Isaiah 66

Bôbo Fɨyini læ̀ saʼ fu nsaʼ ghelɨ

¹Bôbo Fɨyini nɨn be meyn na,

“Iyvɨ i nɨn ghɨ àchɨ à kema, ma duʼ ateyn saʼ mbzɨ, nse ɨ ghɨ àlêʼ kì a mɨ n-tomtɨ ɨvɨ̂ wom ateyn. Yiì ti kàʼ yi bàʼlɨ̀ ìnkì i ndo ì kà sɨ̂ mà a? Mà ti kàʼ a mà na chî wo?

²Ba à n-læ faytɨ ma ɨfwo nâ wèyn nô ɨ̀ jɨ̀m? À ti ta mɨ n-læ faytɨ ɨfwo nâ wèyn nô ɨ̀ jɨ̀m tèyn. À bè mà Bôbo Fɨyini. Yi ti n-dyêyn nna wùl ɨ̀ vzɨ̀ a ka mà na kôŋ ŋweyn nɨn ghɨ wul vzɨ̀ a wù n-gvɨmlɨ ngêŋ ŋweyn asɨ nɨ̀ mà, yvɨ gyâ yem wu nà faynà.

³Mɨtì ghelɨ ghì a ghɨ chòʼnɨ sɨ nà ni kɨ tî, àŋena nɨn kôŋ, mɨ n-fsɨ wi ifu i àŋena. Wùl nɨ̀ fu ìfu sɨ̂ mà nɨ̀ mbòŋ wu nà ghɨ kɨmɨ ta wul ɨ vzɨ̀ a wù n-zuetɨ ghelɨ. Wùl ɨ̀ fu ìfu nɨ̀ wâyn njɨ̀ a nà ghɨ kɨmɨ ŋweyn vzɨ̀ a wù n-gu ifu sɨ̂ mà nɨ̀ bɨ. Wùl ɨ̀ fu ìfu ɨfwo ɨ yɨnɨ a nà ghɨ kɨmɨ ŋweyn vzɨ̀ a wù fu ifu nɨ̀ mɨ̀lûŋ mɨ̀ nkfɨnyam. Wùl nɨ̀n nyôʼ ìleŋ na mà yvɨ alɨ̂m ateyn ɨ̀ bètɨ̀ ŋweyn, a nà ghɨ kɨmɨ ŋweyn vzɨ̀ a wù n-koʼsɨ mɨyini. Àŋena chasɨ meyn mà nà kôŋ kɨ àwo ayùŋ ayuŋ, ma ti wi ateyn.

⁴Ta àŋena chòʼnɨ sɨ nà ni awo nâ kèynà, maʼ choʼnɨ meyn sɨ fu ngeʼ ibemnɨ sɨ̂ àŋena. Nô mɨ ìnkì i ngeʼ ì kà zɨ̂ a àŋena nɨn fâyn nɨn ghɨ kɨ ɨ̀nyeyn zɨ̀ a ka yì koli àŋena. Mɨ n-nì mâʼ ngeʼ atu nɨ̀ àŋena bòm ta ma jâŋ meyn àŋena ghɨ faŋ tɨ̀ fsɨ̀sɨ, ma taŋi meyn nô wùl faŋ tɨ̀ yvɨ̀nɨ ma ɨ̀ kwo ndù nà nî àwo kì a mɨ n-bâyn.

⁵Zɨ̀ ghì a yi n-kôŋ sɨ nà yvɨtɨ iwo i Fɨyini, yvɨ ìwo zɨ̀ a Bôbo Fɨyini nɨn bê sɨ̂ zɨ̀. Wù bè na, “Woynà ghi ghì a ghɨ n-bâyn zɨ bòm ta yi n-yeʼtɨ kɨ a ma, àŋena nɨn wêsɨ̀ zɨ̀ bê na Bôbo Fɨyini dyeyn læ̂ ìŋwâʼ i ŋweyn ɨ̀ bœ̀sɨ̀ zɨ̀ ghèsɨ̀ yeyn ta yi n-saŋlɨ. Àŋena nɨn chyeʼ zɨ̀ tî ma ghɨ sɨ wumsɨ àŋena.

