ghɨ̀ jɨ̀m a mbzɨ. À bè Bôbo Fɨyini.
9À læ̀ nà ghɨ ta awo nâ kèynà nɨn gâyn, a ghelɨ na bê na, “Samoʼ à nì kɨ̀ nô Fɨyini feyfɨ awo kèynà. Ghèsɨ samsɨ meyn ŋweyn, wù bœ̂sɨ̀ ghès. À n-ghɨ Fɨyini fìfɨ̀ a ghès ti nà samsɨ kɨ ɨ̀nfeynfɨ (na fɨ bœsɨ ghes.) Ghesɨ̀nà na saŋlɨ-à fî dyala bòm ta fɨ bœsɨ meyn ghesɨ̀nà.
10Bôbo Fɨyini nɨn kɨ̂ŋtɨ̀ ghelɨ kfɨ̂yn Zayòn nɨ̀ àdyaʼ a bemnɨ-a nɨ̀ ŋweyna. Mɨtì ghɨ læ̀ jêylɨ̀ ghelɨ Mowàb kɨ̀ ta ghɨ jèylɨ̀ ɨ̀nfûʼ ɨnyûm alèʼ ghè a ghɨ/ibɨ ghè a ghɨ n-mâʼ ilɨŋ ateyn.
11Ghelɨ Mowàb læ̀ lâysɨ̀ àkœ/ɨ̀wu ibi afu kɨ̀ ta wùl nî wu làysɨ̀ ɨlvɨ ta wù n-sâm jva, nà jêm na Fɨyini fɨ gamtɨ àŋena. Mɨtì a Bôbo Fɨyini ni a ighaŋsɨ i ɨwùyn nɨ̀ àŋena i mæ, a nô mɨ àwo kì a àŋena nɨn faytɨ kya sɨ nì bòm ìtof i àŋena mæ.
12Bôbo Fɨyini læ̀ ni-à a ghɨ bɨytɨ mbàyn sìsɨ̀ a sɨ jɨ̀ŋ kal ntèʼsɨ a Mowàb. dyêblɨ̀ kɨ tèyn, a sɨ na nyɨŋ kɨ a nse. ghɨ læ̀ chyeʼsɨ̂ ɨ̀lwêʼ ateyn a wu na ghɨ kɨ ta abɨ̂l.