Isaiah 37

Fòyn Hèzèkayà ɨ loyn igâmtɨ̀ sɨ̂ nfèʼtɨ̀ Isayà.

¹À nà n-ghɨ ta fòyn Hèzèkayà yvɨ awo kì a atu a sugèyʼsɨ̀ nɨ̀ ghelɨ Silìyà bè, wu bàytɨ̀ ndzɨsɨ ŋweyn ɨ màʼ fɨ̀ntsɨ ɨ ndù a ndo nɨ̀ Bôbo Fɨyini. ²Wù n-tum meyn Elìyakìm ta wu nà n-tisɨ awo a ntoʼ nɨ̀ Shebnà ɨ wul ɨ̀ nyaʼnɨ nɨ̀ ngàŋ ndô Fɨyini i lema/ngaŋtɨnɨ ma àŋena màʼ kɨ fɨ̀ntsɨ na àŋena ndu yeyn nfèʼtɨ̀ Isayà ɨ wâyn Amòz. ³Àŋena ndù ɨ bè sɨ̂ ŋweyn na fòyn Hèzèkayà bè na, “Layn nɨn ghɨ àchi a ngeʼ, achi a wuminɨ-a, achi ɨlvɨ ta ɨlvɨ kfeyn na ghɨ bzɨ wayn, nà àteyn na kelɨ wi adyaʼ sɨ tsɨyn. ⁴Mɨ n-jêm na Bôbo Fɨyini ɨ Fɨyini fɨ ghesɨ̀nà yvɨ ndi sèynsɨ̀ a fòyn Asilìyà tùm na atu a sugèyʼsɨ̀ nɨ̀ ŋweyn a gvi tèlɨ Fɨyini fìfɨ̀ a fɨ n-chi, jêm na Bôbo Fɨyini fu ngeʼ sɨ̂ ŋweyn bòm àwo kì a wù bè. Mɨ n-chwotɨ̂ na wà jem sɨ̂ ghèsɨ̀ ghì a ghɨ faŋ.

⁵À nà n-ghɨ ta ghelɨ ntum nɨ̀ fòyn Hèzèkayà ndù fèʼtɨ̀ iwo zɨ̀ sɨ̂ nfèʼtɨ̀ Isayà a fòyn bè, ⁶wu bè na àŋena ndu bè sɨ̂ bò ìfèl nɨ̀ àŋena na Bôbo Fɨyini bè na, “Ka wa n-fàyn bòm ndi sìsɨ̀ a ghelɨ ghɨ felɨnɨ nɨ̀ fòyn Asilìyà gvì tèlɨ ma nɨ̀ ɨ̀nseynsɨ. ⁷Yvɨtɨ/iwo zɨ̀ a ka mà be. Mɨ n-ni-à a fòn Asilìyà yvɨ saʼhà a yì ni a wù kasi kfa sɨ a ŋweyn ilaʼ a ghɨ zue ŋweyn iwòŋ afu.”

⁸A nà ghɨ ta atu a sugèyʼsɨ̀ nɨ̀ ghelɨ Àsilìyà kàsi yvɨ̀ na fòyn Asilìya kasi meyn lù sɨ a Lakìsh, wu kasi ɨ ndù ɨ yeyn fòyn wu nù ntèʼ Libnà.