⁶Yì yvɨtɨ ɨchfɨ̂ vzɨ̀ a wu n-koʼ a ntèʼ ighaʼnɨ a Jèlusalèm. Yì yvɨtɨ gya sìsɨ̀ a sɨ n-koʼ a ndô Fɨyini. Gyasɨ nɨn koʼ a ndô Fɨyini bòm ta Bôbo Fɨyini sɨ ghɨ mâʼ ngeʼ atu nɨ̀ mbàynɨ̀ sɨ ŋweynsɨ. Bôbo Fɨyini sɨ fu ɨ̀mwaʼtɨ àŋena.”

⁷Bôbo Fɨyini nɨn fi meyn bè na, “Ntèʼ Jèlusalèm nɨn ghɨ wayn ŋam kɨ̀ ŋweyn sɨ ilæ tèyn wu bzɨ kɨ bzɨ. Jèlusalèm nɨn ghɨ tèyn ta wul ɨ wi ɨlvɨ ta wù bzɨ jæ na wàyn na lum ŋweyn.

⁸Wùl ɨ̀ bû tìmi yvɨ ìnkì iwo tèyn ta iyeyn nâ yèynì. Wùl bû tìmi yeyn ìnkì iwo tèyn. Ilaʼi bû tìmi fvɨ̀ koʼ kɨ̀ achi àmòʼ. Ghɨ kàʼ ghɨ bû lì kɨ fɨlêŋnɨ̀ fɨ ɨlvɨ ɨ̀ bzɨ ìlaʼ atum. Mɨtì Zayòn zɨ̀tɨ̀ kɨ̀ zɨtɨ sɨ yvɨ wayn ɨ̀ bzɨ kɨ̀ bzɨ woyn ŋweyn.

⁹Mà kàʼ ti ma nì na ɨlvɨ kfeyn ta ka wùl ɨ̀ bzɨ ɨ faŋ ti tɨ̀ nì na wù bzɨ a? À n-bê mà Bôbo Fɨyini, a nî mà na ghɨ̀ki na bzɨ-a ma mà kàʼ ma bû nì na wùl na ghɨ àkâyn.

¹⁰Zɨ̀ ghî a yi n-kôŋ Jèlusalèm, zɨ̂ àŋena na saŋlɨ-à fî dêŋsɨ̀-à, ɨ zɨ ghɨ̀ jɨ̀m ghî a zɨ̀ tî nà kayn mbzɨ àŋena.

¹¹Yì na saŋlɨ̂ zɨ̂ àŋena ta ka yì na kelɨ ìghaʼ zɨ̀ a Bôbo Fɨyini fù sɨ̂ Jèlusalèm. Yì læ̀ nà ghɨ kɨ ta wâyn njɨ̀ ɨlvɨ ta wù n-nyoŋ igheyn i nà àteyn ɨ̀ kul.

¹²Bôbo Fɨyini bè na, “Samoʼ mɨ n-nì fu ìghaʼ sɨ̂ ghelɨ Isìlæ̀. Mà læ̀ fu ìghaʼ ateyn a yi na kalì kɨ mɨlvɨ ɨ̀n jɨ̀m ta jvà. Mà læ̀ fu ɨ̀kwo sɨ̂ tɨ̀laʼ tɨ (ɨtum) a yi na ghɨ kɨ ta à n-kalì ànkuŋ. Mà læ̀ nà tôʼnɨ̀ nɨ̀ zɨ̀ kɨ̀ ta nàwayn nî wu nà tôʼnɨ̀ nɨ̀ wâyn ŋweyn ɨlvɨ ta wù n-nyoŋsɨ.

