Isaiah 3
This book is a draft. It has been translated but has not yet finished checking, and is published here so the community can read and respond to it.
Bôbo Fɨyini nɨn saʼ ghelɨ Judà nɨ̀ ghelɨ Jèlusalèm
1Isayà nɨ̀n bê meyn sɨ̂ ghelɨ Judà na, “Yì na kya samoʼ na Bôbo Fɨyini ɨ Bôbo vzɨ nɨn kɨŋ lvɨ̂yn sɨ lìsi nô mɨ ghà ta kɨ gâmtɨ̀ ghelɨ Judà nɨ̀ ghelɨ Jèlusalèm. Wu n-nì-à a àŋena na kelɨ wi mu, kelɨ wi ɨfwo ɨ yɨnɨ.
2Wu n-lìsì ghelɨ ghɨ to/ngaŋtɨnɨ nɨ̀ zɨ̀ baʼsɨ̂ nɨ̀ sugèyʼ sɨ tosɨ, lìsì ghelɨ ghì a ghɨ n-saʼ fu nsaʼ sisɨ baʼsɨ̂ nɨ̀ nfèʼtɨ̀ sɨ ghaʼnɨsɨ. Mɨ n-lisì ghelɨ mɨ̂nyaʼ nɨ̀ zɨ̀ baʼsɨ̂ nɨ̀ chyeʼ sisɨ.
3Mɨ n-lìsɨ ɨtû sugèyʼsɨ̀ nɨ̀ zɨ̀ baʼsɨ̂ nɨ̀ ghelɨ ghɨ tisɨnɨ nɨ̀ zɨ̀ ghì a yi n-eʼtɨ ɨwuyn nɨ̀ àŋena, lìsì ghelɨ ghì a ghɨ n-tebtɨ zɨ baʼsɨ̂ nɨ̀ ghelɨ ghì a ghɨ n-faytɨ kya sɨ fèl ɨfwo nɨ̀ ɨ̀wu, lisì kɨ̀mɨ ghelɨ ghì a ghɨ n-fêʼtɨ̀ awo sɨ̂ zɨ̀ kɨ læ jæ gàyn.
4Mà læ̀ ni-à a woynda na ghɨ ghelɨ ghɨ tisɨnɨ nɨ̀ zɨ̀, nì a nkàyn woyn ghɨ bolɨ na ghɨ tɨ̀fôyn titɨ.
5Mà læ̀ ni-à a ghelɨ ghɨ li na yeʼtɨ̂ ghɨli, ghɨ̀lûmnɨ̀ ghɨli ɨ bâyn ghɨli, ghelɨ ghɨ li bâyn woynà àŋena, nì a woynda lali kèʼ ghɨ̀ lema, a ghelɨ ghɨ bolɨ lali kèʼ ghelɨ ghɨ to.
6À læ̀ nà ghɨ achi/ɨtuʼ nâ ghè, wùl ɨ lalì ghal kɨ wâynà ŋweyn bê na, “Wà n-kelɨàwaf, gvi wa ghɨ wul ɨ̀ tisɨnɨ nɨ̀ ghès ɨlvɨ ngeʼ afêyn.
7Mɨtì a beynsɨ bè na, “Mà kàʼ ma bû gàmtɨ̀ zɨ̀. Mɨ n-kelɨ wi afo, kelɨ wi mɨ ndzɨsɨ lisɨ a ndo. Ka yi n-lèm mà sɨ a wul ɨ tisɨnɨ nɨ̀ zɨ̀.”
8Samoʼ, ntèʼ Jèlusalèm nɨn ghɨ ngeʼ, Judà nɨn fêʼ meyn. Àŋena chasɨ meyn Bôbo Fɨyini awo ghè a àŋena nɨn nî nɨ̀ àwo kì a àŋena nɨn bê. Àŋena tê meyn Bôbo Fɨyini kɨ̀ nô a ndayn.
9Awo kì a àŋena nì nɨn dyêyn na àŋena nɨn ghɨ kɨ nô ghelɨ ghɨ bɨ.
