Joshua 10

Joshwà ɨ tɨm yɨ tɨfôyn tɨ Amò tɨ̀ tâyn.

¹Adòni-Zedèk ɨ fòyn Jèlusalèm nɨn yvɨ meyn na Joshwà tɨm meyn yɨ ntèʼ Ây ɨ̀ zuètɨ ghelɨ ateyn nô ghɨ̀ jɨ̀m baʼsɨ nɨ̀ fòyn àŋena kɨ̀mɨ ighel ta wu n-bèbsɨ Jèlikò ɨ boŋ zue fòyn àteyn. Wu n-yvɨ meyn kɨmɨ na ghelɨ Gibìyòn yɨ meyn mɨ̀kâyn ŋêyn ghelɨ Isìlæ̀ nà chî nɨ̀ mbôynɨ̀, ²ŋêyn ghelɨ ŋweyn ɨ nà sɨ fâyn nô sɨ a ŋaŋ. Àŋena nà n-fâyn bòm ta Gibìyòn nà n-ghɨ kɨ nô ntèʼ ì to kɨ̀mɨ ta ntèʼ sìsɨ̀ a sɨ nà n-kelɨ tɨfôyn, fî ghaʼ chwò ntèʼ Ây, fî kelɨ sugèyʼsɨ tosɨ. ³Adòni-Zedèk ɨ fòyn Jèlusalèm ɨ kæ tum ntum sɨ̂ Hohàm ɨ fòyn Heblòn nɨ̀ Bilàm ɨ fòyn Jamùt nɨ̀ Jafìyà ɨ fòyn Lakìsh nɨ̀ Debì ɨ fòyn Eglòn ɨ bè na, ⁴“Yì gvi ɨ̀ gàmtɨ̀ mà, ghesɨ̀nà ndu nù ntèʼ Gibìyòn bòm ta àŋena yɨ meyn mɨ̀kâyn ŋêyn Joshwà nɨ̀ Isìlæ̀ sɨ nà chî nɨ̀ mbôynɨ̀.”

⁵Tɨfôyn tɨ Amò nâ tì tɨ̀ tâyn ma à ti fòyn Jèlusalèm nɨ̀ fòyn Heblòn nɨ̀ fòyn Jamùt nɨ̀ fòyn Lakìsh nɨ̀ fòyn Eglòn ɨ kæ chɨ̀yntɨ sugèyʼsɨ àŋena ɨ ndu jɨŋ kal ntèʼ Gibìyòn ɨ nù àŋena.

⁶Ghelɨ Gibìyòn ɨ tum bè sɨ̂ Joshwà a Gilgàl na, “Ghès nɨn ghɨ ghelɨ ghɨ felɨnɨ nɨ̀ zɨ̀, ka yi n-màʼì ghès. Yì nyaŋsɨ gvì gàmtɨ̀ ghès. Tɨfôyn tɨ Amò tìtɨ̀ a tɨlaʼtɨ àŋenatɨ nɨn ghɨ a kfɨynsɨ chɨyntɨ meyn nô tɨ̀ jɨ̀m ɨ̀ gvì sɨ nu ghes.”

⁷Joshwà ɨ lù sɨ a Gilgàl ŋêyn ghelɨ iwòŋ nɨ̀ ŋweyn nô ghɨ̀ jɨ̀m, baʼsɨ̂ nɨ̀ sugèyʼsɨ tosɨ nɨ̀ ŋweyn. ⁸Bôbo Fɨyini ɨ bè sɨ̂ Joshwà na, “Ka wà n-fàyn, mɨ n-fu àdyaʼ a wà tɨm yɨ àŋena. Nô wùl sɨ ateyn kàʼ wu bû tìmi sɨ nu vâ.”

⁹Joshwà ŋêyn ghelɨ ŋweyn ɨ lù a Gilgàl nɨ̀ntuʼ ɨ chi jel kɨ têyn ɨ bɨs ɨ gvɨ̀tɨ fvɨ̀ asɨ nɨ̀ ghelɨ Amò. ¹⁰Bôbo Fɨyini ɨ nì ghelɨ Amò ɨ jɨŋi asɨ nɨ̀ ghelɨ Isìlæ̀, Isìlæ̀ ɨ tɨm yɨ àŋena a ntèʼ Gibìyòn ɨ fi nyɨŋ a àŋena ibàm ɨ koʼ ndù dzɨ a Bet-Holòn. Àŋena nà n-nyɨŋ tì fî toʼ zuetɨ̂ ndû kɨ ndu nɨ̀ ghelɨ Amò sɨ chem a Azekà nɨ̀ Makedà. ¹¹A nà ghɨ ta Ghelɨ Amò lù a Bet-Holòn nà nyɨŋ ndû a Azekà, Bôbo ɨ suʼsɨ àwœ a àŋena atu nô sɨ a idvɨ̀ kɨ zuetɨ àŋena ɨ chwò ta ghelɨ Isìlæ̀ nɨn zuetɨ nɨ̀ mɨ̀nyuè.

