Jonah 4

Jonà ɨ nyòʼsɨ̀ ɨ̀toŋ

¹À nà ghɨ ta Fɨyini fɨ kòynsɨ isuyn sɨ̂ ghelɨ Ninevè, iwo ateyn i ɨ yaf Jonà nô sɨ a ŋaŋ, wu nyòʼsɨ̀ ɨ̀toŋ, ²ɨ nà sɨ jêm sɨ̂ Bôbo bê na, “Ma ti meyn bè kɨ̀mɨ tèyn a Bôbo jæ ta ka mà lu gvì afêyn na, mɨ n-kya ìwo zɨ̀-ì a wà n-kɨŋ sɨ nì. À ti iwo zɨ̀ a mà tî nà leʼ ndù dzɨ a Tashìsh. Ma ti meyn nà sɨ kya na wà n-ghɨ Fɨyini, kelɨ àtem a juŋà, koynsɨ̂ isuyn, nyâŋsɨ̀ yabsɨ̂ wì ɨtoŋ fî kôŋ ghelɨ nô a jûŋ, lum luŋ wi luŋ sɨ fu ngeʼ sɨ̂ ghelɨ ghɨ bɨ. ³Laynsɨ læ zue ndù nɨ̀ mà a Bôbo bòm ta yi n-jofɨ̀ kɨ na mà kfɨ ndù, chwò ta ka mà na chi-à.” ⁴Bôbo Fɨyini ɨ bèynsɨ̀ ɨ bɨf sɨ̂ Jonà na, “A yi ti n-ghɨ àtì-ati na wà na yabsɨ̂ ɨ̀toŋ a?”

⁵Jonà ɨ yvɨ tî, ɨ kwo fvɨ̀ ɨ ndù kɨ dzɨ a abàs ghè a ɨchfɨ iyvɨ i nɨn sal ateyn a Ninevè ɨ kas fɨtwotɨ̂ afu ɨ zɨ dùʼì sɨ ateyn ɨ nà sɨ ki sɨ yeyn iwo zɨ̀-ì a ka yi gayn. ⁶Bôbo Fɨyini ɨ nì, fɨkâʼ fɨ lifɨ fvɨ̀ ɨ lema koʼ alèʼ nâ ghè a Jonà nà n-duʼ ateyn sɨ chɨytɨ chue sɨ a ŋweyn atu ta ka wù na yvɨ̂tɨ̀-à. Wu nà saŋlɨ̂ nô a jûŋ. ⁷Mɨtì ɨtuʼ ɨ bɨs layn, Fɨyini fɨ tum fɨngêʼ fɨ lifɨ fɨ zɨ a fɨ̂kàʼ nâ ghè ɨ kfɨl, tɨfvɨ tɨ ateyn, tɨ yàlà. ⁸Ɨchfɨ̂ iyvɨ i ni sal, Fɨyini fɨ nì afyef a li-a nà chwô, lûm kɨ tèyn nchuŋ, chuè ɨ fî bayn atu nɨ̀ Jonà. Wu boli tèyn ɨ nà kɨŋ sɨ kfɨ ɨ kæ bè na, “Yi n-jôf kɨ na mà lani kfɨ ndù chwô ta ka ma na fì chi-à.”

⁹Fɨyini fɨ ɨ kæ bɨf sɨ̂ ŋweyn na, “A yi ti n-ghɨ àtì-ati na wà na yabsɨ̂ ɨ̀toŋ bòm ta fɨkâʼ fèynfɨ̀ kfɨ̀ a?” Jonà ɨ bè na, “Ɨtoŋ wom nɨn kelɨ kɨ nô sɨ yaf. Wu yafɨ meyn chem kɨ̀ nô aleŋ, ma na sɨ kòŋ kɨ sɨ kfɨ.”

¹⁰Bôbo Fɨyini ɨ bè sɨ̂ ŋweyn na, “Fɨkâʼ fèynfɨ̀ tî lèma koʼ kɨ nɨ̀ntuʼ, ɨtuʼ se sɨ layn ma fɨ kfɨ meyn. Wà bu tî nì ìwo ili na fɨ lema, fɨ kfɨ iwo ateyn i na sɨ fu ngeʼ sɨ̂ và tèyn bòm ghà? ¹¹Mà ti kàʼ ma faŋ ti tɨ̀ kòynsɨ isuyn sɨ̂ ntèʼ ighaʼnɨ têyn ta Ninivè a? Ba ghelɨ nɨn ghɨ ateyn chwô nkam ɨvɨ nɨ̀ ghelɨ nkamsɨ mɨ̀vɨ̂m mbò, nô wùl sɨ ateyn ɨ kya wi iwo, nyamsɨ ɨ ghɨ kɨmɨ ateyn, dvɨ̂ kɨ tèyn.”