Joshua 24

Ghelɨ Isìlæ̀ ɨ bètɨ̀ mɨ̀kâyn a Shekèm

¹Joshwà nɨ̀n yvɨŋtɨ meyn àsas a ndo nɨ̀ ghelɨ Isìlæ̀ nô à jɨ̀m a Shekèm. A nà ghɨ ta àŋena gvì yvɨ̀ŋtɨ̀, wu jàŋtɨ̀ chyeʼsɨ nɨ̀ ghelɨ ghɨ tisɨnɨ nɨ̀ ghelɨ ghɨ saʼnɨ nô ghɨ̀ jɨ̀m àŋena gvì ɨ timi asɨ a antayntayn a mɨ̂kàyn nɨ̀ Fɨyini fɨ.

²Ghelɨ ateyn nɨn gvi timi tî, Joshwà ɨ bè sɨ̂ àŋena nô ghɨ̀ jɨ̀m na, “Bôbo Fɨyini, ɨ Fɨyini fɨ ghelɨ Isìlæ̀ bè na, ‘À nà n-ghɨ ɨtuʼ ɨ wu asɨ, ghɨ̀bo bò ɨ ghi, baʼsɨ nɨ̀ Telà ɨ bò Abɨ̀làhâm ŋêyn Nahò ɨ chî injɨyn i jvâ Yuflèt, koʼsɨ̂ mɨyini ɨ mɨ̂nlù. ³Mɨtì ma lì ɨ fvɨ̀ nɨ̀ bò vzɨ Abɨ̀làhâm sɨ a injɨyn i jvâ Yuflèt nâ ghè, ɨ jèl ɨ toynɨ nɨ̀ ŋweyn a Kenàn, ɨ fu woyn sɨ̂ ŋweyn kɨ̀ sɨ a idvɨ̀. Mɨ n-læ fu yisàk sɨ̂ ŋweyn, ⁴ɨ fu Jàkôb ŋêyn Esò sɨ̂ Yisàk. Mɨ n-læ meyn fu ilaʼ zɨ̀ a yi nà n-ghɨ atû kfɨ̀yn ghɨ toŋtɨ na Seyì sɨ̂ Esò mɨtì Jàkôb ŋêyn woyn ŋweyn ɨ kàlì a Ijìb.’”

⁵“‘Àŋena nɨn læ kàli tî, ma læ tum Mosìs ŋêyn Alòyn, ɨ fi fu ngeʼ ì bemnɨ sɨ̂ ghelɨ Ijìb ɨ lì ɨ fvɨ̀ nɨ̀ zɨ̀ sɨ a ilaʼi afu. ⁶A nà n-ghɨ ta mà fvɨ̀sɨ ghɨ̀bo ghi sɨ a Ijìb, àŋena gvì ɨ chem a mbæ̀ jvà ì baŋnɨ, a ghɨ tì sugèyʼsɨ Ijìbsɨ̀ ɨ nyɨŋ a àŋena ibàm nɨ̀, ghɨli nyɨŋ atû mɨ̀nchaʼ mɨ̀ ìwòŋ, ghɨli nyɨŋ atû nyamsɨ kfaŋ, ɨ nyɨŋ gvi chem a mbæ̀ jvà ì baŋnɨ nâ ghè. ⁷Mɨtì àŋena dzɨ̀ sɨ̂ Bôbo Fɨyini na wù gamtɨ àŋena, wu nì mbàʼ ì fɨmnɨ ɨ fvɨ̀ antêynɨ̀ àntêynɨ̀ nɨ̀ àŋena nɨ̀ ghelɨ Ijìb nô mɨ ɨlvɨ gha ɨ nì jvà ì baŋnɨ ɨ gvì ɨ chɨytɨ ghelɨ Ijìb mɨtì ghɨ̀bo ghi dyàŋ, yi yeyn iwo zɨ̀ a mà nì sɨ̂ ghelɨ Ijìb. Yi n-læ gàyn tî, yi chi a nse iyum sɨ a ndyèyn ìdyà.’”

