Joshua 21

Ntèʼ sîsɨ̀ a ghɨ n-læ fu sɨ̂ ghelɨ isas i ndo nɨ̀ Levì

¹Ghelɨ ghɨ tisɨnɨ isas i ndo nɨ̀ Levì nɨ̀n ndû meyn ɨ yeyn Elezà, ɨ ngàŋ ndô Fɨyini ŋêyn Joshwà ɨ wâyn Nûn nɨ̀ ghelɨ ghɨ tisɨnɨ asas a ndo nɨ̀ ghelɨ Isìlæ̀ ghɨli, ²a Shilò ilaʼ i Kenàn ɨ bè sɨ̂ àŋena na, “Bôbo Fɨyini nɨ̂n be meyn ɨ toynɨ a Mosìs na wà fu ntèʼsɨ, ghès na chî ateyn nɨ̀ ɨ̀twaʼ ta ka nyâm seysɨ na yɨ ateyn.” ³Ghelɨ Isìlæ̀ ɨ kæ fu ntèʼsɨ àŋena sɨ lisɨ nɨ̀ ɨ̀twaʼ ɨ nyâmsɨ̀ sɨ̂ ghelɨ isas i ndo nɨ̀ Levì kɨ̀ ighel ta Bôbo Fɨyini nɨn læ bè.

⁴Ghɨ n-læ fu ɨlwêʼ ɨ wu asɨ sɨ̂ ìsas i ndo nɨ̀ Kohàt kɨ̀ ɨchfɨ ndo ɨchfɨ ndo, ɨ ndù isas i ndo nɨ̀ Levì, ɨchfɨ ndo nɨ̀ Alòyn, ɨ ngàŋ ndô Fɨyini, ɨ fu ntèʼsɨ njvàsɨ̀ tal sɨ ghɨ abàs nɨ̀ ghelɨ Judà nɨ̀ Simìyòn nɨ̀ ghelɨ isas i ndo nɨ̀ Benjamìn. ⁵Ghɨ n-fù tî ɨ ndù sɨ̂ ghelɨ isas i ndo nɨ̀ Kohàt ghɨli, ɨ fu ntèʼsɨ ìvɨm abàs nɨ̀ ghelɨ isas i ndo nɨ̀ Eflèm nɨ̀ Dân nɨ̀ àbâs isas i ndo nɨ̀ Mànasè a li-a.

⁶Ghɨ n-fu meyn kɨmɨ ntèʼsɨ njvàsɨ̀ tal sɨ̂ woyn Geshòn abàs isas i ndo nɨ̀ Isakà nɨ̀ Ashà nɨ̀ Naftalì nɨ̀ àbâs isas i ndo nɨ̀ Mànasè a Bashàn.

⁷Ghɨ n-boŋ meyn fu kɨmɨ ntèʼ sɨ lisɨ sɨ̂ ghelɨ isas i ndo nɨ̀ Melalì njvàsɨ̀ bò kɨ̀ ɨchfɨ ndo ɨchfɨ ndo abàs isas i ndo nɨ̀ Lubèn nɨ̀ Gâd nɨ̀ Zebulòn.

⁸Yi ti n-dyêyn na ghelɨ Isìlæ̀ nɨn læ fu ntèʼ nâ sèynsɨ̀ baʼsɨ̂ nɨ̀ ɨ̀twaʼ nyâmsɨ̀ sɨ̂ ghelɨ isas i ndo nɨ̀ Levì kɨ̀ ighel ta Bôbo Fɨyini nɨn læ bè toynɨ̂ a Mosìs.

⁹Ɨsêynsɨ̀ nɨn ghɨ ntèʼ sìsɨ̀ a ghɨ n-læ fsɨ sɨ̂ ghelɨ isas i ndo nɨ̀ Judà nɨ̀ ghelɨ isas i ndo nɨ̀ Simìyòn. ¹⁰Ghɨ n-fsɨ ntèʼsɨ ateyn ɨ fu sɨ̂ woyn Alòyn ɨchfɨ ɨ ndo nɨ̀ Kohàt isas i ndo nɨ̀ Levì bòm ta ghɨ n-læ tɨm bèyʼ yi dyèyn na ghɨ fu alêʼ a kɨ asɨ-a sɨ̂ àŋena.