¹²À nà n-ghɨ kɨmɨ achi nâ ghè a Bôbo nì ghelɨ Isìlæ̀ tɨm ɨ̀ yɨ ghelɨ Amò, Joshwà ɨ timi asɨ nɨ̀ ghelɨ Isìlæ̀ ɨ nà jemà bê na,

“Bôbo ni ɨchfɨ̂-iyvɨ i timi kɨ̀ alèʼ àmòʼ atû Gibìyòn,

nô mɨ njoŋ faŋ tɨ̀ fì tɨ̀ nèʼlɨ̀ sɨ atû ìbal i Ajalòn.”

¹³Wu jèm tì ɨchfɨ̂-iyvɨ i timi kɨ tî,

njoŋ faŋ tɨ̀ fì tɨ̀ nèʼlɨ̀, nô ta ka ghelɨ Isìlæ̀ tɨm yɨ mbàynɨ̀sɨ àŋena. Iwo nâ yèynì nɨn ghɨ ma ghɨ nyaʼ meyn a ŋwàʼlɨ̀ Jashà.

Ɨchfɨ̂ iyvɨ i nɨn tìmi ɨ faŋ kɨ alèʼ àmòʼ iyvɨ ɨ faŋ tɨ̀ sœ sɨ achi a fɨ̂blɨ̀-à.

¹⁴Achi a bû tìmi nà ghɨ tèyn ta akeyn nâ kèynà ta Bôbo nɨn yvɨ ijêm i wûl. Bôbo nà n-tɨm kɨ̀ nô ìwoŋ alèʼ nɨ̀ ghelɨ Isìlæ̀.

¹⁵Joshwà ŋêyn ghelɨ ŋweyn nɨn tɨm yɨ iwoŋ ateyn ɨ kasi ndù alèʼ ghè a àŋena nɨn bɨ̀ ateyn a Gilgàl.

¹⁶Ghɨ n-se sɨ tɨm iwoŋ ateyn, tɨfôyn tìtɨ̀ tɨ̀ tayn ɨ leʼ ndu lèytɨ̀ antêynɨ̀ ìfo a Makedà. ¹⁷Ghelɨ ɨ gvi fèʼtɨ̀ sɨ̂ Joshwà na àŋena yeyn meyn tɨ̀fôyntɨ Amò nâ tìtɨ̀ tɨ̀ tâyn ta tɨ lèytɨ̀ antêynɨ̀ ìfo a Makedà. ¹⁸Joshwà ɨ bè na àŋena ndu bɨŋ ngòʼ sɨ ghaʼlɨnɨsɨ ɨ̀ fèyn ɨ̀chfɨ̂ ifò ateyn ɨ̀ lèm ghelɨ ghɨ na chî ìfô ateyn ka tɨfôyn tɨ ateyn tɨ fvɨ lèʼnɨ. ¹⁹Wu n-bè tî ɨ bè sɨ̂ àŋena na, “Ka yi n-fàŋ afu. Yì na nyɨŋ kɨ nyɨŋ ibam nɨ̀ mbàynɨ̀ sisɨ ɨ̀ zuètɨ àŋena. Ka yi n-vìsi àŋena leʼ zɨ a antêynɨ̀ ntèʼ nɨ̀ àŋena. Bôbo Fɨyini fifɨ lem meyn na yi n-tɨm yɨ àŋena.”

²⁰Joshwà ŋêyn ghelɨ ŋweyn ɨ zuetɨ ghelɨ Amò, ghɨli ghɨ̀sèʼ têyn ɨ leʼnɨ ɨ kasi ndù a àŋena ntèʼsɨ. ²¹Ghelɨ Isìlæ̀ ɨ kasi kfa kɨ nô a jûŋ ghɨ̀ jɨ̀m ɨ ndu yeyn Joshwà alèʼ ghè a wu nà n-ghɨ ateyn a Makedà. Nô wùlɨ̀ Kenàn ɨ nà kelɨ wi atem sɨ bè iwo sɨ̂ wul ɨ̀ Isìlæ̀.