¹³Mɨ n-nì kyakyâ zɨ̀ a mà ɨbzɨ nà dêŋsɨ̀ kɨ ta nàwayn nî wu kyakya wayn ɨ nà dêŋsɨ̀-à. Mà læ̀ kfɨmtɨ̂ zɨ̀ kɨ̀ ta nàwayn nî wu nà kfɨmtɨ̂ wayn. Jèlusalèm læ̀ kasî nà ghɨ kɨ ta yi nà n-ghɨ sɨ asɨ a yì na kelɨ ìyvɨ̂tɨ̀ (mbôynɨ̀).

¹⁴À læ̀ nà ghɨ ta yi n-yeyn awo nâ kèynà a mɨ̀têm mzɨ na saŋlɨ-à. Yi læ̀ yeyn nà lemâ kɨ ta ɨnfûʼ. Ghelɨ læ̀ yeyn ta yi n-saŋlɨ fî yvɨ̂tɨ̀-à, a ghɨ keli na Bôbo Fɨyini nɨn gâmtɨ̀ wul ɨlvɨ ta wù n-yvɨnɨ ŋweyn. Mɨtì wu nì nyôʼsɨ̀ ɨ̀toŋ sɨ̂ ghelɨ ghì a ghɨ n-yvɨnɨ wi ŋweyn.

¹⁵Yeyna, Bôbo Fɨyini weyn gvî antêynɨ̀ àfef a to-a ma ɨvɨsɨ jɨŋ meyn kàli ŋweyn. Wù n-gvî ta sugèyʼ atû fɨ̀nchaʼ fɨ iwòŋ. Wù n-gvî sɨ fu ngeʼ sɨ̂ ghelɨ awo a bɨ-a. Wù n-gvi-à ɨtoŋ ɨ yafɨnɨ nɨ̀ ŋweyn ɨ balî ta ɨvɨs ichɨ.

¹⁶Bôbo Fɨyini læ̀ mâʼ ngeʼ atu nɨ̀ mbzɨ ì jɨ̀m. Ngeʼ nâ yèyn læ̀ nà ghɨ ɨ̀vɨs nɨ̀ ìwoŋi ghɨ tɨm kɨ mbzɨ ì jɨ̀m. Wù læ̀ zuetɨ̂ ghelɨ ghɨ dvɨ̂ kɨ tèyn.

¹⁷Ndòyn nɨn ghɨ atu nɨ̀ ghelɨ ghì a ghɨ n-tuŋ anôyn ndû a gvêyn mbàysɨ̀ sɨ nà koʼsɨ mɨyini. Ghɨ n-se sɨ ndù tî ghɨ nà fu ìfu sɨ lem ngeŋgsɨ àŋena na sɨ na layna. Àŋena nɨn ndû afu ghɨ nà kfɨlɨ njwò nkfɨnyàm nɨ̀ chwokùʼsɨ̀ baʼsɨ̂ nɨ̀ ɨ̀fwo ɨ chaʼnɨnɨ ɨlvɨ. Ghɨ læ̀ chɨ̂yntɨ̀ zuetɨ̂ àŋena nô ghɨ̀ jɨ̀m.

¹⁸Mɨ n-kya nô mɨ ìfêl i nda, kya ìkfâʼtɨ̀ i àŋena. Mɨ n-gvî sɨ saʼ ghelɨ nô ghɨ̀ jɨ̀m. Mà læ̀ baʼtɨ̂ ghelɨ ɨtum kɨ ghɨ̀ jɨ̀m kèsa ghɨ n-taŋî ìtaŋi ì kà a àŋena gvi yeyn adyaʼ a bemnɨ-a nɨ̀ mà.

