Isaiah 62
This book is a draft. It has been translated but has not yet finished checking, and is published here so the community can read and respond to it.
Zayòn nɨn kekî ìzɨyn i fɨ-i
1Isayà nɨn be meyn na bòm ìkôŋ zɨ̀ a mɨ n-kelɨ sɨ̂ ghelɨ Zayòn . Mà na tsɨ wi kɨ tsɨ bòm àŋena. Mɨ n-nì chimî wì moŋ. Mɨ n-nì chimî wì nô ta ka awo a àtì-ati a koli àŋena. Mà na bê kɨ be sɨ chem ta ka Fɨyini fɨ bœsɨ àŋena a ghelɨ yeyn ibayn zɨ̀ a àŋena nɨn kelɨ kɨ̀ ta ghelɨ yeyn ìbayn zɨ̀ a lâm nɨ̀n fu.
2Tɨlaʼ tɨ mbzɨ tɨ ɨ nì yeyn Fɨyini bœ̀sɨ̀ zɨ̀. Tɨfôyntɨ mbzɨ tɨ ɨ nì yeyn àdyaʼ a kaynɨ-a nɨ̀ Fɨyini fɨ nɨ̀ àdèŋ kì a Jèlusalèm nɨn ghɨ ateyn nà toŋtɨ̂ zɨ̀ izɨyn i fɨ-i ghè a Bôbo Fɨyini ɨ nì chfɨ a yi ɨwùyn.
3Yi n-læ nà ghɨ ghelɨ ghì a Bôbo Fɨyini choʼ ɨ lèm sɨ a nyɨŋ kɨ̀ ta afol a tɨ̂fòyn nɨ̀ ŋweyn kì a kɨ n-jôf nô sɨ a ŋaŋ. Yi n-læ nà ghɨ kɨ àfol a tɨ̂fòyn a jofɨnɨ-a awu nɨ̀ Fɨyini fɨ.
4Wùl læ̀ bu fì bê wì na yi n-ghɨ ntèʼ ma ghɨ maʼi meyn kèsa sɨ bè na yi n-ghɨ ntèʼ ma yì sɨ ghɨ kɨ iyum. Mɨtì ghɨ læ̀ nà toŋtɨ̂ zɨ̀ na ntèʼ zɨ̀ a Fɨyini fɨ nɨn kôŋ. Ghɨ n-læ̀ nà toŋtɨ̂ ìlaʼ ì zɨ-i na ilaʼ a kelɨ Bôbo Fɨyini. Ghɨ n-læ̀ nà toŋtɨ̂ tì bòm ta Bôbo Fɨyini nɨn tôʼnɨ̀ nɨ̀ zɨ̀ kɨ̀ ta wùl ɨ̀ tòʼnɨ̀ nɨ̀ wî ŋweyn ɨlvɨ ta wù màla.
5Zayòn, ghelɨ nâ ghèyn læ̀ malâ zɨ̀ kɨ̀ ighel ta wùl màla waynda ngòyn. Ghelɨ nâ ghèyn læ̀ nà kêʼtɨ̀ zɨ̀ ta wayndà ɨ̀kuŋ lì wi nà kêʼtɨ̀-à. Yi n-ghɨ kɨmɨ ighel ta Bôbo Fɨyini læ̀ nà saŋlɨ bòm(kûm) zɨ̀.
6Bôbo Fɨyini nɨn bè na, “Jèlusalèm, ma lêm meyn ghelɨ nchì atû mbàyn ntèʼ nɨ̀ zɨ̀. Àŋena na ghɨ afu nɨ̀nchuè, ghɨ nɨ̀ntuʼ, byal fêʼtɨ̀ nô mɨ ghà vzɨ̂ a àŋena nɨn yeyn. Zɨ̀ ghelɨ nchì, yì na bêtɨ̀ àwo a ghelɨ Isìlæ̀ sɨ̂ Bôbo Fɨyini. Ka wùl sɨ̂ zɨ̀ nɨn læ̀ faŋ tɨ̀ ni ifêl i ŋweyn zɨ̀ a wù n-kelɨ sɨ nì.
7Yì na bêtɨ̀ kɨ betɨ sɨ̂ Bôbo Fɨyini nô ta ka wù nî nì. Yì na jêm kɨ jem sɨ chem ta ka wù ni mbzɨ ì jɨ̀m na bemsɨ̂ Jèlusalèm.
8Bôbo Fɨyini nɨn be meyn sɨ a ŋweyn a ngeŋ na, “Samoʼ samoʼ, mà læ̀ bu fì wê wì zɨ̀ ɨwu nɨ̀ mbàynɨ̀ sisɨ. Yi læ̀ bu fì visî wì na mbàynɨ̀ sisɨ beʼi lù nɨ̀ ɨ̀fwo ɨ yɨnɨ nɨ̀ zɨ̀. Ghelɨ ghɨ gvinɨ a yi ilaʼ læ̀ bu fì nyvɨ wi mɨlûʼ ɨn fɨ mzɨ̀ a yi n-yeyn ngeʼ ɨ̀ kam.
9Mɨtì à læ̀ nà yɨ kɨ zɨ̀ ɨfwo ɨ yɨnɨ vzɨ̀ a yì fèlɨ̀ ghayn. Yi læ̀ na yɨ-a koʼsɨ̂ Bôbo Fɨyini. Ghelɨ ghì a ghɨ læ̀ nà kœ mɨtam læ̀ nà nyvɨ mɨ̀lûʼ mzɨ̀ a àŋena kàm ateyn. Àŋena læ̀ nà nyvɨ ɨwe ɨ ndo nɨ̀ Bôbo Fɨyini.
10Ghelɨ Jèlusalèm, yì chwo fvɨ̀. Yì fvɨ ɨ̀ fàytɨ dzɨ ghelɨ na chwô ateyn. Yì faytɨ ɨlwêʼ vzɨ̀ a wu bèf a dzɨ ito nô ɨ̀ jɨ̀m. Yì lisi ngòʼsɨ̀ sɨ a dzɨsɨ. Yì koʼsɨ ndzɨ̀ ìghòŋ ghelɨ tɨlaʼ tɨ̀ jɨ̀m tɨ̀ yeyn.
11Bôbo Fɨyini tum meyn ntum kɨ̀ mbzɨ ì jɨ̀m bè na, “Yì be sɨ̂ ghelɨ Zayòn na, Yì yeyna! Fɨyini fifɨ sɨ gvî sɨ bœ̀sɨ zɨ. Samoʼ wù n-kelɨ ɨ̀mwaʼtɨ ɨ̀vzɨ. Wu n-gvì nɨ̀ ghelɨ ghi ghì a wù (kàsi fsɨ̀ sɨ̂ ɨ̀tum) fvɨ̀sɨ̀ sɨ ndo àkòs.
12Ghɨ læ̀ nà toŋtɨ̂ àŋena na ghelɨ ghɨ laynɨ. Ghɨ læ̀ nà bê nà à n-ghɨ ghelɨ ghì a Bôbo Fɨyini tî yuyn tèyn sɨ akòs. Ghɨ læ̀ nà bè na Jèlusalèm nɨn ghɨ ntèʼ zɨ̀ a Bôbo Fɨyini nɨn kôŋ. Ghɨ læ̀ nà bê na à n-ghɨ ntèʼ bu fì ghɨ wi iyum.