Isaiah 5

Njàŋ kûm gvêyn (gɨ̀lêbɨ̀ nɨ̀) Bôbo Fɨyini

¹Mɨ n-yem njàŋ lvɨ̂yn sɨ koʼsɨ ɨvzɨ̂ a mɨ n-kôŋ. Mɨ n-yem njàŋ kûm gvêyn gɨ̀lêbsɨ̀ nɨ̀ ŋweyn, ɨvzɨ̂ a mɨ n-kôŋ nɨn kelɨ gvêyn gɨ̀lêbsɨ̀ yi ghɨ a kfɨyn, alèʼ ɨfwo ɨ yɨnɨ koʼ ateyn.

²Wù n-felɨ̀ gveyn àteyn, wu kumtɨ lìsì ngòʼsɨ̀ sɨ ateyn, ɨ tòʼ gɨ̀lêb sɨ jûŋsɨ̀ ateyn. Wù tôʼ, wu bàʼlɨ̀ àbaŋ a nchì antêynɨ̀ gvèyn, ɨ tɨm ibɨ zɨ̀ a ka ghɨ na kam gɨ̀lêbsɨ̀/mɨ̀lûʼ ateyn. Wù nî wu nà chîtɨ̀ kɨ bèŋ sɨ̀ jɨ̀m sɨ kœ gɨ̀lêb sɨ bɨsɨ ateyn.

³Bôbo Fɨyini nɨ̀n bê na, “Zɨ̀ ghî a ghɨ n-chi a Jèlusalèm nɨ̀ zɨ̀ ghî a yi n-chî a Judà. Yì feœɨ na à nì mà iwo i bzɨ-i ma gvêyn gɨ̀lêbsɨ nɨ̀ mà a?

⁴Mɨ nà n-kaʼ a mà fî nì ghà nɨ̀ gvêyn gɨ̀lêbsɨ nɨ̀ mà sɨ chwo izɨ-ì a mà sɨ ghɨ ma ma nî meyn a? Bòm ghà ta gvêyn gɨ̀lêbsɨ nɨ̀ mà nɨn kola kɨ gɨ̀lêbsɨ bɨsɨ/luenɨsɨ ma mà ti nà chîtɨ̀/ki gɨ̀lêb sɨ jûŋsɨ̀ a?

⁵Gvêyn gɨ̀lêbsɨ nɨ̀ mà nɨn ghɨ (ghelɨ) Judà. Mɨ n-fèʼtɨ̀ ìwo zɨ̀ sɨ̂ zɨ̀ lvɨ̂yn a mɨ n-kɨŋ sɨ nì sɨ̂ àŋena. Mɨ n-nì-à/n-teyntɨ̂ lisì mɨ̀têʼ mzɨ̀ a mɨ̀ n-kɨŋtɨ àŋena, ɨ̀ bèbsɨ/fù ngeʼ sɨ̂ àŋena. Mɨ n-nì-à a ghɨ bɨytɨ mbàyn zɨ̀ a yì jɨ̀ŋ kal ilaʼ i àŋena, ɨ̀ vìsi a nyamsɨ ɨtwaʼsɨ zɨ bèbsɨ gveyn àteyn.

⁶Mà læ̀ ni-à a ɨtwaʼ ɨtwo koʼ a gvêyn nâ ghàyn. Mà læ̀ bu kâŋ/faytɨ̂ wi gɨ̀lêb sɨ ateyn felɨ̀ mɨ felɨ. Mà læ̀ visi-à a afûʼ a bɨ-a nɨ̀ sùnjoŋnjoŋsɨ koʼ a gvêyn nâ ghàyn, ɨ̀ kàyn na ka mbàʼsɨ̀ fî sùʼsɨ ìvɨ ateyn.

⁷Ghelɨ Isìlæ̀ nɨn ghɨ gvêyn gɨ̀lêbsɨ nɨ̀ Bôbo Fɨyini, ɨ bò ɨ̀dwaʼ ɨ̀ jɨ̀m. Ghelɨ Judà ɨ ghɨ ta gvêyn mbàs zɨ̀ a wù n-kôŋ nò sɨ a ŋaŋ. Wù n-kɨŋ na àŋena na nî àwo a juŋà mɨtì àŋena zuetɨ̂ kɨ ghelɨ, kɨŋ na àŋena na nî àwo kì a kɨ n-ghɨ àtì-ati mɨtì yeyna àŋena yeʼtɨ̂ kɨ yeʼtɨ ghelɨ.