10Ghelɨ ghì a ghɨ n-chi nchînɨ̀sɨ àtì-ati læ̀ nà saŋlɨ-à, nô mɨ ghà ɨ ghɨ kɨ a jûŋ sɨ̂ àŋena. Ghɨ læ̀ mâʼtɨ̀ àŋena bòm ìfêl i juŋì nɨ̀ àŋena.
11Mɨtì ghelɨ awo a bɨ-a nɨn ghɨ a ngeʼ, ghɨ mâʼtɨ̀ àŋena kɨ̀ ta ifêl i àŋena i nɨn dyêyn.
12Ngvaʼ wùl nɨn saʼ yeʼtɨ̂ ghelɨ̀ ghem, ghɨ̀ki saʼ àŋena. Ghelɨ̀ ghem, ghelɨ ghɨ tisɨnɨ nɨ̀ zɨ̀ nɨn jɨ̂ŋsɨ̀ zɨ̀. Àŋena nî meyn yi na jelɨ̀ a dzɨ sɨ bɨsɨ.
13Bôbo Fɨyini timi meyn a ŋweyn alèʼ, alèʼ ghè a ghɨ nsaʼ nsaʼsɨ ateyn. Wù tìmi sɨ saʼ ghelɨ ateyn.
14Bôbo Fɨyini nɨn kelɨ nsaʼ ŋêyn chyeʼsɨ Isìlæ̀sɨ̀ baʼsɨ̂ nɨ̀ ghelɨ ghɨ tisɨnɨ ghì a ghɨ n-tisɨ ghelɨ ŋweyn. Wù n-ghâm àŋena bê na, “Yi bebsɨ meyn Isìlæ̀ ɨ (gvêyn gɨ̀lêbsɨ̀ nɨ̀ mà) ghelɨ̀ ghem. Yi luynsɨ meyn ndô sisɨ nɨ̀ ɨ̀fwo ma yì (choŋ) ghal fsɨtɨ sɨ̂ ghelɨ ànfɨf.”
15Bòm ghà ta yi n-fu ngeʼ sɨ̂ ghelɨ̀ ghem a? Bòm ghà ta yi n-chyeʼsɨ akêʼ a ghelɨ ànfɨf a nse a? À n-bê mà Bôbo Fɨyini ɨ bò ɨ̀dwaʼ ɨ̀ jɨ̀m.
Nfàsì nfàsì sɨ̂ ghɨ̀ki Jèlusalèm/Zayòn
16Bôbo Fɨyini nɨn bê na, “Ghɨ̀ki Jèlusalèm/Zayòn nɨn ghaŋsɨ̂ ɨ̀wuyn. Àŋena nɨn se sɨ jèl, ghɨ njesɨ àkêʼ iyvɨ, ɨ nà bôlɨ̀ ki kɨ ɨ̀lwêʼ. Àŋena se sɨ jèl ghɨ na tom kɨ sijya sijya ni-à nchaʼ sìsɨ̀/sɨ nyotɨnɨ sìsɨ̀ a ghɨ wê afeyn ɨ kumà.
17Mɨtì Bôbo Fɨyini nɨn ni-à a idzɨ ì ku ɨtu ghɨ̂ki Jèlusalèm. Bôbo Fɨyini nɨn nì-à a ɨtû àŋena kos.”