²²Joshwà ɨ kæ bè na, “Yì bɨŋ lìsì ngòʼ sìsɨ̀ sɨ ɨchfɨ ifò afî ɨ̀ fvɨ̀sɨ̀ gvì nɨ̀ tɨ̀fôyn tìtɨ̀ tɨ̀ tâyn sɨ̂ mà a makedà.” ²³Sugèyʼsɨ ateynsɨ ɨ fvɨ̀sɨ gvì nɨ̀ tɨ̀fôyn tɨ ateyn tɨ tɨ̀ tâyn sɨ ifò nâ ghè, a ghɨ fòyn Jèlusalèm, nɨ̀ fòyn Heblòn nɨ̀ fòyn Jamùt nɨ̀ fòyn Lakìsh nɨ̀ fòyn Eglòn. ²⁴Ghɨ n-gvi nɨ̀ tɨ̀fôyntɨ ateyn tɨ ɨ nyɨ̀ŋsɨ̀ asɨ nɨ̀ Joshwà, wu jàŋtɨ̀ sugèyʼsɨ̀ sɨ gvì, wu bè sɨ̂ ɨ̀tu àŋena na, “Yì fvɨ gvì tòmtɨ ɨ̀vɨ ɨ̀vzɨ atoŋ nɨ̀ tɨ̀fôyn tèyntɨ̀.” Sugèyʼsɨ ateynsɨ ɨ ni kɨ ta Joshwà bè.

²⁵Joshwà ɨ fi bè sɨ̂ àŋena na, “Ka yi n-fàyn nô sakos, yì na kelɨ mɨ̀tem ɨn tô bòm ta Bôbo na nî kɨ nì mbàynɨ̀ sisɨ têyn.” ²⁶Joshwà ɨ kæ zuetɨ tɨfôyn tɨ ateyn sɨ ghaŋsɨ tɨgvɨyn tɨ àŋena ɨnkàʼ ɨ̀n tâyn nô sɨ chem aleŋ ɨlvɨ ikfa.

²⁷Ɨchfɨ̂ iyvɨ ɨ ni se sɨ sœ, Joshwà ɨ bè sɨ̂ sugèyʼsɨ ŋweynsɨ na sɨ suʼsɨ tɨgvɨyn tɨ tɨ̂fòyn nâ tìtɨ̀ ɨ̀ ndù màʼì kɨ̀mɨ ifò afî a àŋena tî lèytɨ̀ ateyn tì. Àŋena ndu màʼì ɨ chɨl ɨchfɨ̂ ifò ateyn nɨ̀ ngòʼsɨ ghaʼlɨnɨsɨ, sɨ na bu ghɨ kɨ afu sɨ koʼ sɨ chem layn.

²⁸A nà ghɨ kɨmɨ achi nâ ghè Joshwà ŋêyn sugèyʼsɨ ŋweynsɨ ɨ nù ɨ yɨ Makedà ɨ zue fòyn àteyn ɨ zuetɨ ghelɨ ntèʼ nâ ghì nô ghɨ̀ jɨ̀m nɨ̀ mɨ̀nyuè. Àŋena nɨn bu læ visi nô wul ɨ̀mòʼ afu tɨ̀ zue. Wu n-ni kɨmɨ sɨ̂ fòyn Makedà kɨ̀ ta wu n-nì sɨ̂ fòyn Jèlikò.

Isìlæ̀ ɨ tɨm yɨ ntèʼsɨ Amò sîsɨ̀ a sɨ nà n-ghɨ abàs itsɨyn

²⁹Joshwà ŋêyn sugèyʼsɨ ŋweynsɨ nɨ̂n lù a Makedà ɨ ndù a Libnà ɨ tɨm iwoŋ afu. ³⁰Bôbo Fɨyini ɨ fi nì Isìlæ̀ ɨ tɨm yɨ fòyn Libnà ŋêyn ghelɨ ŋweyn. Ghelɨ Isìlæ̀ nɨn zuètɨ nô ghelɨ ghɨ̀ jɨ̀m a ntèʼ afu nɨ̀ mɨ̀nyuè. Àŋena nɨn bu visi nô wul ɨ̀mòʼ afu tɨ̀ zue. Wu n-ni kɨmɨ ìwo zɨ̀-ì sɨ̂ fòyn Libnà a wu n-nì sɨ̂ fòyn Jèlikò.