⁸“‘Mɨ n-læ meyn lì ɨ gvì nɨ̀ zɨ̀ ilaʼ nɨ̀ ghelɨ Amò injɨyn i jvâ Jodàn, àŋena nù zɨ̀ mɨtì ma nì yi tɨm yɨ àŋena, ma bebsɨ àŋena, ɨ fu ilaʼ i àŋena sɨ̂ zɨ̀. ⁹A nà ghɨ ta Balàk ɨ fòyn Mowàb ɨ wâyn Zibò bàʼtɨ sɨ nu zɨ, ɨ tum jàŋ Balàm ɨ wâyn Beyò na wù gvi lɨ̀ŋ zɨ. ¹⁰Mɨtì ma faŋ tɨ̀ bɨ̀mi na Balàm mom iwo nâ zɨ̀, ɨ kwo nì na wù boysɨ boysɨ zɨ, ɨ fi fvɨ̀sɨ̀ zɨ̀ sɨ a ŋweyn awu.

¹¹“‘Yi lù afu, ɨ dyàŋ jvâ Jodàn nô ghɨ̀ jɨ̀m ɨ gvì a Jèlikò. Ghelɨ Jèlikò ɨ nù zɨ̀ kɨ̀mɨ ta ghelɨ Amò nɨ̀ ghelɨ Belìz nɨ̀ ghelɨ Kenàn, nɨ̀ ghelɨ Hêt nɨ̀ ghelɨ Gilgàsh nɨ̀ ghelɨ Hîv baʼsɨ̂ nɨ̀ ghelɨ Jebùs mɨtì ma gàmtɨ̀ zɨ̀ yi tɨm yɨ àŋena. ¹²À nà n-ghɨ ta yi n-gvî, ma nì àŋena nà chɨŋtɨ̂ faynà, yi tɨm yɨ àŋena kɨ̀mɨ ta mɨ n-læ nì, yi tɨm yɨ tɨfôyn tɨ Amò tìtɨ̀ tɨ̀ bò. Yi n-bu læ tɨm yɨ àŋena nɨ̀ mɨ̀nyuè mzɨ̂ kèsa nɨ̀ àwoŋ à ki-a. ¹³Mɨ n-læ nì tî, ɨ fu ilaʼ sɨ̂ zɨ̀ bula yi fêl ìwo, nɨ̀ ntèʼsɨ afu bula à bâʼlɨ̀ zɨ̀, yi na sɨ chî ateyn, kfɨlɨ mɨ̀tam mɨ̀ gɨ̀lêbsɨ̀, lo mɨ̀tam mɨ̀ olìfsɨ̀ ɨnkàʼ bula yi n-læ yel.’

¹⁴“Yi ti n-dyêyn na, yi n-kelɨ sɨ nà fâyn Bôbo Fɨyini, koʼsɨ̂ ŋweyn kɨ̀ nô nɨ̀ mɨ̀tem mzɨ̂ ɨ̀n jɨ̀m. Yì maʼi mɨyini mzɨ̀ a ghɨ̀bo ghi nà n-koʼsɨ injɨyn i jvâ Yuflèt, nɨ̀ ɨmzɨ̂ Ijìb mzɨ̀, nà koʼsɨ̂ kɨ Bôbo Fɨyini. ¹⁵Mɨtì yi kæ sɨ nà kôŋ wì sɨ nà koʼsɨ Bôbo Fɨyini, yi choʼnɨ Fɨyini fifɨ̀ layn a yi n-kôŋ sɨ nà koʼsɨ, kèsa yi n-choʼnɨ̂ sɨ nà koʼsɨ̂ mɨyini mzɨ̀ a ghɨ̀bo ghi nà n-koʼsɨ a injɨyn i jvâ Yuflèt, ma ɨmzɨ̂ ghelɨ Amò ghì a yi n-chi a àŋena ilaʼ a. Mɨtì sɨ̂ mà, ghesɨ̀ ghelɨ ndo nɨ̀ mà, na koʼsɨ̂ kɨ Bôbo Fɨyini.”