⁹Sènàchelèb ɨ fòyn Asilìyà ɨ yvɨ na Tilkà ma à ti ɨ fòyn Kûsh nɨn gvî sɨ nu ŋweyn ɨ fi tum ghelɨ ntèʼ nɨ̀ ŋweyn sɨ̂ Hèzèkayà ɨ bè na, ¹⁰“Yì ndu bè sɨ̂ Hèzèkayà ɨ fòyn Judà na, ‘Ka wa n-vìsi fɨyini fìfɨ̀ a wà n-yeʼtɨ ateyn tì lɨsɨ vâ ɨlvɨ ta fɨ n-bê na fòyn Asilìyà nɨn tɨm yɨ wi Jèlusalèm.” ¹¹Samoʼ wà yvɨ meyn àwo kì nô à jɨ̀m a tɨfôyn tɨ Asilìyàtɨ̀ nì sɨ̂ tɨ̀laʼ tɨ litɨ ɨ̀ bèbsɨ tɨ̀laʼ tɨ ateyntɨ nô tɨ̀ jɨ̀m. Ka wà na kfâʼtɨ̀ na fɨyini fyafɨ nɨn gàmtɨ̀ và. ¹²Mɨyini mɨ̀ tɨ̀laʼ tìtɨ̀ a ghɨ̀bo ghem nɨn læ bebsɨ nɨn bu læ gàmtɨ tɨlaʼ tɨ ateyn. À nà n-ghɨ mɨyini mɨ̀ Gozàn nɨ̀ ɨmzɨ̂ Halàn nɨ̀ ɨmzɨ̂ ghelɨ Edìn ghì a ghɨ nà n-chi a Tel Asà. ¹³Fòyn Hamàt nɨ̀ fòyn Alfàd bà? Fòyn Layì nɨ̀ fòyn Sèfàvayìm nɨ̀ fòyn Henà baʼsɨ̂ nɨ̀ ɨwû Ivà bà?

Hèzèkayà ɨ jèm

¹⁴Fòyn Hèzèkayà nɨ̀n læ fsɨ ŋwàʼlɨ̀ zɨ̀ sɨ̂ ghelɨ ntum ghì a fòyn Asilìyà tum, ɨ jàŋ ŋwàʼlɨ̀ àteyn ɨ lu koʼ ndù a ndô Fɨyini ɨ yàs ɨ lèm ŋwàʼlɨ̀ àteyn asɨ nɨ̀ Bôbo Fɨyini. ¹⁵Wu n-lèm tî ɨ jèm sɨ̂ Bôbo Fɨyini bê na, ¹⁶“Bôbo Fɨyini ɨ Bò ɨ̀dwaʼ ɨ̀ jɨ̀m, ɨ Fɨyini fɨ Isìlæ̀, wà n-duʼ achɨ a tɨ̂fòyn nɨ̀ và antêynɨ̀ nɨ̀ Chelùbsɨ̀ atû àntàyntayn a mɨ̂ kàyn. À n-ghɨ kɨ va Fɨyini atu nɨ̀ tɨ̀laʼ tɨ̀ jɨ̀m a mbzɨ, ma à fàytɨ và iyvɨ nɨ̀ nse. ¹⁷Yeyn awo kì a kɨ n-gâyn sɨ̂ ghès a Bôbo Fɨyini. Yvɨ ndi sìsɨ̀ a Sènàchelìb tùm na ghɨ gvi tèlɨ và ɨ Fɨyini fìfɨ̀ a fɨ n-chi nɨ̀ ɨ̀nseynsɨ-a.

¹⁸Yi n-ghɨ samoʼ a Bôbo na tɨfôyn tɨ Asilìyàtɨ zuetɨ meyn ghelɨ tɨlaʼ ghèyn ɨ̀ bèbsɨ tɨ̀laʼ tɨ ateyn. ¹⁹Tɨfôyn nâ tèyntɨ nyoʼ meyn bèbsɨ ɨ̀nfyèʼsɨ̀ ɨ tɔlaʼ nâ tèyntɨ̀ bòm ta ɨfwo nâ wèyn nà n-ghɨ ma à fàytɨ ghelɨ nɨ̀ ɨ̀nkàʼ ɨ̀ fàytɨ kɨ̀mɨ nɨ̀ ngòʼsɨ̀. ²⁰Bôbo Fɨyini feyfɨ, fvɨ̀sɨ læ̂ ghès lvɨ̂yn sɨ awu nɨ̀ fòyn Asilìyà ta ka tɨlaʼ tɨ̀ jɨ̀m a mbzɨ keli na à n-ghɨ kɨ và Bôbo Fɨyini, ghɨ Fɨyini.