¹⁹Mɨ n-nì lêm nchwæ yem a àŋena antêynɨ̀ sɨ dyèyn adyaʼ à kema. Mɨ n-nì tum ghelɨ ghɨ li ghì a ghɨ n-faŋ a tɨ̂laʼ tɨ litɨ. Àŋena nì ndû a Tashìsh ndù a Libìyà ɨ̀ ndù a Lidìyàn ɨ̀ ndù kɨ̀mɨ a Tubàl, ndù a Glîs nɨ̀ tɨ̀laʼ tɨ litɨ a ndyèynsɨ̀. Ɨlwêʼ nâ wèyn nɨn ghɨ ɨ̀lwêʼ vzɨ̀ a ghelɨ bu duʼ tɨ yvɨ na mɨ n-kelɨ àdyaʼ (mɨ n-ghɨ wul ɨtwo). Àŋena nì ndû fêʼtɨ̀ na àdyaʼ à kema nɨ̀ ìghaʼ ì yemi nɨn ghɨ sɨ̂ tɨ̀laʼ tɨ mbzɨtɨ nô tɨ̀ jɨ̀m.

²⁰Àŋena læ̀ ndû lî kfâ nɨ̀ woynà ghi sɨ a tɨ̂laʼ tɨ mbzɨ nô tɨ̀ jɨ̀m ɨ̀ gvì nɨ̀ àŋena a yi ilaʼ sɨ ifu sɨ̂ mà. Ghɨ læ̀ nà gvî nɨ̀ àŋena atû nyamsɨ kfaŋ, gvî nɨ̀ ghɨli a mɨnchaʼ mɨ̀ ìwòŋ, gvî nɨ̀ ghɨli a mɨnchaʼ ma ghɨ yùŋtɨ̀ yuŋtɨ, ghɨli gvî atû nyamsɨ ma à bzɨ njàkâs ŋêyn nyamsɨ kfaŋsɨ, gvî kɨmɨ nɨ̀ ghɨli atû kàmêlsɨ̀.” Bôbo Fɨyini nɨn bê na, “Ghɨ læ̀ nà gvî nɨ̀ woynà ghi a Jèlusalèm kɨ̀ ta ghelɨ Isìlæ̀ nî ghɨ nà beʼì ɨ̀fwo ɨ yɨnɨ gvî nɨ̀ ɨ̀ŋweyn a ndo nɨ̀ mà sɨ ifu, fu a dzɨ ghè a isaʼi nɨn dyêyn na ghɨ n-kelɨ sɨ nà fu ateyn, fu ɨ̀fwo wu layn ta isaʼi nɨn dyêyn.” ²¹Bôbo Fɨyini bè na, “Mà læ̀ choʼtɨ̂ ghelɨ a yi antêynɨ̀ a àŋena na ghɨ ngàŋsɨ ndô Fɨyini ɨ̀ lèm ghɨli a ghɨ na felɨ̀ a ndô Fɨyini, ²²kɨ̀ ighel ta iyvɨ i fɨ-i nɨ̀ nse ifɨ læ̀ nà ghaŋì, ti kɨ ɨlwèʼ ghè a wu n-ti ateyn a ma asɨ. Bôbo Fɨyini nɨn bè na izɨyn ì zɨ-i baʼsɨ̂ nɨ̀ woyn ghi læ̀ nà ghɨ kɨ tì nô ta ka ghɨ̀ læ̂ ghɨ.” ²³Ghelɨ ghɨ̀ jɨ̀m a mbzɨ læ̀ nà gvî koʼsɨ̂ mà nô mɨ njoŋ ì kà læ̀ nà fvɨ-à, ghelɨ nà gvî koʼsɨ̂ mà, koʼsɨ̂ mà a mɨchi mɨ̀ ɨ̀tuʼ ilaʼ nɨ̀ mà nô ɨ̀n jɨ̀m. À bè mà Bôbo Fɨyini. ²⁴Ghelɨ ghì a ghɨ n-læ gvì sɨ koʼsɨ ma læ̀ sesɨ fvɨ ntèʼ Jèlusalèm ɨ̀ yeyn tɨgvɨyn tɨ ghelɨ ghì a ghɨ n-to nɨ̀ àtu-a sɨ̂ mà tɨ nyɨŋa. Gvɨysɨ na fœ̂sɨ̀ kɨ fœsɨ achaʼ ɨwùyn nɨ̀ àŋena, ɨvɨsɨ balî afu ma ghɨ kàʼ ghɨ bû lɨ̀msɨ.