Isaiah 31
This book is a draft. It has been translated but has not yet finished checking, and is published here so the community can read and respond to it.
Ngeʼ nɨn ghɨ sɨ̂ ghelɨ ghì a ghɨ n-yeʼtɨ ɨwuyn nɨ̀ ghelɨ Ijìb
1Ngeʼ ighaʼnɨ nɨn ghɨ sɨ̂ ghelɨ ghì a ghɨ ndû sɨ̂ ghelɨ Ijìb na ghɨ gamtɨ àŋena. Àŋena nɨn yeʼtɨ̂ a nyamsɨ kfaŋ nɨ̀ ghelɨ Ijìb, yeʼtɨ̂ a mɨ̂nchaʼ mɨ̀ ìwòŋ nɨ̀ ghelɨ Ijìb bòm ta ghelɨ Ijìb nɨn kelɨ mɨ̀nchaʼ mɨ̀ ìwòŋ kɨ̀ sɨ idvɨ̀. Àŋena nɨn yeʼtɨ̂ kɨmɨ adyaʼ a bemnɨ-a nɨ̀ ghelɨ Ij̀b, yeʼtɨ̂ adyaʼ nɨ̀ ghelɨ ghɨ tonɨ ghì a ghɨ n-nyɨŋ nyamsɨ kfaŋ mɨtì àŋena nɨn samsɨ̂ wì Bôbo Fɨyini, yeʼtɨ̂ wì ɨwuyn nɨ̀ Fɨyini fɨ laynɨfɨ nɨ̀ ghelɨ Isìlæ̀.
2Bôbo Fɨyini nɨ̀n tofɨ nô a jûŋ, a nî ŋweyn na ngeʼ na kolî ghelɨ. Wù n-bê mɨ na gha, nî kɨ tì. Wù n-fu ngeʼ sɨ̂ ghelɨ ghì a ghɨ n-nî awo a bɨ-a fu kɨmɨ sɨ̂ ghelɨ ghì a ghɨ n-gâmtɨ àŋena.
3Ghelɨ Ijìb nɨn ghɨ wi Fɨyini, àŋena nɨn ghɨ kɨ wul ɨ̀ mɨ̀sòŋ. Nyamsɨ kfaŋ nɨ̀ àŋenasɨ nɨn ghɨ kɨ nyamsɨ a ghɨ mɨyini/ayvɨs. A læ̀/nì nà ghɨ Bôbo Fɨyini nɨn fu ngeʼ sɨ̂ àŋena, a ghelɨ ghì a ghɨ tî nà gâmtɨ àŋena fe a nô mɨ ghelɨ ghì a ghɨ tî nà kɨŋ na ghɨ gamtɨ àŋena boŋ fe. Ghɨ læ̀ bebsɨ̂ kɨ àŋena ghɨ̀ jɨ̀m.
4Bôbo Fɨyini nɨn fi meyn bè sɨ̂ mà (Isayà) na, “Ta woyn bzɨ̀nkem nɨn tôʼnɨ̀ ɨ̀ nì wu na dɨ̂mlɨ̀-à ti atu àkfɨ a nyâm ta yì ku/zue, fâyn wì afo, nô mɨ ɨlvɨ ta inôyn i nchì sɨ bzɨsɨ gvì nà byatɨ̂ afu nô sɨ a ŋaŋ. À ti kɨ̀ ta Bôbo Fɨyini ɨ bò ɨ̀dwaʼ ɨ̀ jɨ̀m læ̀ suʼi gvî sɨ tɨm iwoŋ a kfɨ̂yn Zayòn.
5Bôbo Fɨyini ɨ Bò Ɨ̀dwaʼ ɨ̀ Jɨ̀m ɨ nì ni-à a ghelɨ Jèlusalèm na chî nɨ̀ mbôynɨ̀. Wù na tàynɨ̀ nɨ̀ àŋena kɨ̀ ta fɨnyuynfɨ nî fɨ nà tâyn chwô atû ndo nɨ̀ ɨ̀nfeynfɨ kɨ̂ŋtɨ̀ woyn ŋweyn. Wu nì/læ̀ toynɨ̂ a ntèʼ afu ɨ̀ bœ̀sɨ̀ ghelɨ ntèʼ nâ ghì.
6Ghelɨ Isìlæ̀, yi to meyn chwòsɨ̀ nɨ̀ àtu-a sɨ̂ Bôbo Fɨyini. Yì beynlɨ sɨ a yi a mbzɨsɨ kàsi gvì sɨ̂ mà. 7Ɨlvɨ nɨn koʼ gvi-à ta ka nô zɨ̀ ghɨ̀ jɨ̀m maʼi mɨyini mzì a yì fàytɨ nɨ̀ àso ɨkwo a baŋnɨ-a baʼsɨ̂ nɨ̀ ɨ̀nfyèʼsɨ̀ vzɨ̂ a yì fàytɨ nɨ̀ àso ɨkwo a fɨfâ nà nî mbɨ bòm ɨ̀ŋweyn.
8Ghelɨ Asilìyà læ̀ kfɨtɨ̂ iwòŋ bula à zue wul ɨ̀ mɨ̀sòŋ. Àŋena læ̀ leʼ ɨchfɨ iwòŋ, mɨtì a ghɨ ghaytɨ woyn ghɨ lûmnɨ̀ nɨ̀ àŋena, a ghɨ na felɨ̀ àkôs.
9Sugèyʼ sɨ tosɨ nɨ̀ ghelɨ Asilìya læ̀ fâyn nô sɨ a ŋaŋ ɨ̀ leʼ sɨ a asɨ iwòŋ. Ɨtû sugèyʼsɨ̀ nɨ̀ àŋena læ̀ yeyn ndzɨ ìwòŋ nɨ̀ Bôbo Fɨyini (ta ghɨ làysɨ̀ iyvɨ, nà chɨŋtɨ̂ faynà. À bè Bôbo Fɨyini vzɨ̀ a ɨvɨsɨ ŋweyn nɨn bali a Zayòn, ilemi ɨvɨ̀s nɨ̀ ŋweyni ɨ fvɨ̂ koʼ a Jèlusalèm.