³¹Joshwà ɨ lù a Libnà ŋêyn ghelɨ ŋweyn ɨ ndù a Lakìsh ɨ ndu jɨŋ kali ntèʼ nâ zɨ̀ ɨ fi nù ntèʼ àteyn. ³²A nà ghɨ a ànkùmtɨ̀ achi, Bôbo Fɨyini ɨ nì ghelɨ Isìlæ̀ ɨ tɨm yɨ ntèʼ Lakìsh ɨ lì ntèʼ àteyn ɨ zuetɨ ghelɨ ateyn nô ghɨ̀ jɨ̀m. Àŋena nɨn bu læ visi nô wul ɨ̀mòʼ afu kɨ̀ ighel ta ghɨ n-nì a Libnà. ³³A nà n-ghɨ kɨmɨ ɨlvɨ nâ ghè, Holàm ma à ti fòyn Gezà ɨ gvì sɨ gàmtɨ ghelɨ Lakìsh mɨtì Joshwà ɨ zue ŋweyn ŋêyn sugèyʼsɨ ŋweynsɨ nô sɨ̀ jɨ̀m.

³⁴Joshwà ŋêyn sugèyʼsɨ ŋweynsɨ ɨ lù sɨ a Lakìsh ɨ ndù a Eglòn ɨ jɨŋ kali ɨ nù ntèʼ àteyn. ³⁵Àŋena nɨn nù tî ɨ tɨm yɨ ntèʼ àteyn ɨ zuetɨ ghelɨ ateyn nô ghɨ̀ jɨ̀m kɨ achi nâ ghè nɨ̀ mɨ̀nyuè. Àŋena nɨn zuetɨ ghelɨ ateyn kɨ ighel ta àŋena nɨn zuetɨ a Lakìsh.

³⁶Joshwà ɨ fi lù sɨ a Eglòn ŋêyn ghelɨ ŋweyn ɨ koʼ a Heblòn ɨ ndu nù ghelɨ ntèʼ nâ ghì, ³⁷ɨ tɨm yɨ ntèʼ ateyn ɨ zuetɨ ghelɨ ateyn baʼsɨ̂ nɨ̀ fòyn àŋena nɨ̀ mɨ̀nyuè. Àŋena nɨn bu læ visi nô wul ɨ̀mòʼ afu. Ghɨ n-ni sɨ̂ ghelɨ ntèʼ nâ ghì kɨ̀ ta ghɨ n-nì sɨ̂ ghelɨ Eglòn.

³⁸Joshwà ŋêyn ghelɨ ŋweyn ɨ kæ ndù sɨ nu ghelɨ ntèʼ Debì. ³⁹Àŋena nɨn ndù tî ɨ tɨm yɨ ntèʼ àteyn nɨ̀ mɨ̀ntèʼtɨ̂ mzɨ̀ a mɨ nà n-ghɨ afu ɨ zuetɨ ghelɨ ateyn nɨ̀ mɨ̀nyuè. Àŋena nɨn bu læ visi nô wul ɨ̀mòʼ afu tɨ̀ zue. Iwo zɨ̀-ì a àŋena nɨn nì a ntèʼ Debì nà n-ghɨ kɨmɨ izɨ-ì a àŋena nɨn læ nì a Libnà nɨ̀ Heblòn.

⁴⁰À ti ta Joshwà nɨn tɨm yɨ abâs ilaʼ nâ kì nô à jɨ̀m. Wu n-tɨm yɨ ghelɨ ghì a ghɨ nà n-chi a kfɨynsɨ nɨ ɨghî a ghɨ nà n-chi a nse iyum abàs itsɨyn nɨ ɨghî a ghɨ nà n-ghɨ a kfɨynsɨ injɨyn i Kenàn nɨ ɨghî a tɨ̂bàl afî a tɨ nà n-baʼsɨ a Kenàn. Wu n-zuètɨ kɨ ghelɨ ghɨ̀ jɨ̀m ɨ faŋ tɨ̀ vìsi nô wul ɨ̀mòʼ. Wu n-ni kɨ ta Bôbo ɨ Fɨyini fɨ Isìlæ̀ nɨn bè na wù ni. ⁴¹Joshwà nɨn tɨm yɨ àŋena kɨ̀ sɨ zɨ̀tɨ̀ a Kadesh Banìyà sɨ ndù sɨ chem a Gazà sɨ fì sɨ zɨ̀tɨ̀ a Goshèn sɨ ndù sɨ chem a Gibìyòn. ⁴²Wu n-tɨm yɨ tɨfôyn nâ tèyntɨ̀ nɨ̀ ntèʼsɨ àŋenasɨ kɨ̀ ìwòŋ ìmòʼ. Wu n-tɨm yɨ bòm ta Bôbo ɨ Fɨyini fɨ Isìlæ̀ nà n-gâmtɨ̀ àŋena.

⁴³A nà sɨ ghɨ ibàm ateyn, Joshwà ŋêyn ghelɨ Isìlæ̀ ɨ kæ kasi sɨ ndù alèʼ ghè a àŋena nɨn bɨ̀ ateyn a Gilgàl.