Bôbo Fɨyini ɨ yvɨ/bèynsɨ̀ ìjêm i Hèzèkayà

²¹Nfèʼtɨ̀ Isayà ɨ wâyn Amòz nɨn tum meyn ntum sɨ̂ fòyn Hèzèkayà ɨ bè na, “Bôbo Fɨyini ɨ Fɨyini fɨ Isìlæ̀fɨ̀ bè na, ma yvɨ meyn ìjêm ì zæ kûm Sènàchelìb ɨ fòyn Silìyà. ²²À ti iwo zɨ̀/À n-ghɨ ìwo zɨ̀ a Bôbo Fɨyini bè kûm ŋweyn tèyn. ²³Wà n-telɨ̂ ndà bê àwo a bɨ-a kûm ŋweyn a? Wà n-byal sɨ̂ ndà? Wà n-ki ndà ikèʼa a? Wà n-taŋî sɨ̂ Fɨyini fɨ laynɨfɨ nɨ̀ ghelɨ Isìlæ̀fɨ̀.

²⁴Wà tum meyn ghelɨ ghi gvî tèlɨ Bôbo Fɨyini. Wà be meyn na, “Mɨ n-kelɨ mɨ̀nchaʼ mɨ̀ ìwòŋ mɨ dvɨ̂ kɨ tèyn. Ma koʼ meyn chèm a kfɨynsɨ, ma koʼ meyn chèm nô a fɨ̂nchoynchoyn fɨ kfɨ̂yn Lebanòn. Ma gvelɨ meyn ɨ̀nkâʼ mɨ̀ Lebanòn mzɨ̀ a mɨ̀ n-dyêblɨ̀ chwô ɨ̂n lì ghɨ jâŋ na ɨnkâʼ mɨ̀ Sedà. Ma gveytɨ meyn ɨ̀gùm ɨ jûŋ. Ma ndu meyn chèm a ngòʼsɨ akù a Lebanòn, akù afî a ɨ̀nkàʼ ɨ̀n jùŋ nɨ̀n ghɨ ateyn.

²⁵Ma tɨm meyn tɨ̀bɨ tɨ mu a tɨlaʼ tɨ atum, ɨ̀ nyvɨ̀ mu mɨ̀ àteyn. Mà tî nà kelɨ sugèyʼsɨ̀ sɨ nyɨŋ ta ngumisɨ, sɨ zɨ̂ se sɨ dyàŋ a jvasɨ ijìb, ɨvɨ àŋena yumsɨ mu nô ɨ̀n jɨ̀m.”

²⁶Samoʼ wà yvɨ meyn na mɨ n-læ baʼtɨ iwo nâ yèynì nò sɨ a ndyèyn. Mɨ n-læ baʼtɨ iwo ateyn nô sɨ ɨtuʼ mu. Ma nî meyn lvɨ̂yn yi gâyn. Wà bɨytɨ meyn ntèʼsɨ ghaʼlɨnɨ sìsɨ̀ a ghɨ n-bàʼlɨ mbàyn ɨ jɨŋ kali, à faŋ kɨ̀ mɨchɨ mɨ̀ ndosɨ/à na sɨ ti kɨ tɨ̀kuʼ tɨ ngòʼsɨ̀.

²⁷Àŋena bu tî nà fî kelɨ àdyaʼ, ɨ̀ nà sɨ faynà, fî wumi-à. Àŋena sɨ ghɨ ta ɨnfûʼ ɨtwaʼ. Àŋena nɨn ghɨ ta afûʼ a bola, ta afûʼ a kɨ fvɨ̀ atû ndo ɨ̀ se sɨ koʼ chuè nyôʼ kɨ kfɨ.

²⁸Mɨtì mɨ n-kya àlêʼ kì a wà n-chi/ghɨ ateyn, kya ɨ̀lvɨ vzɨ̀ a wà n-seʼ ateyn nɨ̀ ɨ̀lvɨ vzɨ̀ a wà n-kfa, kya àwo kì a wà n-bê kûm mà nɨ̀ ɨ̀toŋ ɨ yafɨnɨ.