¹¹Ghɨ n-fu Kiliyat Abà ma à ti Heblòn ilaʼ atû kfɨ̀yn a Judà baʼsɨ̂ nɨ̀ ɨ̀twaʼ nyâmsɨ̀ a ngùŋ àteyn. Abà nà n-ghɨ bò bò Anàk. ¹²Ghɨ n-læ se sɨ fu ntèʼ nâ sèynsɨ̀ sɨ̂ àŋena, ma ghɨ sɨ ghɨ ma ghɨ fu meyn gveynsɨ nɨ̀ mɨ̀ntèʼtɨ̂ mzɨ̀ a mɨ̀ nà n-ghɨ a mbæ̀sɨ̀ sɨ̂ Kalèb ɨ wâyn Jefunè.

¹³Yi ti n-dyêyn na ghɨ n-læ fu Heblòn ma à ti ntèʼ zɨ̀ a ghɨ nà n-bê na wùl ɨ̀ zue meyn wul, wù kâʼ a wù leʼ ɨ̀ ndù lèytɨ̀ ateyn sɨ̂ woyn Alòyn ɨ ngàŋ ndô Fɨyini, nɨ̀ Libnà ¹⁴nɨ̀ Jatì nɨ̀ Eshtemò, ¹⁵nɨ̀ Holòn nɨ̀ Debì, ¹⁶nɨ̀ Ayìn nɨ̀ Jutà nɨ̀ Bet Shemèsh baʼsɨ̂ nɨ̀ ɨtwaʼ nyâmsɨ̀ nɨ̀ àŋena. A nà n-chɨ̂yntɨ̀ ghɨ ntèʼsɨ bulamòʼ ta n-ghɨ fsɨ sɨ̂ àsas a ndosɨ nâ kèynà à bò.

¹⁷Ghɨ n-læ ndù ɨlwèʼ isas i ndo nɨ̀ Benjamìn ɨ fsɨ Gibìyòn nɨ̀ Gebà, ¹⁸nɨ̀ Anatòt nɨ̀ Almòn baʼsɨ̂ nɨ̀ ɨ̀twaʼ nyâmsɨ̀ ɨ fu sɨ̂ àŋena. À nà n-chɨ̂yntɨ̀ ghɨ ntèʼ sɨ̀ kæ̀.

¹⁹Ntèʼ sîsɨ̀ a ghɨ n-læ fu sɨ̂ ngàŋsɨ ndô Fɨyini, ma à ti woyn Alòyn nà n-chɨ̂yntɨ̀ ghɨ njvàsɨ̀ tal baʼsɨ̂ nɨ̀ ɨ̀twaʼ nyâmsɨ̀. ²⁰Achfɨ̂ a ndo nɨ̀ ghelɨ Kohàt kì a kɨ n-læ faŋ nɨn læ keli ntèʼsɨ alèʼ a kelɨ ghelɨ isas i ndo nɨ̀ Eflèm baʼsɨ̂ nɨ̀ ɨ̀twaʼ nyâmsɨ̀.

²¹Ntèʼsɨ ateynsɨ nà n-ghɨ Shekèm ilaʼ atû kfɨ̀yn a Eflèm, a ghɨ kɨmɨ ntèʼ ìlì ta ghɨ nà n-bê na wùl ɨ̀ zue meyn wul, wù kâʼ a wù leʼ ɨ̀ ndù lèytɨ̀ ateyn baʼsɨ̂ nɨ̀ Gezà, ²²nɨ̀ Kibzèm nɨ̀ Bet Holòn baʼsɨ̂ nɨ̀ ɨ̀twaʼ nyâmsɨ̀ nɨ̀ àŋena.