Fɨyini fɨ nɨn fu ngeʼ sɨ̂ ghelɨ Judà.

⁸Ngeʼ nɨn ghɨ sɨ̂ ghelɨ ghì a ghɨ n-yuyn kɨ ndosɨ kfeynsɨ̂ ateyn nɨ̀ sɨlisɨ a Isìl'f, yeyn gveynsɨ kfeynsɨ̂ ateyn nɨ sɨlisɨ sɨ chem aleŋ na à na sɨ kelɨ kɨ àŋena ɨfwo ɨ̀ jɨ̀m, a chî kɨ àŋena ilaʼ.

⁹Ma yvɨ meyn ta Bôbo Fɨyini ɨ bò Ɨ̀dwaʼ ɨ̀ jɨ̀m bè na,

“Samoʼ, ndosɨ jûŋsɨ̀/dvɨnɨsɨ nâ sìsɨ̀ læ̀ nà ghɨ kɨ ta nse iyum, ndo sɨ ghaʼlɨnɨ sìsɨ̀ a sɨ n-jofɨ̀ nô a jûŋ tì ɨ ghɨ kɨ sɨ yum.

¹⁰Ghɨ/yi læ̀ nà kam mɨ̀llûʼ mɨ̀ gɨ̀lêbsɨ̀ ma ghɨ kœ̀ a nkfɨ̀sɨ gvêyn ìvɨm, mɨ fvɨ̂ kɨ galùmsɨ̀ ntufa (litàsɨ̀ mɨ̀vɨm ɨ̀n bò njvàsɨ̀ bò) Yì læ̀ nà lî ngœ̀ tɨfûʼ ìvɨm tòʼ, yi ni kfi kɨ ifûʼ ìmoòʼ.”

¹¹Ngeʼ nɨn ghɨ sɨ̂ ghelɨ ghì a ghɨ n-lalì kɨ nì bɨsì bɨsì kɨŋ mɨ̀lûʼ ɨn to sɨ nà yvɨ-a. Ngeʼ nɨn ghɨ sɨ̂ ghelɨ ghì a ghɨ yisi nyvɨ kɨ mɨ̀lûʼ tèyn sɨ chem antêynɨ̀ nɨ̀ntuʼ ta ka mɨ̀ ku àŋena.

¹²Àŋena se sɨ yɨ ayɨ ghɨ nà buʼ/kelɨ tɨ̀luŋ nɨ̀ tɨ̀ndelàdèlàtɨ̀, buʼ/kelɨ kɨmɨ tɨ̀chaʼachaʼ nɨ̀ ndoŋsɨ baʼsɨ̂ nɨ̀ mɨ̀lûʼ mɨtì àŋena nɨn yeyn kelî wì awo kì a Bôbo Fɨyini nɨn nî sɨ̂ àŋena, kfaʼtɨ̀ wì iwo zɨ̀ a wù nì.

¹³À ti iwo zɨ̀ a mɨ n-nì visi, a ghɨ ghaytɨ ndù nɨ̀ ghelɨ̀ ghem a tɨ̂laʼ tɨ ɨtum. Ghɨ n-ghaytɨ̂ lû nɨ̀ àŋena bòm ta àŋena nɨn kya wi iwo/ma. Ghelɨ ghɨ tisɨnɨ nɨ̀ àŋena læ̀ kfɨtɨ-à bòm ta ghɨ n-kelɨ wi afo sɨ yɨ, a ghelɨ ghɨ li kfɨtɨ bòm ta ghɨ n-kelɨ wi mu sɨ nyvɨ.

¹⁴À ti iwo zɨ a isê ma à ti ilaʼ i nkfɨsɨ nse yàsì meyn nô sɨ a ŋaŋ ma ghɨ kàʼ ghɨ bû fèʼ ìghaʼ ateyn. Isê ateyni nɨn mzɨ̀ ghelɨ ghɨ tisɨnɨ a Isìlæ̀ baʼsɨ̂ nɨ̀ ghelɨ Isìlæ̀/Jèlusalèm nô ghɨ̀ jɨ̀m ɨ̀ mzɨ̀ kɨ̀mɨ ghelɨ ghì a ghɨ n-kôŋ sɨ nà ghɨ ɨlwèʼ ayɨ nâ ghàyn.