¹⁶Ghelɨ Isìlæ̀ ɨ bèynsɨ̀ ɨ bè na, “Ghès kàʼ ghɨ bû mòm sɨ visi Bôbo Fɨyini sɨ nà koʼsɨ mɨyini ɨ mɨ̂nlù. ¹⁷A n-læ fvɨ̀sɨ kɨ nô Bôbo Fɨyini, ɨ Fɨyini feyfɨ ɨ fvɨ̀sɨ̀ ghès nɨ̀ ghɨ̀bo ghes sɨ a Ijìb ilaʼ afî a ghès nà n-felɨ̀ akôs ateyn, ɨ nì àwo ɨchfɨ̀ ɨ yumnɨ-a kɨ̀ nô a ghès asɨ. Wù n-toʼnɨ meyn nɨ̀ ìjêl ì yes i nô ì jɨ̀m, ɨ tòʼnɨ̀ nɨ̀ ghès a tɨ̂laʼ afî a ghès nà n-toynɨ ateyn. ¹⁸A nà n-ghɨ ta ghès nɨn gvî, Bôbo Fɨyini ɨ sàŋ ɨ fvɨ̀sɨ̀ tɨ̀laʼ nô tɨ̀ jɨ̀m baʼsɨ̂ nɨ̀ ghelɨ Amò ghì a ghɨ nà n-ghɨ ateyn. Bôbo Fɨyini nɨn ghɨ Fɨyini feyfɨ, ghès na boŋ koʼsɨ̂ kɨ ŋweyn.”

¹⁹Joshwà ɨ bè sɨ̂ ghelɨ ateyn na, “Yi na boynɨ̂ wì sɨ̂ zɨ̀ sɨ koʼsɨ Bôbo Fɨyini. Bôbo Fɨyini nɨn layna, kɨŋ na ghɨ na koʼsɨ̂ kɨ ŋweyn. Wù kàʼ wu bû lèsɨ̀ fù zɨ ɨlvɨ ta yì vìsi ŋweyn nà koʼsɨ̂ Mɨ̀yìnì ɨ̀n lì. ²⁰Yì kæ sɨ visi Bôbo Fɨyini, ma wù nî meyn àwo a juŋà sɨ̂ zɨ̀, nà koʼsɨ̂ mɨyini ɨ̀n lì, a wù beynlɨ ɨ̀ fù ngeʼ ì bemnɨ sɨ̂ zɨ̀.”

²¹Ghelɨ ateyn ɨ bè sɨ̂ Joshwà na, “Ɨ̀ngaŋ, ghès na koʼsɨ̂ Bôbo Fɨyini.”

²²Joshwà ɨ kæ bè na, “Yi n-ghɨ nchwò nsaʼ sɨ̂ ngêŋ sisɨ ta yì bè na yi choʼnɨ meyn sɨ nà koʼsɨ̂ Bôbo Fɨyini.”

Àŋena ɨ bɨmi ɨ bè na, “Ghès nɨn ghɨ nchwò nsaʼ.”

²³Joshwà ɨ kæ bè na, “Ta yì chòʼnɨ meyn lvɨ̂yn sɨ nà koʼsɨ Bôbo Fɨyini, yì maʼi læ̂ mɨyini mɨ̀ ɨ̀tum mzɨ̀ a yi n-kelɨ tî nà koʼsɨ̂ kɨ Bôbo Fɨyini, ɨ Fɨyini fɨ ghelɨ Isìlæ̀.”

²⁴Ghelɨ ateyn ɨ bè sɨ̂ Joshwà na, “Ghès na koʼsɨ̂ kɨ Bôbo Fɨyini, ɨ Fɨyini feyfɨ, yvɨnɨ̂ kɨ ŋweyn.”