²³Ghɨ n-fu meyn kɨmɨ ntèʼsɨ sɨ̂ àŋena sɨ̀ kæ̀ nɨ̀ ɨ̀twaʼ nyâmsɨ̀ alèʼ a kelɨ ghelɨ isas i ndo nɨ̀ Dân. Ntèʼsɨ ateynsɨ nà n-ghɨ Eltekè nɨ̀ Gibetòn, ²⁴nɨ̀ Ayjalòn nɨ̀ Gat Limòn baʼsɨ̂ nɨ̀ ɨ̀twaʼ nyâmsɨ̀ nɨ̀ àŋena. Ntèʼsɨ ateynsɨ nà n-chɨ̂yntɨ̀ ghɨ sɨ̀ kæ̀.

²⁵Ghɨ n-fu meyn kɨmɨ ntèʼ sɨ lisɨ sɨ̀ bò a ghɨ Tanàk nɨ̀ Gat Limòn baʼsɨ̂ nɨ̀ ɨ̀twaʼ nyâmsɨ̀ abàs alèʼ nɨ̀ ghelɨ isas i ndo nɨ̀ Mànasè a li-a dzɨ a injɨyn i jvâ Jodàn.

²⁶Ghɨ n-chɨ̀yntɨ ntèʼ nâ sèynsɨ ìvɨm nɨ̀ ɨ̀twaʼ nyâmsɨ̀ ɨ fu sɨ̂ ghelɨ ɨchfɨ ndo nɨ̀ Kohàt ghì a ghɨ n-faŋ.

²⁷Ghɨ n-læ meyn boŋ fu ntèʼsɨ nɨ̀ ɨ̀twaʼ nyâmsɨ sɨ̂ àchfɨ̂ a ndo nɨ̀ ghelɨ Geshòn, a ghɨ kɨmɨ ìsas i ndo nɨ̀ Levì. Ghɨ n-fu ntèʼ sɨ̀ bò a kelɨ àbâs isas i ndo nɨ̀ Mànasè a li-a. À nà n-ghɨ ntèʼ Golàn abàs a Bashàn, a ghɨ kɨmɨ ntèʼ ìlì ta ghɨ nà n-bê na wùl ɨ̀ zue meyn wul, wù kâʼ a wù leʼ ndù lèytɨ̀ ateyn, nɨ̀ Be Eshtalà baʼsɨ̂ nɨ̀ ɨ̀twaʼ nyâmsɨ.

²⁸Ghɨ n-fu meyn kɨmɨ ntèʼ sɨ̀ kæ̀ sɨ̂ àŋena alèʼ isas i ndo nɨ̀ Isakà a ghɨ Kishìyòn nɨ̀ Dabelàt, ²⁹nɨ̀ Jamùt nɨ̀ En Ganìm, baʼsɨ̂ nɨ̀ ɨ̀twaʼ nyâmsɨ̀.

³⁰Ghɨ n-ndù alèʼ isas i ndo nɨ̀ Ashà ɨ fu kɨmɨ ntèʼ sɨ̀ kæ̀. Ntèʼ nâ sèynsɨ nà n-ghɨ Mishàl nɨ̀ Abdòn, ³¹nɨ̀ Helkàt baʼsɨ̂ nɨ̀ Lehòb.

³²À nà n-ghɨ alèʼ isas i ndo nɨ̀ Naftalì, ghɨ fu ntèʼ sɨ̀ tal sɨ̂ àŋena a ghɨ Kedèsh abàs ilaʼ i Galìlî a ghɨ kɨmɨ ntèʼ ìlì ta ghɨ nà n-bê na wùl ɨ̀ zue meyn wul wù kâʼ a wù leʼ ndù lèytɨ̀ ateyn, nɨ̀ Hamot Dô nɨ̀ Katàn baʼsɨ̂ nɨ̀ ɨ̀twaʼ nyâmsɨ̀.

³³Ntèʼ sîsɨ̀ a ghɨ n-fu sɨ̂ ghelɨ Geshòn nà n-chɨ̂yntɨ̀ ghɨ njvàsɨ̀ tal baʼsɨ̂ nɨ̀ ɨ̀twaʼ nyâmsɨ̀.