¹⁵Wùl ɨ̀ mɨ̀sòŋ læ̀ yeyn na yi n-ghɨ wi nô àfo, nà wumi-à, a ghelɨ ghì a ghɨ n-ghaŋsɨ ɨwuyn na ngvɨmlɨ̂ ngeŋsɨ àŋena.

¹⁶Mɨttì ghɨ læ̀ nà koʼsɨ̂ kɨ Bôbo Fɨyini ɨ bò Ɨ̀dwaʼ ɨ̀ jɨ̀m bòm ta wù nsaʼ fyeʼtɨ̂ wì iwo. Ghɨ læ̀ yeyn ìlayn i ŋweyn bòm ta wù n-nî kɨ àwo kì a kɨ n-ghɨ àtì-ati.

¹⁷Njɨ̀sɨ̀ læ̀ nà yɨ a Jèlusalèm kɨ̀ ta sɨ n-yɨ ɨtwaʼ nyâmsɨ̀. Woyn bzɨsɨ ndoŋsɨ ɨ kfɨl ɨ̀yol ɨlwèʼ ɨ ndosɨ nɨ̀ ghelɨ ghɨ to.

¹⁸Ngeʼ nɨn ghɨ sɨ̂ ghelɨ ghì a ghɨ faŋ nà nî kɨ mbɨ. Àŋena nɨn nî mbɨ kɨ nɨ̀ àdyaʼ a àŋena nô à jɨ̀m, ma ghɨ kàʼ ghɨ bû vìsi mbɨsɨ ateyn.

¹⁹Ngeʼ nɨn ghɨ sɨ̂ ghelɨ ghì a ghɨ n-bê na, “Fɨyini fɨ yaŋsɨ nì ìfêl i ŋweyn ghèsɨ̀ yeyn. Fɨyini fɨ laynɨ fɨ nɨ̀ ghelɨ Isìlæ̀ ni iwo zɨ̀ a fɨ bàʼtɨ ghèsɨ̀ na kya/keli ikfâʼtɨ̀ i ɨ̀nfeynfɨ.”

²⁰Ngeʼ nɨn ghɨ sɨ̂ ghelɨ ghì a ghɨ n-yeyn iwo i bzɨ-i ghɨ bè na à n-ghɨ ìwo i juŋì, ɨ̀ yeyn iwo i juŋì ghɨ bè na à n-ghɨ ìwo i bzɨ-i, bê na abe a fɨmnɨ-a nɨn ghɨ ìbayn , ibayni ɨ ghɨ àbe a fɨmnɨ-a. Afo kì a kɨ n-luê, àŋena nɨn bê na kɨ n-tofɨ tafɨ, akî a kɨ n-tofɨ tofɨ, àŋena bê na kɨ n-luê lue. ²¹Ngeʼ nɨn ghɨ sɨ̂ ghelɨ ghì a ghɨ n-kfâʼtɨ̀ na ghɨ n-tofa nô a jûŋ, lêm na ghɨ n-kya kɨ àwo à jɨ̀m.

²²Ngeʼ nɨn ghɨ sɨ̂ ghelɨ ghì a ghɨ n-nyvɨ̀ chwòsɨ̀ mɨlûʼ ɨn to, ghaŋsɨ̂ ɨ̀wuyn na ghɨ kàʼ a ghɨ n-nyvɨ nô mɨ ìnki i mɨ̂lùʼ ɨn to ì kà.

²³Ghelɨ ghɨ bɨ nɨn yuyntɨ̂ àŋena ghɨ saʼ fu nsaʼ sɨ̂ àŋena. Mɨtì fu ngeʼ sɨ̂ ghelɨ bula ghɨ bebsɨ ìwo/ghɨ kya wi iwo.