²⁹Mɨ n-wê fɨ̀nchaʼ femfɨ a wa azue, ɨ̀ we fɨ̀nchaʼ a wa ɨchfɨ̀ nà gûbtɨ̀ và ateyn, ɨ̀ nì a wà kasi ɨ̀ ndù kɨ̀ a dzɨ ghê a wà tî gvì.

³⁰Nfèʼtɨ̀ Ìsayà nɨn taŋi tî ɨ bè sɨ̂ fòyn na Hèzekayà na, “Ɨyêyn nɨn ghɨ nchwæ sɨ dyeyn sɨ̂ và na Bôbo Fɨyini nɨn taŋî kɨ samoʼ. À na ghɨ a bêŋ afêyn, a wà yɨ ɨfwo ɨ yɨnɨ bula wà fêl, a à na ghɨ a ànkùmtɨì a bêŋ, a wà yɨ ɨ̀nchwò ateyn.

³¹Ghelɨ ghì a ghɨ n-faŋ a Judà nɨn lemâ ɨ̀ bzɨ woyn kɨ̀ ta aghaŋ ɨnkàʼà ni kɨ to a nse mɨ lemâ ɨ̀ kòla mɨ̀tam.

³²Ghelɨ ghɨ li nɨn faŋ a Jèlusalèm, a anôyn a ghelà faŋ a kfɨ̂yn Zayòn. Bôbo Fɨyini ɨ nì nô ìwo ateyn bòm ìkôŋ i ŋweyn.

³³Iyeynì nɨn ghɨ/à ti iwo zɨ̀ a Bôbo Fɨyini bè kûm fòyn Asilìyà. Wù læ̀ bu zɨ̂ wì a ntèʼt afêyn, kèsa sɨ tɨm nô mɨ ìwoŋ na yi zɨ chèm ateyn. Wà læ̀ bu gvî wì a ntèʼ nâ ghàyn nɨ̀ nkyà ìwoŋ, ɨ̀ læ̀ faŋ tɨ̀ gèmtɨ̀ sɨ kal nɨ̀ ntèʼ àteyn.

³⁴Fòyn Silìyà læ̀ kasî kfâ kɨ a dzɨ ghê a wù tî gvì ateyn. Wù læ̀ bu zɨ̂ wì a ntèʼ afêyn.

³⁵Mɨ n-nì kɨ̂ŋtɨ̀ ntèʼ yèyn ɨ̀ bœ̀sɨ̀ ntèʼ àteyn bòm wul ɨ vzɨ̀ a mɨ n-ghɨ ɨ̀ŋweyn ɨ̀ bœ̀sɨ̀ bòm Devìt ɨ wul ɨ̀ felɨnɨ nɨ̀ mà.

³⁶Nchì Bôbo Fɨyini ɨ ni kfa ɨ ndu zuetɨ ghelɨ nkam ɨvɨ nɨ̀ ghelɨ nkamsɨ mɨ̀vɨm nfama njvàsɨ̀ tâyn alèʼ ghè a ghelɨ Asilìyà bɨ̀ ateyn. Ghelɨ ghì a ghɨ faŋ ɨ bɨs ɨ làlì ɨ yeyn tɨgvɨyn tɨ ghêl kɨ̀ ɨlwêʼ ɨ̀ jɨ̀m. ³⁷Sènàchelìb ɨ fòyn Asilìyà ɨ yeyn tî ɨ leʼ lù sɨ alèʼ ghè a àŋena bɨ̀ ateyn ɨ kasi ndù ɨ nà chî a Ninevè.

³⁸A læ nà ghɨ achi a li-a wu koʼsɨ̂ Nislòk ɨ fɨyini fɨ ŋweyn a ndo nɨ̀ ɨ̀nfeynfɨ, woyn ghɨ lûmnɨ̀ nɨ̀ ŋweyn ghɨ̀ bò ɨ Adlamelèk ŋêyn Shàlezà ɨ zue ŋweyn ɨ leʼ ndù ilaʼ i Alàt, Esahadòn ɨ wâyn ŋweyn ɨ lûmnɨ̀ ɨ̀lvɨ̀ ɨ koʼ ɨfôyn.