³⁴Ghɨ n-fu meyn kɨmɨ ɨ̀lwêʼ sɨ̂ abàs isas i ndo nɨ̀ Levì kì a kɨ n-fvɨ̀ ɨchfɨ ndo nɨ̀ Melalì, ɨ ndù alèʼ isas i ndo nɨ̀ Zebulòn, ɨ fu ntèʼ sɨ̀ kæ̀ a ghɨ Joknèm nɨ̀ Katà, ³⁵nɨ̀ Dimnà nɨ̀ Nahalàl baʼsɨ̂ nɨ̀ ɨ̀twaʼ nyâmsɨ̀.

³⁶À nà n-ghɨ alèʼ isas i ndo nɨ̀ Lubèn, ghɨ fu ntèʼ Bezà nɨ̀ Jahàz, ³⁷nɨ̀ Kedemòt nɨ̀ Mefàt sɨ̂ àŋena, baʼsɨ̂ nɨ̀ ɨ̀twaʼ nyâmsɨ̀. Ntèʼsɨ ateynsɨ nà n-chɨ̂yntɨ̀ ghɨ sɨ̀ kæ̀.

³⁸À nà n-ghɨ alèʼ isas i ndo nɨ̀ Gâd, ghɨ fu ntèʼ Lamòt a Gilèd, a ghɨ kɨmɨ ntèʼ ìlì ta ghɨ nà n-bê na wùl ɨ̀ zue meyn wul, wù kâʼ a wù leʼ ndù lèytɨ̀ ateyn nɨ̀ Màhanèm, ³⁹nɨ̀ Heshbòn nɨ̀ Jazà baʼsɨ̂ nɨ̀ ɨ̀twaʼ nyâmsɨ̀. À nà n-chɨ̂yntɨ̀ ghɨ ntèʼ sɨ̀ kæ̀.

⁴⁰Ntèʼ sîsɨ̀ a ghɨ n-fu sɨ̂ àbes isas i ndo nɨ̀ Levì ma à ti ɨchfɨ ndo nɨ̀ Melalì nà n-chɨ̂yntɨ̀ ghɨ njvàsɨ̀ bò.

⁴¹Ghelɨ isas i ndo nɨ̀ Levì nɨn læ chɨ̀yntɨ keli ntèʼsɨ mɨ̀vɨm ɨ̀n kæ̀ njvàsɨ̀ nfama nɨ̀ ɨ̀twaʼ nyâmsɨ̀. ⁴²Nô mɨ ntèʼ ì kà antêynɨ̀ ntèʼsɨ nâ ghàyn nà n-ghɨ ma ɨtwaʼ nyâmsɨ jɨŋ meyn kàli.

⁴³Yi ti n-dyêyn na Bôbo Fɨyini nɨn læ meyn fu ɨlwêʼ vzɨ̀ sɨ̂ ghelɨ Isìlæ̀ nô ɨ̀ jɨ̀m a wù n-læ chfɨ̀nɨ̀ sɨ̂ ghɨ̀bo àŋena, àŋena ɨ lì ɨ̀lwêʼ ateyn ɨ bàʼlɨ̀ ɨ nà chî ateyn. ⁴⁴Bôbo nɨ̀n nî meyn àŋena nà kelɨ mbôynɨ̀ kɨ̀ ɨlwèʼ ɨ̀ jɨ̀m ta àŋena nà n-ghɨ ateyn kɨ̀ ighel ta wu n-læ chfɨ̀nɨ̀ sɨ̂ ghɨ̀bo àŋena. Nô mbàynɨ̀ àŋena ìmòʼ nɨn bu læ to ghaʼ àŋena bòm ta Bôbo Fɨyini nɨ̀n gamtɨ meyn, àŋena tɨm yɨ mbàynɨ̀sɨ àŋena nô sɨ̀ jɨ̀m. ⁴⁵Bôbo Fɨyini nɨn nî meyn àwo kì a wu n-læ chfɨ̀nɨ sɨ̂ ghelɨ Isìlæ̀ nô à jɨ̀m. Wu n-bu læ faŋ nô ìwo ìmòʼ tɨ̀ nì.