²⁴Yi ti n-ghɨ na aghaŋ à ki-a/àŋena nì fœ̂ a ɨ̀mbùs ɨ àŋena yum a afyefa na tâynsɨ̀-à kɨ ighel ta ɨvɨsɨ nî wu nyòʼ ìlɨŋ baʼsɨ afùʼ a yuma kɨ fɨ mæ̀ nô à jɨ̀m. Yi nì gâyn tèyn bòm ta àŋena chasɨ meyn ìsaʼ i Bôbo Fɨyini ɨ bò ɨ̀dwàʼ ɨ̀ jɨ̀m, ɨ̀ leʼ na ghɨ na nî àwo kì a Fɨyin fɨ laynɨfɨ nɨ̀ ghelɨ Isìlæ̀ nɨn bê.

²⁵À ti iwo zɨ̀ a Bôbo Fɨyini nɨ̀n nyôʼsɨ̀ ɨtoŋ sɨ̂ ghelɨ ŋweyn, wù laysɨ/naysɨ meyn àwu sɨ fu ngeʼ sɨ̂ ghelɨ ŋweyn. Kfɨynsɨ nì neʼà, a tɨgvɨyn tɨ ghelɨ ŋweyn/ghelɨ ghì a ghɨ kfɨ̀tɨ na nyɨŋ a dzɨ sɨ tosɨ ta ilɨŋ a ghɨ màʼì. Yi n-gâyn nô mɨ tì a ɨtoŋ Bôbo Fɨyini na bu yafɨ kɨ yafɨ, awu a ŋweyna bu ghɨ kɨ iyvɨ sɨ fu ngeʼ sɨ̂ ghelɨ ŋweyn.

²⁶Bôbo Fɨyini nɨn tum meyn nchwæ ŋweyn sɨ̂ tɨ̀laʼ tìtɨ̀ a tɨ n-ghɨ a ndyèyn, wu n-jâŋtɨ̀ ghelɨ kɨ tɨghaŋ tɨ mbzɨ tɨ̀ jɨ̀m nì zue. Àŋena nɨn gvì-à, àŋena nɨn nyɨŋ gvî nô nɨ̀ àdyaʼa.

²⁷Wùl nɨn bolɨ wi nô ɨ̀mòʼ, a wùl ɨ̀ faŋ tɨ̀ fe. Wùl nɨn bolɨ wi nô ɨ̀mòʼ a nô wùl faŋ tɨ̀ bùni. Akue a wûl à nɨn yàsà wì, a ànghòf a gvɨ àvɨ̀ nɨ̀ wùl à faŋ tɨ̀ bef/tèyna.

²⁸Awoŋa àŋena nɨn ghɨ ma ghɨ faytɨ meyn chof, mɨ̀nchya mɨ̀ àŋena ghɨ ma ghɨ beyn meyn nà gvɨ̂tɨ̀ kɨ sɨ tɨm. Ɨvɨ nyamsɨ kfaŋ nɨ̀ àŋena nɨn to kɨ ta ngòʼsɨ ɨvɨ̀s/kfɨsɨ, akal a mɨ̂nchaʼ nɨ̀ àŋena chwônɨ̀ kɨ ta afyef ato-a.

²⁹Àŋena nɨn dzɨ̂/dɨ̂m kɨ ta bzɨ̀kem nî yi nà dzɨ-à. Àŋena nɨn dzɨ̂ kɨ ta wâyn bzɨ̀kem nî wu nà dzɨ-à ɨlvɨ ta yì kù nyam ìlì, bèʼì nà leʼ nɨ̀ ɨ̀nyeyn na ka ghɨ ghal fsɨ.

³⁰À læ̀ nà ghɨ achi nâ ghè, a àŋena na dzɨ̂/kû/dɨ̂m atu nɨ̀ ghelɨ Isìlæ̀ kɨ̀ ta jva i ghaʼnɨ nî yi nà ku-à. Wù se sɨ/kæ ki ilaʼ ateyn a wù yeyn kɨ̀ abe a fɨmnɨ-a nɨ̀ mɨ̀lùmchuŋ. Mbàʼsɨ̀ læ̀ chɨytɨ̂ ɨ̀lwêʼ achi nâ ghè a wu na fɨ̂m kɨ tèyn tìk (Mbàʼ læ̀ lɨm ɨ̀lwêʼ achi nâ ghè a ghɨ na yeyn wi ibayn).