²⁵A nà n-ghɨ achi nâ ghè, Joshwà ɨ timi ŋêyn ghelɨ Isìlæ̀, àŋena ɨ yɨ mɨkâyn ŋêyn Bôbo Fɨyini a Shekèm ɨ nyaʼ tɨ̀saʼ tìtɨ̀ a àŋena nɨn kelɨ sɨ nà chî ateyn. ²⁶Joshwà nɨ̀n læ nyaʼ awo nâ kèynà a ŋwàʼlɨ̀ tɨ̀saʼ nɨ̀ Fɨyini fɨ ɨ bè ghɨ bɨŋ ngòʼ ìghaʼnɨ ɨ tom isas i fɨ̂kàʼ fɨ ôk, a ngùŋ alèʼ a laynɨ-a nɨ̀ Bôbo Fɨyini.

²⁷Joshwà nɨ̀n bê meyn sɨ̂ ghelɨ nâ ghì nô ghɨ̀ jɨ̀m na, “Yì faytɨ ki ngòʼ yèyn. Ngòʼ àteyn yvɨ meyn nô mɨ ghà ta Bôbo bè sɨ̂ ghesɨ̀na nɨ̀ akî a yì chfɨ̀nɨ̀ sɨ̂ Bôbo Fɨyini. Ngòʼ àteyn na nì-à yi bêtɨ̀ na yi n-kelɨ wi sɨ to nɨ̀ àtu a sɨ̂ Fɨyini fɨ.”

²⁸À nà n-ghɨ ta Joshwà tàŋi mèsì, wu bè na ghelɨ ateyn kasi kfa sɨ a àŋena ɨlwèʼ.

Joshwà ɨ kfɨ

²⁹A nà ghɨ ta Joshwà ɨ wâyn Nûn ɨ wul ɨ̀ felɨnɨ nɨ̀ Bôbo Fɨyini nì mèsì awo nâ kèynà, wu kfɨ. Wù n-læ se sɨ kfɨ ma wù sɨ ghɨ bèŋ ɨvɨ nɨ̀ bèŋsɨ̀ ìvɨm, ³⁰ghɨ gvɨ̀mì ŋweyn a ŋweyn alèʼ a ntèʼ Timnat Selà ilaʼ atû kfɨ̀yn a Eflèm dzɨ abàs ikuè a kfɨ̂yn Gâsh.

³¹Ghelɨ Isìlæ̀ nà n-koʼsɨ̂ Bôbo Fɨyini ɨtuʼ nɨ̀ Joshwà, wu læ kfɨ àŋena nà bu koʼsɨ̂ kɨ koʼsɨ bòm ta chyeʼsɨ Isìlæ̀sɨ nà n-ghɨ ma ghɨ yeyn meyn àwo kì a Bôbo nì sɨ̂ ghelɨ Isìlæ̀ nô à jɨ̀m.

³²Ghelɨ Isìlæ̀ nɨ læ lì ɨvɨf ɨ Josèf vzɨ̀ a àŋena nɨn læ lì a Ijìb ɨ koʼ nɨ̀ ŋweyn tî, ɨ gvɨ̀mì a Shekèm alèʼ ghè a Jàkôb nɨn læ yuyn sɨ̂ woyn Hamò ɨ bò Shekèm sɨ a ɨbyeʼlɨ aso ɨkwo a fɨfâ ɨvɨ. Alêʼ nâ kì ɨ nà sɨ kelɨ woyn Josèf.

³³Elezà ɨ wâyn Alòyn ɨ boŋ kfɨ ghɨ gvɨ̀mì a Gibìyà, alèʼ ma ghɨ n-læ fu sɨ̂ wâyn ŋweyn ɨ Finehàs ilaʼ i Eflèm atû kfɨ̀yn.