18Achi a/ɨlvɨ nɨn kfeyna, a Bôbo Fɨyini ni a ɨfwo nâ vzɨ̀ nô ɨ̀ jɨ̀m a àŋena nɨn nyôtɨ̀ ɨwuyn ateyn sɨ nà jofà mæ, ɨ nchaʼ sìsɨ̀ a àŋena nɨn wê afyeyn nɨ̀ ɨ̀byâs ɨfwo vzɨ̀ a àŋena kùl ɨtu baʼsɨ̂ nɨ̀ tɨ̀fwo tìtɨ̀ a àŋena nɨn we amzɨ̀, 19kɨ̀mɨ nɨ̀ nchaʼ sìsɨ̀ a àŋena nɨ we akœ. Wu læ̀ fsɨtɨ̂ mɨ̀yèli mɨ̀ àŋena, ɨ̀ fsɨ̀tɨ kɨ̀mɨ ɨ̀byâs ɨfwo vzɨ̀ a àŋena nɨn chɨytɨ akêʼ ateyn. 20Bôbo Fɨyini læ̀ fsɨtɨ̂ ndzɨ sìsɨ̀ a àŋena nɨn kul ɨtu ateyn, nɨ̀ nchaʼsɨ nyotɨnɨ sìsɨ̀ a àŋena nɨn we afyeyn nɨ̀ ɨ̀waf àŋena, fsɨ̀tɨ kɨ̀mɨ ncheŋsɨ mɨ̂yìsi ɨ̀nlɨmtɨnɨ̂ nɨ̀ àŋena baʼsɨ̂ nɨ̀ mɨ̀fvɨ ɨm bɨ̂ nɨ̀ àŋena. 21Wù læ̀ fsɨtɨ̂ mɨ̀nchaʼ mɨ̀ ɨ̀wu nɨ̀ àŋena, ɨ̀ fsɨ̀tɨ kɨ̀mɨ mɨ̀nchaʼ mzɨ̀ a àŋen nɨn we ɨzue, 22ɨ̀ fsɨ̀tɨ ndzɨsɨ jûŋsɨ̀ nɨ̀ àŋena kɨ̀mɨ nɨ̀ dàlasɨ baʼsɨ̂ nɨ̀ ɨ̀fwo vzɨ̀ a àŋena màʼ atû ndzɨsɨ wu na ghaŋlɨ̂ kalì ibàm, kɨ̀mɨ nɨ̀ ɨ̀wafɨ baʼsɨ̂ nɨ̀ mɨ̀bò mɨ̀ ɨ̀kwo nɨ̀ àŋena. 23Wù læ̀ fsɨtɨ̂ ɨ̀nki vzɨ̀ a àŋena nɨn ki ɨwuyn/akêʼ ateyn, fsɨ dàla sɨ fɨfɨnɨsɨ nɨ̀ àŋena, kɨ̀mɨ nɨ̀ ɨ̀fwo vzɨ̀ a àŋena nɨn nyôtɨ̀ ɨtu àŋena ateyn baʼsɨ̂ nɨ̀ ndzɨ sìsɨ̀ a àŋena nɨn chɨytɨ ɨtu àŋena ateyn sɨ chɨytɨ̂ kɨmɨ àwom a àŋena.
24Ghɨ̀ki Jèlusalèm læ̀ nà kwo lɨ̂mtɨ̀ befɨ kɨ tèyn, mɨ̀yìsi ɨ̀n jùŋ ɨ lɨ̂mtɨ̀ wì a àŋena ɨwùyn. Àŋena læ̀ nà kwo wôbtɨ/mâʼ nkfɨ̀sɨ ɨwùyn a ghɨ wi ɨwaf. Àŋena læ̀ nà kwo kelɨ ɨ̀tu ɨ kosɨnɨ a ghɨ wi nyuŋsɨ atu sɨ jûŋsɨ̀. Wu læ̀ nà kwo mâʼ fɨ̀ntsɨ a ghɨ wi dàla sɨ jûŋsɨ̀. Iwumi i læ̀ kwo lî àlêʼ ijòf nɨ̀ ŋweyn.
25Ghɨ læ̀ zuetɨ̂ ghɨ̀lûmnɨ ntèʼ Jèlusalèm nɨ̀ mɨ̀nyuè, zuètɨ sugèyʼ sɨ tosɨ nɨ̀ àŋena iwòŋ.
26Ghɨ læ̀ dzɨ̂ àŋena ɨchfɨ mbàyn ntèʼ, ntèʼ Jèllusalèm læ̀ dzɨ̂ àŋena ta wul ɨ wi a wù chòʼtɨ ndzɨsɨ, dùʼì a nse nɨ̀ ìsas i yumi.